Home  
Politics

పాల్వాయి శిశుపాలుడు ఎవరో?

      ముఖ్యమంత్రి కిరణ్ కుమార్ రెడ్డిపై తెలంగాణ నేత, రాజ్యసభ సభ్యుడు పాల్వాయి గోవర్ణన్ రెడ్డి మండిపడుతున్నారు. శిశుపాలుడు వంద తప్పులు చేసిన తరువాత శిక్ష అనుభవించాడు. కానీ ముఖ్యమంత్రి కిరణ్ కుమార్ రెడ్డి శిశుపాలునికంటే ఎక్కువ తప్పులే చేశారు. ముఖ్యమంత్రి పదవికి ఆయన రాజీనామా చేస్తే ఏంటి ? చేయకపోతే ఏంటి ? అధిష్టానం అనుకుంటే వెంటనే తప్పిస్తుంది. ఆయనను వెంటనే ముఖ్యమంత్రి పదవి నుండి, కాంగ్రెస్ పార్టీ నుండి తొలగించాలి. తెలంగాణ రాష్ట్రం ఇస్తామంటూనే అన్యాయం చేస్తామంటే ఊరుకునేది లేదు అని రాజ్యసభ సభ్యుడు పాల్వాయి గోవర్ణన్ రెడ్డి హెచ్చరించారు. కాంగ్రెస్ హై కమాండ్ కిరణ్ ను తీసే సాహసం చేయలేకపోతున్నదని పాల్వాయి 'కడుపు మంట'ని అంటున్నారు!

దేవుళ్ళకీ ప్రాంతీయ మసి!

    దేవుళ్ళకి కూడా ప్రాంతీయ మసిని పూయడానికి విభజనవాదులు ప్రయత్నిస్తున్నారు. విభజనవాదులకు హైదరాబాద్‌ని తేరగా ఇచ్చేయాలి.. గతంలో పరిపాలనా సౌలభ్యం కోసం ఖమ్మం జిల్లాలో కలిపిన భద్రాచలాన్ని కూడా ఇచ్చేయాలి. ఇదెక్కడి న్యాయం? 1956‌కి ముందు తెలంగాణ ఎలా వుండేదో ఆ తెలంగాణ కావాలని అంటున్నారు కదా, మరి 1956లో భద్రాచలం సీమాంధ్రలోనే వుంది కదా అని ఎవరైనా ప్రశ్నిస్తే విభజనవాదులు గయ్యిమని అంతెత్తున లేస్తున్నారు.   భద్రాచలంతో తెలంగాణ ప్రజలకు బోలెడంత అనుబంధం పెరిగిపోయిందట. అందుకే భద్రాచలం తెలంగాణలో వుండాలట. మరి సీమాంధ్రులకు కూడా హైదరాబాద్‌తో అనుబంధం పెరిగిపోయింది కాబట్టి హైదరాబాద్ మీద సీమాంధ్రులకు కూడా హక్కు కావాలంటే దానికిమాత్రం ఒప్పుకోం అంటున్నారు. అంటే ‘అనుబంధం’ అనే పదం మీద కేవలం తెలంగాణ వారికే కాపీరైట్ హక్కులున్నాయా? సీమాంధ్రులకు అనుబంధాలు వుండకూడదా? అసలు భద్రాచలం ఆలయాన్ని హైదరాబాద్ పాలకుల ఆదాయంతోనే కట్టించారు కాబట్టి భద్రాచలం మాదే అని విభజనవాదులు అంటున్నారు. అలాంటప్పుడు భద్రాచలం ఆలయం కట్టించిన సమయంలో సీమాంధ్ర ప్రాంతం కూడా హైదరాబాద్ నవాబుల పాలనలోనే వుండేది కదా.. మరి సీమాంధ్ర మీకు వద్దా అని ప్రశ్నిస్తే సమాధానం చెప్పేవాళ్ళెవరూ లేరు!  ఈమధ్య మరో కొత్త వాదన విభజన వాదుల నోళ్ళలోంచి ఊడిపడింది. సీమాంధ్ర ప్రాంతంలో అనేక ప్రధాన దేవాలయాలు వున్నాయి. మా తెలంగాణలో లేవు. అంచేత భద్రాచల రాముడినైనా మాకు వదిలిపెట్టండి అంటున్నారు. దేవుళ్ళు ఏ ప్రాంతంలో వున్నా అందరికీ దేవుళ్ళే. ఒకవేళ భద్రాచలం సీమాంధ్రకి వెళ్ళిపోతే తెలంగాణ వాళ్ళు రాముడిని చూడటానికి వెళ్ళరా? రాముడు అందరి వాడు..  ‘అందరి బంధువయా.. భద్రాచల రామయ్యా’  అని అందుకే అన్నారు. అందరి బంధువుని కొందరికే బంధువుని చేయాలనుకోవడం కరెక్ట్ కాదు. అయినా తెలంగాణలో పెద్ద దేవాలయాలు లేవని అనడం చాలా తప్పు. చాలా గొప్పగొప్ప క్షేత్రాలు తెలంగాణ ప్రాంతంలో వున్నాయి. ప్రాంతీయ భేదం లేకుండా అందరూ వాటిని సందర్శిస్తూనే వున్నారు. విభజనవాదులు మాత్రం ప్రతి అంశాన్నీ విభజనకు ముడిపెడుతూ రాజకీయాలు చేస్తున్నారు. చివరికి దేవుళ్ళకి కూడా ప్రాంతీయ మసిని పూస్తున్నారు.

కన్నావారి సొల్లు కబుర్లు

  మంత్రి కన్నా లక్ష్మినారాయణ తన రచ్చబండ కార్యక్రమాన్ని సైతం రద్దు చేసుకొని రెక్కలు కట్టుకొని మరీ సోనియమ్మ ముందు వాలి రహస్య మంతనాలు చేసివచ్చిన తరువాత, కిరణ్ కుర్చీలో ఆయనే కూర్చోబోతున్నడనే వార్తలు రావడంతో, అటువంటి వార్తలు వింటూ మనసులో ఆనందం పొంగిపోరలుతున్నపటికీ, పైకి మాత్రం అసలు సిసలయిన రాజకీయనాయకుడిగా చిరంజీవి కంటే బాగా నటించక తప్పలేదు.   అసలు అధిష్టానం తనను రమ్మని పిలువలేదని కానీ తానే సమైక్యాంధ్ర కోసం వెళ్లి సోనియమ్మని కలిసొచ్చానని, కానీ గిట్టని వారు తనకు ముఖ్యమంత్రి పదవి ఆఫర్ వచ్చిందని, అందుకు ప్రతిగా రాష్ట్ర విభజనకు సహకరించేందుకు అంగీకరించినట్లు ప్రచారం చేస్తున్నారని, కానీ తను అచ్చమయిన సమైక్యవాదినని, అచ్చు బొత్స సత్తి బాబు లాగానే ఆవేదన ఆయన కూడా ఆవేదన వ్యక్తం చేసారు.   అయితే రాష్ట్ర విభజన ప్రక్రియ దాదాపు పూర్తి కావస్తున్న ఈ తరుణంలో ఆయన రచ్చబండ మీద నుండి నేరుగా హనుమంతుడిలా డిల్లీకి లంగించి తల్లి సోనియా ముందు వాలి, రాష్ట్రాన్ని సమైక్యంగా ఉంచాలని కోరానని చెపుతున్నారు. అదే కొంచెం నమ్మ బుద్ది కావడం లేదు. అయితే ఆయన మిగిలిన వారిలా కాకుండా తాను ముఖ్యమంత్రి రేసులో లేనని చెప్పడం ద్వారా రేసులో తన ప్రాధమిక అర్హతను స్వయంగా నిర్దారించుకొనడంమెచ్చుకోవలసిందే.

సీఎం ఢిల్లీ పర్యటన 18కి వాయిదా

      ముఖ్యమంత్రి కిరణ్‌కుమార్ రెడ్డి ఢిల్లీ పర్యటన 18 తేదికి వాయిదా పడింది. షెడ్యూల్ ప్రకారం ఈ రోజు రాత్రి 8 గంటలకు జీవోఎం సభ్యులతో భేటీ అవ్వాల్సి ఉంది. ఆయన ఏ కారణం వల్లనో వాయిదా వేసుకున్నారు.దీనితో కేంద్ర మంత్రులు పద్దెనిమిదో తేదీన రావాలని సూచిస్తూ సమాచారం పంపారు. అందరి అబిప్రాయాలు తీసుకున్న తర్వాత చివరిగా కిరణ్ తో మాట్లాడాలని మంత్రుల బృందం భావిస్తున్నట్లు చెబుతున్నారు. మరోవైపు రాష్ట్ర వ్యవహారాల ఇన్‌చార్జి దిగ్విజయ్ సింగ్ ఈనెల 18 వరకు అందుబాటులో లేరు. దిగ్విజయ్ వచ్చాక సీఎం ఢిల్లీ పర్యటన కు వెళ్లనున్నారు.

కేంద్ర విన్నపాలు వినవలె ముఖ్యమంత్రిగారు

  రాష్ట్ర విభజనను పర్యవేక్షిస్తున్న కేంద్రమంత్రుల బృందం ముఖ్యమంత్రి కిరణ్ కుమార్ రెడ్డిని ఈ రోజు రాత్రి 8గంటలకు డిల్లీలో జరిగే సమావేశానికి రమ్మని పిలిచింది. కానీ రచ్చబండ కార్యక్రమం పెట్టుకొనందున డిల్లీ రాలేనని జవాబు చెప్పి తప్పించుకోవడంతో కాంగ్రెస్ అధిష్టానం కంగు తింది. ఇంతవరకు తన విభజన ఆలోచనని ధిక్కరిస్తున్నప్పటికీ, అది సజావుగా సాగేందుకు పరోక్షంగా సహకరిస్తున్నందున నేటికీ ఆయనను ‘గుడ్ బాయ్’ గానే పరిగణిస్తూ వచ్చిన కాంగ్రెస్ అధిష్టానం, ఆయన ఇప్పుడు తన ఆజ్ఞను కూడా ధిక్కరించడంతో అవాక్కయింది.   అయితే ఊహించినట్లే కాంగ్రెస్ అధిష్టానం తన పరువు కాపాడుకొనే ప్రయత్నంలో, ఈనెల 18న సీమాంధ్రకు చెందిన కేంద్రమంత్రులతో జీ.ఓ.యం. సమావేశమయిన తరువాతనే, ఆఖరిగా ముఖ్యమంత్రితో మాట్లాడాలని నిశ్చయించుకొన్నామని, అందుకే ఈరోజు ఆయనతో జరుగవలసిన సమావేశం వాయిదా వేశామని ప్రకటించింది. అందువల్ల మళ్ళీ ఈనెల 18న జరిగే సమావేశానికి ఆయనని డిల్లీ రమ్మని తాజాగా మరో ఆహ్వానం పంపింది. కనీసం ఆ విజ్ఞప్తినయినా ముఖ్యమంత్రి మన్నించి డిల్లీ వెళతారో లేక తేదీ ముందే తెలిసింది గనుక, ఆరోజు ఏ విశాఖ పర్యటనో పెట్టుకొని తప్పించుకొంటారో? చూడాలి.

‘ఇసి’గించొద్దు రాహుల్!

        మనిషికోమాట... గొడ్డుకోదెబ్బ అన్నారు. మరి రాహుల్ గాంధీ లాంటి రాజకీయ నాయకుడిని దారిలోకి తేవాలంటే ఏం చేయాలన్నది ఎవరైనా కొత్తగా కనిపెట్టాలి. చిన్నసార్ ఏ ముహూర్తంలో రాజకీయాల్లోకి ఎంటరయ్యాడోగానీ, సార్ ఎక్కడ ప్రచారం చేస్తే అక్కడ కాంగ్రెస్ పార్టీ మటాష్! తనమీద పడిన ఈ ముద్రని పోగొట్టుకోవాలని అనుకున్నాడో ఏంటోగానీ, ప్రస్తుతం ఎన్నికలు జరుగుతున్న రాష్ట్రాల్లో రాహుల్ తెగ పర్యటించేస్తున్నాడు. ఓటర్లని బుట్టలో వేయడానికి నోటికొచ్చింది మాట్లాడేస్తున్నాడు.   ఆమధ్య ఓ మీటింగ్‌లో ముజఫర్‌నగర్‌లో జరిగిన గొడవలను ప్రస్తావించి, ఆ గొడవలకి కారణం బీజేపీయేనని కాషాయం కలరింగ్ ఇచ్చే ప్రయత్నం చేశాడు. ఈ విషయం మీద బీజేపీ  భగ్గుమంది. రాహుల్ మీద చర్యలు తీసుకోవాలని ఎన్నికల సంఘానికి ఫిర్యాదు చేసింది. ఎన్నికల సంఘం రాహుల్‌ని వివరణ కోరితే, రాహుల్ తాను చాలా మంచి బాలుడినని, ఎన్నికల కమిషన్ నిబంధనలను ఎంతమాత్రం ఉల్లంఘించలేదని వివరణ ఇచ్చాడు. అయితే రాహుల్ గాంధీ ఇచ్చిన వివరణ ఎన్నికల కమిషన్‌కి ఎంతమాత్రం నచ్చలేదు. రాహుల్ వివరణ మీద ఇ.సి. తీవ్ర అసంతృప్తిని వ్యక్తం చేసింది. భవిష్యత్తులో బహిరంగసభల్లో మాట్లాడే సమయంలో నోరు, ఒళ్ళు దగ్గర పెట్టుకుని మాట్లాడితే మంచిదని వార్నింగ్ ఇచ్చింది. ఇప్పటికైనా రాహుల్ జనాన్ని తన మాటలతో ‘ఇసి’గించకుండా వుంటారని ఆశిద్దాం. ఇదిలావుంటే, రాహుల్ గాంధీ మీద బీజేపీ ఎన్నికల సంఘానికి ఫిర్యాదు చేసింది కాబట్టి, దానికి ప్రతీకారంగా కాంగ్రెస్ పార్టీ నరేంద్రమోడీ మీద ఎన్నికల సంఘానికి ఫిర్యాదుచేసింది. ఎన్నికల ప్రచార సభల్లో మోడీ కాంగ్రెస్ పార్టీ గుర్తు అయిన హస్తాన్ని ‘ఖూనీ పంజా’ అని విమర్శిస్తున్నారని, ఈ పాయింట్‌ని బేస్ చేసుకుని మోడీ మీద చర్యలు తీసుకోవాలని ఫిర్యాదులో పేర్కొంది. ఎన్నికల సంఘం యథావిధిగా ఈ విషయంలో నరేంద్ర మోడీ వివరణ ఇవ్వాలని ఆదేశించింది. దీనికి నరేంద్రమోడీ వివరణ ఎలా వుంటుందో వేచి చూడాలి. కానీ ఒక్కటి మాత్రం సందేహం లేకుండా చెప్పొచ్చు. అదేంటంటే, మోడీ ఇచ్చే వివరణ రాహుల్ ఇచ్చిన వివరణలా ఇ.సి. చేత అక్షింతలు వేయించుకునేలా మాత్రం వుండదు.

రెడ్డిగారి ఈ దూకుడు ఎందుకో

  టీ-కాంగ్రెస్ నేతల జైత్రయాత్రలో అకస్మాత్తుగా దూకిన జైపాల్ రెడ్డి మొన్ననిర్మల్ లో జరిగిన సభలో ‘సమన్యాయం అంటే అదేమయినా బ్రహ్మపదార్ధమా?’ అని ఒక మంచి ప్రశ్నవేసారు. నిజమే! అది ఎవరికీ అర్ధం కాని బ్రహ్మ పదార్ధమేమి కాదని, దాని భావమెంటో అందరికీ తెలుసునని ఆయనకి బాగా తెలుసును.   అయితే, మిగిలిన కేంద్ర మంత్రులకు తెలంగాణా రాష్ట్ర ఏర్పాటు గురించి బహిరంగంగా మాట్లాడేందుకు లేని అభ్యంతరం కేవలం తనకే ఉందని భావిస్తూ, ఇంతకాలం తెలంగాణాపై మాట్లాడానికి ఇష్టపడని ఆయన, పాపం టీ-కాంగ్రెస్ నేతలు సోనియమ్మ భజన చేసుకొని ముఖ్యమంత్రి సంపాదించుకోవాలనే ఆలోచనతో జైత్ర యాత్రలు చేసుకొంటుంటే, వారి మధ్యలో ఆయన సినిమా హీరోలా హటాత్తుగా ఎందుకు దూకారు? దూకి వారి కంటే బిగ్గరగా ‘సోనియమ్మ మనసు వెన్న, కానీ ఆమె సంకల్పం మాత్రం వజ్ర సంకల్పం’ అంటూ ఎందుకు భజన మొదలుపెట్టారు? భద్రాచలం మొదలు హైదరాబాదు వరకు, ఉద్యోగుల సమస్యల నుండి నదీ జలాల వరకు ప్రతీ అంశంపై అందరి కంటే పెద్ద గొంతుకు వేసుకొని ఎందుకు వాదిస్తున్నారు? ఆయనలో కలిగిన ఈ అకస్మాత్ మార్పుల వెనుక దాగిఉన్న బ్రహ్మ రహస్యం ఏమిటి? అని ఆయన వివరించితే బాగుంటుంది.   వీలయితే అవే సభల్లో తను ముఖ్యమంత్రి రేసులో లేనని ఒక చిన్న ప్రకటన చేసినట్లయితే, వేదిక మీద ఉన్న పోటీదారులకి అదో తుత్తి.

విభజనపై సుప్రీంను ఆశ్రయించిన ఎంపి

  తెలంగాణ ఏర్పాటు విషయంలో కేంద్రం వడివడిగా అడుగులు వేస్తున్న నేఫధ్యంలో కొందరునాయకులు న్యాయపోరాటానికి రెడీ అవుతున్నారు. విభజన ప్రక్రియను ఆపాలని కోరుతూ తెలుగుదేశం పార్టీకి చెందిన రాజ్యసభ సభ్యుడు సి.ఎం.రమేష్‌ బుధవారం సుప్రింకోర్టులో పిటీషన్‌ దాఖలు చేశారు. విభజన విషయంలో కాంగ్రెస్‌ పార్టీ ఏకపక్షంగా వ్యవహరిస్తున్న కారణంగా కోర్టును ఆశ్రయించాల్సి వచ్చిందని పిటిషన్‌లో తెలిపారు. కేంద్రంతో పాటు కాంగ్రెస్‌ పార్టీ విభజన ప్రక్రియను రాజకీయ కోణంలో చూస్తుందని పిటిషనర్‌ అయిన సి.ఎం. రమేష్‌ తెలిపారు. రాజ్యాంగ సవరణ ద్వారా 371(డి) ని తొలగించాలని సి.ఎం. రమేష్‌ సుప్రీంకోర్టును ఆశ్రయించారు. ఇదిలా వుండగా సీమాంధ్ర ఇంజనీరింగ్‌ కళాశాలల కన్వీనర్‌ చిరంజీవిరెడ్డి కూడా రాష్ట్ర విభజనను సవాల్‌ చేస్తూ బుధవారం సుప్రీంకోర్టులో మరో పిటిషన్‌ దాఖలు చేశారు.

మరోసారి సమ్మెకు సై

  కాంగ్రెస్‌ అధిష్టానం విభజన దిశగా వడివడిగా అడుగులు వేస్తుండటంతో ఏపిఎన్జీవోలు మరోసారి సమ్మెకు సిద్దపడుతున్నారు. యుపీఏ ప్రభుత్వం, సీడబ్ల్యుసి గత జులై 30న రాష్ట్ర విభజనకు అనుకూలంగా నిర్ణయం ప్రకటించిన నేపథ్యంలో సీమాంధ్ర ప్రాంతంలో సమ్మె సరైన్‌ మోగింది. దాదాపు అన్ని ప్రభుత్వ సంఘాలకు సమ్మెకు మదతునివ్వడంతో దాదాపు 72 రోజుల పాటు రాష్ట్రంలో పాలన స్తంభించింది. అయితే ప్రస్థుతం జరుగుతున్న పరిణామాల నేపథ్యంలోనే ఏపీ ఎన్జీవో నేత అశోక్‌ బాబు ఢిల్లీకి వెళ్లి రాష్ట్ర విభజనను అడ్డుకోవాలని జాతీయ పార్టీ నేతలను కలిసి విజ్ఞప్తి చేశారు. దీంతో పాటు మరో మారు సీమాంధ్ర ఉద్యోగులు సమ్మెకు సిద్దం కావాలని పిలుపునిచ్చారు.తెలంగాణ ఏర్పాటుకు సంభందించిన బిల్లు అసెంబ్లీకి వస్తే వెంటనే మరో మారు సమ్మెకు దిగుతామని హెచ్చరిస్తున్నారు ఏపిఎన్జీవోలు.

వైద్య విద్యార్థిపై హత్యాయత్నం

వైధ్యకళాశాలలో దారుణాలు ఇంకా కొనసాగుతూనే ఉన్నాయి. తాజాగా రాష్ట్రనికి చెందిన ఓ వైద్య విద్యార్థిపైన తోటి విద్యార్థులే పెట్రోలు పోసి నిప్పంటించిన సంఘటన చోటు చేసుకుంది. కర్నాటక రాష్ట్రంలోని కోలార్ వైద్య విశ్వవిద్యాలయంలో ఈ దారుణం జరిగింది. బాధితుడు వైద్య విద్యార్థి మహబూబ్ నగర్ జిల్లా కల్వకుర్తి గ్రామానికి చెందిన కామేష్ సాయిప్రసాద్. మంగళవారం రాత్రి కొందరు సహ విద్యార్థులు కామేష్‌ పై పెట్రోలు పోసి నిప్పంటించారు. తీవ్ర గాయాలు అయిన అతనిని దగ్గర్లోని సెయింట్ జార్జ్ ఆసుపత్రికి తరలించారు. అరవై శాతం గాయాలతో కామేష్ ఆసుపత్రిలో చికిత్స పొందుతున్నాడు. అతని పైన దాడి చేసింది మన రాష్ట్రానికి చెందినవారేనని అనుమానిస్తున్నారు. కామేష్ తల్లిదండ్రులు హైదరాబాదులో న్యాయవాదులుగా పని చేస్తున్నారు.

మరో ఘోరం

  మహబూబ్నగర్ జిల్లాలో వోల్వో బస్సు ప్రమాదం మరువక ముందే కర్ణాటకలో మరో బస్సు ప్రమాదం చోటు చేసుకుంది. బెంగళూరు నుంచి ముంబై వెళుతున్న నేషనల్ ట్రావెల్కు చెందిన వోల్వో బస్సు ఈ తెల్లవారుజామున 2.30 గంటల ప్రాంతంలో హవేలీ జిల్లాలోని కునిమల్లళ్లిలో మంటల్లో చిక్కుకుంది.ఈ దుర్ఘటనలో ఏడుగురు మరణించగా, చాలా మంది గాయపడ్డారు. గాయపడ్డవారిలో కొందరి పరిస్థితి విషయంగా ఉంది. బుధవారం సాయంత్రం బెంగళూరు నుంచి ముంబైకి ఈ బస్సు బయలుదేరింది. అయితే ప్రమాదానికి కారణం డ్రైవర్‌ నిర్లక్షంగా భావిస్తున్నారు. బస్సు డివైడర్‌ను డీకోని టైరుపేలటంతో మంటలు వ్యాపించాయన్నది ప్రాదమిక సమాచారం.ప్రమాద సమయంలో బస్సులో 49 మంది ప్రయాణికులున్నారు.

అఖ్కర్లేనిపక్షం!

      కేంద్రప్రభుత్వం మరోసారి ఏర్పాటు చేసిన అఖిలపక్ష సమావేశంలో ఏదో జరిగిపోతుందని ఎదురుచూసిన వారికి నిరాశే మిగిలింది. కేంద్ర మంత్రుల బృందం అఖిలపక్షం మొదటిరోజు ఒక్కో పార్టీతో పదేసి నిమిషాలపాటు మాట్లాడించింది. ఆ పార్టీలు కొత్తగా మాట్లాడిందేమీ లేదు.. వాటి ద్వారా కేంద్ర ప్రభుత్వం కొత్తగా తెలుసుకున్న విషయమూ ఏమీ లేదు. మొత్తమ్మీద చూస్తే ఈసారి అఖిలపక్షం ద్వారా ఒరిగిందేమీ లేదని రాజకీయ పరిశీలకులు అంటున్నారు.   ఈ అఖిలపక్షం ప్రస్తుతం వున్న పరిస్థితుల్లో అస్సలు అఖ్కర్లేని పక్షమని జోక్ చేస్తున్నారు. ఈ అఖ్కర్లేనిపక్షంలో అన్ని పార్టీలూ మరోసారి రాష్ట్ర విభజన మీద తమ విధానాన్ని చెప్పాయి. బీజేపీ పాత పాట పాడిన తర్వాత ఈ విషయంలో కాంగ్రెస్ తీరు చెప్పాలంటూ కొత్త పల్లవి అందుకుంది.  ఆ పల్లవి బీజేపీ నోట్లోంచి బయటకి  రాకముందే మంత్రుల కమిటీ బీజేపీ నోరు నొక్కేసింది. కొత్త విషయాలు చెప్పనివ్వకుండా, పాత విషయాలనే మళ్ళీ వినడానికే ఈ అఖిలపక్షం ఏర్పాటు చేసినట్టున్నారు. హైదరాబాద్ నుంచి పార్టీలన్నీ పడుతూ లేస్తూ ఢిల్లీకి వెళ్ళాయి. పార్లమెంటు మెయిన్ గేటు నుంచి సమావేశం జరిగిన చోటకి వెళ్ళడానికి ఎంతసేపు పట్టిందో కనీసం అంతసేపు కూడా మంత్రుల బృందంతో సమావేశం జరగలేదు. ఈమాత్రం భాగ్యానికి, ఈ హడావిడి మేళానికి పార్టీల సమయం వృధా చేయడం ఎందుకని విమర్శకులు అంటున్నారు. కాకపోతే ఈసారి నిర్వహించిన అఖ్కర్లేనిపక్షం రాష్ట్ర విభజన విషయంలో కేంద్ర ప్రభుత్వం ఎంత బుర్రలేకుండా ఆలోచిస్తోందన్న విషయాన్ని మరోసారి బయటపెట్టింది. కేంద్రప్రభుత్వ అజ్ఞానం బయటపడటం మినహా ఈ అఖ్కర్లేనిపక్షం పింగళించిందేమీ లేదు!

ఎక్కడయినా బావ కానీ... వంగతోట కాడ కాదు

  జగన్మోహన్ రెడ్డి రాష్ట్ర కాంగ్రెస్ నేతలలో మిగిలిన వారినందరినీ విడిచి పెట్టేసి, తనలాగే రాష్ట్రాన్ని సమైక్యంగా ఉంచేందుకు గట్టిగా కృషి చేస్తున్నముఖ్యమంత్రి కిరణ్ కుమార్ రెడ్డినే ఎందుకు టార్గెట్ చేసుకొంటున్నారు? రాష్ట్ర విభజనకు అనుకూలంగా ఇచ్చిన లేఖను వెనక్కు తీసుకొని, రాష్ట్రాన్నిసమైక్యంగా ఉంచేందుకు వచ్చితనతో చేతులు కలపమని తన బద్ధశత్రువయిన తెదేపాని కూడా కోరుతున్నపుడు, మరి తన సమైక్యబాటలోనే పయనిస్తున్నకిరణ్ కుమార్ రెడ్డితో మాత్రం జగన్మోహన్ రెడ్డి ఎందుకు కలిసి నడవడానికి ఇష్టపడటం లేదు?   వచ్చే ఎన్నికల తరువాత కాంగ్రెస్ నేతృత్వంలో యూపీయే ప్రభుత్వానికి మద్దతి ఇస్తామని చెపుతున్నపుడు, ‘సేమ్ టు సేమ్ డీ.యన్.ఏ.’ కలిగి ఉన్న రాష్ట్ర కాంగ్రెస్ ప్రభుత్వం అంటే జగన్ ఎందుకు మండిపడుతున్నట్లు? ఇటువంటి ధర్మ సందేహాలు ప్రజలకు చాలానే ఉన్నాయి. అయితే ఇవి సమాధానాలు దొరకని భేతాళ ప్రశ్నలు కావు.   పరుగు పందెంలోనయితేనేమి సమైక్య చాంపియన్ రేసులోనయితేనేమి ఎవరూ కూడా తమ పోటీదారులతో చేతులు కలిపి పరిగెత్తాలనుకోరు కదా? ఇదీ అంతే! అదీకాక అన్నివిధాల సమాన, మ్యాచింగ్ డీ.యన్.ఏ.కలిగి ఉన్నవాడిని ప్రోత్సహించడం అంటే మొదటి స్థానం కోసం కాక రెండో స్థానం కోసం పరుగెడుతున్నట్లే లెక్క.   ఒకవేళ కిరణ్ కుమార్ రెడ్డి కాంగ్రెస్ పార్టీకే అంటిపెట్టుకొని ఉంటే, ఎన్నికల సమయంలోనే కాక ఆ తరువాత కూడా రెండు కత్తులు ఒకటే ఒరలో ఇమడవన్నట్లు, ఆ ఇద్దరు రెడ్లు ఒకే పార్టీలో, ప్రభుత్వంలో ఇమడలేరు. అలాకాక కిరణ్ పార్టీ నుండి బయటపడి వేరే కుంపటి పెట్టుకొన్నప్పటికీ, ఆ పొగ, ఆ సెగ ఎన్నికలలో తనకి తగలక మానవు. ఎక్కడయినా బావ కానీ వంగ తోట కాడ మాత్రం కాదన్నట్లు తనకి అన్ని చోట్ల పోటీగా నిలుస్తున్న కిరణ్ కుమార్ అంటే అందుకే జగన్కి అంత ప్రత్యేకమయిన ఆ ఇది. కానీ కాంగ్రెస్ పార్టీలో మిగిలినవారినెవరినీ అతను తనతో సమానులుగా భావించడం లేదు గనుకనే వారు బ్రతికిపోయారు. లేకుంటే వారు కూడా పోయేవారే.   ఇక చంద్రబాబు రాజకీయ అనుభవమంతా వయసు కూడా లేని జగన్ ఆయనని లేఖ వెనక్కి తీసుకొని, వచ్చి తన వెనుక నడువమని చెప్పడం అతితెలివి, అహంకారమే తప్ప మరొకటి కాదు. తన దూకుడు వల్ల ఇప్పటికే అనేక తప్పుడు నిర్ణయాలు, ‘యూ టర్నులు’ తీసుకొని, చివరికి ఆ తెదేపాను చూసే తన తప్పుని గ్రహించి మళ్ళీ తెలంగాణాలో పార్టీని కాపాడుకోవాలని ప్రాకులాట మొదలుపెట్టిన అతను, తను వేసిన ఎత్తుకి చంద్రబాబు, అతని పార్టీ పడిపోతుందని భావించడం అవివేకమే.  

రాష్ట్ర విభజనకు సమైక్యవాది సలహాలా?

  కేంద్రమంత్రుల బృందం నిర్వహించిన అఖిలపక్ష సమావేశానికి రాష్ట్రం నుండి ఒక్క తెదేపా తప్ప మిగిలిన అన్ని పార్టీలు హాజరయ్యి తమ తమ అభిప్రాయాలు చెప్పివచ్చాయి. మిగిలిన పార్టీల సంగతెలా ఉన్నా, రాష్ట్ర విభజనను తీవ్రంగా వ్యతిరేఖిస్తున్న వైకాపా విభజనకోసం ఏర్పాటు చేసిన మంత్రుల బృందాన్ని వెళ్లి కలవడంలో అర్ధమేమిటని చంద్రబాబు ప్రశించారు. ఓట్లు సీట్ల కోసం పైకి సమైక్యాంధ్ర అంటూ, విభజన ప్రక్రియలో వైకాపా ఎందుకు పాలుపంచుకొంటోందని ఆయన ప్రశ్నించారు. ఇక ఒకపక్క కాంగ్రెస్ పార్టీలో విలీనం కామని చెపుతూనే, తెరాస అధ్యక్షుడు కేసీఆర్ నిన్న హోం మంత్రి షిండేతో రహస్యంగా సమావేశమయ్యి ఏమి మాట్లాడుకొన్నారని ప్రశ్నించారు. కాంగ్రెస్ పార్టీలో తెరాస ఎన్నికల ముందు విలీనం అయితే, వైకాపా ఎన్నికల తరువాత అవ్వాలని ముందే నిర్ణయం అయిపోయిందని ఆయన అన్నారు. రాష్ట్ర విభజనకు సిద్దపడుతున్న కాంగ్రెస్ తో తెరాస చేతులు కలపడంలో ఆశ్చర్యం లేదు. కానీ రాష్ట్రాన్ని సమైక్యంగా ఉంచాలని పోరాడుతున్నట్లు చెప్పుకొంటున్న వైకాపా కూడా చేతులు కలిపితే దాని అర్ధం వేరేలా ఉంటుంది.

రామయ్యా.. రావొద్దయ్యా!

      తండ్రి హరికృష్ణ, ఇతర సన్నిహితుల సూచనల మేరకు గత కొంతకాలంగా తెలుగుదేశం పార్టీకి జూనియర్ ఎన్టీఆర్ దూరంగా వుంటున్నాడు. తాను దూరమైపోతే తెలుగుదేశం పార్టీలో అల్లకల్లోలం జరిగి, చంద్రబాబు తనను బతిమాలుకుంటాడని జూనియర్ ఎన్టీఆర్ భావించాడు. అయితే బుడ్డోణ్ణి తెలుగుదేశం పార్టీలో ఎవరూ పట్టించుకోలేదు. నువ్వు పార్టీలో వుంటే ఎంత.. బయటకి పోతే ఎంత అన్నట్టుగా ఎలాంటి ప్రతిస్పందన లేకుండా ఉండిపోయారు. తనకు లభించిన రాంగ్ డైరెక్షన్ కారణంగా తెలుగుదేశం పార్టీకి అనవసరంగా దూరమయ్యానే అన్న ఆవేదన జూనియర్‌లో వుంది. మళ్ళీ తెలుగుదేశం పార్టీకి సన్నిహితం కావాలన్న ఆలోచన కూడా ఆయనలో వుంది. అయితే తెలుగుదేశం పార్టీ పిలిస్తేనే వెళ్ళాలన్న బెట్టు మెయింటెయిన్ చేస్తున్నాడు.   ఈమధ్యకాలంలో జూనియర్ ఎన్టీఆర్ వైఎస్సార్‌సీపీలో చేరబోతున్నట్టు రూమర్లు వచ్చాయి. ఈ రూమర్లను ఎవరు క్రియేట్ చేశారో తెలియదుగానీ, వీటి ప్రభావం తెలుగుదేశం పార్టీ మీద పడుతుందని జూనియర్ సన్నిహితులు భావించారు. వైఎస్సార్‌సీపీలో చేరితే జూనియర్ తమ నుంచి పూర్తిగా దూరమైపోతాడన్న ఆందోళన తెలుగుదేశం పార్టీలో పెరుగుతుందని, దాంతో  పార్టీ బుడ్డోడి దగ్గరకి దిగి వస్తుందని ఎదురుచూశారు. అయితే తెలుగుదేశం పార్టీ నుంచి ఎలాంటి సిగ్నలూ లభించలేదు.  జూనియర్ ఎన్టీఆర్ వైఎస్సార్‌సీపీకి వెళ్తాడేమోనన్న ఆందోళన తెలుగుదేశం పార్టీలో మచ్చుకు కూడా కనిపించలేదు. అయితే జూనియర్ ఎన్టీఆర్ తమ పార్టీలోకి వచ్చేస్తాడేమోనన్న ఆందోళన మాత్రం వైఎస్సార్‌సీపీ నాయకులలో కనిపిస్తోంది. ఇప్పటికే గందరగోళంగా వున్న వైసీపీ జూనియర్ ఎన్టీఆర్ రాకతో మరింత గందరగోళంలో పడే అవకాశం వుందని భయపడుతున్నారు. జూనియర్ ఎన్టీఆర్, ఆయన సహచరులు, సన్నిహితులు తమ పార్టీలోకి రావడం, ఆధిపత్యం కోసం పోరాడటం, కీలకమైన అసెంబ్లీ, పార్లమెంట్ నియోజకవర్గాల సీట్లకు టెండర్ పెట్టడం, వాటిని ఇవ్వకపోతే అలగడం.. ఈగోలంతా తమకు ఎందుకని అనుకుంటున్నారు. అందుకే జూనియర్ ఎన్టీఆర్ తమ పార్టీలోకి రాకుండా వుండటమే తమ పార్టీకి మంచిదని భావిస్తున్నారు. మనస్పూర్తిగా ‘రామయ్యా.. రావొద్దయ్యా’ అంటున్నారు.  

మళ్ళీ మళ్ళీ వెళ్ళాలి డిల్లీకి

  కిరణ్ కుమార్ రెడ్డి రాష్ట్రాన్ని ఏలుతున్నముఖ్యమంత్రే కావచ్చు. గానీ ఆయనదీ కాంగ్రెస్ డీ.యన్.ఏ. గనుక కాంగ్రెస్ ఆచార వ్యవహారాల ప్రకారం, రోజూ సచివాలయానికి వెళ్లినా వెళ్లకపోయినా వారానికొకమారయినా  డిల్లీ వెళ్ళడం మాత్రం అత్యవసరం. ఓసారి సోనియా మాడం పిలిస్తే రెక్కలు కట్టుకొని డిల్లీలో వాలవలసి ఉంటుంది. మరోసారి అందరూ కలిసి వార్ రూమ్ లో తలుపులేసుకొని వాదులాడుకోవడానికి వెళ్ళవలసి వస్తుంది. ఇంకోసారి తనని అభిమానించే దిగ్విజయ్ సింగ్ పిలిస్తే ఆయనను కాదనలేక వెళ్ళవలసి ఉంటుంది. ఏ లెక్కన చూసుకొన్నాకిరణ్ నెలకి ఓ ఐదారుసార్లు డిల్లీకి అలా వెళ్లి ఇలా వచ్చేస్తుంటారు.   ఇంతకు ముందు కూడా ఆయన చాలా సార్లు వెళ్లోచ్చిన్నపటికీ, అప్పటికి ఆయనకి ఇంత ఫాలోయింగ్ లేకపోవడంతో మీడియా కూడా ఏదో మొక్కుబడిగా రిపోర్ట్ చేసేది. కానీ ఆయన సమైక్య చాంపియన్ గా బ్యాడ్జీ తగిలించుకొన్నపటి నుండి మీడియాలో కూడా ఆయనకి మంచి ఫాలోయింగ్ వచ్చేసింది. ఇప్పుడు ఆయన తన ఇంట్లోంచి కాలు బయటపెట్టినా సెన్సేషనల్ న్యూసే, పెట్టకపోయినా అంతకంటే పెద్ద సెన్సేషనల్ న్యూసే. మరి అటువంటప్పుడు ఆయనని కేంద్రమంత్రుల బృందం రేపు డిల్లీ రమ్మని పిలిస్తే మరింకెంత సెన్సేషనో ప్రత్యేకంగా చెప్పనవసరం లేదు.   ఈరోజు మిగిలిన రెండు సమైక్య పార్టీలు సీపీఎం, వైకాపాలతో కూడా అఖిలపక్షం తంతు ముగించేసిన కేంద్రమంత్రుల బృందం, రేపు ముఖ్యమంత్రి కిరణ్ కుమార్ రెడ్డిని ఓసారి డిల్లీ వచ్చిపొమ్మని మెసేజ్ పెట్టింది. ఈయన చూస్తే విభజన వద్దంటాడు. వాళ్ళేమో విభజన ప్రక్రియ దాదాపు పూర్తి చేసేసి చేతులు కడుక్కొనే ముందు, తమకు ఇంత సౌలభ్యం కల్పించిన ఆయనకు ఓమారు థాంక్స్ చెప్పడం ధర్మమని భావించారో లేక ఆయనను సంప్రదించకుండా కుర్చీలోంచి లేచిపోతే రాజ్యంగా విరుద్దమని జనాలేమయినా ఫీలయిపోతారనో తెలియదు కానీ మొత్తం మీద ఆయనను ఓసారి మళ్ళీ డిల్లీకి రమ్మని పిలిచారు. రేపు రాత్రి మీటింగుట!

సీబీఐ చిలక పలుకులు

  బీసిసిఐ అధ్యక్షుడు శ్రీనివాసన్ అల్లుడు గురునాథ్ మేయప్పన్ ఐపీయల్ మ్యాచుల్లో స్పాట్ ఫిక్సింగ్, బెట్టింగ్ కేసుల్లో వెలగబెట్టిన నిర్వాకానికి ఆయన ఉద్యోగం ఊడినంత పనయింది. అయితే ఆయన కాంగ్రెస్ తో చాలా చక్కగా కనెక్ట్ అయ్యి ఉన్నాడు గనుక మళ్ళీ తన కుర్చీలో తను మళ్ళీ కూల్ గా సెటిల్ అయిపోగలిగాడు.   జనాలకి, మీడియాకే కాదు పోలీసులకి కూడా గజినీలా షార్ట్ మెమొరీ సమస్య ఉంది గనుక, మేయప్పన్ తో సహా అందరినీ ఎప్పుడో మరిచిపోయారు. మరి ఆ పాటిదానికి ఇంతోటి హంగామా, కష్టం ఎందుకనే ఆలోచన ఒక ప్రముఖ టీవీ ఛానల్ వారికి రావడంతో, లేడికి లేచిందే పరుగు అన్నట్లు సీబీఐ చిలుక అంటే ఆ సంస్థ డైరెక్టర్ రంజిత్ సిన్హా, రాహుల్ ద్రావిడ్ వంటి క్రికెట్ ఆటగాళ్ళని స్టూడియోలో కూర్చోబెట్టి అసలు ఈ తప్పులనే చట్టబద్దం చేసేస్తే ఎలాగుంటుంది? అని కెలికొదిలి పెట్టింది.   క్రికెట్ పై బెట్టింగ్ కి చట్టబద్దత కల్పిస్తే దేశానికి కూడా మేలు జరుగుతుందని రాహుల్ ద్రావిడ్ డిక్లేర్ చేసారు.   “నిజమే స్మీ! ఇలా చేస్తే మాకు కొంచెం పని తగ్గుతుందని” అనుకొందో మరేమో గానీ సీబీఐ చిలుక కూడా బెట్టింగ్ ని చట్టబద్దం చేయడంలో ఎటువంటి తప్పు లేదని ఒప్పేసుకొంది. తన చిలక పలుకులు ప్రజలకు మరింత బాగా విడమరిచి చెపితే బాగుంటుందనే సదాభిప్రాయంతో “మన దేశంలో అనేక రాష్ట్రాలలో నేటికీ లాటరీలకు చట్టబద్దత ఉంది. హాలీ డే రిసార్ట్ లో కాసీనోల పేరిట జూదమాడుకోవడానికి అభ్యంతరం లేదు. నల్లదనం ఉంటే ప్రకటించుకొనే సౌలభ్యం కూడా ఉంది. మరటువంటప్పుడు మరే ఇతర పరిశ్రమలకి తీసిపోని విధంగా రూ.66,000 కోట్ల టర్న్ ఓవర్ తో సాగుతున్న ఈ క్రికెట్ బెట్టింగ్ మీదనే ఎందుకు ఇన్ని ఆంక్షలు, అభ్యంతరాలు? అవి ఉన్నపటికీ బెట్టింగ్ కాయడాన్ని మనం ఆపలేకపోతున్నాము కదా? మరటువంటప్పుడు దానికి చట్టబద్దత కల్పిస్తే పోలా? అని సదరు చానల్ వారిని గట్టిగా నిలదీశారు.   ఆ చిలుక ప్రశ్నలకి సదరు చానెల్ వారి వద్ద సరయిన సమాధానం ఉన్న కార్డు ఒక్కటి కూడా లేదు.

తెలంగాణలో క్షణం కూడా ఉండలేం

  తెలంగాణ ఏర్పాటు విషయంలో కేంద్రం దూకుడు ప్రదర్శింస్తుంటే సీమాంద్ర కాంగ్రెస్‌ నాయకులకు ఏమి పాలుపోవడం లేదు. అందుకే రోజుకో రకంగా స్టేట్‌మెంట్స్‌ ఇస్తూ తమ నిరుత్సాహాన్ని ప్రకటిస్తున్నారు కాంగ్రెస్‌ నాయకులు. తాజాగా కాంగ్రెస్‌ పార్టీ సీనియర్‌ నాయకుడు జేసి దివాకర్‌ రెడ్డి ఆసక్తి కర వ్యాఖ్యలు చేశారు.   రాష్ట్రవిభజన జరిగితే తెలంగాణ ప్రాంతంలో సీమాంద్ర వాసులు ఒక్క క్షణం కూడా ఉండటం దండగ అని అన్నారు. మంగళవారం సిఎల్పీ కార్యాలయంలో పలువురు పార్టీ నాయకులతో పిచ్చాపాటిగా మాట్లాడిన ఆయన  ఈ వ్యాఖ్యలు చేశారు. రాష్ట్ర విభజన తరువాత ఇక్కడ ఉండటం కన్నా కొత్త రాజధానిలో గుడారాలు వేసుకొని పని చేసుకోవడం మంచిదన్నారు.   రాష్ట్ర విభజన అనంతరం తెలంగాణ ప్రాంతంలో ఒక్క క్షణం కూడా ఉండటం దండగ అని మాజీ మంత్రి, అనంతపురం జిల్లా సీనియర్ కాంగ్రెసు నాయకులు జెసి దివాకర్ రెడ్డి వ్యాఖ్యానించారు. మంగళవారం సిఎల్పీ కార్యాలయంలో జెసి, గాదె వెంకట రెడ్డి, యాదవ రెడ్డి తదితరులు పిచ్చాపాటిగా మాట్లాడుకున్నారు. ఈ సమయంలో రాష్ట్ర విభజన తర్వాత పదేళ్ల పాటు ఉమ్మడి రాజధాని అంశం చర్చకు వచ్చింది. దీనిపై జెసి మాట్లాడుతూ రాష్ట్ర విభజన తర్వాత కొత్త రాజధానిలో గుడారాలు వేసుకుని పని చేస్తామంటే ఎవరైనా వద్దంటారా? అని ప్రశ్నించారు. గుడారాల్లో పని చేస్తూనే రాజధాని నిర్మాణాన్ని కొనసాగించవచ్చని, ఇందుకు మహా అయితే ఐదేళ్లకు మించి సమయం అవసరం ఉండదన్నారు

రాష్ట్రపతికి బాబు లేఖ

  తెలంగాణ ఏర్పాటు విషయంలో కేంద్ర అనుసరిస్తున్నతీరుపై తెలుగుదేశం పార్టీ అధినేత చంద్రబాబునాయుడు తీవ్ర అసంతృప్తి వ్యక్తం చేశారు. రాష్ట్ర విభజన అంశంలో ఇరు ప్రాంతాల అభిప్రాయలకు కేంద్ర విలువ ఇచ్చేలా చూడాలని ఆయన రాష్ట్రపతి ప్రణబ్‌ముఖర్జీని కోరారు.   జీవొయం భేటికి రావాలని కేంద్రహొం శాఖకు రాసిన లేఖకు బదులుగా ఆయన ప్రణబ్‌ ముఖర్జీకి లేఖ రాశారు. ఇప్పటికే తెలుగుదేశం పార్టీ చేసిన సిఫార్సులను పట్టించుకోనందుకు నిరసనగా జీవోయం భేటిని బహిష్కరించారు.   రాష్ట్రపతికి రాసిన లేఖలో చంద్రబాబు ముఖ్యంగా మూడు విషయాలను ప్రస్తావించారు. రాష్ట్ర విభజన అంశంలో రాజ్యాంగ నియమాలు, గతంలో పాటించిన సంప్రదాయాలను గౌరవించాలి. ఇరు ప్రాంతాలకు చెందిన ఉద్యోగులు, విద్యార్థులు, రైతులకు సంబంధించిన జేఏసీలను పిలిచి సమస్యాత్మక అంశాలపై విపులంగా చర్చించాలి. ఇతర ప్రభావిత వర్గాల మనోగతాన్ని కూడా పరిగణనలోకి తీసుకొని అందరికీ ఆమోదయోగ్యమైన పరిష్కారాన్ని కనుగొన్న తర్వాతే ముందుకు వెళ్లాలి అని ఆయన రాష్ట్రపతిని కోరారు.