Home  
Politics

ఫుల్‌స్టాప్ పెట్టిన బాబు!

      క్రమశిక్షణకు మారుపేరుగా ప్రజల నుంచి ప్రశంసలు అందుకునే తెలుగుదేశం పార్టీలో ఇటీవల జరిగిన కొన్ని పరిణామాలు ఆశ్చర్యాన్ని కలిగించాయి. తెలంగాణ ప్రాంతానికి చెందిన సీనియర్ నాయకుడు, పార్టీ అధ్యక్షుడు చంద్రబాబుకు చేదోడు వాదోడుగా వుండే ఎర్రబెల్లి దయాకరరావు ఈమధ్యకాలంలో పార్టీ క్రమశిక్షణ గీతను దాటడం ఎవరూ ఊహించని పరిణామంగా అందరూ భావించారు.   తన సహచరులు, సీమాంధ్ర ప్రాంతానికి చెందిన నాయకులు పయ్యావుల కేశవ్, కోడెల శివప్రసాదరావు మీద ఎర్రబెల్లి ఘాటైన పదజాలంతో విరుచుకుపడటం పార్టీలో ఆందోళనకు కారణమైంది. ఏవైనా సమస్యలుంటే అంతర్గతంగా చర్చించుకుని పరిష్కరించుకునే తెలుగుదేశం పార్టీలో మీడియాకెక్కి విమర్శించుకునే కాంగ్రెస్ పార్టీ తరహా సంస్కృతి బయల్దేరడాన్ని ఎవరూ హర్షించలేకపోయారు. పార్టీకి విధేయుడిగా వుండే ఎర్రబెల్లి తన పొరపాటును దిద్దుకుంటారని అందరూ భావించారు. ఈ విషయంలో చంద్రబాబు జోక్యం చేసుకోకపోయినా పరిస్థితి సర్దుకున్న వాతావరణం ఏర్పడింది. అయితే తాజాగా ఎర్రబెల్లి మరోసారి టీడీపీ రాజ్యసభ సభ్యుడు సీఎం రమేష్ మీద ఘాటైన వ్యాఖ్యలతో విరుచుకుపడటం, ఇది వారిద్దరి మధ్య వాగ్వాదానికి దారి తీయడం, ఇద్దరూ వ్యక్తిగత విమర్శల వరకూ వెళ్ళడంతో ఈ అంశంలో చంద్రబాబు జోక్యం చేసుకోక తప్పని పరిస్థితి వచ్చింది. ఏదైనా సమస్య ఏర్పడితే దాన్ని పార్టీలో చర్చించి పరిష్కరించుకోవాలే తప్ప ఇలా మీడియాకెక్కి తిట్టుకోవడం భావ్యం కాదని చంద్రబాబు స్పష్టంగా చెప్పారు. పార్టీలో అంతర్గత క్రమశిక్షణా రాహిత్యం పెరిగిపోతోందన్న అభిప్రాయం ప్రజల్లో ఏర్పడుతున్న సమయంలో చంద్రబాబు రంగంలోకి దిగడం మంచి పరిణామమని రాజకీయ పరిశీలకులు భావిస్తున్నారు. పార్టీలో సీమాంధ్ర, తెలంగాణ నాయకుల మధ్య తలెత్తుతున్న విభేదాల విషయంలో చంద్రబాబు ఇంతవరకూ జోక్యం చేసుకోకపోవడం వల్లే నాయకులు కట్టు తప్పుతున్నారని, ఇప్పుడు చంద్రబాబు రంగంలోకి దిగడం వల్ల ఇలాంటి వివాదాలకు ఫుల్‌స్టాప్ పడే అవకాశం వుందని భావిస్తున్నారు. ఇకముందు ఎర్రబెల్లి మీడియాకెక్కి విమర్శలు చేసే అవకాశం వుండదని తెలుగుదేశం పార్టీలో భావిస్తున్నారు.

క్రికెట్ దేవుడు సచిన్ కు 'భారతరత్న'

      భారత క్రికెట్ దేవుడు మాస్టర్ బ్లాస్టర్ సచిన్ టెండూల్కర్ కు భారత అత్యున్నత పురస్కారం 'భారత రత్న' ను కేంద్ర ప్రభుత్వం ప్రకటించింది. 'భారత రత్న' కు ఎంపికైన తొలి క్రికెటర్ సచిన్ రమేష్ టెండూల్కర్. ఇరవై నాలుగు ఏళ్ళుగా భారత క్రికెట్ సచిన్ అందించిన సేవలకు గుర్తుగా కేంద్ర ప్రభుత్వం ఈ అవార్డ్ ప్రకటించింది.   భారత అత్యున్నత పౌర పురస్కారం 'భారత రత్న' ను ప్రకటించడం పట్ల సచిన్ టెండూల్కర్ ఆనందం వ్యక్తం చేశాడు. తనకు ఈ పురస్కారాన్ని ప్రకటించిన కేంద్ర ప్రభుత్వానికి ధన్యవాదాలు తెలిపారు. ఈ పురస్కారాన్ని తన తల్లికి అంకితం ఇస్తున్నానని ప్రకటించారు.

రచ్చబండ మీద నిలబడి అరిస్తే విభజన ఆగుతుందా

  రాష్ట్రాన్ని సమైక్యంగా ఉంచమని మా ముందు ఎంత గొంతు చించుకొని అరిస్తే మాత్రం ఏమి లాభం? అదేదో మీ అధిష్టానం ముందు అరిస్తే బాగుంటుంది కదా! అని ప్రజలు భావిస్తుంటే, ముఖ్యమంత్రి కిరణ్ కుమార్ రెడ్డి రచ్చ బండ మీద నిలబడి మన సమైక్యనినాదాలు ఢిల్లీకి విన్పించేలా గొంతెత్తి నినదించమని వారినే అడగడం విశేషం. తమ పార్టీ తీసుకొన్న నిర్ణయానికి తాను చింతిస్తున్నానని, అయితే ఈ నెల 18న జరుగనున్న కేంద్ర మంత్రుల బృందం సమావేశంలో పాల్గొని సమైక్యరాగం మరింత గట్టిగా ఆలపిస్తానని  ఆయన ప్రజలకి హామీ ఇచ్చారు.   నిజానికి సమైక్య ఉద్యమాలు జోరుగా సాగుతున్న సమయంలో ఆయన ప్రజల మధ్యకి వచ్చి ఉంటే, ముందుగా ఆయన రాజీనామా కోసం వారు పట్టుబట్టేవారేమో! ఒకవైపు డిల్లీలో రాష్ట్ర విభజన ప్రక్రియ చకచకా జరిగిపోతుంటే, మరో పక్క కేంద్రమంత్రుల బృందానికి అవసరమయిన నివేదికలు కూడా పంపుతూనే,మళ్ళీ ఇక్కడ రచ్చబండ మీద నిలబడి గొంతు చించుకోవడం దేనికి ప్రజలను మభ్యపెట్టడానికి కాకపోతే! తనను నిలదీయవలసిన ప్రజల చేతనే కిరణ్ కుమార్ రెడ్డి తనకు జై కొట్టించుకోవడం నిజంగా గొప్ప విషయమే.

ఇంతకీ జగన్ డిల్లీ వెళ్లి ఏమి సాధించినట్లో

  రాష్ట్రాన్ని సమైక్యంగా ఉంచేందుకు ఎంత దూరమయినా వెళ్లేందుకు సిద్దమంటున్నజగన్ బాబు ఈరోజు ప్రతిపక్ష పార్టీ నేతలను కలిసేందుకు డిల్లీకి వెళ్ళారు. అయితే ఆయన కలుస్తున్న పార్టీల్లో దాదాపు అన్నీ కూడా విభజనకు అనుకూలంగా నిర్ణయం తీసుకొన్నవేనని తెలిసి ఉన్నప్పటికీ, వాటిని కలిసి మద్దతు కూడగట్టుకోవాలను కోవడం ఆశ్చర్యం కలిగిస్తుంది.   మొదటి నుండి తెలంగాణా ఏర్పాటుని సమర్దిస్తున్నసీపీఐ పార్టీ నేతలనే జగన్ మొట్ట మొదట కలవడం కాకతాళీయమే కావచ్చు. గానీ, ఊహించినట్లే వారు తెలంగాణాపై తమ వైఖరి మార్చుకొనే ప్రసక్తే లేదని మొహం మీదనే చెప్పేశారు. అయితే సీమాంధ్రకు అన్యాయం జరుగకుండా తమ పార్టీ శ్రద్ద వహిస్తుందని అభయం ఇచ్చిసాగనంపారు.   ఇక తరువాత ఆయన కలువబోయే సీపీయం, రాష్ట్ర విభజనను వ్యతిరేఖిస్తున్నపటికీ ఇటీవల జరిగిన అఖిల పక్షసమావేశంలో విభజన అనివార్యమయితే ఏమి చేయాలో చెప్పడంతో ఆ పార్టీ కూడా విభజనకు అంగీకరించినట్లే అయింది. కానీ మున్ముందు జగన్ పార్టీతో ఎన్నికల పొత్తులు పెట్టుకోవాలని చూస్తున్న ఆ పార్టీ బహుశః అతనికి సానుకూలంగానే స్పందించవచ్చును. ఆ పార్టీ కూడా సీమాంద్రకు అన్యాయం జరుగకుండా చూస్తామని హామీ ఇచ్చి సాగానంపవచ్చును.   ఇక రేపు జగన్ కలువబోయే బీజేపీ మొదటి నుండి తెలంగాణాకు మద్దతు పలుకుతోంది. అయితే సీమాంధ్ర, తెలంగాణాలలో తన పార్టీ ప్రయోజనాలను, భావి అవసరాలను దృష్టిలో ఉంచుకొని, ఇటీవల తన వైఖరి మార్చుకొంటున్నట్లుగా సంకేతాలు ఇస్తోంది. రానున్న ఎన్నికల తరువాత కేంద్రంలో ప్రభుత్వం ఏర్పరచాలని కోరుకొంటోంది గనుక మున్ముందు జగన్ మద్దతు అవసరం ఉంటుంది గనుక, అతను తన మద్దతు గురించి కన్ఫర్మ్ చేస్తేనే సానుకూలంగా స్పందించవచ్చును.   ఇక బహుజన్ సమాజ్ వాది పార్టీ తన ఉత్తర ప్రదేశ్ రాష్ట్రాన్నేనాలుగు ముక్కలు చేయాలని డిమాండ్ చేస్తోంది. గనుక జగన్ కోరికను మన్నించడం కష్టం. కానీ, ములాయం సింగ్ నేతృత్వంలో సమాజ్ వాది పార్టీ చిన్న రాష్ట్రాల ఏర్పాటుని వ్యతిరేఖిస్తున్న కారణంగా జగన్ కి మద్దతు పలుకవచ్చును. కానీ కాంగ్రెస్ అధిష్టానం ములాయం కుటుంబ సభ్యులందరిపై తన సీబీఐ చిలుకలను ప్రయోగించి, వారినందరినీ తన అదుపులో ఉంచుకొంది. ఈ విషయాన్ని గతంలో స్వయంగా ములాయం సింగే చెప్పారు కూడా. అందువల్ల ములాయంకి మద్దతు ఈయలని ఉన్నపటికీ అతనికీ జగన్మోహన్ రెడ్డికీ మధ్య సీబీఐ అడ్డుగోడ ఉంది. గనుక దానిని దాటే సాహసం చేయకపోవచ్చును.   అంటే జగన్ కలిసిన పార్టీలలో ఏ ఒక్కటీ కూడా అతనికి బేషరతుగా మద్దతు ఇచ్చే ప్రసక్తి లేదని అర్ధం అవుతోంది.

వెల్‌కమ్ టు క్రిమినల్స్

      తలుపులు బార్లా తెరిచివున్న ఇంట్లోకి ఎవరు వెళ్ళారు? కుక్కలు, పిల్లలు, దొంగలు దూరేస్తారు. ఇప్పుడు వైఎస్సార్సీపీ పార్టీ పరిస్థితి కూడా ఇలాగే తయారైంది. వచ్చే ఎన్నికలలో ఇటు సీమాంధ్రలో, అటు తెలంగాణలో భారీ సంఖ్యలో సీట్లు సంపాదించేయాలని జగన్ భావిస్తున్నారు. దీనికి అనుగుణంగా డబ్బు భారీగా పెట్టగల వారికి ఎవరికైనా తన పార్టీలో స్థానం వుంటుందని సూచనలు ఇస్తున్నాడు. అలాంటి వారికి తన పార్టీలోకి ఆహ్వానం పలుకుతూ పార్టీ తలుపులు బార్లా తెరిచిపెట్టాడు. దాంతో పార్టీలోకి నేరచరితులు భారీగా వచ్చి చేరుతున్నారు.   ఏ దిక్కూ లేకుంటే అక్కమొగుడే దిక్కన్నట్టు ఏ పార్టీలోనూ స్థానం దొరకని నేరచరితులు ఇప్పుడు వైఎస్సార్సీపీ వైపు ఆశగా చూస్తున్నారు. మొన్నటి వరకూ జైల్లో ఆతిథ్యం తీసుకున్న మోపిదేవి వెంకటరమణ వైసీపీలో మహా దర్జాగా చేరిపోయారు. ఈమధ్యకాలంలో ఈ పార్టీలో చేరిన వాళ్ళలో నేరచరితులే ఎక్కువగా వున్నారని పరిశీలకులు చెబుతున్నారు. ఒకటో అరో కేసులు వున్నవాళ్ళతోపాటు భారీ క్రిమినల్ రికార్డులు వున్నవారు కూడా వైసీపీలో చేరడానికి ఆసక్తి చూపిస్తున్నారు. జైలు శిక్షలు పడ్డవాళ్ళు కూడా ఎలాంటి జంకూ గొంకూ లేకుండా ఈ పార్టీ వైపు అడుగులు వేస్తున్నారు. సాక్షాత్తు పార్టీ అధ్యక్షుడే పదహారు నెలలు జైలులో వుండొచ్చాడు కాబట్టి పార్టీలో చేరడానికి తమకు అభ్యంతరం చెప్పేవాళ్ళు లేరని సదరు జైలుపక్షులు భావిస్తున్నట్టున్నారు. అయితే ఈ ధోరణి వైసీపీలో వున్న ఒకటీ అరా ఉత్తములకు నచ్చడం లేదని తెలుస్తోంది. అయితే పార్టీలోకి నేరచరితుల ప్రవాహాన్ని ఆపే శక్తి తమకు లేకపోవడం వల్ల ఏమీ చేయలేక చేతులు ముడుచుకుని కూర్చుంటున్నట్టు తెలుస్తోంది. ఈ ధోరణి మంచిది కాదని జగన్‌కి చెప్పాలని ఒకరిద్దరు తాపత్రయ పడినా, మంచి సలహాలిచ్చేవారినే బయటకి నెట్టేసే జగన్ తత్వం తెలిసినవారు కావడంతో వెనకడుగు వేసినట్టు తెలుస్తోంది.

క్రికెట్ దేవుడికి ఇక శలవు

    క్రికెట్ ఆడని భారత్ ను ఊహించుకోవడం ఎంత కష్టమో, సచిన్ లేని క్రికెట్ ను ఊహించుకోవడం కూడా అంతకంటే చాలా కష్టం. క్రికెట్, సచిన్, దేవుడు మూడు కూడా మూడక్షరాల పదాలే కావడం సచిన్ క్రికెట్ దేవుడని చెప్పడానికే పుట్టాయని అనుకోవాలేమో.   క్రికెట్ దేవుడు సచిన్ టెండూల్కర్ వేల పరుగులు, ఇంకా అనేక అద్భుతాలను సృష్టించి, ప్రపంచ వ్యాప్తంగా ఉన్నకోట్లాది మంది అభిమానుల నుండి, తనకు ప్రాణంతో సమానమయిన క్రికెట్ నుండి ఇక శలవంటూ ఈ రోజు వీడ్కోలు తీసుకొన్నాడు.   నిన్నముంబై వాంఖేడ్ స్టేడియంలో వెస్ట్ ఇండీస్ తో జరిగిన మ్యాచులో తన 200వ టెస్ట్ మ్యాచు ఆడి మరో సరి కొత్త రికార్డు నెలకొల్పిన సచిన్, నిన్ననే 76 పరుగులు తీసి అవుటవడంతో సాంకేతికంగా అతని క్రికెట్ ఆట ముగిసినట్లే అయింది. కానీ, అభిమానుల, ఆటగాళ్ళ కోరిక మేరకు ఈ రోజు మ్యాచులో కూడా అతను రెండు ఓవర్లు బౌలింగ్ చేసాడు. వెస్ట్ ఇండీస్ జట్టుని ఓడించిన భారత్ జట్టు ఆ క్రికెట్ దేవుడికి సవినయంగా దక్షిణ సమర్పించుకొంది.   అనేక ఏళ్ళు ఉద్యోగం చేసి పదవీ విరమణ చేస్తున్న ఉద్యోగిలాగే, ఏకంగా 24సం.లు ఏకధాటిగా క్రికెట్ ఆడిన తరువాత రిటర్మెంట్ తీసుకొంటున్నసచిన్ కూడా మళ్ళీ తన జీవితంలో ఇక మైదానంలో అడుగుపెట్టేది లేదని గ్రహించినప్పుడు, చాలా ఉద్విగ్నతకు లోనయ్యి కన్నీళ్ళు పెట్టుకొన్నాడు.   తనకు ఇంత ఉన్నతమయిన జీవితాన్ని, పేరు ప్రతిష్టలని, గౌరవాన్ని, ఐశ్వర్యాన్ని ప్రసాదించిన ఆ మైదానానికి వంగి నమస్కరించి శలవు తీసుకొన్నాడు. అతనిని ఆటగాళ్ళు తమ భుజాలపై ఎక్కించుకొని మైదానం చుట్టూ తిప్పుతుంటే, అతనికి వీడ్కోలు పలకడానికి వచ్చిన వేలాది ప్రజలు అదోరకమయిన సందిగ్దావస్థలో భారమయిన హృదయాలతో అతనికి వీడ్కోలు పలికారు.   సచిన్ టెండూల్కర్ వారినందరినీ ఉద్దేశించి మాట్లాడుతూ, తనకు జన్మనిచ్చిన తల్లి తండ్రులే తనని క్రికెట్ వైపు మళ్లించి తనకీ గొప్ప జీవితాన్ని, అరుదయిన గౌరవాన్ని కల్పించారని అందుకు వారికి సదా రుణపడి ఉంటానని అన్నారు. తన ఆటకోసం, ఉన్నతి కోసం, తన వ్యక్తిగత ఆనందాలను, సంతోషాలను పణంగా పెట్టి సహకరించిన అర్ధాంగి అంజలికి అతను ప్రేక్షకుల సమక్షంలో కృతజ్ఞతలు తెల్పుకొన్నాడు. ఈ రెండున్నర దశాబ్దాలలో తనకు సహకరించిన క్రికెట్ ఆటగాళ్ళకు, అభిమానులకు, బోర్డు మెంబర్లకు, మీడియాకి అందరికీ పేరుపేరునా అతను కృతజ్ఞతలు తెలుపుకొంటున్నపుడు, అతనితో బాటు స్టేడియం లోపల బయట, టీవీల ముందు కూర్చొని వీక్షిస్తున్న లక్షలాది అభిమానులు కూడా తీవ్ర ఉద్విగ్నతకు లోనయ్యారు.   ఈ రోజుతో క్రికెట్ ప్రపంచంలో ఒక అధ్యాయం ముగిసి, చరిత్రగా మారింది. క్రికెట్ అనే పదానికి మారుపేరుగా మారిన సచిన్ ఇక ఆ క్రికెట్ లో ప్రత్యక్షంగా కనబడకపోవచ్చును. కానీ ఈ ప్రపంచంలో క్రికెట్ ఉన్నంత కాలం అతని పేరు తలచుకోకుండా బహుశః ఏ మ్యాచ్ కూడా పూర్తవదని కూడా ఖచ్చితంగా చెప్పవచ్చును.   తెలుగువన్ తరపున, అభిమానుల తరపున సచిన్ టెండూల్కర్ కి శుభాకాంక్షలు.

సమైక్య చాంపియన్స్ ట్రోఫీ సెమీ ఫైనల్స్ లో గెలుపెవరిది

  ఒక సమైక్య కృషీవలుడు రాష్ట్రాన్ని సమైక్యంగా ఉంచేందుకు తన ముఖ్యమంత్రి పదవిని కూడా త్యాగం చేయడానికి సిద్దమని ప్రకటిస్తుంటే, మరొకాయన ఉంగరం పడిపోయిన చోటనే వెతుకోవాలనట్లు డిల్లీలో వాలి కాంగ్రెసేతర పార్టీలను తనతో సమైక్యం కమ్మని కోరుతున్నాడు.   పదవులు త్యాగాలు చేసినంత మాత్రాన్నఫలితం ఉండదని అనుభవపూర్వకంగా చెపుతున్నకావూరి, చిరంజీవి, పల్లంరాజు, పురందేశ్వరి వంటి వారి మాటలను ఖాతరు చేయక 'త్యాగం.. త్యాగం' అంటూ చాంపియన్ నెంబర్:1 ఒకటే పలవరిస్తున్నపటికీ, మరో వైపు ‘ఆయన కాంగ్రెస్ అధిష్టానం గీసిన గీతను జవదాటే రకం’ కాదని డిల్లీ వాళ్ళే సర్టిఫై చేస్తున్ననేపద్యంలో ఆయన విశ్వసనీయతపై జనాలలో అనుమానాలు మొదలయ్యాయి.   ఇక ‘సమైక్యసెంటిమెంటుతో సీమాంధ్రలో మొత్తం యంపీ సీట్లు అన్నినొల్లెస్తా, రాష్ట్రంలోనే కాదు డిల్లీ లెవెల్లో కూడా గిరగిర చక్రం తిప్పేస్తా’ అంటూ భీషణ ప్రతిజ్ఞ చేసిన చాంపియన్ నెంబర్:2 జగన్ బాబు ఇప్పుడు ఆ పనిమీదనే నేడు డిల్లీలో వాలిపోయారు. అందువల్ల ఇంతకీ ఆయన చేస్తున్నది సమైక్యయాత్రనా లేక ఎన్నికల పొత్తుల యాత్రనా అనే అనుమానాలు జనాలకున్నాయి.   ఏమయినప్పటికీ ఈనెలాఖరులోగా ఫైనల్స్ జరుగబోతున్నాయని షిండే మహాశయులు డేట్ కూడా ప్రకటించేసారు గనుక, ఇప్పుడు జరుగుతున్నవి సమైక్య చాంపియన్ ట్రోఫీ కోసం జరుగుతున్న మ్యాచ్ లో సెమీ ఫైనల్స్ గా భావించవచ్చును. డిల్లీలో కూర్చొన్న థర్డ్ ఎంపైర్స్ ఇంతకీ ఈ మ్యాచ్ లో ఎవరిని చాంపియన్ గా ప్రకటిస్తారో తెలుసుకోవాలంటే మరి కొన్ని వారాలు వేచి చూడక తప్పదు.  

టీడీపీ నాయకులకు గాలం!

      రాష్ట్రాన్ని రెండు ముక్కలు చేసిన ఘనకార్యాన్ని విజయవంతంగా పూర్తిచేసిన టీఆర్ఎస్, కాంగ్రెస్, వైఎస్సార్సీపీ పార్టీలు ఇప్పుడు తమ దృష్టిని తెలుగుదేశం పార్టీ మీద కేంద్రీకరించాయి. రాష్ట్ర విభజన విషయంలో అడ్డగోలు వాదనలకు పోకుండా ఒక స్పష్టమైన విధానంలో వున్న తెలుగుదేశం పార్టీని తెలంగాణ ప్రాంతంలో పూర్తిగా దెబ్బతీసే ప్రయత్నాలను మూడు పార్టీలూ ముమ్మరంగా చేస్తున్నాయి. తెలుగుదేశం పార్టీ తెలంగాణ అనుకూల పార్టీ కాదంటూ గోబెల్స్ ప్రచారం చేసే పని ఎప్పటినుంచో అమలులో వుంది.     ఇప్పుడు తెలుగుదేశం పార్టీలోని తెలంగాణ నాయకులను తమ వైపు లాక్కునే ప్రాజెక్టును మూడు పార్టీలూ చేపట్టాయి. నోటి బలమే తప్ప ఓటుబలం లేని కడియం శ్రీహరి లాంటి నాయకులు ఇప్పటికే తెలుగుదేశం పార్టీకి దూరమై తెలుగుదేశం పార్టీ నెత్తిన పాలు పోశారు. ఇప్పుడు తెలుగుదేశం పార్టీలో బలంగా వున్న తెలంగాణ ప్రాంత నాయకుల మీద మూడు పార్టీల దృష్టి పడింది. టీడీపీలో ఈమధ్యకాలంలో వివాదాస్పద వ్యాఖ్యలతో రచ్చ చేస్తున్న ఎర్రబెల్లి దయాకరరావును లాక్కోవాలని కాంగ్రెస్ పార్టీ  తీవ్రంగా ప్రయత్నించింది. అయితే ఆ ప్రయత్నాలన్నీ బెడిసికొట్టాయి. రాజకీయాలు మానేసి వ్యవసాయం చేసుకుంటానే తప్ప తెలుగుదేశం పార్టీని విడిచిపెట్టేది లేదని ఎర్రబెల్లి స్పష్టం చేశారు. అయినా కాంగ్రెస్ పార్టీ ఎర్రబెల్లి కోసం గాలం వేసే వుంచింది. ఇప్పుడు మూడు పార్టీలూ రేవంత్‌రెడ్డితోపాటు పలువురు సీనియర్ తెలంగాణ నాయకులను తమ దారిలోకి తెచ్చుకోవాలని ప్రయత్నాలు చేస్తున్నాయి. తెలుగుదేశం పార్టీలోంచి మా పార్టీలోకి వస్తే మీకు ఉజ్వల భవిష్యత్తు వుంటుందంటూ ఆఫర్ల మీద ఆఫర్లు ఇస్తూ ప్రలోభాలకు గురిచేస్తున్నారు. అయినా వాళ్ళ పప్పులు ఉడకటం లేదు. హడావిడి చేసే కార్యకర్తలే తప్ప ఓట్లు పడే నాయకులు లేని టీఆర్ఎస్ పార్టీ.. తెలుగుదేశం నాయకులు, కార్యకర్తల మీద బోలెడంత ఆశలు పెట్టుకుంది. ఏ సీటు కావాలన్నా ఇస్తాం. ఏం కోరినా తీరుస్తాం అంటూ ఆఫర్లు ఇస్తోంది. ఇక తెలంగాణలో పూర్తిగా గల్లంతైపోయిన వైఎస్సార్సీపీ తన దింపుడుకళ్ళం ఆశలతో వుంది. తెలుగుదేశం పార్టీ నాయకులను తనవైపు లాక్కుని అయినా తెలంగాణలో ఉనికిని నిలుపుకోవాలని భావిస్తోంది. అయితే ఈ మూడు పార్టీల ఆశలు ఆవిరవడం తప్ప ప్రయోజనం వుండదని రాజకీయ విశ్లేషకులు భావిస్తున్నారు.  

రత్నప్రభ ఫైర్...జగన్ మైండ్ బ్లాంక్

      వైఎస్ జగన్ మోహన్ రెడ్డి పై సీనియర్ ఐఏఎస్ అధికారిణి కత్తి రత్నప్రభ నిప్పులు చెరిగారు. సీబీఐ కోర్టు ప్రాంగణంలో తీవ్ర స్వరంతో ఆమె విరుచుకుపడటంతో జగన్ ఒక్కసారిగా షాక్‌కు గురయ్యారు. రెండు రోజుల కిందట ఇందుటెక్ జోన్ కేసు విచారణ సందర్భంగా కోర్టుకు హాజరై వస్తున్న జగన్ కు ..అదే కేసులో నిందితురాలిగా ఉన్న రత్నప్రభ ఎదురుపడింది. అంతే.. జగన్‌ను చూడగానే ఆమె ఆగ్రహంతో ఊగిపోయారు. "వాట్ మిస్టర్ జగన్..? వాటీజ్ దిస్ నాన్సెన్స్..? మీరెవరో నాకు తెలియదు.. ఎప్పుడూ చూడనూ లేదు.. మీతో మాట్లాడిందీ లేదు. కానీ మీ వల్ల మేమందరం సమస్యల్లో పడిపోయాం.. ఈ గొడవలతో మాకేమీ సంబంధం లేదు.. మేం రూల్స్ ప్రకారమే నడుచుకున్నాం.మీ నాన్న ముఖ్యమంత్రిగా ఆదేశాలిస్తే.. వాటిని మేం పాటించాం. అయినా మాకెందుకీ సమస్యలు.. మీ కారణంగా మేమందరం కోర్టుల చుట్టూ తిరగాల్సి వస్తోంది. ఇలా మేమెందుకు తిరగాలి. ఇంతకాలం నిజాయతీగా బతికి ఇప్పుడు మీ వల్ల మేమంతా అభాసుపాలయ్యాం.. '' అంటూ జగన్‌పై రత్నప్రభ నిప్పులు చెరిగారు. వాస్తవానికి రత్నప్రభ గురించి జగన్‌కు కూడా పెద్దగా తెలియదు. విచారణకు హాజరై తిరిగి వస్తున్నప్పుడు ఎదురుపడి దుమ్ము దులిపేయడంతో ఆయన కాసేపు నిశ్చేష్టుడయ్యాడు.  

వైకాపా కొత్త పాయింటు

  ‘కీప్ సమ్ చేంజ్’ అంటే దానికి అర్ధం జనాలు రకరకాలుగా చెప్పుకోవచ్చు గాక. వాటిలో ఒకటి నిరంతరం కొత్త ఆలోచనలకి ప్రయత్నించమనే సందేశం కూడా ఇమిడి ఉంది. దానిని ఎవరు పట్టించుకొన్నా, కోకపోయినా వైకాపా మాత్రం బాగా వంట పట్టించుకొంది. అందుకే ఎప్పటి కప్పుడు సరి కొత్త ట్విస్టులు, యూ టర్నులు, వ్యూహాలతో దూసుకుపోతూ ఉంటుంది. ఈవిషయంలో ఏ ఇతర పార్టీ కూడా దానికి సరిసాటి కాదని ఒప్పుకోక తప్పదు. ఇక లేటెస్ట్ గా ఆ పార్టీ కనుగొన్నకొత్త సిద్దాంతం ఏమిటంటే తమ అధినేత జగన్మోహన్ రెడ్డిని రాజకీయంగా దెబ్బతీయడానికే కాంగ్రెస్ పార్టీ రాష్ట్ర విభజన చేస్తోందని! ఈ సంగతి కనిపెట్టడానికి కొంచెం ఆలస్యమయినా చాలా చక్కటి పాయింటుతో వచ్చామని ఆ పార్టీకి చెందిన మేకపాటి రాజమోహన్ రెడ్డి భావించారు. కానీ, తెదేపా కూడా సరిగ్గా ఇలాగే భావించడం యాదృచ్చికమేమో? అయితే అంత మాత్రాన్న ఈ రెండు పార్టీలు కుమ్మక్కు అయ్యే అవకాశమే లేదని గట్టిగా చెప్పవచ్చును.

సోనియా కడుపులో మంట!

      కడుపులో వున్న బాధ బాగా పెరిగిపోతే అది కడుపు మంటగా మారి బయటపడుతుంది. దానికి తాజా ఉదాహరణగా మనం కాంగ్రెస్ అధినేత్రి సోనియాగాంధీని తీసుకోవచ్చు. రాజకీయ ప్రసంగాలు చేయడంలో నరేంద్రమోడీకి, రాహుల్ గాంధీకి వున్న తేడాని దేశం మొత్తం గమనిస్తోంది. నరేంద్ర మోడీ ప్రసంగిస్తే జనం మంత్రముగ్ధుల్లా వింటున్నారు. అదే రాహుల్ గాంధీ నోరు విప్పితే జనం పెదవి విరుస్తున్నారు.   పసలేని, పనికిరాని ప్రసంగాలతో రాహుల్ గాంధీ అందరిచేతా అక్షింతలు వేయించుకుంటున్నాడు. అయిదు రాష్ట్రాల ఎన్నికల ప్రచారం సందర్భంగా రాహుల్ గాంధీ చేసిన ప్రసంగాలకు తీవ్ర వ్యతిరేకత వ్యక్తమయింది. ప్రసంగాల్లో మత ఘర్షణలు, ఇందిర, రాజీవ్ హత్యల్లాంటి విషయాలను ప్రస్తావించి అందరి చేతా తలంటి పోయించుకున్నాడు.  చివరకు ఎన్నికల కమిషన్ కూడా రాహుల్ గాంధీని నోరు దగ్గర పెట్టుకుని మాట్లాడాలని హెచ్చరించింది. తన కడుపున పుట్టిన రాహుల్ గాంధీ సరైన రీతిలో ప్రసంగాలు చేయలేక భంగపడుతూ వుండటం చూసి ఆయనగారి మాతృమూర్తి సోనియాగాంధీ ఎంతో బాధపడుతోంది. అయినా సోనియాగాంధీకే సరిగా ప్రసంగాలు చేయడం రాదు.. మరి రాహుల్‌కి ఎలా వస్తుంది? అందుకే, తన కొడుకు ప్రసంగాలు బాగా చేయలేడుగానీ, దేశాన్ని అభివృద్ధిలోకి తీసుకెళ్ళగడని ఆమె తల్లి హృదయం నమ్మేస్తోంది. మరోవైపు రాహుల్ గాంధీ కంటే నరేంద్రమోడీ బాగా ప్రసంగిస్తూ జనాన్ని ఆకట్టుకుంటూ వుండటం ఆమె కడుపులో బాధని కలిగిస్తోంది. ఆ బాధ కడుపు మంటగా మారి బయటపడింది. మధ్యప్రదేశ్‌లో ఎన్నికల ప్రచార సభలో మాట్లాడిన సోనియాగాంధీ నరేంద్రమోడీ మీద విమర్శనాస్త్రాలు సంధించారు. ‘‘ప్రసంగాలతో దేశ సమస్యలను పరిష్కరించలేం.. అభివృద్ధి సాధించలేం’’ అని తన కడుపుమంటని బయటపెట్టుకున్నారు. రాహుల్ గాంధీ కంటే నరేంద్రమోడీ బాగా ప్రసంగిస్తున్నారన్న విషయాన్ని పరోక్షంగా ఒప్పుకున్నారు. నరేంద్రమోడీ కంటే రాహుల్ బాగా మాట్లాలేకపోతున్నాడని ఏడవటం కంటే, రాహుల్‌ని నరేంద్రమోడీ ప్రసంగాలు విని ఎలా మాట్లాడాలో నేర్చుకోమని చెప్పొచ్చు కదా సోనియా మేడమ్!  

టిడిపిలో ఎర్రబెల్లి వర్సెస్ సీఎం రమేష్

      తెలుగుదేశం పార్టీలో చిచ్చురేగుతున్నట్లుగా కనిపిస్తోంది. నాలుగు రోజుల క్రితం పయ్యావుల కేశవ్ మీద ఆగ్రహం వ్యక్తం చేసిన ఎర్రబెల్లి దయాకర్ రావు తాజా రాజ్యసభ సభ్యుడు సీఎం రమేష్ మీద ఆగ్రహం వ్యక్తం చేశారు. పార్టీలో తాము ఉండాలో లేదా రమేష్ ఉండాలో తేల్చుకుంటామని ఆయన అన్నారు.   సీఎం రమేష్ లాంటి దళారులు, వ్యాపార వేత్తల మూలంగానే రాష్ట్రంలో తెలుగుదేశం పార్టీ ప్రతిష్ట దిగజారుతుందని, కనీసం వార్డు మెంబరుగా కూడా గెలవలేని రమేష్ ను పార్టీ ఎంపీగా పంపడం నష్టం చేస్తోందని ఎర్రబెల్లి అన్నారు. సీఎం రమేష్ ఓ బ్రోకర్, మోసగాడు అని, ఆయనను మీద వెంటనే చర్యలు తీసుకోవాలని అన్నారు. చంద్రబాబు విభజన లేఖకు కట్టుబడి ఉన్నారని అంటూనే దయాకరరావు ఈ డిమాండ్ చేయడం విశేషం.

సొంత పార్టీకి కిరణ్ ప్రచారం..!

    అందరూ ఊహించినట్టే రచ్చబండను తన ఇమేజ్ పెంచుకోవడానికి సీఎం ఉపయోగించుకోవడం ప్రారంభించేశారు. భవిష్యత్తులో తాను కాంగ్రెస్ నుంచి విడిపోయి సొంత పార్టీ పెడితే సీమాంధ్ర ప్రజలు తనకు పూర్తి మద్దతు ఇచ్చేలా ఇప్పటి నుంచే గ్రౌండ్ ప్రిపేర్ చేసుకుంటున్నారు.విశాఖ జిల్లా చోడవరంలో జరిగిన రచ్చబండ కార్యక్రమంలో స్థానికుల సమస్యల పరిష్కారం కంటే సమైక్యాంధ్ర నినాదాన్నే ప్రధానంగా ముందుకు తీసుకొచ్చారు.   రాష్ట్రం విడిపోవడం తనకు ఎంతమాత్రం ఇష్టం లేదని, చివరి వరకు రాష్ట్రం ముక్కలు కాకుండా కాపాడతానని ప్రసంగించారు. రాష్ట్రం విడిపోతే వచ్చే నష్టాలను ఏకరువు పెట్టారు. సీఎం ఇలా మాట్లాడుతూ వుంటే సీమాంధ్రుల మనసులు ఒకసారి కాకపోతే ఒకసారైనా కరగకుండా వుంటాయా అని ఆయన అనుకూల వర్గాలు ఆశాభావంతో వున్నాయి. రచ్చబండలో సమైక్య నినాదాన్ని చాటడంతోపాటు స్థానికులకు బోలెడన్ని వరాలు కూడా సీఎం ప్రకటించారు. వందల కోట్ల రూపాయల అభివృద్ధి పనులకు వాగ్దానాలు చేశారు. ఈసారి రచ్చబండలో భాగంగా సీఎం కిరణ్ మొత్తం నాలుగు సీమాంధ్ర జిల్లాల్లో పర్యటించనున్నారు. ఈ పర్యటనలో ఈ నాలుగు జిల్లాలనూ తన ‘గ్రిప్’లోకి తెచ్చుకోవాలని కిరణ్ కృతనిశ్చయంతో ఉన్నట్టు తెలుస్తోంది.  

ధర్మ సందేహాలు ఎన్నో

  జగన్ బాధితులలో ధర్మాన ప్రసాదరావు కూడా ఒకరు. కానీ చావు తప్పి కన్నులొట్టపోయినట్లు ఇంకా జైలు గడప తొక్క కుండా ఎలాగో మేనేజ్ చేసుకొంటూ, ఆ జగన్ బాబుతోనే కలిసి రోజూ కోర్టుల చుట్టూ ప్రదక్షిణాలు చేసుకొంటున్నారు. ఆ క్రమంలో వారిద్దరూ ఒకరికొకరు ఎట్రాక్ట్ అవుతునట్లు సమాచారం. ఇంతవరకు కిరణ్ రెడ్డి ఎప్పటికయినా కొత్త పార్టీ పెట్టకపోతాడా అందులో తను చేరకపోతానా? అని త్రిశంకులో ఊగిసలాడుతున్న ధర్మాన, ఈ ఎట్రాక్షన్లో పడి, తనకీ పరిస్థితి కల్పించిన బాబు ఆ బాబేనన్న సంగతి కూడా మరిచిపోయి, ‘పోనీ వైకాపాకి కమిట్ అయిపోదామా?’ అని ఆలోచనలో పడినట్లు తెలుస్తోంది.   కానీ రామేశ్వరం వెళ్ళినా శనీశ్వరం పోలేదన్నట్లు, సీబీఐ ఇచ్చిన మెడల్స్ వల్ల తనకి టికెట్ రాని కాంగ్రెస్ నుండి, సీబీఐతో అనుబందం పెనవేసుకొన్న కాంగ్రెస్ లోకి జంప్ చేస్తే, రేపు కేసులు ఓ కొలిక్కి వస్తున్నపుడు మళ్ళీ అదే బాబుకి వ్యతిరేఖంగా మాట్లాడవలసి వస్తే? అనే ధర్మసందేహం కూడా ధర్మయ్యని పట్టి వెనక్కి లాగుతోంది.   అంతే గాక తనకంటే ముందే ఆ పార్టీలో సెటిల్ అయిపోయిన బ్రదర్ కృష్ణ దాసు తనకోసం తలుపులు తీసేందుకు బొత్తిగా ఒప్పుకోవడం లేదట. ఇదివరకు అతనిపై మరో బ్రదర్ రామదాసుని ఎన్నికలలో పోటీకి నిలబెట్టడమే అందుకు కారణమని సమాచారం. అయితే ఏ బ్రదర్ ఒప్పుకోకపోయినా బిగ్ బ్రదర్ ఒప్పుకొంటే అన్ని తలుపులు వాటంతటవే తెరుచుకొంటాయని జగమెరిగిన సత్యం.   అయితే కండువా ఏదయినప్పటికీ ఈసారి నేరుగా లోక్ సభకే వెళ్ళిపోవాలని ధర్మాన డిసైడ్ అయిపోయినట్లు సమాచారం. అలాగయితే, ఆ రేంజిలో జిల్లాలో పోటీపడవలసిన వారు ఇద్దరు ఉన్నారు. తండ్రి మరణంతో అతని స్థానంలోకి వచ్చిన ఎర్రం నాయుడు కుమారుడు రామ్మోహన్ నాయుడు. కాంగ్రెస్ డీ.యన్.యే. కలిగి ఉన్నకిల్లి రాణిగారు.   రామ్మోహన్ నాయుడు తన ముందు కాకి పిల్లే అనుకొన్నా, అతనికి సానుభూతి ఓటు, జిల్లాలో అతని తండ్రికి ఉన్నమంచి పేరు ప్లస్ పాయింట్స్. ఇక కిల్లి రాణీ గారి గురించి చెప్పేదేముంది? తన పట్టు చీర కొంగుతో రాష్ట్రాన్ని గట్టిగా ముడేసి కలిపి ఉంచుదామనుకొన్నపటికీ ఆ పాడు బీజేపీ, తెదేపాలు ‘యు టర్నులు’ తీసుకొంటున్నాయని ఆవేదన చెందని రోజు లేదు. ఇక ఎలాగు విడిపోయే రాష్ట్రం కోసం రాకరాక వచ్చిన తన కేంద్ర మంత్రి రాజీనామా చేసి ఉపయోగమేమిటని నిలదీస్తుంటారు కూడా. కానీ ఈసారి కూడా తనకే ఓటేసి గెలిపించేస్తే డిల్లీలో తనకున్న పలుకుబడినంతా ఉపయోగించేసి శ్రీకాకుళానికి ఒక మంచి ప్యాకేజి తెస్తానని హామీ ఇస్తున్నారు.   కానీ మళ్ళీ అంతలోనే ధర్మనకి మరో ధర్మసందేహం కలిగింది. అదే, ఏ కండువా కప్పుకొన్నపటికీ జనాలు గుర్తు పట్టకుండా ఉంటారా? అని. మరి ఈ పద్దులు, సందేహాలు అన్నీ సరి చూసుకొన్న తరువాతనే ఏ కండువా కప్పుకోవాలో, ఏ సీటులో కూర్చొంటే ఐదేళ్ళు కడుపులో చల్ల కదలకుండా హాయిగా కూర్చోవచ్చో ఫైనల్ చేసుకోవడం ధర్మానకి ధర్మంగా ఉంటుంది.

సోనియమ్మ వరమిచ్చినా ...సీబీఐ అడ్డుపడినట్లు

  ఆరు నెలలు సహవాసం చేస్తే వారు వీరవుతారన్నట్లుగా, చంచల్ గూడా జైలులో జగన్ తో ఏకంగా పదహారు నెలలు సహవాసం చేయడంతో మోపిదేవి అ జగన్ పంచనే జేరుతున్నారు. ఇక జగన్ పుణ్యమా అని సీబీఐ చార్జ్ షీట్లో పేర్లు నమోదు చేయించుకొన్నపాపానికి పాపం! సబిత, ధర్మాన అన్యాయంగా తమ పదవులు ఊడగొట్టుకొని తమ పరిస్థితేమిటో తమకే తెలియక తలలు పట్టుకొని కూర్చొన్నారు. తెలంగాణాలో కాంగ్రెస్ నేతలకి కొంత ‘హ్యాండ్ సప్పోర్ట్’ బాగానే ఉన్నపటికీ, సీమాంధ్రలో అది బొత్తిగా కరువవడంతో పాపం చాలా ఇబ్బందులు పడుతున్నారు వెర్రి నాగాన్నలు.   అయితే ఈ సీబీఐ చార్జ్ షీట్లో ఎక్కిన పేర్లు సబితమ్మకి, ముఖ్యమంత్రి రేసులో ఉన్న గీతమ్మకి, ధర్మయ్యకి భుజకీర్తులు (మెడల్స్)లా తయారవడంతో ఇప్పుడు తమకి టికెట్స్ వస్తాయో రావో అని వారందరూ ఒకటే టెన్షన్ లో ఉన్నారు పాపం! మోపిదేవి దైర్యంగా వైకాపాలోకి దూకేసినా ఈ ముగ్గురి పరిస్థితి మాత్రం చాలా అయోమయంగా ఉంది. తెలంగాణాలో కాంగ్రెస్ నుండి వైకాపాలోకి దూకడమంటే గోతి లోంచి నూతిలోకి దూకినట్లే గనుక పాపం ఆ అమ్మలిద్దరూ వేరే ఆప్షన్స్ లేక కాంగ్రెస్ నే కరిచిపెట్టుకొని ఉన్నారు ఇంకా.   సోనియమ్మ వారికి టికెట్ ఇవ్వలనుకొన్నా సీబీఐ వారికి అడ్డుపడటం నిజంగా ఎంత దురదృష్టం?

సచిన్ ఎందుకు ఔటయ్యాడు?

      ముంబైలోని వాంఖేడే స్టేడియం. మాస్టర్ బ్లాస్టర్ సచిన్ టెండూల్కర్ తన క్రికెట్ కెరీర్లో చివరి టెస్ట్ ఆడుతున్నాడు. ఈ టెస్ట్ మ్యాచ్ తర్వాత సచిన్ ఇక బ్యాట్ పట్టడు. ఈ టెస్ట్ మ్యాచ్‌లో సెంచరీ చేయడం ద్వారా తన కెరీర్‌కి గొప్ప ముగింపు ఇవ్వాలని ఆయన అభిమానులందరూ కోరుకుంటున్నారు. వాంఖేడే స్టేడియంలో బ్యాటింగ్ చేస్తున్న సచిన్ మీదే స్టేడియంలో వున్న, టీవీలో మ్యాచ్ చూస్తున్న అందరి చూపులూ కేంద్రీకృతమై వున్నాయి.   సచిన్ ఎంతో ఉత్సాహంగా బ్యాటింగ్ చేస్తున్నాడు. ప్రత్యర్థి జట్టు బౌలర్లు విసురుతున్న బంతుల్ని చాకచక్యంగా కొడుతున్నాడు. వేసిన ప్రతి బాల్ నుంచి పరుగులు పిండుకోవాలి.. తనను చూస్తున్న అభిమానులకు ఆనందం కలిగించాలి అనే తపన సచిన్ ముఖంలో కనిపిస్తోంది. ఈ చివరి టెస్ట్ మ్యాచ్‌లో తనకోసం కాకపోయినా తనను అభిమానించే దేశ ప్రజల కోసమైనా సెంచరీ చేయాలన్న  కృతనిశ్చయం ఆయన కళ్ళలో కనిపిస్తోంది. సచిన్ ముఖంలో, కళ్ళలో కనిపిస్తున్న భావాలను అర్థం చేసుకున్న అభిమానులు మరింత ఉత్సాహంగా మ్యాచ్‌ని గమనిస్తున్నారు. సచిన్ సెంచరీ చేసే క్షణం కోసం ఎదురుచూస్తున్నారు. ప్రత్యర్థి బౌలర్ విసురుతున్న బంతుల్ని సచిన్ చాకచక్యంగా ఫోర్లు, సిక్సర్ల రూపంలో బౌండరీ అవతలకి తరలిస్తున్నాడు. సచిన్ అర్ధ శతకం పూర్తి చేశాడు. స్టేడియం మొత్తం కోలాహలంగా మారింది. చూస్తుండగానే సచిన్ అరవై పరుగులు పూర్తి చేశాడు. మరికొద్ది నిమిషాల్లో డెబ్భై పరుగులు పూర్తయ్యాయి. సచిన్ సెంచరీ చేయడం ఖాయమన్న నిర్ణయానికి స్టేడియంలో ఉన్నవారు, టీవీలు చూస్తున్నవారు వచ్చేశారు. అయితే సడెన్‌గా సచిన్ దూకుడులో మార్పు వచ్చింది. మనిషి స్లో అయిపోయాడు. బంతులు ఎదుర్కోవడంలో తడబడుతున్నాడు. రెండుసార్లు ఔటవ్వబోయి తృటిలో తప్పించుకున్నాడు. మ్యాచ్ చూస్తున్నవారంతా ఇది చూసి ఆశ్చర్యపోయారు. సచిన్‌లో సడెన్‌గా ఈ మార్పు ఎందుకు వచ్చిందా అని ఆలోచించడం మొదలుపెట్టారు. వాళ్ళంతా అలా ఆలోచిస్తూ వుండగానే 74 పరుగుల వ్యక్తిగత స్కోర్ దగ్గర సచిన్ ఔటయ్యాడు. సచిన్ సెంచరీ చేయాలన్న అభిమానుల ఆశలు నీరుగారిపోయాయి. సచిన్‌లో ఉన్నట్టుండి, సడెన్‌గా ఎందుకు మార్పు వచ్చిందా అన్న పరిశీలన అభిమానులలో మొదలైంది. అందరూ ఏదో అనుమానం వచ్చి స్టేడియం మొత్తం కలియజూశారు. అంతకుముందే స్టేడియంలోకి ఎంటరైన ఒక వ్యక్తిని చూడగానే అందరికీ సచిన్ ఎందుకు ఔటయ్యాడో అందరికీ అర్థమైపోయింది. ఆ వ్యక్తి ఎవరో కాదు.. రాహుల్‌గాంధీ! లెగ్గుబాబూ.. లెగ్గు! అది మామూలు లెగ్గా! రాహుల్‌గాంధీ ఎంటరయ్యాక వంద సంవత్సరాలకు పైగా చరిత్ర వున్న కాంగ్రెస్ పార్టీనే ఔటయిపోయింది. పాపం సచిన్ ఒక లెక్కా? సరే జరిగిందేదో జరిగిపోయింది. కనీసం సెకండ్ ఇన్నింగ్స్ లో అయినా సచిన్ ఆడేటప్పుడు రాహుల్‌గాంధీని స్టేడియం పరిసరాల్లోకి రాకుండా చూడు భగవంతుడా అని  సచిన్ అభిమానులందరూ దేవుడికి మొరపెట్టుకుంటున్నారు.

సోనియమ్మ గుడికి పూజారి ఎవరు?

  తన రాజకీయ ప్రస్థానంలో చివరి దశలో ఉన్న మాజీమంత్రి, కాంగ్రెస్ ఎమ్మెల్యే శంకర్ రావు, ఇంతవరకు తన సికిందరాబాద్ కంటోన్మెంటు నియోజక వర్గం ప్రజలకు ఒరగబెట్టినదేమీ లేకపోయినా, వచ్చే ఎన్నికలకు టికెట్ సంపాదించాలనే యావ మాత్రం తగ్గలేదు. ప్రస్తుతం రాష్ట్ర కాంగ్రెస్ పార్టీలో హేమా హేమీలకే తమ పరిస్థితి ఏమిటో అర్ధం కాక తలలు పట్టుకొంటుంటే, శంకర్ రావు మాత్రం ‘అమ్మ దయ ఉంటే అన్ని ఉన్నట్లే’ అనే పాలసీతో నిత్య సోనియా పారాయణం చేస్తూ ఆమె దృష్టిలో పడాలని తెగ తాపత్రయపడుతున్నాడు.   ఆ ప్రయత్నంలో భాగంగానే తెలంగాణా వరంగా ఇచ్చిన ఆ దేవతకు ఒక గుడి కట్టాలని కూడా సంకల్పం చెప్పుకొని ప్రయత్నాలు మొదలుపెట్టేసాడు. స్థలం గుర్తించడం, (బహుశః ప్రభుత్వభూమి అయినందున) రెవెన్యు అధికారులను సంప్రదించడం కూడా జరిగిందని, సోనియమ్మ పుట్టిన రోజు అంటే డిశంబర్ 9న సోనియాలయ శంఖు స్థాపన కూడా చేయాలని ఆయన కమిట్ అయిపోయినట్లు సమాచారం.   అయితే ఆయన గ్రహించని రెండు విషయాలు ఏమిటంటే, ఆయన ఇంకా రాజకీయాలలో చక్రం తిప్పాలని ఆరాటపడుతున్నప్పటికీ, సోనియమ్మ వచ్చే ఎన్నికలలో కాంగ్రెస్ పార్టీ గెలిస్తే రాహుల్ బాబుని ప్రధాని కుర్చీలో కూర్చోబెట్టి, తను రిటర్మెంట్ తీసుకోవాలని భావిస్తున్నట్లు సమాచారం. అటువంటప్పుడు శంకర్ రావు ఆమెకు గుడి కట్టించడం కంటే రాహుల్ బాబుకే కట్టించేస్తే బెటరేమో ఓ సారి ఆలోచించవలసి ఉంది. లేకుంటే రాజకీయాల నుండి రిటర్ అయిపోతున్న సోనియమ్మకు గుడి కట్టి అందులో భజన చేసుకోవాలంటే ఆమెతో బాటు శంకర్ రావు కూడా రిటర్మెంట్ తీసుకోక తప్పదు.   ఇక రెండో పాయింటు: రాహుల్ గాంధీ వచ్చే ఎన్నికలలో తన వంటి యువతకి అంటే 40 నుండి 60 మధ్యలో ఉన్నవారికే ప్రాధాన్యం ఇస్తారని ఇప్పటికే చాలా స్పష్టమైయిన సంకేతాలు ఇస్తున్నారు. మరి తను ఆ ‘యువ రేంజ్’ లో ఉన్నాడో లేదో ఒకసారి క్రాస్ చెక్ చేసుకొని, వీలయితే మళ్ళీ ఓ సారి ఆరోగ్యపరీక్షలు చేయించుకొంటే మంచిది. ఎందుకంటే పోలీసులు విచారణకు పిలిచినప్పుడల్లా ఆయన ఆరోగ్యం పాడయిపోవడం, వెంటనే ఏ కార్పోరేట్ ఆసుపత్రిలో చేరిపోవడం చూసి ఆ సాకుతో రాహుల్ ఆయనకు టికెట్ నిరాకరించే ప్రమాదం ఉంది. అందువల్ల సోనియమ్మని ఎలాగో ప్రసన్నం చేసుకొని, యువ రేంజ్ లోకి దూరిపోయి టికెట్ సంపాదించుకొన్నా, తీరా చేసి మళ్ళీ ఆరోగ్యంపాడయిపోతే టికెట్ వృదా అయిపోతుంది గనుక ముందే ఓ సారి ఓల్ బాడీ చెకప్స్ కూడా చేయించుకొంటె మంచిదేమో అని అలోచించాలి. .   అందువల్ల సోనియమ్మకి గుడి కట్టే ముందు ఓసారి టికెట్ విషయం కూడా కన్ఫర్మ్ చేసుకొంటే మంచిదేమో. అప్పుడు గుడికి, తనకి కలిపి మొత్తం ఎంత ల్యాండ్ పుచ్చుకోవాలో, అసలు గుడి కట్టాలో వద్దో, కడితే ఎవరికి కట్టాలో, కడితే టికెట్ వస్తుందో రాదో, రాకపోతే దానిలో నిత్యపూజలు తనే స్వయంగా నిర్వహించాలో లేక వేరవరినా నిర్వహించాలో, వగైరా సమాచారం అంతా సేకరించవచ్చును.     ఏమయినప్పటికీ ఇటువంటి గొప్ప భక్తుడిని తమ ప్రతినిధిగా ఎన్నుకొన్న సికిందరాబాద్ కంటోన్మెంటు ఓటర్ల విజ్ఞతకు జోహార్లు చెప్పక తప్పదు. ఒకవేళ ఈ సారి అతనిపై అమ్మ దయ తప్పి, యువరాజు టికెట్ మంజూరు చేయకపోతే కనీసం సదరు నియోజక వర్గ ప్రజలయినా అతనిని స్వతంత్ర అభ్యర్ధిగా నిలబెట్టుకొని గెలిపించుకోవలసిన గురుతరమయిన బాధ్యత తమపైనే ఉందని గుర్తించాలి.లేకుంటే శంకరన్న అదే గుడిలో గంట కొట్టుకొంటూ కాలక్షేపం చేయక తప్పదు.

పట్టాలు తప్పిన రైలు 5గురు మృతి, 50 మందికి గాయాలు

      మహారాష్ట్రలోని నాసిక్ సమీపంలో ఘోటి వద్ద మంగళ ఎక్స్‌ప్రెస్ పట్టాలు తప్పింది. ఈ ప్రమాదంలో ఐదుగురు మృతి చెందగా, 50 మందికి పైగా గాయాలయ్యాయి. ఎర్నాకుళం నుంచి నిజాముద్దీన్ వెళ్తున్న మంగళ ఎక్స్‌ప్రెస్ ఆరు బోగీలు పట్టాలు తప్పడంతో ఈ దుర్ఘటన సంభవించింది. క్షతగాత్రులను దగ్గరలో ఉన్న రూరల్ ఆసుపత్రికి పంపి చికిత్స అందిస్తున్నారు. రైలు ఎందుకు పట్టాలు తప్పిందన్న విషయం ఇంకా తెలియరాలేదు. మరిన్ని వివరాలు ఇంకా అందాల్సి ఉంది.

మోపిదేవి కాంగ్రెస్ కి రామ్ రామ్

  వాన్‌పిక్ కేసు నిందితుడిగా దాదాపు 16నెలలు జైలు జీవితం గడిపిన మాజీమంత్రి మోపిదేవి వెంకటరమణ, తనకు కాంగ్రెస్ పార్టీ నామమాత్రంగా కూడా పట్టించుకోకుండా వదిలేసిందనే ఆగ్రహంతో, కాంగ్రెస్ ను వీడి శుక్రవారం జగన్మోహన్ రెడ్డి సమక్షంలో వైకాపాలో చేరబోతున్నారు. ఇప్పటికే ఆయన సోదరుడు, కుటుంబ సభ్యులు, అనుచరులు వైకాపాలో చేరి ఉన్నారు. ఇప్పుడు మోపిదేవి కూడా చేరుతున్నారు.   సాధారణ పరిస్థితుల్లో అయితే మోపిదేవి వంటి బలమయిన నాయకుడు పార్టీని వీడివెళ్లిపోతుంటే బుజ్జగింపుల ప్రక్రియ ఉండేది. కానీ ఇప్పుడు ముఖ్యమంత్రికే గ్యారంటీ లేనప్పుడు ఇంకా మోపిదేవిని మాత్రం ఎవరు పట్టించుకొంటారు? పైగా సీమాంధ్రలో కాంగ్రెస్ పార్టీ పరిస్థితి చాలా దయనీయంగా ఉంది. అందరూ ఎవరికి వారు తమ పరిస్థితి ఏమిటనే దిగులుతో ఏమి చేయాలో పాలుపోక, పరిస్థితులు ఎప్పటికయినా చక్కబడక పోతాయా? అని ఆశగా ఎదురుచూస్తున్నారు. ఇటువంటి సమయంలో మోపిదేవిని ఎవరూ పట్టించుకొంటారని ఆశించడం కూడా అత్యాశే అవుతుంది. అయితే రేపు జగన్ తన పార్టీని మళ్ళీ కాంగ్రెస్ పార్టీలో కలిపేస్తే భూమి గుండ్రంగా ఉన్నట్లు మోపిదేవి మళ్ళీ కాంగ్రెస్ గూటిలోనే వచ్చి పడవచ్చును.