పండుగల వేళ సంప్రదాయం ఉట్టిపడే..చీరకట్టు చిట్కాలు..! పండుగలు వస్తున్నాయంటే చాలు మన ఇళ్లలో ఆధ్యాత్మిక వాతావరణంతో పాటు సందడి మొదలవుతుంది. పూజలు, బంధువుల రాకపోకలు, పిండి వంటల గుమగుమలతో ప్రతీ ఇల్లు కళకళలాడుతుంది. ఇలాంటి ప్రత్యేకమైన రోజుల్లో  భారతీయ మహిళలు ఎక్కువగా ఇష్టపడేది సంప్రదాయ చీరకట్టునే. చీర ఎంత అందమైనదో, దాన్ని సరైన పద్ధతిలో కట్టుకున్నప్పుడే దాని లుక్ మరింత రెట్టింపు అవుతుంది. పండుగల రోజుల్లో అమ్మాయిల అందాన్ని  మరింత పెంచి, నిండుగా కనిపించేలా చేసే కొన్ని సులువైన చీరకట్టు చిట్కాలు ఉన్నాయి.  అవేంటో  తెలుసుకుంటే.. చీర సెలక్షన్.. చీరలో అందంగా కనిపించాలంటే మొదట చీర సెలక్షన్ చాలా ముఖ్యం.  పండుగల రోజుల్లో పట్టు, చందరి, కాటన్ సిల్క్ లేదా జరీ వర్క్ ఉన్న చీరలు చాలా బాగుంటాయి. పూజల సమయంలో కాస్త వెలుగునిచ్చే పసుపు, ఎరుపు, ఆకుపచ్చ, మెరూన్ వంటి రంగులు సంప్రదాయ రూపాన్ని తెస్తాయి. ఉదయం పూట తేలికపాటి చీరలు, సాయంత్రం వేళల్లో కాస్త గ్రాండ్ గా ఉండే చీరలను ఎంచుకోవడం మంచిది. బ్లౌజ్ డిజైన్.. చీర అందం మొత్తం బ్లౌజ్ డిజైన్ పైనే ఆధారపడి ఉంటుంది. ఎంత మంచి చీర కట్టినా బ్లౌజ్ సరిగ్గా కుదరకపోతే లుక్ పాడవుతుంది. కాబట్టి పండుగ చీరలకు ఫిట్టింగ్ సరిగ్గా ఉండేలా చూసుకోవాలి. ఎల్బో లెంగ్త్ హ్యాండ్స్, మగ్గం వర్క్ లేదా కాంట్రాస్ట్ రంగుల బ్లౌజులు సంప్రదాయ లుక్ కి చాలా బాగా సరిపోతాయి. కొంగు, కుచ్చిళ్లు.. చీర కట్టేటప్పుడు కుచ్చిళ్లు, పల్లూ మీద  శ్రద్ధ పెట్టాలి. కుచ్చిళ్లను సమానంగా మడతపెట్టి, నడుము భాగంలో గట్టిగా పిన్ చేసుకోవాలి. ఇది  పొడుగ్గా, సన్నగా కనిపించేలా చేస్తుంది. పల్లూ విషయానికి వస్తే, పూజలు లేదా ఇంట్లో పనుల వేళ పల్లూను చిన్న చిన్న మడతలుగా పెట్టి పిన్ చేసుకుంటే తిరగడానికి వీలుగా ఉంటుంది. సాయంత్రం వేడుకల్లో పల్లూను ఫ్రీగా వదిలేస్తే గ్రాండ్ లుక్ వస్తుంది. జ్యువెలరీ ముఖ్యం.. చీరకట్టుకు తగ్గట్టుగా ఆభరణాలు వేసుకుంటే ఆ కళే వేరు. సంప్రదాయ చీరలపైకి గుత్తుసౌసర్లు, కాసుల పేరు, క్వాలిటీగా ఉండే  టెంపుల్ జ్యువెలరీ చాలా చక్కగా సెట్ అవుతాయి. పెద్ద హారం వేసుకున్నప్పుడు చెవులకు చిన్న దిద్దులు, లేదా కేవలం పెద్ద జుంకాలు మాత్రమే వేసుకుని మెడ ఖాళీగా వదిలేయడం ఇప్పుడు మంచి ట్రెండ్. చేతులకు గాజులు వేసుకోవడం అస్సలు మర్చిపోకూడదు. మేకప్.. అందమైన చీరకట్టుకు తగిన మేకప్, హెయిర్ స్టైల్ తోడు అయితే లుక్ పర్పెక్ట్ గా కంప్లీట్ అవుతుంది.   హెవీ మేకప్ కాకుండా నాచురల్ గా కనిపించేలా కాటుక, ముక్కుపుడక, చిన్న బొట్టు పెట్టుకుంటే చాలా ముచ్చటగా ఉంటారు. జుట్టును కొప్పులా ముడివేసి చుట్టూ మల్లెపూలు చుట్టుకున్నా, లేదా జడ వేసుకుని పువ్వులు పెట్టుకున్నా సంప్రదాయం ఉట్టిపడుతుంది. ఇది గుర్తుపెట్టుకోండి.. అంతా రెఢీ అయ్యాక వేసుకునే పాదరక్షలు కూడా చీర నడకను ప్రభావితం చేస్తాయి. కాబట్టి చీర కింద పడిపోకుండా నడవడానికి వీలుగా ఉండే ఫ్లాట్స్ లేదా చిన్న హీల్స్ ఎంచుకోవడం మంచిది. ఇవన్నీ పాటిస్తే  పండుగల సమయంలో  అందరి దృష్టి అమ్మాయిల పైనే ఉంటుంది.                                   *రూపశ్రీ

సున్నితమైన చర్మమా బ్యూటీ హ్యాక్స్ ట్రై చేసే ముందు ఈ జాగ్రత్తలు తప్పనిసరి! అందంగా, కాంతివంతంగా కనిపించాలని ప్రతి ఒక్కరికీ ఉంటుంది. ఇందుకోసం సోషల్ మీడియాలో కనిపించే ఎన్నో రకాల చిట్కాలు, ఫేస్ ప్యాక్‌లు, వైరల్ బ్యూటీ హ్యాక్స్‌ను ఎంతోమంది ప్రయత్నిస్తుంటారు. కానీ సున్నితమైన చర్మం లేదా సెన్సిటివ్ స్కిన్ ఉన్నవారు ఇలాంటి చిట్కాలను గుడ్డిగా పాటించడం వల్ల ప్రయోజనం కంటే నష్టమే ఎక్కువ జరుగుతుంది.  మెరిసిపోయే చర్మం కోసం చేసే కొన్ని తొందరపాటు పనుల వల్ల చర్మం ఎర్రబడటం, దురద, మంట , చర్మం చాలా  పొడిబారడం వంటి సమస్యలు ఎదురవుతాయి. అందుకే సెన్సిటివ్ స్కిన్ ఉన్నవారు బ్యూటీ ప్రొడక్ట్స్ లేదా చిట్కాలను ఉపయోగించేటప్పుడు ఏ తప్పులు చేయకూడదు, ఎలాంటి జాగ్రత్తలు తీసుకోవాలో వివరంగా తెలుసుకుంటే.. నిమ్మరసాన్ని నేరుగా ముఖానికి రాయడం.. సాధారణంగా నిమ్మరసం చర్మాన్ని శుభ్రం చేస్తుందని చాలామంది భావిస్తారు. ఇది సహజ బ్లీచ్ అని కూడా అంటారు.  కానీ నిమ్మరసంలో యాసిడ్ పరిమాణం చాలా ఎక్కువగా ఉంటుంది. దీనిని నేరుగా సెన్సిటివ్ స్కిన్ మీద రాసుకోవడం వల్ల తీవ్రమైన మంట వస్తుంది. అలాగే నిమ్మరసం రాసుకుని ఎండలోకి వెళ్తే చర్మంపై నల్లటి మచ్చలు ఏర్పడటంతో పాటు చర్మం పాడయ్యే ప్రమాదం ఉంది. కాబట్టి ముఖాన్ని శుభ్రంగా ఉంచుకోవడానికి మైల్డ్ లేదా తక్కువ ప్రభావం లేని క్లెన్సర్‌ను మాత్రమే ఉపయోగించాలి. బేకింగ్ సోడాతో స్క్రబ్ చేయడం.. ఇంట్లోనే తయారుచేసుకునే ఫేస్ స్క్రబ్‌లలో చాలామంది బేకింగ్ సోడాను వాడుతుంటారు. అయితే బేకింగ్ సోడా చర్మం యొక్క సహజ పీహెచ్ సమతుల్యతను దెబ్బతీస్తుంది. దీనివల్ల చర్మం త్వరగా పొడిబారిపోయి, పొరలు ఊడటం లేదా రక్షణ పొర దెబ్బతినడం జరుగుతుంది. సెన్సిటివ్ స్కిన్ ఉన్నవారు బేకింగ్ సోడాను స్క్రబ్‌గా వాడకపోవడమే మంచిది. పదే పదే ఎక్స్‌ఫోలియేషన్ లేదా స్క్రబ్బింగ్ చేయడం..  చర్మంపై ఉన్న మృతకణాలను తొలగించడానికి స్క్రబ్బింగ్ అవసరమే అయినప్పటికీ, దానిని అతిగా చేయకూడదు. గట్టిగా ఉండే స్క్రబ్‌లు లేదా కెమికల్ ప్రొడక్ట్స్‌తో పదే పదే ముఖాన్ని తోమడం వల్ల సెన్సిటివ్ స్కిన్ ఎర్రబడి, చికాకు పెరుగుతుంది.  చర్మం తత్వానికి తగినట్లుగా మాత్రమే ఎక్స్‌ఫోలియేషన్ చేయాలి. వైరల్ అయ్యే ప్రతి ఫేస్ ప్యాక్‌ను వాడటం.. సోషల్ మీడియాలో ఏదైనా ఫేస్ ప్యాక్ ట్రెండ్ అవుతోందంటే అది అందరికీ సెట్ అవుతుందని అనుకోవడం పొరపాటు. ఫేస్ ప్యాక్‌లలో వాడే సువాసనలు, ఎస్సెన్షియల్ ఆయిల్స్ , కొన్ని రకాల సహజపదార్థాలు కూడా సెన్సిటివ్ చర్మంపై అలెర్జీని లేదా మంటను కలిగిస్తాయి. కాబట్టి ఏ ప్యాక్ అయినా వాడే ముందు జాగ్రత్త పడటం అవసరం. ప్యాచ్ టెస్ట్ చేయకుండా ప్రొడక్ట్స్ వాడటం..  ఏదైనా కొత్త క్రీమ్, సీరం లేదా ఇంట్లో తయారుచేసిన ప్యాక్ అయినా సరే, నేరుగా ముఖంపై అప్లై చేయకూడదు. ముందుగా చేతిపై లేదా చెవి వెనుక భాగంలో కొద్దిగా రాసి ప్యాచ్ టెస్ట్ చేసుకోవాలి. ఎలాంటి మంట లేదా అలెర్జీ రాలేదని నిర్ధారించుకున్నాకే ముఖానికి వాడాలి. స్ట్రాంగ్ కెమికల్స్ , పర్ఫ్యూమ్ ప్రొడక్ట్స్ వాడటం..  అధిక సువాసన ఉన్న ప్రొడక్ట్స్ లేదా ఆర్టిఫిషియల్ కెమికల్స్ ఉన్న స్కిన్‌కేర్ వస్తువులు సెన్సిటివ్ స్కిన్‌ను త్వరగా దెబ్బతీస్తాయి. కాబట్టి కెమికల్స్ తక్కువగా ఉండి, ఫ్రాగ్రన్స్ ఫ్రీగా ఉండే సౌమ్యమైన ప్రొడక్ట్స్‌ను మాత్రమే ఎంచుకోవాలి. చర్మానికి తగిన తేమ, రక్షణ ఇవ్వకపోవడం.. సెన్సిటివ్ స్కిన్ ఉన్నవారు చర్మాన్ని ఎప్పుడూ హైడ్రేటెడ్‌గా ఉంచుకోవాలి. చర్మానికి సరిపడే మంచి మోయిశ్చరైజర్‌ను క్రమం తప్పకుండా వాడాలి. అలాగే ఎండ నుంచి చర్మాన్ని కాపాడుకోవడానికి మైల్డ్ సన్‌స్క్రీన్‌ను తప్పనిసరిగా ఉపయోగించాలి. సెన్సిటివ్ స్కిన్ ఉన్నవారు ఏవో వైరల్ చిట్కాలు, ఖరీదైన హ్యాక్స్ వెనుక పడకుండా తమ చర్మం అవసరాలను అర్థం చేసుకుని, సరైన భద్రతా నియమాలు పాటిస్తే చర్మం ఆరోగ్యంగా, ప్రశాంతంగా , కాంతివంతంగా ఉంటుంది.                           *రూపశ్రీ.

మహిళలలో అండాల విడుదల సక్రమంగా జరగాలంటే ఎలాంటి ఆహారం తీసుకోవాలి మహిళల ఆరోగ్యంలో సంతానోత్పత్తి వ్యవస్థ చాలా కీలకమైనది. నేటి ఆధునిక జీవనశైలి, మానసిక ఒత్తిడి, పోషకాహార లోపం , హార్మోన్ల అసమతుల్యత వల్ల చాలామంది మహిళల్లో అండాల విడుదల లేదా అండాశయం నుండి గుడ్డు సరిగ్గా విడుదల కాకపోవడమనే సమస్య ఎక్కువగా కనిపిస్తోంది. దీన్నే అండ్రోజెన్ లేదా అండాల విడుదల సమస్యలు అని అంటారు. గర్భధారణకు లేదా నెలసరి సక్రమంగా రావడానికి   ప్రతి నెల అండం సరైన సమయానికి విడుదల కావడం చాలా ముఖ్యం. ఈ ప్రక్రియ సహజంగా, సక్రమంగా జరగడానికి  తినే ఆహారం ప్రధాన పాత్ర పోషిస్తుంది. సరైన పోషకాలు ఉన్న ఆహారాన్ని రోజువారీ అలవాటుగా చేసుకుంటే హార్మోన్లు సమతుల్యంగా మారి, సంతానోత్పత్తి సామర్థ్యం పెరుగుతుంది. మహిళల్లో అండాల విడుదల సక్రమంగా జరగడానికి సహాయపడే ముఖ్యమైన ఆహార పదార్థాలు , వాటి వల్ల కలిగే ప్రయోజనాలు తెలుసుకుంటే.. ఆకుకూరలు , కూరగాయలు.. పాలకూర, తోటకూర, బ్రోకలీ వంటి ఆకుకూరల్లో ఫోలేట్ (విటమిన్ బి-9), ఐరన్ , యాంటీఆక్సిడెంట్లు పుష్కలంగా ఉంటాయి. ఇవి అండాశయాల ఆరోగ్యాన్ని మెరుగుపరచడమే కాకుండా, అండం నాణ్యతను పెంచడానికి ఎంతో తోడ్పడతాయి. రోజువారీ భోజనంలో ఆకుకూరలను భాగం చేసుకోవడం వల్ల హార్మోన్ల అసమతుల్యత తగ్గుతుంది. పప్పుధాన్యాలు , శనగలు.. శాకాహారంలో ప్రోటీన్ లభించే పప్పులు, శనగలు, పెసలు ,  చిక్కుళ్ళు అండాల విడుదలకు చాలా మంచివి. జంతు సంబంధిత ప్రోటీన్ కంటే వృక్ష సంబంధిత ప్రోటీన్ తీసుకోవడం వల్ల సంతానోత్పత్తి సమస్యలు తగ్గుతాయని పరిశోధనలు చెబుతున్నాయి. ఇవి శరీరంలో ఇన్సులిన్ స్థాయిలను అదుపులో ఉంచి హార్మోన్లను క్రమబద్ధీకరిస్తాయి. మొలకెత్తిన విత్తనాలు , గింజలు..  బాదం, వాల్‌నట్స్, గుమ్మడి విత్తనాలు, నువ్వులు , పొద్దుతిరుగుడు విత్తనాల్లో విటమిన్ ఇ, జింక్, మెగ్నీషియం , ఒమేగా-3 ఫ్యాటీ యాసిడ్లు అధికంగా ఉంటాయి. ఇవి అండాశయాలకు రక్తప్రసరణను పెంచి, హార్మోన్ల ఉత్పత్తి సరిగ్గా జరిగేలా చూస్తాయి. ముఖ్యంగా వాల్‌నట్స్ , గుమ్మడి విత్తనాలు అండం విడుదల కావడానికి అవసరమైన పోషకాలను అందిస్తాయి. తాజా పండ్లు.. జామ, బత్తాయి, నారింజ, బెర్రీలు, వంటి పండ్లలో విటమిన్ సి , యాంటీఆక్సిడెంట్లు పుష్కలంగా ఉంటాయి. ఇవి శరీరంలోని హానికర కణాలను తగ్గించి, అండాల నాణ్యతను కాపాడుతాయి. దానిమ్మ పండు తినడం వల్ల గర్భాశయానికి రక్తప్రసరణ పెరిగి ఆరోగ్యం మెరుగుపడుతుంది. తృణధాన్యాలు.. తెల్ల  బియ్యం, మైదా వంటి రిఫైన్డ్ ఆహారాలకు దూరంగా ఉండి, గోధుమలు, జొన్నలు, రాగులు, సజ్జలు , బ్రౌన్ రైస్, కొర్రలు, సమలు వంటి చిరు ధాన్యాలు తీసుకోవాలి. వీటిలో ఉండే కాంప్లెక్స్ కార్బోహైడ్రేట్లు , ఫైబర్ శరీరంలో బ్లడ్ షుగర్ స్థాయిలను స్థిరంగా ఉంచుతాయి. దీనివల్ల ఇన్సులిన్ నిరోధకత తగ్గి అండాలు సరిగ్గా విడుదలవుతాయి. ఆరోగ్యకరమైన కొవ్వులు.. శరీరంలో ఈస్ట్రోజెన్, ప్రొజెస్టెరాన్ వంటి హార్మోన్లు సరిగ్గా ఉత్పత్తి కావాలంటే ఆరోగ్యకరమైన కొవ్వులు అవసరం. అవకాడో, ఆలివ్ నూనె , కొబ్బరి నూనె వంటివి ఆహారంలో చేర్చుకోవడం వల్ల హార్మోన్ల వ్యవస్థ సక్రమంగా పనిచేస్తుంది. చేపలు..  మాంసాహారం తినేవారు ఒమేగా-3 ఫ్యాటీ యాసిడ్లు ఎక్కువగా ఉండే శార్డైన్స్, సాల్మన్ వంటి చేపలను తీసుకోవచ్చు. ఇవి శరీరంలో మంటను లేదా వాపును తగ్గించి, అండాశయం పనితీరును మెరుగుపరుస్తాయి. తగినంత నీరు , ద్రవాహారం.. ఆహారంతో పాటు ప్రతిరోజూ తగినంత నీరు తాగడం కూడా చాలా అవసరం. నీరు శరీరంలోని వ్యర్థాలను బయటకు పంపి, కణాలకు పోషకాలు సరిగ్గా అందేలా చేస్తుంది. కొబ్బరినీళ్ళు, పల్చటి మజ్జిగ తీసుకోవడం కూడా ఆరోగ్యానికి ఎంతో మేలు చేస్తుంది. తీసుకోకూడని ఆహారాలు.. అండాల విడుదల సక్రమంగా జరగాలంటే మంచి ఆహారం తీసుకోవడంతో పాటు కొన్నింటికి దూరంగా ఉండాలి. ఎక్కువగా ప్రాసెస్ చేసిన ఆహారాలు, వేపుళ్ళు, చక్కెర ఎక్కువగా ఉండే తీపి పదార్థాలు, మైదా, కూల్ డ్రింక్స్ , జంక్ ఫుడ్ తగ్గించాలి. అలాగే కెఫిన్ పానీయాలు అయిన టీ, కాఫీ పరిమితి దాటకుండా చూసుకోవాలి. గుర్తుంచుకోవాల్సిన విషయం.. మహిళలు తమ ఆహారంలో సహజమైన, తాజా పోషకాలు ఉండేలా చూసుకోవడం ద్వారా అండాల విడుదల సమస్యల నుంచి బయటపడవచ్చు. ఆహార అలవాట్లతో పాటు క్రమం తప్పకుండా వ్యాయామం చేయడం, రోజుకు 7 నుండి 8 గంటలు ప్రశాంతంగా నిద్రపోవడం , ఒత్తిడికి దూరంగా ఉండటం వల్ల సంతానోత్పత్తి ఆరోగ్యం మరింత మెరుగవుతుంది.                              *రూపశ్రీ.

ఈ చిన్న అలవాట్లు.. మహిళల ఆరోగ్యాన్ని అద్బుతంగా మారుస్తాయ్..! ఇంటి పనులతో, ఉద్యోగ బాధ్యతలతో ప్రతిరోజూ ఉరుకులు పరుగుల జీవితాన్ని గడిపే మహిళల ఆరోగ్యం చాలాసార్లు వెనుకబడిపోతుంది. ముఖ్యంగా ముప్పై ఏళ్లు దాటిన తర్వాత శరీరంలో వచ్చే హార్మోన్ల మార్పులు, పోషకాల లోపాలు అనేక రకాల ఆరోగ్య సమస్యలకు దారితీస్తాయి. ఈ నేపథ్యంలో మహిళలు తమ ఆరోగ్యాన్ని ఎలాంటి ఇబ్బందులు లేకుండా కాపాడుకోవడానికి కొన్ని ప్రత్యేకమైన ఆరోగ్యకరమైన ఆహారాలు, పానీయాలు ఎంతగానో సహాయపడతాయి. చిన్నపాటి ఆహారపు అలవాట్లతో ఆరోగ్యాన్ని ఎలా మెరుగుపరుచుకోవచ్చో ఇప్పుడు వివరంగా తెలుసుకుంటే.. ఐరన్ భర్తీకోసం.. మహిళల శరీరంలో ఐరన్ లోపం చాలా సాధారణంగా కనిపిస్తుంటుంది. దీనిని నివారించడానికి మొరింగా అనగా మునిగ ఆకుల పొడితో పాటు ఉసిరి జ్యూస్ కలపిన పానీయం అద్భుతంగా పనిచేస్తుంది. శరీరంలో ఐరన్ శాతాన్ని పెంచడానికి మునగ ఆకుల పొడి సహాయపడితే, అందులో ఉండే విటమిన్ సి ఆ పోషకాలు శరీరానికి సరిగ్గా అందేలా చూస్తుంది. ఐరన్ మాత్రలతో పనిలేకుండా ఈ సహజసిద్ధమైన కాంబినేషన్ ను క్రమం తప్పకుండా ప్రయత్నించడం వల్ల మంచి ఫలితం ఉంటుంది. ఎముకల బలానికి.. వయసు పెరుగుతున్న కొద్దీ ఎముకల బలహీనత, కీళ్ల నొప్పులు వంటి సమస్యలు సాధారణంగా వేధిస్తుంటాయి. వీటికి చక్కటి పరిష్కారంగా రాగి మాల్ట్ ని తీసుకోవచ్చు. రోజూ ఉదయం పూట రాగి మాల్ట్ తీసుకోవడం వల్ల శరీరానికి కావలసిన క్యాల్షియం పుష్కలంగా అందుతుంది. ఇది ఎముకలను దృఢంగా మార్చడంతో పాటు ఒళ్ళు నొప్పులను తగ్గించి రోజంతా ఉత్సాహంగా ఉండేలా చేస్తుంది. జీర్ణవ్యవస్థకు.. మన భారతీయ వంటకాల్లో ఎప్పుడూ ఉండే మజ్జిగను చాలామంది కేవలం భోజనం అయ్యాక తాగే పానీయంగా  మాత్రమే చూస్తారు. కొందరైతే పెరుగు తిన్నాం కాబట్టి మజ్జిగతో పనిలేదు అనుకుంటారు.  కానీ మజ్జిగ ఆరోగ్యానికి చేసే మేలు అంతా ఇంతా కాదు. ఇది జీర్ణ వ్యవస్థను మెరుగుపరచడంలో కీలక పాత్ర పోషిస్తుంది. కడుపులో ఉండే మంచి బ్యాక్టీరియాను పెంచి జీర్ణక్రియను క్రమబద్ధీకరిస్తుంది. మజ్జిగను మరింత ప్రభావవంతంగా తీసుకునే పద్ధతులను పాటిస్తే శరీరంలో రోగ నిరోధక శక్తి మెరుగవుతుంది. హార్మోన్ల అసమతుల్యత.. మహిళల్లో హార్మోన్ల అసమతుల్యత అనేది ప్రస్తుతం చాలా సాధారణ సమస్యగా మారిపోయింది. దీనిని అదుపులో ఉంచడానికి ఫ్లాక్స్ సీడ్స్ అనగా అవిసె గింజలు , బాదం పప్పులతో తయారు చేసిన స్మూతీ అద్భుతంగా పనిచేస్తుంది. ఈ పానీయం హార్మోన్లను క్రమబద్ధీకరించడమే కాకుండా చర్మానికి మంచి నిగారింపును ఇస్తుంది. గుండె ఆరోగ్యానికి, జీర్ణవ్యవస్థ పనితీరుకు కూడా ఇది ఎంతో మేలు చేస్తుంది. పసుపు,మిరియాలు మ్యాజిక్.. రాత్రి పడుకునే ముందు పసుపు, మిరియాలు కలిపిన పాలు తాగడం వల్ల అనేక ఆరోగ్య ప్రయోజనాలు కలుగుతాయి. పసుపులో ఉండే గుణాలు శరీరంలో మంటను తగ్గించి, రోగనిరోధక శక్తిని పెంచుతాయి. అలాగే నల్ల మిరియాలు పసుపులోని పోషకాలు శరీరానికి అందేలా సహకరిస్తాయి. రాత్రి నిద్రపోయే ముందు పసుపు, మిరియాల పాలు   తీసుకోవడం వల్ల ఒత్తిడి తగ్గి మంచి నిద్ర పడుతుంది, దీనివల్ల  మరుసటి రోజు ఉదయం ఉత్సాహంగా ఉండవచ్చు. మహిళలు తమ బిజీ షెడ్యూల్ లో కొద్దిగా సమయం కేటాయించుకుని ఈ సహజ డ్రింక్స్ ను రోజువారీ ఆహారంలో భాగం చేసుకుంటే ఎలాంటి అనారోగ్యాల బారిన పడకుండా ఆరోగ్యంగా, ప్రశాంతంగా జీవించవచ్చు.                                                                                                                                                 *రూపశ్రీ.  

 మహిళల్లో ఎముకలు బలంగా మారాలంటే చేయాల్సిన శక్తివంతమైన వ్యాయామాలు ఇవి..! వయసు పెరుగుతున్న కొద్దీ మహిళల శరీరంలో అనేక రకాల మార్పులు వస్తుంటాయి. ముఖ్యంగా ముప్పై ఏళ్లు దాటిన తర్వాత ఎముకల గిట్టతనం లేదా సాంద్రత క్రమంగా తగ్గుతూ వస్తుంది. దీనివల్ల నడుము నొప్పి, మోకాళ్ల నొప్పులు రావడం మాత్రమే కాకుండా ఎముకలు త్వరగా బలహీనపడే అవకాశం ఉంటుంది. ఇంట్లో ఉండే గృహిణులు అయినా, ఆఫీసులకు వెళ్లే ఉద్యోగినులు అయినా ఎముకల ఆరోగ్యాన్ని కాపాడుకోవడం చాలా అవసరం. కేవలం మంచి ఆహారం తీసుకోవడమే కాకుండా, క్రమం తప్పకుండా కొన్ని వ్యాయామాలు చేయడం వల్ల ఎముకలను చాలా కాలం పాటు బలంగా, ఆరోగ్యంగా ఉంచుకోవచ్చు. ఎముకల శక్తిని పెంచడానికి ప్రతిరోజూ సులభంగా చేసుకోగలిగే కొన్ని ముఖ్యమైన వ్యాయామాల గురించి  వివరంగా తెలుసుకుంటే.. నడక , మెట్లు ఎక్కడం.. ఎముకలను బలోపేతం చేయడానికి నడక అత్యంత సులువైన, సమర్థవంతమైన మార్గం. ప్రతిరోజూ ఉదయం లేదా సాయంత్రం  వేగంగా అరగంట పాటు నడవటం వల్ల కాళ్లలోని ఎముకలు, కీళ్ళు దృఢపడతాయి. నడకతో పాటు లిఫ్ట్ వాడకుండా మెట్లు ఎక్కడం, దిగడం వంటివి చేయడం వల్ల తొడలు, నడుము భాగంలో ఉన్న ఎముకలపై ఒత్తిడిపడి అవి మరింత బలంగా తయారవుతాయి. ఇది శరీరంలో రక్తం సరఫరాను కూడా మెరుగుపరుస్తుంది. స్క్వాట్స్ , లంజెస్.. ఇంట్లోనే చిన్న ప్రదేశంలో చేసుకోగలిగే వ్యాయామాలలో స్క్వాట్స్ చాలా మంచివి. కుర్చీలో కూర్చుని లేచినట్లుగా మోకాళ్లను వంచి చేసే ఈ వ్యాయామం వల్ల పిరుదులు, తొడలు, మోకాళ్ల చుట్టూ ఉండే ఎముకలకు మంచి బలం లభిస్తుంది. అలాగే ఒక కాలు ముందుకు పెట్టి మోకాలు వంచే లంజెస్ వ్యాయామం చేయడం వల్ల శరీర బ్యాలెన్స్ పెరుగుతుంది. ప్రారంభంలో తక్కువ సార్లు చేస్తూ, అలవాటయ్యాక సంఖ్యను పెంచుకోవచ్చు. చిన్న చిన్న బరువులు ఎత్తడం.. ఎముకల సాంద్రతను పెంచడంలో వెయిట్ ట్రెయినింగ్ చాలా సహాయపడుతుంది. పెద్ద పెద్ద బరువులు ఎత్తాల్సిన అవసరం లేదు. ఇంట్లో ఉండే చిన్న రెండు నీళ్ల క్యాన్ లు లేదా అర కిలో, ఒక కిలో ఉండే చిన్న డంబెల్స్ చేతుల్లో పట్టుకుని పైకి, కిందకి అనడం వల్ల చేతులు, భుజాల ఎముకలు గట్టిపడతాయి. ఈ రకమైన వ్యాయామాలు ఎముకలు అరిగిపోకుండా కాపాడటానికి ఎంతో దోహదపడతాయి. యోగాసనాలు , సూర్య నమస్కారాలు.. ఎముకల బలానికి, శరీర దృఢత్వానికి యోగా అద్భుతంగా పనిచేస్తుంది. ప్రతిరోజూ కొన్ని నిమిషాల పాటు సూర్య నమస్కారాలు చేయడం వల్ల శరీరం మొత్తంలోని ఎముకలకు మంచి వ్యాయామం లభిస్తుంది. వీటితో పాటు వృక్షాసనం, భుజంగాసనం వంటి ఆసనాలు వేయడం వల్ల వెన్నుముక బలంగా తయారవుతుంది. ప్రతిరోజూ యోగా చేయడం వల్ల శరీరం సమతుల్యత సాధించి, కీళ్ల నొప్పుల నుంచి ఉపశమనం లభిస్తుంది. స్కిప్పింగ్  లేదా జంపింగ్ జాక్స్.. ఎముకల ఆరోగ్యం బాగుండాలంటే వాటిపై స్వల్పంగా ఒత్తిడి పడటం అవసరం. చిన్నతనంలో వేసే తాడు దూకుడు లేదా ఒకే చోట నిలబడి గెంతుతూ చేసే జంపింగ్ జాక్స్ వ్యాయామాలు ఎముకల కణజాలాన్ని వేగంగా పునరుద్ధరించడానికి తోడ్పడతాయి. అయితే మోకాళ్ల నొప్పులు తీవ్రంగా ఉన్నవారు లేదా , పైబడిన వారు వైద్యుల సలహా తీసుకున్న తర్వాత మాత్రమే ఇటువంటి వ్యాయామాలు చేయడం మంచిది. మహిళలు గుర్తు పెట్టుకోవాల్సిన విషయం.. రోజువారీ జీవనశైలిలో ఈ చిన్న చిన్న వ్యాయామాలను భాగం చేసుకోవడం వల్ల ఎముకలు బలహీనపడకుండా చూసుకోవచ్చు. వ్యాయామంతో పాటుగా కాల్షియం, విటమిన్ డి సమృద్ధిగా ఉండే పాలు, ఆకుకూరలు, గుడ్లు, నువ్వులు వంటి ఆహార పదార్థాలను రోజూ తీసుకోవడం మర్చిపోకూడదు. ఉదయం వేళ లేత ఎండలో కొన్ని నిమిషాలు గడపడం వల్ల శరీరానికి సహజంగా విటమిన్ డి లభించి ఎముకలు దృఢంగా మారుతాయి. ప్రతి రోజూ కనీసం ఇరవై నుంచి ముప్పై నిమిషాలు  ఆరోగ్యం కోసం కేటాయిస్తే, భవిష్యత్తులో వచ్చే ఎముకల సమస్యల నుంచి సులభంగా దూరంగా ఉండవచ్చు.                                *రూపశ్రీ.

పసిపిల్లలకు తిన్న ఆహారం వంటబట్టాలంటే ఏం చేయాలి.! పసిపిల్లలు ఎంత తిన్నా ఒంటికి పట్టడం లేదని చాలామంది తల్లులు బాధపడుతుంటారు. పిల్లలు బలంగా, ఆరోగ్యంగా పెరగాలంటే వారు తినే ఆహారం సరిగ్గా జీర్ణమై ఒంటికి పట్టడం చాలా ముఖ్యం. దీనికోసం ఇంగ్లీష్ మందులు, టానిక్‌ల కంటే మన అమ్మమ్మలు, నానమ్మల కాలం నాటి సహజమైన చిట్కాలు బాగా పనిచేస్తాయి. పూర్వకాలం నుండి వస్తున్న ఈ సులువైన పద్ధతులు పాటించడం వల్ల పిల్లల జీర్ణశక్తి పెరిగి, తిన్న తిండి ఒంటికి పట్టి వారు ఆరోగ్యంగా ఎదుగుతారు. ఆ చిట్కాలేంటో తెలుసుకుంటే.. ఆహారం ఇలా ఉండాలి.. ముందుగా పిల్లలకు ఇచ్చే ఆహారంలో మసాలాలు లేకుండా, సులభంగా జీర్ణమయ్యేలా చూసుకోవాలి. అన్నంలో కొద్దిగా ఇంగువ, వాము, జీలకర్ర పొడి కలిపి తినిపిస్తే కడుపులో గ్యాస్, నొప్పి వంటి సమస్యలు రావు. ఇవి జీర్ణరసాలను ఊరేలా చేసి తిన్న ఆహారాన్ని త్వరగా అరిగేలా చేస్తాయి. ప్రో బయోటిక్స్.. పిల్లల కడుపును ఆరోగ్యంగా ఉంచడంలో పెరుగు, మజ్జిగ బాగా ఉపయోగపడతాయి. ప్రతిరోజు మధ్యాహ్నం వేళ పసిపిల్లలకు కొద్దిగా తాజా పెరుగు లేదా వెన్న తీసిన మజ్జిగ అలవాటు చేయాలి. దీనివల్ల కడుపులో మంచి బ్యాక్టీరియా పెరిగి, తిన్న ఆహారంలోని పోషకాలు శరీరానికి సరిగ్గా అందుతాయి. ఫోన్లు, టీవీలు వద్దు.. పిల్లలకు తినిపించేటప్పుడు వారితో కాసేపు సరదాగా మాట్లాడుతూ, ప్రశాంతమైన వాతావరణంలో తినిపించాలి. ఫోన్లు చూపిస్తూ బలవంతంగా తినిపించడం వల్ల ఆహారం సరిగ్గా జీర్ణం కాదు. ఆహారాన్ని బాగా నమిలి మింగేలా చూడటం కూడా చాలా ముఖ్యం. ఆటలు మంచి మార్గం.. ప్రతిరోజు ఉదయం లేదా సాయంత్రం వేళల్లో పిల్లలను కాసేపు ఆటలాడనివ్వాలి. శారీరక శ్రమ వల్ల ఆకలి పెరుగుతుంది, తిన్నది బాగా అరిగి ఒంటికి పడుతుంది. వీటితో పాటు నువ్వుల నూనె లేదా కొబ్బరి నూనెతో పిల్లల కడుపుపై మెల్లగా మర్దన చేయడం వల్ల కూడా జీర్ణక్రియ మెరుగుపడుతుంది. రోజూ తగినన్ని నీళ్లు తాగిస్తూ, సమయానికి పౌష్టికాహారం ఇస్తూ ఈ చిన్న చిన్న చిట్కాలు పాటిస్తే పిల్లలు చురుగ్గా, ఆరోగ్యంగా పెరుగుతారు.                                       *రూపశ్రీ.

ప్రతి మహిళ ఆరోగ్య విషయాలపై పూర్తి అవగాహన కలిగి ఉండటం ఎంతైనా అవసరం. ముఖ్యంగా రొమ్ము ఆరోగ్యం (Breast Health) గురించి మాట్లాడేటప్పుడు, చాలామందిలో అనవసరమైన భయాలు, అపోహలు ఉంటాయి. రొమ్ములో చిన్న గడ్డ, నొప్పి లేదా వాపు కనిపించగానే చాలా మంది మహిళలు అది ఖచ్చితంగా రొమ్ము క్యాన్సర్ (Breast Cancer) అని భయపడిపోతూ ఉంటారు. అయితే, ప్రముఖ గైనకాలజిస్ట్ డాక్టర్ వినిత పులి (Dr. Vinatha Puli) స్పష్టం చేసిన వివరాల ప్రకారం, రొమ్ములో ఎలాంటి గడ్డ, నొప్పి లేదా వాపు కనిపించినంత మాత్రాన అది క్యాన్సర్ కావాలని నిబంధన ఏమీ లేదు. చాలా సందర్భాలలో ఇవి హార్మోన్ల అసమతుల్యత, సాధారణ కణతుల వల్ల లేదా ఇతర చిన్నపాటి ఆరోగ్య సమస్యల వల్ల కూడా వచ్చే అవకాశం ఉంది. అయితే, ఏ లక్షణాలను కూడా తేలికగా తీసుకోకూడదని, ప్రతి మహిళా తన శరీరం ఇచ్చే సంకేతాలను గమనించాలని వైద్యులు హెచ్చరిస్తున్నారు. ముఖ్యంగా, రొమ్ములో నొప్పి లేని గడ్డ (Painless Lump) ఏర్పడిందంటే దానిని అస్సలు నిర్లక్ష్యం చేయకూడదు. చాలా మంది మహిళలు నొప్పి లేకపోతే అది ప్రమాదకరం కాదని పొరపడుతుంటారు, కానీ క్యాన్సర్‌కు సంబంధించిన గడ్డలు కొన్నిసార్లు ఎలాంటి నొప్పిని కలిగి ఉండవు. కాబట్టి, ఎలాంటి అసాధారణ మార్పులు కనిపించినా వెంటనే వైద్యులను సంప్రదించడం అత్యంత ముఖ్యం. అంతేకాకుండా, స్క్రీనింగ్ వయస్సు మరియు పరీక్షల ఫ్రీక్వెన్సీ ప్రతి ఒక్కరి వ్యక్తిగత ఆరోగ్య ప్రమాద కారకాలు (Risk Factors) మరియు వైద్య మార్గదర్శకాలపై ఆధారపడి ఉంటాయి. నిర్దిష్ట వయస్సు దాటిన మహిళలు క్రమం తప్పకుండా మామోగ్రామ్ (Mammogram) లేదా వైద్య పరీక్షలు చేయించుకోవడం ద్వారా ఎటువంటి ముప్పునైనా ముందే గుర్తించి తగిన జాగ్రత్తలు తీసుకోవచ్చు. ఆరోగ్యం విషయంలో అశ్రద్ధ చేయకుండా, అవగాహనతో మెరుగైన జీవనశైలిని అలవర్చుకోవడం మన చేతుల్లోనే ఉంది.     breast lump, breast pain, breast cancer symptoms, Dr. Vineetha Puli, non-cancerous breast lumps, breast health warnings, breast cancer awareness Telugu.