Andhra Pradesh Political News | AP Politics | Political News & Updates

బీజేపీ తరఫున జ్ణానేశ్వర్ కుమార్ రాయబారాలు.. సీఈసీపై కేరళ మాజీ సీఎస్ ఆరోపణలు.!

సీఈసీ జ్ణానేష్ కుమార్‌పై కేరళ మాజీ ప్రధాన కార్యదర్శి జిజి థామ్సన్ చేసిన ఆరోపణలు కలకలం రేపుతున్నాయి. తాను సర్వీస్‌లో ఉన్న సమయంలోజ్ణానేష్ కుమార్‌ బీజేపీ తరఫున ఎన్నికల్లో పోటీ చేయాలని కోరారని, అంతేకాకుండా కేంద్రంలో మంత్రి పదవి కూడా దక్కుతుందని ప్రతిపాదించారని జిజి థామసన్ తాజాగా వెల్లడించారు. ఈ వ్యాఖ్యలు ప్రస్తుతం జాతీయ స్థాయిలో హాట్ టాపిక్ గా మారాయి. 2016లో ఢిల్లీకి వెళ్లే విమాన ప్రయాణ సమయంలో ఈ ఆసక్తికరమైన చర్చ జరిగినట్లు తెలిపారు. ఆ సమయంలో తాను కేరళ రాష్ట్ర ప్రధాన కార్యదర్శిగా విధులు నిర్వర్తిస్తుండగా, గ్యానేష్ కుమార్ కేంద్ర హోంమంత్రిత్వ శాఖలో ఉన్నతాధికారిగా సేవలందిస్తున్నారని గుర్తుచేశారు. ప్రయాణ సమయంలో తన రిటైర్మెంట్ అనంతర ప్రణాళికల గురించి ఆరా తీసిన జ్ణానేష్ కుమార్‌.. ఆ సందర్భంలోనే బీజేపీ తరఫున పతనం తిట్ట లోక్‌సభ స్థానం నుంచి పోటీ చేయాలని సూచించారన్నారు. మైనారిటీ వర్గానికి చెందిన తానకు మంచి వక్తగా పేరుండటం వల్ల బీజేపీ తరఫున బరిలోకి దిగితే సులభంగా విజయం సాధించవచ్చనిజ్ణానేష్ కుమార్‌ చెప్పారనీ, ఎన్నికల్లో గెలిచి పార్లమెంట్‌కు వెళితే కేంద్ర కేబినెట్‌లో మంత్రి పదవి దక్కే అవకాశం ఉందని తనను ఒప్పించే ప్రయత్నం చేశారని ధామ్సన్ పేర్కొన్నారు. అయితే, తనకు ప్రత్యక్ష రాజకీయాలపై ఆసక్తి లేదని విస్పష్టంగా చెప్పి ఆ ప్రతిపాదనను తిరస్కరించినట్లు వివరించారు. ప్రస్తుతం దేశంలో ఎన్నికల సంఘం పనితీరు, సీఈసీ జ్ణానేశ్ కుమార్ వ్యవహారశైలి, నిష్పాక్షికతపై విమర్శలు, ఆరోపణలు వెల్లువెత్తుతున్న తరుణంగా థామ్సన్ వెల్లడించిన విషయాలు ప్రాధాన్యత సంతరించుకున్నాయి. సీఈసీ గతంలో రాజకీయ పార్టీల కోసం రాయబారాలు లేదా సిఫార్సులు చేయడం ప్రజాస్వామ్య వ్యవస్థకు విరుద్ధమని ప్రతిపక్ష నేతలు అంటున్నారు. ధామ్సన్ వెల్లడించిన వివరాలపై కాంగ్రెస్‌ సహా ప్రతిపక్ష పార్టీల అగ్రనేతలు జ్ణానేష్ కుమార్‌ తీరుపై తీవ్ర ఆగ్రహం వ్యక్తం చేశారు. రాజ్యాంగబద్ధమైన స్వయంప్రతిపత్తి కలిగిన సంస్థకు అధిపతిగా ఉండాల్సిన వ్యక్తి, గతంలో అధికార పార్టీకి అనుకూలంగా వ్యవహరించారనే ఆరోపణలు వచ్చిన నేపథ్యంో సీఈసీ వెంటనే తన పదవికి రాజీనామా చేయాలని డిమాండ్ చేస్తున్నారు. [Jiji Thomson, Gyanesh Kumar, Chief Election Commissioner, BJP ticket offer, Kerala Former Chief Secretary, Telugu One]

Published on: Sun Sep 27, 2026 10:36AM

ఖైరతాబాద్ బరిలో తెలంగాణ రక్షణ సేన: అభ్యర్థి ఎవరంటే.?

ఖైరతాబాద్‌ అసెంబ్లీ నియోజకవర్గానికి ఉప ఎన్నిక తధ్యం అని ఖరారైపోయింది. దీంతో ప్రధాన పార్టీలు ఎన్నికల వ్యూహ రచన, ఎత్తుగడలు, ఏర్పాట్లలో నిమగ్నమయ్యాయి. ఈ క్రమంలోనే తెలంగాణ రక్షణ సేన (టీఆర్ఎస్) పార్టీ కూడా ఈ ఎన్నికల బరిలోకి దిగాలని నిర్ణయించుకోవడం స్థానిక రాజకీయాల్లో చర్చనీయాంశంగా మారింది. రాబోయే ఉపఎన్నికలో తమ అభ్యర్థిని రంగంలోకి దించి పార్టీ సత్తా చాటాలని టీఆర్ఎస్ అధినేత్రి కల్వకుంట్ల కవిత నిర్ణయించారు. తొలుత ఖైరతాబాద్ బరిలో కల్వకుంట్ల కవిత దిగుతారని ప్రచారం జరిగినప్పటికీ.. టీఆర్ఎస్ గళాన్ని బలంగా వినిపించేందుకు పోటీలో టీఆర్ఎస్ ఉంటుందనీ, అయితే కవిత అభ్యర్థి కారనీ అంటున్నారు. ప్రణాళికలు రచిస్తోంది. నగర రాజకీయాల్లో తమ గళాన్ని గట్టిగా వినిపించేందుకు ఈ ఎన్నికను ఒక వేదికగా ఉపయోగించుకోవాలని ఆ పార్టీ భావిస్తున్నట్లు తెలుస్తోంది. నియోజకవర్గంలోని ప్రజా సమస్యలపై పోరాడటమే తమ ప్రధాన లక్ష్యమని, అధికార, ప్రతిపక్ష పార్టీల వైఫల్యాలను ప్రజల్లోకి తీసుకువెళ్లడానికి ఈ ఉపఎన్నిక సరైన వేదిక అని టీఆర్ఎస్ నాయకత్వం భావిస్తోంది. ప్రజల ఆశీస్సులతో ఈ ఎన్నికల్లో బలమైన పోటీ ఇస్తామని, స్థానిక ప్రజల సమస్యల పరిష్కారమే తమ ప్రధాన అజెండాగా ఉంటుందని టీఆర్ఎస్ చెబుతోంది. కాంగ్రెస్, బీఆర్ఎస్ మరియు బీజేపీ ఖైరతాబాద్ ఉప ఎన్నికలో విజయం కోసం వ్యూహాలు రచిస్తున్న తరుణంలో అనూహ్యంగా టీఆర్ఎస్ కూడా బరిలోకి దిగనున్నట్లు ప్రకటించడంతో పోటీ రసవత్తరం గా ఉంటుందని పరిశీలకులు విశ్లేషిస్తున్నారు. ఈ నియోజకవర్గంలో గత ఎన్నికల ఫలితాలు, ప్రస్తుత రాజకీయ వాతావరణం దృష్ట్యా బీఆర్ఎస్, కాంగ్రెస్, బీజేపీలు విజయంపై ధీమాతో ఉన్నాయి. ఈ నేపథ్యంలో టీఆర్ఎస్ బరిలోకి దిగడంతో సమీకరణాలు ఏ విధంగా మారతాయన్న దానిపై సర్వత్రా ఉత్కంఠ నెలకొంది. ఖైరతాబాద్ ఉప ఎన్నికకు ఎలక్షన్ కమిషన్ షెడ్యూల్ ప్రకటించిన తరువాత ప్రచార కార్యక్రమాలను వేగవంతం చేయాలని టీఆర్ఎస్ భావిస్తోంది. ప్రచారంలో భాగంగా వివిధ ప్రాంతాల్లో పర్యటించి, స్థానిక సమస్యలపై డిక్లరేషన్లు ప్రకటించాలని టీఆర్ఎస్ భావిస్తున్నట్లు తెలుస్తోంది. ప్రకటించే అవకాశం ఉందని తెలుస్తోంది. మొత్తం మీద టీఆర్ఎస్ బరిలోకి దిగడానికి నిర్ణయించుకోవడంతో ఖైరతాబాద్ ఉప ఎన్నికలో చతుర్ముఖ పోటీ అనివార్యం కావడంతో సర్వత్రా ఈ ఎన్నికపై ఆసక్తి ఉత్కంఠ వ్యక్తమౌతోంది. [Telangana Rakshana Sena, Khairatabad by Eection, Telangana Politics, BRS, Congress, BJP, TRS, Telugu One]

Published on: Sat Sep 26, 2026 5:43PM

వరుస ఎదురుదెబ్బలతో ఉక్కిరిబిక్కిరి: పుష్కరకాలంలో ఎన్నడూ లేనంతా ఎదురుగాలి.!

దేశ రాజకీయాకాశంలో గత కొంతకాలంగా ప్రధాని నరేంద్ర మోడీ నేతృత్వంలోని కేంద్ర ప్రభుత్వానికి వరుస ఎదురు దెబ్బలు తగులుతున్నాయి. ఒకదాని వెనుక ఒకటి అన్నట్లుగా సమస్యలు చుట్టుముడుతున్నాయి. రాజ్యాంగబద్ధ సంస్థల నిర్ణయాలు, ప్రతిపక్షాల నుంచి వస్తున్న విమర్శలు ప్రభుత్వానికి ఇబ్బందికరంగా మారుతున్నాయి. పుష్కరకాలంగా ఎన్నడూ లేని విధంగా మోడీ సర్కార్ డిఫెన్స్ లో పడుతోంది. రాజకీయంగానే కాకుండా, వ్యవస్థాగత అంశాలలోనూ మోడీ సర్కార్ సమస్యల సంక్షోభంలో కూరుకుపోతున్నది. నీట్ పరీక్ష పత్రం లీక్ కావడం నుంచి మొదలై.. తాజాగా ఎన్నికల సంఘంలో తలెత్తిన సంక్షోభం వరకూ వరుసగా జరుగుతున్న పరిణామాలు నైతికంగా మోడీ సర్కార్ ను బలహీనం చేశాయనడంలో సందేహం లేదు. నీట్ వ్యవహారాన్ని తీసుకుంటే.. నీట్ పేపర్ లీకేజీకి వ్యతిరేకంగా దేశ వ్యాప్తంగా నిరసనలు వ్యక్తమయ్యాయి. అప్పటి వరకూ మోడీ సర్కార్ ఘనంగా చెప్పుకుంటూ వచ్చిన పారదర్శకత ప్రశ్నార్థకమైంది. రాజ్యాంగ వ్యవస్థలు బలహీనపడ్డాయన్న వాదనకు బలం చేకూరింది. అంత వరకూ విపక్షాలు చేసే విమర్శలను సునాయాసంగా తిప్పికొట్టి పై చేయి సాధించిన మోడీ సర్కార్ నీటి విషయంలో సమాధానం చెప్పుకోలేక తడబడింది. వెనకడుగు వేసింది. ఇక తాజాగా ఎన్నికల సంఘం వ్యవహారశైలిపై వస్తున్న విమర్శలు, ఎన్నికల సంఘం కమిషనర్ల మధ్య విభేదాలు.. మోడీ సర్కార్ ను మరింత డిఫెన్స్ లో పడేశాయి. ఎన్నికల సంఘం పనితీరుపై వెల్లువెత్తుతున్న విమర్శలు మోడీ సర్కార్ అనుసరిస్తున్న విధానాలలోని డొల్లతనాన్నీ, ఆధిపత్య ధోరణినీ ప్రస్ఫుటం చేశాయి. ప్రధాన ఎన్నికల కమిషనర్ జ్ఞానేశ్ కుమార్ రాజీనామా డిమాండ్లు ఇప్పుడు హాట్ టాపిక్‌గా మారాయి. ఓటర్ల జాబితాల సవరణ, ఈవీఎంల పనితీరుపై అనుమానాలు వ్యక్తం చేస్తూ ప్రతిపక్షాలు చేస్తున్న పోరాటం మోడీ సర్కార్ పునాదులను కదిలిస్తున్న పరిస్థితి గోచరిస్తోంది. నీట్, ఎన్నికల సంఘం వివాదాలు కేంద్ర ప్రభుత్వ పతిష్టను మసకబార్చాయి. మరోవైపు వందేమాతరం వివాదం కూడా ప్రభుత్వానికి ఇబ్బందికరంగానే మారింది. పార్లమెంట్‌లో ఈ గీతాలాపనపై జరిగిన చర్చలు దుమారాన్ని రేపాయి. ఈ గీతాన్ని పూర్తిగా పాడాలనే నిబంధనలు తేవడం, చివరి చరణాలలోని పేర్లపై అభ్యంతరాలు వ్యక్తం కావడం దీనికి సంబంధించి కోర్టుల నుంచి వచ్చిన తీర్పులు, ప్రతికూల వ్యాఖ్యలు మోడీ ప్రభుత్వానికి తలనొప్పులు తెచ్చిపెట్టాయి. న్యాయస్థానాలు వ్యక్తం చేసిన అభిప్రాయాలు పాలకుల చర్యలకు అడ్డుకట్ట వేసేలా ఉన్నాయని పరిశీలకులు విశ్లేషిస్తున్నారు. ఈ మొత్తం పరిణామాల నేపథ్యంలో.. ప్రభుత్వం తరఫున వాదనలు వినిపించే తీరు కూడా వివాదాస్పదంగా మారి కొత్త చర్చకు తెరలేపింది. ఒకవైపు దేశాభివృద్ధి, మరోవైపు సాంస్కృతిక జాతీయవాదం అనే అజెండాతో సాగుతున్న మోడీ సర్కార్‌కు ఈ పరిణామాలు స్పీడ్ బ్రేకర్లుగా మారాయి. ఈ వరుస పరిణామాలు ముందుముందు మారనున్న రాజకీయ సమీకరణాలకు సంకేతాలుగా పరిశీలకులు విశ్లేషిస్తున్నారు. కేవలం సంఖ్యాబలం ఉందన్న ధీమాతో ఇష్ఠారీతిగా నిర్ణయాలు తీసుకోవడం, విధానాలు రూపొందించడం వల్లే ఈ పరిస్థితి ఏర్పడిందని అంటున్నారు. ఏ ప్రజలైతే చట్ట సభల్లో మోడీ సర్కార్ కు సంఖ్యాబలం ఇచ్చారో.. ఆ ప్రజలే ఇప్పుడు కేంద్ర విధానాలు, నిర్ణయాలను వ్యతిరేకిస్తున్నారు. ముందు ముందు ఈ వివాదాలు ఏ రూపందాలుస్తాయన్నది చూడాలి. మొత్తం మీద వరుసగా మూడు ఎన్నికలలో మోడీ సర్కార్ పై విశ్వాసం ఉంచి అధికారం కట్టబెట్టిన ప్రజ ఇప్పుడు.. అదే మోడీ సర్కార్ పై ఆగ్రహంతో రగిలిపోతోంది. ప్రజాభీష్ఠానికి విరుద్ధంగా నిర్ణయాలు తీసుకుంటే సహించేది లేదని కుండబద్దలు కొడుతోంది. ఇప్పుడీ సవాళ్లను మోడీ ఎలా ఎదుర్కొని అధిగమిస్తారన్నది ఆసక్తిగా మారింది. [Modi Government, Cisises, NEET Leak Controversy, Election Commission, Vandemataram Song, Opposition, Criticism, People Anger]

Published on: Sat Sep 26, 2026 4:47PM

సంక్షోభాలే అవకాశాలు: చంద్రబాబు క్రైసిస్ మ్యాన్.. లోకేష్ డోలో 250 మ్యాన్.!

ఆంధ్రప్రదేశ్ రాజకీయాల్లో ముఖ్యమంత్రి నారా చంద్రబాబు నాయుడుది దశాబ్దాల సుదీర్ఘ ప్రస్థానం. క్లిష్టమైన పరిస్థితులను ఎదుర్కొంటూ రాష్ట్రాన్ని ముందుకు నడిపించడంలో ఆయనకు ఆయనే సాటి. ఎంతటి సంక్షోభాన్నైనా సంయమనం కోల్పోకుండా అధిగమించడం, ఆ సంక్షోభాన్నే అవకాశంగా మలచుకుని ముందుకు సాగడం ఆయన నైజం. ఎంతటి క్షిష్టమైన సమస్యనైనా పరిష్కరించగలిగే నేర్పు, ఎంతటి సంక్షోభాన్నైనా తట్టుకునిముందుకు సాగే సామర్ధ్యం కారణంగానే ఆయనకు పొలిటికల్ సర్కిల్స్ లొ క్రైసిస్ మ్యాన్ అన్న గుర్తింపు వచ్చింది. ఇక ఇప్పుడు చంద్రబాబు తనయుడు, తెలుగుదేశం కార్యనిర్వాహక అధ్యక్షుడు, మంత్రి నారా లోకేష్ సైతం అదే బాటలో నడుస్తున్నారు. పారిశ్రామికవేత్తలు, ఇన్వెస్టర్ల సమస్యలను పరిష్కరించే విషయంలో లోకేష్ తనను తాను డోలో 650 మ్యాన్ గా ఆయన అభివర్ణించుకున్నారు. సాధారణంగా జ్వరం, ఒళ్లు నొప్పులు వంటి సమస్యలకు డోలో 650 తక్షణ ఉపశమనాన్ని ఇస్తుంది. ఇదే విషయాన్ని ఉదహరిస్తూ నారా లోకేష్ తాను కూడా పారిశ్రామిక రంగంలో అదే పాత్ర పోషిస్తున్నానని చమత్కరించారు. రాష్ట్రంలో పెట్టుబడులు పెట్టేందుకు వచ్చే పారిశ్రామికవేత్తలు, ఇన్వెస్టర్లకు ఇబ్బంది వస్తే.. తనకు ఫోన్ చేస్తారని, తక్షణమే ఆ సమస్యను పరిష్కరించేందుకు తాను ముందుంటానని లోకేష్ చెప్పుకొచ్చారు. తెలుగుదేశం కూటమి ప్రభుత్వం అధికారంలోకి వచ్చిన నాటి నుంచీ పారిశ్రామిక రంగం జోరందుకుంది. పెట్టుబడుల ప్రవాహం వరదనున తలపిస్తోంది. ఇదంతా లోకేష్ చొరవ ఫలితమే పరిశ్రమల ఏర్పాటులో ఎదురయ్యే అడ్డంకులను తొలగించడంలో, అధికారులతో సమన్వయం చేసుకుంటూ ముందుకు వెళ్లడంలో లోకేష్ అనితర సాధ్యమన్న రీతిలో ముందుకు సాగుతున్నారు. రాష్ట్రానికి పెట్టుబడులను ఆకర్షించడంతో పాటు, ఇప్పటికే ఒప్పందాలు కుదుర్చుకున్న ప్రాజెక్ట్‌లను గ్రౌండింగ్ చేసే దశలో ఎలాంటి జాప్యం జరగకుండా లోకేష్ స్వయంగా పర్యవేక్షిస్తూ, పనులను పరుగులెట్టిస్తున్నారు. ఇన్వెస్టర్లకు క్షేత్రస్థాయిలో ఎదురయ్యే సమస్యలను ఎలాంటి జాప్యం లేకుండా ఎప్పటికప్పుడు పరిష్కరిస్తూ, ఇన్వెస్టర్లలో భరోసా నింపుతున్నారు. పెట్టుబడుల సాధనే ధ్యేయంగా ఆయన అనుసరిస్తున్న విధానం పారిశ్రామిక వర్గాల ప్రశంసలు అందుకుంటోంది. వ్యాపార ప్రక్రియ వేగవంతంగా సాగేలా చూస్తూ, కొత్త అవకాశాలను సృష్టించడమే లక్ష్యంగా లోకేష్ అడుగులు వేస్తున్నారు. తండ్రి చంద్రబాబు నాయుడు రాజకీయ శైలి నుంచి లోకేష్ ఈ లక్షణాలను పుణికిపుచ్చుకున్నారన్న చర్చ జోరుగా సాగుతోంది. ప్రస్తుతం ఏపీలో సరికొత్త పారిశ్రామిక విధానాలు అమలవుతున్న తరుణంలో, ఇన్వెస్టర్లకు నారా లోకేష్ ఇస్తున్న భరోసా ఏపీ సర్వతోముఖాభివృద్ధికి దోహదపడుతుందని పరిశీలకులు విశ్లేషిస్తున్నారు. కేవలం రాజకీయ విమర్శలకు పరిమితం కాకుండా, రాష్ట్రానికి పరిశ్రమలను తీసుకు రావడంలోనూ, ఆ క్రమంలో ఏవైనా సమస్యలు ఎదురైతే వాటిని అక్కడికక్కడే పరిష్కరించడంలోనూ లోకేష్ చొరవ తండ్రి చంద్రబాబును మించి ఉంటుందని పరిశీలకులు చెబుతు న్నారు. లోకేష్ తనకు తాను తగిలించుకున్న డోలో 650 మ్యాన్ ట్యాగ్ ఆయనకు అతికినట్లు సరిపోయిందంటున్నారు. [AP CM CBN Crisis Man, Nara Lokesh, Dolo 650 Man, AP Investments, Investor Meet, Andhra Pradesh Industries, Investments, Troubleshoot, Telugu One]

Published on: Sat Sep 26, 2026 4:11PM

డిజిటల్ సీఎం నుంచి రైతు బాంధవుడి వరకూ: నారా చంద్రబాబు ప్రస్ధానం.!

తెలుగు రాష్ట్రాల్లో ఇన్ఫర్మేషన్ టెక్నాలజీ విప్లవానికి నాంది పలికి, హైదరాబాద్‌ను ప్రపంచ ఐటీ మ్యాప్‌లో నిలబెట్టిన నాయకుడిగా, దార్శనికుడిగా చంద్రబాబుకు తిరుగులేనిగుర్తింపు ఉంది. ఉమ్మడి ఆంధ్రప్రదేశ్ విభజన తర్వాత నవ్యాంధ్ర ప్రదేశ్ ముఖ్యమంత్రిగా బాధ్యతలు చేపట్టిన ఆయన, రాష్ట్ర సమగ్రాభివృద్ధి కోసం నిరంతరం శ్రమిస్తున్నారు. రాజకీయ ప్రత్యర్థులు సైతం ఆయనను టెక్నాలజీ పట్ల మక్కువ గల నేతగా అభివర్ణిస్తుంటారు. ఆయన దార్శనికతను అభినందిస్తారు. 2014లో నవ్యాంధ్రప్రదేశ్ తొలి ముఖ్యమంత్రిగా ఆయన పేరు తప్ప మరేమీ మిగలని ఆంధ్రప్రదేశ్ ను గాడిలో పెట్టేందుకు నిరంతరం శ్రమించారు. 2019 ఎన్నికలలో ఓటమి తరువాత పలు సంక్షోభ పరిస్థితులను ఎదుర్కొన్నారు. 2024 ఎన్నికలలో విజయం తరువాత.. చంద్రబాబు పని తీరులో సమూల మార్పు వచ్చింది. పరిశీలకులు ఆయన ప్రస్తుత పాలనను చంద్రబాబు 2.0 అంటున్నారు. ఏకకాలంలో టెక్నాలజీకి, వ్యవసాయానికీ, ఇరిగేషన్ కు ప్రాధాన్యత ఇస్తూ ముందుకు సాగుతున్నారు. వ్యవసాయ రంగానికి పెద్దపీఠ వేసేలా చంద్రబాబు 35 వేలకోట్ల రూపాయల అంచనాతో సాగునీటి రోడ్‌మ్యాప్‌ను ప్రకటించారు. దీని ద్వారా రాష్ట్రవ్యాప్తంగా పెండింగ్‌లో ఉన్న 36 సాగునీటి ప్రాజెక్టులను వేగంగా పూర్తి చేయాలని లక్ష్యంగా పెట్టుకున్నారు. అంతేకాకుండా.. దేశంలోనే తొలిసారిగా ఆంధ్రప్రదేశ్‌లో ఇరిగేషన్ అండ్ వాటర్ క్యాలెండర్ ను అందుబాటులోకి తెచ్చారు. ఈ విధానం ద్వారా అన్నదాతలు తమ పంటల సాగుకు సంబంధించి శాస్త్రీయంగా ముందస్తు ప్రణాళిక చేసుకునే అవకాశం లభిస్తుంది. ఈ ప్రణాళికలో ముఖ్యంగా కరువు పీడిత ప్రాంతమైన రాయలసీమకు చంద్రబాబు ప్రాధాన్యత ఇచ్చారు. హంద్రీ నీవా సుజల స్రవంతి, వెలిగొండ ప్రాజెక్టుల పనులను వేగవంతం చేసి, అదనంగా 52 టీఎంసీల నీటి నిల్వ సామర్థ్యాన్ని పెంచే దిశగా అడుగులు వేస్తున్నారు. దీనివల్ల దాదాపు 14 లక్షల ఎకరాలకు సాగునీరు అందనుంది. అదేవిధంగా, కృష్ణా-గోదావరి బేసిన్ పరిధిలో కాల్వల ఆధునీకరణ, నదుల అనుసంధాన పనులను కూడా వేగవంతం చేశారు. రైతులు లాభాలు గడించేందుకు వీలుగా రాయితీపై మైక్రో ఇరిగేషన్ విధానాన్ని ప్రోత్సహిస్తున్నారు. వర్షపాతం నమోదు, జలాశయాల నీటి మట్టాలు, నీటి వినియోగంపై ఎప్పటికప్పుడు నిఘా ఉంచేందుకు ఆర్టిఫిషియల్ ఇంటెలిజెన్స్ పరిజ్ఞానాన్ని ఉపయోగిస్తున్నారు. రైతు ఉత్పత్తిదారుల సంఘాల ద్వారా ప్రభుత్వ పథకాలను సమర్థవంతంగా అమలు చేయడం ద్వారా వ్యవసాయాన్ని మరింత లాభసాటిగా మార్చవచ్చని చంద్రబాబు ధీమాగా చెబుతున్నారు. గతంలో వైసీపీ చంద్రబాబుపై వేసిన వ్యవసాయ వ్యతిరేకి అనే ముద్రను చంద్రబాబు తన నిర్ణయాల ద్వారా పూర్తిగా చెరిపేశారు. టెక్నాలజీతో పాటు వ్యవసాయాన్ని సమాంతరంగా అభివృద్ధి చేస్తూ ఆయన తన కార్పొరేట్ ఇమేజ్‌ ను అలాగే కాపాడుకుంటూ.. అచ్చమైన రైతు నేతగా ట్రాన్స్ ఫారమ్ అయ్యారు. జాతీయ స్థాయి మీడియా సంస్థలు సైతం చంద్రబాబు నాయుడు తీసుకుంటున్న ఈ నిర్ణయాలను ప్రముఖంగా ప్రశంసిస్తున్నాయి. [Chandrababu Naidu, Digital CM, Transform, Farmer Friend, Andhra Pradesh agriculture, irrigation projects, Rayalaseema irrigation, AP news, Telugu One]

Published on: Sat Sep 26, 2026 3:34PM

ప్రతిపక్ష నేతగా రాహుల్ వైఫల్యం.. సీజేపీ చీఫ్ వైపు చూస్తున్న జనం.!

కాంగ్రెస్ అగ్రనేత, లోక్‌సభలో ప్రతిపక్ష నేత రాహుల్ గాంధీకి కాక్రోచ్ జనతా పార్టీ చీఫ్ రూపంలో సవాల్ ఎదురౌతోంది. ప్రతిపక్ష నేతగా రాహుల్ గాంధీ కేంద్రంలో అధికారంలో ఉన్న మోడీ సర్కార్ వైఫల్యాలను ఎండగట్టడంలో, నిలదీయడంలో విఫలమౌతున్నారన్న చర్చ గత కొంత కాలంగా రాజకీయవర్గాలలో విస్తృతంగా సాగుతోంది. ఈ నేపథ్యంలో సీజేపీ చీఫ్ అభిజిత్ దిప్కే దూకుడు రాజకీయాలతో జాతీయ స్థాయిలో మోడీ సర్కార్ ను నిలదీస్తున్నారు. కేంద్రం మెడలు వంచి ధర్మేంద్ర ప్రదాన్ చేత రాజీనామా చేయించగలిగారు. దీంతో రాహుల్ గాంధీ చేయాల్సిన ప్రధాన పోరాటాలను సీజేపీ చీఫ్ తన చేతుల్లోకి తీసుకుంటూ, మంచి ఫలితాలు సాధించగలుగుతున్నారన్న అభిప్రాయం జనబాహుల్యంలో గట్టిగా వ్యక్తమౌతోంది. రాజీవ్ గాంధీ విఫలమైన చోట అభిజిత్ దిప్కే విజయాలు సాధిస్తున్నారన్న అభిప్రాయం సర్వత్రా వ్యక్తమౌతోంది, ఇటీవల దేశవ్యాప్తంగా సంచలనం సృష్టించిన నీట్ వివాదంలో కేంద్ర విద్యాశాఖ మంత్రి ధర్మేంద్ర ప్రధాన్‌ రాజీనామా క్రెడిట్ మొత్తం సీజేపీ చీఫ్ అభిజిత్ దిప్కే ఖాతాలో పడటాన్ని పరిశీలకులు ఉదాహరణగా చూపుతున్నారు. విద్యాశాఖ మంత్రికి వ్యతిరేకంగా ఆందోళనలకు నాయకత్వం వహించి ఆయన రాజీనామా చేయక తప్పని అనివార్యతను కల్పించడంలో సీజేపీ ఉద్యమం సక్సెస్ అయ్యింది. అలాగే తాజాగా ఎన్నికల సంఘం ప్రధానాధికారి జ్ఞానేశ్ కుమార్‌ను లక్ష్యంగా చేసుకుంటూ సీజేపీ ఉద్యమానికి ఉపక్రమించింది. ఆయన రాజీనామాకు డెడ్ లైన్ విధించింది. వాస్తవంగా ఈ స్థాయి దూకుడు ప్రధాన ప్రతిపక్ష నేత రాహుల్ గాంధీలో కనిపించాలి. అయితే ఆ దూకుడు సీజేపీ చీఫ్ కనబరుస్తున్నారు. ఈవీఎంలు, అవినీతి, ఎన్నికల నిర్వహణలో లోపాలపై వచ్చే నెల 2 నుంచి దేశ వ్యాప్తం ఆందోళనకు సీజేపీ పీలుపునిచ్చిన సంగతి విదితమే. ఈ ఆందోళన ప్రకటిస్తూ.. సీజేపీ చీఫ్.. ఎన్నికలు రిగ్గింగ్ అవుతున్నాయని తెలిసినా, ప్రతిపక్షాలు మళ్లీ అవే ఎన్నికల్లో పాల్గొంటూ ఆ పద్ధతికి చట్టబద్ధత ఎందుకు కల్పిస్తున్నాయని ప్రశ్నించి సంచలనం సృష్టించారు. ఓట్లు చోరీకి గురవుతున్నా, ఎమ్మెల్యేలు, ఎంపీలు కొనుగోలుకు గురవుతున్నా, పార్టీలు చీలిపోతున్నా కేవలం ఉనికి కోసమే పోరాడుతున్నారా అని నిలదీశారు. ప్రస్తుత జాతీయ రాజకీయ శూన్యతను భర్తీ చేసేలా సీజేపీ ముందుకు సాగుతోందన్న అభిప్రాయం రాజకీయ పరిశీలకుల్లో బలంగా వ్యక్తమౌతోంది. ఇక్కడే ప్రతిపక్ష నేతగా రాహుల్ వైఫల్యాలు మరింత ప్రస్ఫుటంగా తెరపైకి వస్తున్నాయి. [Rahul Gandhi, CJP Chief, Abhijeet Dipke, Election Commissioner, Opposition Leader, Indian Politics, Challange, Cacroch Janata Party]

Published on: Sat Sep 26, 2026 11:28AM

Pawan Kalyan: సమక్షంలో జనసేనలో చేరిన వైసీపీ కీలక నేతలు.!

వైసీపీకి చెందిన పలువురు నాయకులు జనసేన పార్టీలో చేరారు. జనసేన పార్టీ సిద్ధాంతాలు, పార్టీ అధ్యక్షుడు, ఉప ముఖ్యమంత్రి పవన్ కళ్యాణ్ నాయకత్వం, ప్రభుత్వం చేపడుతున్న పలు కార్యక్రమాలకు ఆకర్షితులై పార్టీలో చేరినట్లు వారు తెలిపారు. శుక్రవారం పవన్ కళ్యాణ్ సమక్షంలో జరిగిన కార్యక్రమంలో తుని నియోజకవర్గానికి చెందిన వైసీపీ నాయకుడు యనమల కృష్ణుడు, హిందూపురం సీనియర్ వైసీపీ నాయకుడు నవీన్ నిశ్చల్ జనసేన కండువా కప్పుకున్నారు. వీరితో పాటు వైసీపీ నాయకుడు, ఏలూరు డీసీసీబీ మాజీ ఛైర్మన్ పీవీఎల్ఎన్ నరసింహరాజు, కందుకూరు, సర్వేపల్లి, కనిగిరి నియోజకవర్గాల వైసీపీ పరిశీలకుడు మన్నెమాల సుకుమార్ రెడ్డి, కాంగ్రెస్ నాయకురాలు అయితాబత్తుల సుభాషిణి కూడా జనసేనలో చేరారు.అలాగే తుని వైసీపీ నాయకుడు పొలినాటి శేషగిరిరావు, తణుకు వైసీపీ నాయకుడు దిరిశాల కృష్ణ శ్రీనివాస్, శ్రీకాళహస్తికి చెందిన వైసీపీ నాయకుడు సత్రవాడ ప్రవీణ్, మిద్దెల హరి, ముమ్మడివరం మాజీ ఏఎంసీ ఛైర్మన్ కుడిపూడి శివన్నారాయణ, నరసరావుపేటకు చెందిన ఏలూరి ప్రసాద్ జనసేనలో చేరారు. ఈ సందర్భంగా పవన్ కళ్యాణ్ వారికి జనసేన కండువాలు కప్పి పార్టీలోకి ఆహ్వానించారు. పార్టీ సిద్ధాంతాలను ప్రజల్లోకి తీసుకెళ్లడంతో పాటు, అందరినీ కలుపుకొని పార్టీ బలోపేతానికి కృషి చేయాలని సూచించారు. ఒకే వేదికపై పలువురు నాయకులు జనసేనలో చేరడం ఆయా నియోజకవర్గాల్లో రాజకీయంగా చర్చనీయాంశంగా మారింది. తాజా చేరికలు స్థానికంగా పార్టీ రాజకీయ సమీకరణాలపై ఎలాంటి ప్రభావం చూపుతాయన్నది ఆసక్తికరంగా మారింది. [ Pawan Kalyan, Jana Sena Party, YSRCP, YSRCP Leaders, Jana Sena Joinings, Political Joinings, Andhra Pradesh Politics, Pawan Kalyan Leadership, Yanamala Krishnudu, Naveen Nischal, PVLN Narasimha Raju, Sukumar Reddy ]

Published on: Fri Sep 25, 2026 9:23PM

అనర్హత వేట్లు కాదు: ఎన్నికల వ్యవస్థలో మార్పు రావాలి.!

ప్రస్తుత రాజకీయాలలో పార్టీ ఫిరాయింపులు అన్నది రివాజుగా మారిపోయింది. ఉదయం ఒక పార్టీ, సాయంత్రానికి మరో పార్టీ.. తెల్లారేసరికి మరో పరా్టీ అన్నట్లుగా రంగులు మార్చేయడం సర్వసాధారణమైపోయింది. ఇందులోంచే ఆయారం, గయారాం అన్న నానుడి పుట్టిందని చెప్పవచ్చు. ఒక పార్టీ తరఫున చట్ట సభకు ఎన్నికైన ప్రజాప్రతినిధులు, తమను ఎన్నుకున్న ప్రజల మనోభావాలను పట్టించుకోకుండా, నైతికత గురించి ఇసుమంతైనా సంకోచించకుండా రాత్రికి రాత్రి మరో పార్టీలోకి జంప్ జిలానీ అన్నట్లుగా దూకేస్తున్నారు. దీనివల్ల ప్రజాస్వామ్య వ్యవస్థలో నైతికత, విలువలు పలుచన అయిపోతున్నాయి. ఏ పార్టీ నుంచి గెలిచామనే అంశంతో సంబంధం లేకుండా, వ్యక్తిగత ప్రయోజనాలు, అధికార కాంక్ష, రాజకీయ లబ్ధికి మాత్రమే పెద్ద పీట వేస్తున్న నేతలే ఎక్కువగా కనిపిస్తున్నారు తాజాగా పార్టీ ఫిరాయింపు నిరోధక చట్టం కింద ఖైరతాబాద్ ఎమ్మెల్యే దానం నాగేందర్ పై పడిన అనర్హత వేటు.. మరో సారి రాజకీయాలలో పార్టీ ఫిరాయింపులు, నైతిక విలువలపై మరో సారి చర్చకు తెరలేపింది. ఒక పార్టీ గుర్తుపై శాసనసభకు ప్రాతినిధ్యం వహిస్తూ, మరో పార్టీ తరఫున పోటీ చేయడంతో దానంపై అనర్హత వేటు పడింది. ఇది దేశ వ్యాప్తంగా పార్టీ ఫిరాయింపులకు పాల్పడే నేతలకు హెచ్చరిక అనడంలో సందేహంలేదు. అయితే.. ఈ సందర్భంగా కేవలం ఫిరాయింపులపైనే కాకుండా ఎన్నికల వ్యవస్థలోని గూడుకట్టుకుని పోయిన లోపాలు, లొసుగుల గురించి కూడా చర్చ జరగాల్సిన అవసరం ఎంతైనా ఉంది. ఎందుకంటే.. ప్రస్తుత ఎన్నికల తీరు ప్రజాస్వామ్య స్ఫూర్తికి భిన్నంగా ఉందన్న అభిప్రాయం ప్రజాస్వామ్య వాదులు వ్యక్తం చేస్తున్నారు. ఎన్నికలు ఖరీదైన వ్యవహారంగా మారిపోయి.. సామాన్యుడికి భాగస్వామ్యం లేని తంతుగా తయారయ్యాయి. ఎన్నికలలో పోటీ చేయాలంటే.. ఎన్నివందల కోట్లు ఖర్చు పెట్టగలరు? అన్న ప్రశ్న ఎదుర్కోవలసి వస్తున్న పరిస్థితి ప్రస్తుతం నెలకొని ఉంది. ఎలాంటి ప్రలోభాలు లేకుండా నిష్పక్షపాతంగా ఓటు వేయాల్సిన ఓటర్లు సైతం డబ్బులు, వస్తువుల పంపిణీని ఆశించే స్థాయికి దిగజారేలా, కాదు కాదు దిగజార్చేలా ఎన్నికల తీరు మారిపోయింది. నిజాయితీగా పేద ప్రజలకు సేవ చేయాలనే తపన ఉన్నవారు ఎన్నికల వ్యయాన్ని తట్టుకోలేక ఈ ప్రక్రియకు దూరం అవుతున్నారు. మరోవైపు.. సాంకేతికత ఎన్నికల ప్రచార శైలిని పూర్తిగా మార్చేసింది. కార్పొరేట్ సంస్థలు, పెద్ద వ్యాపారవేత్తలు, ప్రొఫెషనల్ వ్యూహకర్తలు రాజకీయాలను శాసించే పరిస్థితి నెలకొంది. సోషల్ మీడియా వేదికగా ప్రత్యర్థులపై అసత్య ప్రచారాలు చేయడం, తప్పుడు సమాచారాన్ని ప్రజల్లోకి చొప్పించడం మొత్తంగా వాతావరణాన్ని కలుషితం చేస్తోంది. ఏఐ వంటి సాంకేతికతో నిజం, అబద్ధం మద్య గీత చెరిగిపోయినట్లైంది. నేరచరిత్ర కలిగిన అభ్యర్థులు చట్టసభల్లోకి ప్రవేశిస్తున్నారనే విషయాన్ని వివిధ స్వచ్ఛంద సంస్థలు ఎప్పకటికప్పుడు నివేదికల ద్వారా హెచ్చరిస్తూనే ఉన్నా.. వాకిరి నిరోధించే యంత్రాంగం నిర్వీర్యమైపోయింది. ఎన్నికల సంఘం ప్రేక్షక పాత్రకే పరిమితమైపోయిన పరిస్థితి నెలకొంది. ఈ పరిస్థితి మారకుండా, చట్టసభల్లో అనర్హత వేటుల వల్ల పెద్దగా ప్రయోజనం ఉండదు. ఎన్నికల వ్యవస్థలో సమూల ప్రక్షాళన జరగాల్సి ఉంది. అభ్యర్థుల ఎంపిక, ఎన్నికల ఖర్చు కట్టడి, ప్రలోభాలకు తెరదించడం లాంటి చర్యల ద్వారానే ప్రజాస్వామ్య స్ఫూర్తి పరిఢవిల్లుతుంది. [Defection, Danam Nagender Disqualification, Party Jump Leaders, AAyaram GayaRam, Election Expenses, Telugu One]

Published on: Fri Sep 25, 2026 4:22PM

పవన్ వంగవీటి భేటీ: సంకేతమేంటి?

స్థానిక ఎన్నికల వేళ.. ఆంధ్రప్రదేశ్ రాజకీయాలలో కీలక పరిణామం చోటు చేసుకుంది. తెలుగుదేశం నాయకుడు, మాజీ ఎమ్మెల్యే వంగవీటి రాధాకృష్ణ జనసేన అధినేత, రాష్ట్ర ఉప ముఖ్యమంత్రి పవన్ కళ్యాణ్‌తో మంగళగిరిలోని ఆయన క్యాంపు కార్యాలయంలో భేటీ కావడం పొలిటికల్ హీట్ ను ఒక్కసారిగా పెంచేసింది. ఈ భేటీ కేవలం మర్యాదపూర్వక సమావేశమే అని ఇటు వంగవీటి రాధా, అటు పవన్ కల్యాణ్ చెబుతున్నప్పటికీ..రాష్ట్రంలో రాజకీయ పరిస్థితుల నేపథ్యంలో వీరిరువురి భేటీ ప్రాధాన్యత సంతరించుకుంది. గత కొంతకాలంగా ప్రత్యక్ష రాజకీయాల్లో ఒకింత జోరు తగ్గించిన వంగవీటి రాధా.. ఉన్నట్టుండి జనసేనానిని తో భేటీ అవ్వడం, అదీ రాష్ట్రంలో స్థానిక ఎన్నికల వేడి రగిలిన సమయంలో కలవడం వెనుక పక్కా వ్యూహం ఉందని పరిశీలకులు విశ్లేషిస్తున్నారు. ఉమ్మడి కృష్ణా జిల్లాతో పాటు విజయవాడ రాజకీయాల్లో పట్టు సాధించే దిశగా కూటమి పార్టీలు అనుసరించాల్సిన వ్యూహాలపై ఈ భేటీలో చర్చ జరిగిందని అంటున్నారు. అలాగే రాష్ట్రంలో మారుతున్న రాజకీయ సమీకరణాలు, క్షేత్రస్థాయిలో పార్టీల బలాబలాలు, రాబోయే స్థానిక సంస్థల ఎన్నికల్లో అనుసరించాల్సిన వ్యూహాలపై ఇరువురూ ముచ్చటించుకున్నట్లు చెబుతున్నారు. మొత్తం మీద స్థానిక సంస్థల ఎన్నికల వేళ పవన్ కల్యాణ్, వంగవీటి రంగా భేటీ రాజకీయంగా అత్యంత ప్రాధాన్యత సంతరించుకుంది. ఈ భేటీ స్థానక సమరంలో ఏ మేరకు ప్రభావం చూపుతుందన్న చర్చ మొదలైంది. [Pawan Kalyan, Vangaveeti Radha Krishna, AP Local Body Elections, Mangalagiri Camp office, Janasena Party, AP Politics, Telugu One]

Published on: Fri Sep 25, 2026 3:47PM

ఖైరతాబాద్ బరిలో కల్వకుంట్ల కవిత: కాంగ్రెస్, బీఆర్ఎస్ కు చెమటలు తథ్యం.!

తెలంగాణ రాజకీయ రంగంలో ప్రస్తుతం ఖైరతాబాద్ అసెంబ్లీ నియోజకవర్గ ఉపఎన్నిక హాట్ టాపిక్ గా మారింది. తెలంగాణ రాజధాని హైదరాబాద్ నడిబొడ్డున ఉన్న ఈ నియోజకవర్గంలో రాబోయే ఉపఎన్నికలో కవిత బరిలోకి దిగనున్నారన్న ప్రచారం జోరుగా సాగుతోంది. బీఆర్ఎస్ నుంచి బయటకు వచ్చి తెలంగాణ రక్షణ సేన పేర సొంత పార్టీ ఏర్పాటు చేసిన కల్వకుంట్ల కవిత.. ఏకకాలంలో ఇటు రేవంత్ సర్కార్ ను, అటు అధికారంలో ఉండగా బీఆర్ఎస్ వైఫల్యాలనూ ఎండగడుతున్నారు. దీంతో ఖైరతాబాద్ ఉపఎన్నిక బరిలో కల్వకుంట్ల కవిత దిగితే రాజకీయం రసకందాయంలో పడినట్లేనని పరిశీలకులు విశ్లేషిస్తున్నారు. ఫిరాయింపుల నిరోధక చట్టం కింద దానం నాగేందర్ సభ్యత్వం రద్దు కావడంతో ఖైరతాబాద్ ఉప ఎన్నిక అనివార్యమైంది. ఈ నేపథ్యంలో ప్రధాన రాజకీయ పార్టీలైన కాంగ్రెస్, బీఆర్ఎస్, బీజేపీలు ఈ నియోజకవర్గంలో పాగా వేయడానికి వ్యూహాలు సిద్ధం చేసుకుంటున్నాయి. వ్యూహాలను సిద్ధం చేసుకునే పనిలో పడ్డాయి. ఈ నేపథ్యంలోనే తెలంగాణ రక్షణ సేన అభ్యర్థిగా కల్వకుంట్ల కవిత రంగంలోకి దిగనున్నారన్న వార్త పొలిటికల్ గా సంచలనంగా మారింది. హైదరాబాద్ మహానగర పరిధిలో ఖైరతాబాద్ నియోజకవర్గం నుంచి బరిలోకి దిగడం ద్వారా కల్వకుంట్ల కవిత రాజకీయాల్లో తన ప్రభావం చాటేందుకు రెడీ అయ్యారంటున్నారు. అంతే కాకుండా కేసీఆర్ కుమార్తె కవిత టీఆర్ఎస్ (తెలంగాణ రక్షణ సేన తరఫున ప్రత్యక్ష ఎన్నికల బరిలో నిలిస్తే, ఈ ఉపఎన్నిక రాష్ట్ర స్థాయిలోనే కాకుండా జాతీయ స్థాయిలో కూడా ప్రాధాన్యత సంతరించుకునే అవకాశాలు మెండుగా ఉన్నాయి. గత కొంతకాలంగా రాష్ట్ర రాజకీయాల్లో చోటుచేసుకుంటున్న నాటకీయ పరిణామాలు, కుటుంబ రాజకీయాల నేపథ్యంలో కవిత ఎలాంటి నిర్ణయం తీసుకుంటారనేది ఆసక్తికరంగా మారింది. కవిత రంగంలోకి దిగడం అంటూ జరిగితే ఖైరతాబాద్ ఉప ఎన్నిక రసవత్తరంగా మారుతుందని పరిశీలకులు విశ్లేషిస్తున్నారు. ఆమె అభ్యర్థిగా రంగంలో ఉంటే.. అధికార కాంగ్రెస్ కు, ప్రతిపక్ష బీఆర్ఎస్ కూ కూడా గట్టి పోటీ ఇవ్వడమే కాకుండా, ఆయా పార్టీల విజయావకాశాలపై ప్రభావం పడటం ఖాయమని పరిశీలకులు విశ్లేషిస్తున్నారు. [Khairatabad Bypoll, Kavitha Kalvakuntla, Contest, Danam Nagender disqualification, Telangana politics, Khairatabad assembly constituency, Telangana news, Telugu One]

Published on: Fri Sep 25, 2026 3:31PM