Andhra Pradesh Analytical News | Political Analysis

ఎన్నికల సంఘంపై జగన్ ట్వీట్: ద్వంద్వ వైఖరి అంటూ విపక్షాల విమర్శ.!

ఎన్నికల సంఘానికి సంబంధించిన అంశంపై వైసీపీ అధినేత జగన్ వ్యాఖ్యలు ఆయన ద్వంద్వ వైఖరికీ, ద్వైదీ భావానికీ అద్దం పట్టాయి. ఎన్నికల సంఘం వ్యవహారాల్లో పారదర్శకత, స్వతంత్రత కోసం చట్ట సవరణ అవసరమంటూ సామాజిక మాధ్యమ వేదికగా ఆయన షేర్ చేసిన ట్వీట్ పెద్ద ఎత్తున చర్చకు దారి తీసింది. కేంద్రంలోని బీజేపీ ప్రభుత్వానికి పార్లమెంటులో మద్దతు ఇస్తూ.. బయట మాత్రం వ్యతిరేకిస్తున్నట్లు కనిపించేందుకు ఆయన చేస్తున్న ప్రయత్నం ఈ ట్వీట్ కళ్లకు కట్టింది. జగన్ మొదటి నుంచీ ఇదే వైఖరి అవలంబిస్తున్నారంటూ విమర్శలు వెల్లువెత్తుతున్నాయి. కేంద్రంలో అధికారంలో ఉన్న బీజేపీ నేతృత్వంలోని ఎన్డీయే ప్రభుత్వానికి వ్యతిరేకంగా ఏ సందర్భంలోనూ ఆ పార్టీ నేతలు వ్యతిరేకించలేదని గుర్తు చేస్తున్నారు. ఇప్పుడు కూడా ఎన్నికల సంఘానికి సంబంధించి చట్ట సవరణ చేయాలంటూ జగన్ చేసిన ట్వీట్ పై బీజేపీయేతర పార్టీల నుంచి పెద్ద ఎత్తున వ్యతిరేకత వ్యక్తమౌతోంది. ఇదే విషయాన్ని తృణమూల్ కాంగ్రెస్ ఎంపీ మహువా మొయిత్రా ఎత్తి చూపుతూ జగన్ ను నిలదీశారు. కేంద్ర ప్రభుత్వానికి పార్లమెంటులో అన్ని విషయాలలోనూ అనుకూలంగా వ్యవహరిస్తూ.. బయట మాత్రం వ్యతిరేకిస్తున్నట్లు కనిపించే ప్రయత్నాలను మానుకోవాలని సూచించారు. జగన్ రెండు నాలుకల ధోరణితో వ్యవహరిస్తున్నారంటూ సోషల్ మీడియా వేదికగా విమర్శలు గుప్పించారు. జగన్ చేసిన ట్వీట్ కు ఏ ఒక్క రాజకీయ పార్టీ నుంచీ కూడా సానుకూల స్పందన రాకపోవడం పొలిటికల్ సర్కిల్స్ లో చర్చకు దారి తీసింది. ప్రతిపక్షాలు ఎన్నికల సంఘం విషయంలో ఏ డిమాండ్ అయితే చేస్తున్నాయో అదే డిమాండ్ జగన్ చేసినప్పటికీ ఫలితం లేకుండా పోయింది. జగన్ ట్వీట్ ను స్వాగతించడానికి ఏ పార్టీ ముందుకు రావడంలేదు. దీంతో జాతీయ రాజకీయాలలో జగన్ స్థానం ఏమిటి? ఎక్కడ అన్న ప్రశ్నలు తెరమీదకు వచ్చాయి. జాతీయ స్థాయిలో జగన్ అసలు ఏ పొలిటికల్ కూటమి వైపు ఉన్నారు. ఆయనను కలుపుకుని పోవడానికి ఏ కూటమి సిద్ధంగా ఉందన్న ప్రశ్నలకు.. తాజాగా జగన్ ఎన్నికల సంఘం విషయంలో చట్టసవరణ అంటూ చేసిన వ్యాఖ్యలకు వచ్చిన స్పందనను బట్టి జాతీయ స్థాయిలో జగన్ ఏకాకి అని విస్పష్టంగా అర్థమౌతోందని పరిశీలకులు విశ్లేషిస్తున్నారు. ఒకవైపు కేంద్రంపై విమర్శలు చేస్తూ.. మరోవైపు కేంద్ర ప్రభుత్వానికి మద్దతు నిలిచిన విషయాలను నెటిజనులు గుర్తు చేస్తూ జగన్ ద్వంద్వ వైఖరిని ఎండగడుతున్నారు. [YS Jagan, Election Commission Controversy, Mahua Moitra, National Politics, YCP chief tweet, Political Support, Double Standards, Telugu One]

Published on: Sat Sep 26, 2026 11:05AM

వామపక్షాల రౌండ్ టేబుల్ కాన్ఫరెన్స్: కరవు పరిస్థితులపై చర్చ.. జగన్ హాజరయ్యేనా?

రాష్ట్రంలో కరువు పరిస్థితులపై చర్చించేందుకు అఖిలపక్షాన్ని కలుపుకునిపోయే క్రమంలో సీపీఐ వర్గాలు కీలక అడుగు వేశాయి. ఇందులో భాగంగానే వైసీపీ అధినేత, మాజీ ముఖ్యమంత్రి జగన్ ను సీపీఐ నేతలు రౌండ్‌టేబుల్ సమావేశానికి ఆహ్వానం పంపారు. గత దశాన్నర కాలంగా ఏ పార్టీతోనూ పొత్తులు లేకుండా, సొంత బలాన్ని నమ్ముకుంటూ పూర్తిగా స్వతంత్రంగా రాజకీయాలు నడుపుతూ వస్తున్న జగన్‌ ఈ రౌండ్ టేబుల్ కాన్ఫరెన్స్ కు హాజరౌతారా లేదా అన్న చర్చ పొలిటికల్ సర్కిల్స్ లో జోరుగా సాగుతోంది. తాడేపల్లిలోని వైసీపీ కేంద్ర కార్యాలయంలో సీపీఐ సీనియర్ నాయకులు వైఎస్ జగన్‌ను మర్యాదపూర్వకంగా కలిసి, శనివారం (సెప్టెంబర్ 26) విజయవాడలో జరగనున్న రౌండ్‌టేబుల్ సమావేశానికి హాజరుకావాల్సిందిగా కోరారు. ఏపీలో ప్రస్తుతం నెలకొన్న వర్షాభావ పరిస్థితులు, రైతాంగం ఎదుర్కొంటున్న ఇబ్బందులు, తాగునీటి సమస్య వంటి సమస్యలపై ఈ రౌండ్ టేబుల్ సమావేశంలో చర్చించేందుకు, . ప్రజా సమస్యల పరిష్కారం కోసం రాజకీయ పక్షాలను ఒకే వేదికపైకి తీసుకురావాలనే ఉద్దేశంతో ఈ కార్యక్రమాన్నిఏర్పాటు చేసినట్లు జగన్ కు వారు వివరించారు. 2024 ఎన్నికలలో ఘోర పరాజయం తరువాత వైసీపీ రాష్ట్రంలో రాజకీయ ఉనికిని కాపాడుకోవడానికి శతధా ప్రయత్నిస్తోంది. ఈ తరుణంలో ప్రజా సమస్యల ప్రాతిపదికన జరిగే వామపక్షాలు ఏర్పాటు చేసిన రౌండ్ టేబుల్ కాన్ఫరెన్స్ లో పాల్గొనడం ఆ పార్టీకి రాజకీయంగా ఒకింత సానుకూలత వస్తుందని పరిశీలకులు విశ్లేషిస్తున్నారు. అయితే వైఎస్ జగన్ ఇతర పార్టీలతో కలిసి ఉమ్మడి కార్యాచరణలో భాగస్వామ్యమయ్యే పరిస్థితి ఉందా అన్న అనుమానాలు రాజకీయవర్గాలలో వ్యక్తం అవవుతున్నాయి. తన 15 ఏళ్ల రాజకీయ ప్రస్థానంలో ఇంత వరకూ జగన్ ఎవరితోనూ రాజకీయ ఒప్పందాలు లేదా ఉమ్మడి వేదికలను పంచుకున్న దాఖలాలు లేవు. ఈ నేపథ్యంలో వామపక్షాల నుంచి రౌండ్ టేబుల్ కాన్ఫరెన్స్ కు అందిన ఆహ్వానాన్ని ఆయన మన్నిస్తారా అన్న అనుమానాలు సహజంగానే పరిశీలకుల్లోనూ, వైపీపీ వర్గాల్లోనూ కూడా వ్యక్తమౌతున్నాయి. [CPI Round Table Conference, YS Jagan Mohan Reddy, Invitation , YCP, Andhra Pradesh Drought, Vijayawada, Telugu One]

Published on: Fri Sep 25, 2026 2:30PM

మద్యం కుంభకోణం దర్యాప్తు వేగం: జగన్ లో పెరుగుతున్న భయం.. కేంద్ర పెద్దలను శరణు జొచ్చే ప్రయత్నం.?

ఆంధ్రప్రదేశ్ మద్యం కుంభకోణం కేసు జగన్ మెడకు చుట్టుకుంటోందా? ఈ కేసు దర్యాప్తులో ఈడీ దూకుడు, విచారణలో జగన్ సన్నిహితులు వెల్లడిస్తున్న వివరాల మేరకు ఈ కుంభకోణంలో అంతిమ లబ్ధిదారు జగనే అన్న అనుమానాలు పెంచేవిగానే ఉన్నాయని పరిశీలకులు అంటున్నారు. దీంతో ఈడీ దర్యాప్తు ఏ క్షణంలోనైనా తాడేపల్లి ప్యాలెస్ తలుపుతట్టే అవకాశాలున్నాయన్న అభిప్రాయం పరిశీలకులు వ్యక్తం చేస్తున్నారు. ఈ నేపథ్యంలోనే ఇటీవలి కాలంలో జగన్ వ్యవహరిస్తున్న తీరు ఆయనలో భయాన్నీ, కంగారునూ ఎత్తి చూపుతోందని పరిశీలకులు వ్యక్తం చేస్తున్నారు. చట్టపరమైన ఉచ్చు నుంచి తప్పించుకోవడానికి ఆయన డిస్పరేట్ గా దారులు వెతుక్కుంటున్నట్లు కనిపిస్తోందంటున్నారు. డీఎస్సీ అవకతవకల పేర నిరుద్యోగులను రెచ్చగొట్టి మద్యం కుంభకోణంలో వెలుగులోకి వస్తున్న వాస్తవాల నుంచి ప్రజల దృష్టి మళ్లించే యత్నంగానే పరిశీలకులు చెబుతున్నారు. అంతే కాకుండా రాజ్ భవన్‌కు పరుగులెత్తి గవర్నర్‌కు వినతిపత్రాలు సమర్పించడం వంటివి ఆయనలోని భయాన్నీ కంగారునూ ఎత్తి చూపుతున్నాయంటున్నారు. జగన్ హయాంలో జరిగిన ఆంధ్రప్రదేశ్ మద్యం కుంభకోణం వ్యవహారంలో సిట్, ఈడీలు ఏకకాలంగా ేస్తున్న దర్యాప్తు ఈ కుంభకోణం మూలల వద్దకు వేగంగా చేరుతంది. ముఖ్యంగా ఈడీ దర్యాప్తు వేగం..ఈ కుంభకోణలో మనీ ట్రయల్ చిక్కుముడులను విప్పుతోంది. ఈ వ్యవహారంలో దాదాపుగా ఈడీ దర్యాప్తు కొలిక్కి వచ్చేసినట్లేని పరిశీలకులు అంచనా వేస్తున్నారు. ఈ నేపథ్యంలోనే దర్యాప్తు అధికారులు తాడేపల్లి ప్యాలెస్ తలుపు తట్టడం ఇంకెంతో దూరంలో లేదన్న భావన సర్వత్రా వ్యక్తం అవుతోంది. ముందుగా మద్యం కుంభకోణం వ్యవహారంలో ఆరథిక వ్యవహారాలను చక్కబెట్టిన, జగన్‌కు అత్యంత సన్నిహితుడు, సమీప బంధువు అయిన అనిల్ రెడ్డి పాత్రపై దర్యాప్తు సంస్థలు దృష్టి పెట్టాయని విశ్వసనీయంగా తెలుస్తోంది. ఈ కుంభకోణంలో ముడుపుల సేకరణ, వాటిని హవాలా మార్గాల్లోకి మళ్లించడం వెనుక కీలక సూత్రధారిగా భావిస్తున్న అనిల్ రెడ్డిని ఈడీ ఏ క్షణంలోనైనా విచారణకు పిలవడమో, అదుపులోకి తీసుకోవడమో జరుగుతుందన్న ప్రచారం జోరుగా సాగుతోంది. ఈ నేపథ్యంలోనే స్వీయరక్షణ కోసం జగన్ దూకుడు ప్రదర్శిస్తూ ప్రభుత్వంపై విమర్శల దాడిని తీవ్రం చేశారంటున్నారు. అదే సమయంలో కేంద్ర పెద్దల కరుణా కటాక్షాల కోసం కూడా తీవ్రంగా ప్రయత్నిస్తున్నారని అంటున్నారు. గత నెలలో హస్తిన వెళ్లి పెద్దలను ప్రసన్నం చేసుకునే ప్రయత్నం చేసినప్పటికీ, అది ఫలించ లేదు. కేంద్ర పెద్దల అప్పాయింట్ మెంట్ దొరకకపోవడంతో జగన్ హస్తిన పర్యటనకు వెళ్లలేదు. ఇక ఇప్పుడు రిలయన్స్ గ్రూప్ ప్రతినిధి పరిమళ్ నత్వానీ ద్వారా కేంద్ర పెద్దలను శరణు జొచ్చే ప్రయత్నాలు జగన్ మ ముమ్మరం చేశారంటున్నారు. పరిమళ్ నత్వానీ ఎందుకంటే.. జగన్ హయాంలో పరిమళ్ నత్వానీని రాజ్యసభకు ఎంపిక చేశారు. అందుకే ఇటీవల బెంగళూరులో జగన్ ఆయనతో భేటీ అయ్యారని చెబుతున్నారు. [AP Liquor Scam, YS Jagan Mohan Reddy, Enforcement Directorate, Andhra Pradesh Politics, YCP Tenure, Telugu One]

Published on: Thu Sep 24, 2026 6:04PM

సజ్జల సర్దేసుకుంటున్నారా: వైసీపీలో ఏం జరుగుతోంది.?

స్థానిక ఎన్నికల ముంగిట వైసీపీలో అంతర్గత సంక్షోభం ముదిరి పాకాన పడిందా? అంటే పరిశీలకులే కాదు, విశ్లేషకులు సైతం ఔననే అంటున్నారు. ఇందుకు తార్కానంగా ఇటీవలి కాలంలో మీడియాకు ముఖం చాటేయడమే కాకుండా, పార్టీ వ్యవహారాల్లో కూడా అంటీముట్టనట్లు వ్యవహరిస్తున్న సజ్జల తీరును వారు ఉదహరిస్తున్నారు. ఇటీవలి కాలంలో సజ్జల సైలెన్స్ పార్టీ వర్గాలను సైతం విస్మయ పరుస్తున్నది. జగన్ అధికారంలో ఉన్న సమయంలో ప్రభుత్వ ముఖ్య సలహాదారుగానే కాకుండా, సకల శాఖల మంత్రిగా ప్రభుత్వంలోనే కాకుండా, పార్టీలో కూడా చక్రం తిప్పి.. జగన్ కు కళ్లు, చెవులూ తానేనన్నట్లుగా వ్యవహరించిన సజ్జల ప్రభ 2024 ఎన్నికలలో పార్టీ పరాజయం తరువాత మసకబారింది. అన్నిటికీ మించి పార్టీ అధినేత జగన్ తీసుకున్న కొన్ని నిర్ణయాలు ఆయన ప్రకటించే వరకూ కూడా సజ్జలకు తెలియని పరిస్థితి ఉందనీ, దీంతో తత్వం బోధపడిన సజ్జల తనంత తాను పార్టీ నుంచి తప్పుకునే యోచనలో ఉన్నారని పార్టీ వర్గాలు అంటున్నాయి. విజయసాయిలా పార్టీకి వెంటనే గుడ్ బై చెప్పకుండా, విరామం పేరిట.. నెమ్మది నెమ్మదిగా క్రీయాశీల రాజకీయాల నుంచీ, పార్టీ వ్యవహారాల నుంచీ దూరం కావాలని యోచిస్గున్నట్లు విశ్వసనీయంగా తెలుస్తోంది. స్థానిక ఎన్నికలలో పార్టీని క్షేత్రస్థాయిలో బలోపేతం చేయడానికి సమష్టిగా పని చేయాల్సినతరుణంలో జగన్ కు కుడి భుజం లాంటి నేత మౌన ప్రేక్షకుడిగా మారి.. దాదాపు రాజకీయ సన్యాసం ప్రకటించినట్లుగా వ్యవహరించడం ఒకింద ఇబ్బందికర పరిణామమేనని పార్టీ వర్గాలు అంటున్నాయి. ఒకవైపు ప్రభుత్వ వైఫల్యాలపై పోరాడాలనీ, స్థినిక ఎన్నికలలో అన్ని స్థానాలలోనూ గట్టి పోటీ ఇవ్వాలనీ జగన్ పిలుపునిస్తుంటే.. మరో వైపు పార్టీనుంచి వరుసగా కీలక నేతల వలసలు పార్టీ వర్గాలలో ఆందోళన నింపుతున్నాయి. మొత్తం మీద వైసీపీలో ఆల్ ఈజ్ నాట్ వెల్ పరిస్థితి ఉందని పరిశీలకులు విశ్లేషిస్గున్నారు. [Sajjala, Jagan, YCP key leader, Silince, Active Politics, AP Politics, TeluguOne news]

Published on: Wed Sep 23, 2026 4:52PM

ఆశలన్నీ జనసేనపైనే: సొంత బలంపై ఆశలొదిలేసుకున్న జగన్.!

స్థానిక సంస్థల ఎన్నికలను లక్ష్యంగా చేసుకుని ప్రధాన రాజకీయ పార్టీలు ఇప్పటి నుంచే తమ వ్యూహాలను రచిస్తున్నాయి. 2024 సార్వత్రిక ఎన్నికల్లో భారీ ఓటమి తరువాత వైసీపీ పరిస్థితి నానాటికీ తీసికట్లు నాగంభోట్లు అన్నట్లుగా మారింది. తిరిగి క్షేత్ర స్థాయిలో బలోపేతం అయ్యేందుకు చేస్తున్న ప్రయత్నాలు అంతగా ఫలించడం లేదన్న నిరాశ ఆ పార్టీలో ప్రస్ఫుటంగా కనిపిస్తున్నది. వైసీపీ నుంచి కీలక నాయకుల వలసలను నివారించే దిశగా జగన్ ప్రయత్నాలు ఆరంభించారు. తన సహజ వైఖరికి నిరసనగా.. నేతలను బుజ్జగించే ప్రయత్నాలు చేస్తున్నారు. ఈ క్రమంలోనే ఉత్తరాంధ్ర సహా పలు ముఖ్యమైన ప్రాంతాలకు చెందిన నేతలతో వరుస భేటీలు జరుపుతూ, సంస్థాగత లోపాలను సరిదిద్దేందుకు ప్రయత్నాలు చేస్తున్నారు. అయితే స్థానిక సమరంలో సత్తా చాటాలంటే ఇవేమీ పెద్దగా పని చేయవని భావిస్తున్న జగన్ తన ఆశలన్నీ తెలుగుదేశం కూటమిలో కీలక భాగస్వామి అయిన జనసేనపై ఆశలు పెట్టుకున్నారని పరిశీలకులు విశ్లేషిస్తున్నారు. ఇందులో భాగంగానే సోషల్ మీడియా వేదికగా జనసేన అధినేత, జనసైనికులను రెచ్చగొట్టేలా పోస్టులు పెడుతున్నారు. జనసేన కూటమి ధర్మానికీ, మిత్రధర్మానికీ విరుద్ధంగా స్థానిక ఎన్నికలలో అత్యధిక స్థానాలలో పోటీకి చేస్తే, ఓట్లు తెలుగుదేశం, జనసేనల మధ్య చీలి రాజకీయంగా లబ్ధి పొందే అవకాశం ఉంటుందన్నది వైసీపీ వ్యూహంగా చెబుతున్నారు. ఇందులో భాగంగానే వ్యూహాత్మకంగా.. కూటమిలో అంతర్గత సంక్షోభం తలెత్తిందనే రీతిలో సోషల్ మీడియాలో పోస్టులు షేర్ చేస్తూ జనసేన స్థానిక సమయంలో ఒంటరి పోరుకు సిద్ధపడుతోందన్న ప్రచారం చేస్తున్నారంటున్నారు. తెలుగుదేశం కూటమి భాగస్వామ్య పక్షాల మధ్య సీట్ల సర్దుబాటు విషయంలో విభేదాలు ఉన్నాయన్న సంకేతాలు ప్రజలలోకి వెళ్లేలా ప్రణాళికా బద్ధంగా ఈ ప్రచారం జరుగుతోందని విశ్లేషిస్తున్నారు. తెలుగుదేశం కూటమి నుంచి జనసేనను వేరు చేయడం ద్వారా లబ్ధి పొందాలన్నదే వైసీపీ వ్యూహంగా చెబుతున్నారు. ఒక విధంగా చెప్పాలంటే జనసేన, తెలుగుదేశం మధ్య విభేదాలు సృష్టించి స్థానిక సమరంలో లబ్ధి పొందాలన్నది వైసీపీ ఎత్తుగడగా కనిపిస్తోందంటున్నారు. జనసేనకు క్షేత్రస్థాయిలో బలం లేదని, ప్రచారం చేస్తూనే, మరోవైపు అదే జనసేన ఓటు బ్యాంకుపై ఆధారపడి స్థానిక ఎన్నికలలో గట్టెక్కాలన్నది జగన్ వ్యూహంగా కనిపిస్తోందని చెబుతున్నారు. ఒక విధంగా చెప్పాలంటే సొంత బలంపై నమ్మకం కోల్పోయిన వైసీపీ అధినేత పరాన్న జీవిలా.. కూటమిలో విభేదాలను సృష్టించి లబ్ధి పొందే వ్యూహరచన చేస్తున్నారని అంటున్నారు. కూటమిలో జనసేనకు అన్యాయం జరుగుతోందని, ఆ పార్టీ అధినేత పవన్ కళ్యాణ్ కార్యకర్తల గురించి పట్టించుకోవడం లేదంటూ సోషల్ మీడియాలో వస్తున్న కథనాలు అందులో భాగంగానే రాజకీయ పరిశీలకులు విశ్లేషిస్తున్నారు. అదలా ఉంటే జగన్ వ్యూహాలు ఎంత వరకూ ఫలిస్తాయన్న అనుమానాలు వైసీపీ శ్రేణులలోనే వ్యక్త మౌతున్నాయి. జగన్ ఎత్తుగడలు, వ్యూహాలు అన్నీ సొంత పార్టీని బలోపేతం చేసేందుకు కాకుండా, ప్రత్యర్థి పార్టీలలో విభేదాలు సృష్టించేందుకు అన్నట్లుగా ఉండటంతో వైసీపీ కేడర్ లో అయోమయం నెలకొన్నట్లు కనిపిస్తోంది. వైసీపీ నుంచి నేతల వలసలను ఆపడం విషయంపై పెద్దగా దృష్టి సారించని జగన్.. కీలక సమయంలో విదేశీ పర్యటన పెట్టుకోవడం, వ్యూహాలన్నీ సోషల్ మీడియా పోస్టులపైనూ పెట్టడంతో క్షేత్రస్థాయిలో క్యాడర్ నిస్తేజంగా మారిపోయిన పరిస్థితి నెలకొందంటున్నారు. [AP Local Elections 2026, YS Jagan Mohan Reddy strategy, Janasena Party vote bank, YSRCP political moves AP, Pawan Kalyan, coalition politics, Telugu One]

Published on: Tue Sep 22, 2026 11:52AM

వైసీపీ డీఎస్సీ యాజిటేషన్ బూమరాంగ్.. జగన్ డిఫెన్స్ లో పడ్డారా?

ఆంధ్రప్రదేశ్‌లో డీఎస్సీ నియామకాల ప్రక్రియపై వైసీపీ విమర్శలు, ఆందోళనలు, ఆరోపణలూ బూమరాంగ్ అయిన పరిస్థితి కనిపిస్తోంది.ముఖ్యంగా డీఎస్సీ స్పోర్ట్స్ కోటా నియామకాలపై వైసీపీ ఆరోపణలు, విమర్శలు.. ఆ పార్టీ అధినేత జగన్ కు దిమ్మదిరిగే దెబ్బ కొడుతున్నాయని పరిశీలకులు సైతం అంటున్నారు. డీఎస్సీ ప్రక్రియలో భాగంగా స్పోర్ట్స్ కోటా కింద ఉద్యోగాలు పొందిన అభ్యర్థులు నేరుగా రంగంలోకి దిగి జగన్ వ్యాఖ్యలను, విమర్శలను, ఆరోపణలను ఖండిస్తున్న తీరు ఆయనను, ఆయన పార్టీనీ డిఫెన్స్ లో పడేస్తున్నాయి. తమ నియామకాలలో అక్రమాలు జరగలేదని, అన్ని అర్హతలు, సరైన ధ్రువపత్రాలు ఉన్న తర్వాతే తమకు నియామకాలు దక్కాయని వారు కుండబద్దలు కొడుతున్నారు. రాజకీయ లబ్ధి కోసం మంది నిరుద్యోగుల భవితవ్యంతో ముడిపడిన ఉపాధ్యాయ నియామకాలను వివాదాస్పదం చేయడం తగదంటూ బాధితులు, ఉద్యోగులు జగన్ కు, వైసీపీకీ గట్టి రాటార్డ్ ఇస్తున్నారు. డీఎస్సీ పరీక్షల నిర్వహణ, నియామకాలపై వైసీపీ ఆందోళనలు చేపట్టిన సంగతి తెలిసిందే. ప్రభుత్వంపై ప్రజల్లో వ్యతిరేకతను కూడగట్టేందుకు వైసీపీ నియామకాలలో అక్రమాలు, అవినీతి, అవకతవకలు అంటూ ఆరోపణల మార్గాన్ని ఎంచుకుంది. ముఖ్యంగా స్పోర్ట్స్ కోటా ఉద్యోగాల భర్తీలో భారీ ఎత్తున అవకతవకలు జరిగాయని, అర్హత లేని వారికి సొమ్ములు వసూలు చేసి ఉద్యోగాలు కట్టబెట్టారంటూ.. వైసీపీ అధినేత స్వయంగా పలు సందర్భాలలో ఆరోపణలు గుప్పించారు. అయితే ఈ వ్యవహారంపై దాఖలైన పిటిషన్లను పరిశీలించిన ఆంధ్రప్రదేశ్ హైకోర్టు తగిన ఆధారాలు లేవంటూ ఆ పిటిషన్లు కొట్టేసింది. అయినా కూడా వైసీపీ క్షేత్రస్థాయిలో ఈ విషయంలో ఆరోపణలు గుప్పిస్తూనే ఉంది. దీంతో వైసీపీ ఆరోపణలపై క్రీడా కోటా కింద ఉద్యోగాలు సాధించి ప్రస్తుతం విధుల్లో కొనసాగుతున్న ఉపాధ్యాయులు సీరియస్ గా స్పందించారు. విజయవాడలో దాదాపు 370 మంది క్రీడా కోటా డీఎస్సీ అభ్యర్థులు రౌండ్‌టేబుల్ సమావేశాన్ని ఏర్పాటు చేసి, ఇప్పటివరకు జరిగిన పరిణామాలు, తమపై వస్తున్న నిరాధార ఆరోపణలపై చర్చించారు. తమకు ఎలాంటి రాజకీయ అండదండలు లేవని, నిబంధనల ప్రకారమే మెరిట్, స్పోర్ట్స్ సర్టిఫికెట్ల పరిశీలన అనంతరమే పోస్టులు దక్కాయని కుండబద్దలు కొట్టారు. ఈ సందర్భంగా వారు.. తమ నియామకాలకు సంబంధించి చట్టబద్ధమైన డాక్యుమెంట్లు ఉన్నాయనీ, క్రీడా కోటా ఉద్యోగులను లక్ష్యంగా చేసుకుని బహిరంగంగా విమర్శలు గుప్పిస్తున్న జగన్‌ మోహన్ రెడ్డి, వైసీపీ నేతల ఆరోపణలను సక్ష్యాలతో సహా తిప్పి కొట్టారు. ఒకే కుటుంబం నుంచి ఇద్దరికి క్రీడా కోటాలో ఉద్యోగాలు రావడానికి వీలేదంటూ వైసీపీ చేసిన, చేస్తున్న వ్యాఖ్యలు.. ఆ పార్టీ నేతల అజ్ఝానానికి నిదర్శనమని ఎద్దేవా చేశారు. నిబంధనల ప్రకారం అర్హత ఉంటే ఒకే కుటుంబం నుంచి రెండు కాదు అంతకంటే ఎక్కువ ఉద్యోగాలు కూడా సాధించవచ్చని స్పష్టం చేశారు. రాజకీయ లబ్ధి కోసం తమ నిజాయితీని శంకించడం సరికాదని హితవు చెప్పారు. డీఎస్సీ నియామక ప్రక్రియపై వైసీపీ చేస్తున్నదంతా తప్పుడు ప్రచారమేనని ఈ సందర్భంగా వారు కుండబద్దలు కొట్టినట్లు చెప్పారు. ఇప్పటికైనా ఈ తప్పుడు ప్రచారం ఆపకుంటే.. చట్టపరంగా చర్యలకు ఉపక్రమిస్తామని హెచ్చరించారు. న్యాయపోరాటానికి వెనుకాడబోమని హెచ్చరించారు. వేలాది మంది నిరుద్యోగులకు ఉపాధి కల్పిస్తున్న డీఎస్సీ డ్రైవ్‌ను రాజకీయ స్వార్థం కోసం అప్రతిష్టపాలు చేయడం తగదన్నారు దీంతో డీఎస్సీపై వైసీపీ చేస్తున్న ప్రచారం, సాగిస్తున్న ఆందోళన బూమరాంగ్ అయినట్లు కనిపిస్తోందని పరిశీలకులు విశ్లేషిస్తున్నారు. ప్రభుత్వంపై బురదజల్లే క్రమంలో నేరుగా ఉద్యోగులనే లక్ష్యంగా చేసుకోవడంతో ఆ ఉద్యోగులే తిరగబడి వైసీపీ విమర్శలు, ఆరోపణలను తిప్పి కొడుతునన పరిస్థితి వైసీపీయులను అంతర్మథనంలో పడేసిందంటున్నారు. మొత్తం మీద డీఎస్సీ స్పోర్ట్స్ కోటా అభ్యర్థుల తిరుగుబాటు జగన్‌ కు నిస్సందేహంగా పెద్ద ఎదురుదెబ్బ అనే చెప్పాలి. [Sports Quota DSC, Jagan Mohan Reddy, Y CP, AP High Court, Vijayawada Roundtable Meeting, DSC Recruitment Controversies, Jagan Defence, Bumarang, Telugu One]

Published on: Mon Sep 21, 2026 2:42PM

వైసీపీలో జగన్ పట్టు సడలుతోందా?.. సీనియర్లపై భారం వేసి తప్పుకుంటున్నారా?

ఆ పార్టీ నుంచి ఇటీవలి కాలంలో పెరుగుతున్న వలసలు, పార్టీలో చోటు చేసుకుంటున్న అంతర్గత కుమ్ములాటలు చూస్తుంటే.. ఆ పార్టీకి స్థానిక ఎన్నికలు అగ్నిపరీక్షగా మారేలా కనిపిస్తున్నా యంటున్నారు పరిశీలకులు. సరిగ్గా స్థానిక సన్నద్ధత కీలకంగా మారుతున్న సమయంలోనే జగన్ సకుటుంబంగా యూరొప్ వెళ్లనుండటం కూడా ఆ పార్టీకి ప్రతికూలంగానే పరిణమించే అవకాశాలు ఎక్కువ ఉన్నాయంటున్నారు. స్థానిక పోరులో ఒక్క స్థానం కూడా ఏకగ్రీవం కాకూడదు, పార్టీ గట్టి పోటీ ఇవ్వాలంటూ ఇటీవల దిశానిర్దేశం చేసిన జగన్.. తీరా కార్యరంగంలోకి దిగాల్సిన సమయంలో విదేశీ పర్యటన అంటూ వెళ్లిపోవడానికి.. పార్టీలో పెరిగిన వలసలు, అంతర్గత కుమ్ములాటలను నియంత్రించి పార్టీని గాడిలో పెట్టలేని నిస్సహాయత కూడా ఒక కారణమా అన్న కోణాల్లోనూ పరిశీలకులు విశ్లేషణలు చేస్తున్నారు. గతంలో అంటే జగన్ అధికారంలో ఉన్న సమయంలో ఆయన చేపట్టిన మంత్రివర్గ పునర్వ్యవస్థీకరణ సమయంలో కూడా పార్టీలో అసమ్మతి సెగలు భగ్గుమన్న సమయంలోనూ జగన్ వాటిని సద్దుమణిగేలా చేయడంలో విఫలమయ్యారని ప్రస్తుత పరిస్థితితో పోలుస్తూ వైసీపీ శ్రేణుల అంతర్గత సంభాషణల్లో చర్చ జరుగుతోంది. అప్పుడంటే అధికారం చేతిలో ఉంది కనుక.. పార్టీ నేతలు ఒకరి తరువాత ఒకరుగా దారిలోకి వచ్చారు. అయితే ప్రస్తుతం పరిస్థితి అలా లేదు. ఇప్పుడు పార్టీ అధినేతగా జగన్ పలు సవాళ్లను ఎదుర్కొంటున్నారు. ముఖ్యంగా క్షేత్రస్థాయిలో పార్టీ వేగంగా పట్టుకోల్పోతున్న తరుణంలో.. రాబోయే స్థానిక సంస్థల ఎన్నికలను ఎదుర్కోవడమెలా అని జగన్ తలపట్టుకుంటున్న పరిస్థితి ఉందంటున్నారు. ఒకవైపు సీనియర్ నేతల సస్పెన్షన్లు, మరోవైపు కీలక నాయకుల వలసలు.. స్థానిక సమరం మాట తలుచుకోవడానికే పార్టీ నేతలు, శ్రేణులలో గుబులు పుట్టే పరిస్థితి ఉంది. తాజాగా రేపల్లె నియోజకవర్గంలో పార్టీ సీనియర్ నాయకుడు మోపిదేవి శ్రీనివాసరావుపై పార్టీ వ్యతిరేక కార్యకలాపాలకు పాల్పడుతున్నారంటూ అధిష్టానం సస్పెన్షన్ వేటు వేయడం పార్టీ వర్గాల్లో కలకలం రేపింది. బాపట్ల జిల్లాతో పాటు ఉమ్మడి గుంటూరు జిల్లాలో ఈ సస్పెన్షన్ వైసీపీపై ప్రతికూలంగా పడింది. మరీ ముఖ్యంగా మోపిదేవిపై సస్పెన్షన్ వేటుకు ముందు కనీసం ఆయన వివరణ కూడా తీసుకోకపోవడంపై బాపట్ల, ఉమ్మడి గుంటూరు జిల్లాలో పార్టీ శ్రేణులలో అసంతప్తి భగ్గుమంటోంది. కష్టకాలంలో పార్టీ కోసం నిలబడిన నేతలకు అధిష్ఠానం ఇచ్చే మర్యాద ఇదా అన్న ఆగ్రహం వ్యక్తమౌతోంది. అలాగే ఉత్తరాంధ్ర రాజకీయాలు కూడా జగన్ కు తలనొప్పిగా పరిణమించాయి. ఉమ్మడి విజయనగరం జిల్లాలో వ్యూహాత్మకంగా వ్యవహరిస్తూ పార్టీకి సేవలు అందించిన కీలక నేత మజ్జి శ్రీను ఇటీవల పార్టీకి రాజీనామా చేయడం పెద్ద ఎదురు దెబ్బ అనడంలో సందేహం లేదు. ఇక కాకినాడ జిల్లా జగ్గంపేట నియోజకవర్గ పరిశీలకుడు నెక్కంటి సాయిప్రసాద్ కూడా పార్టీని వీడటం చూస్తుంటే.. ఈ వలసలు ఒక ప్రవాహంగా కొనసాగే అవకాశం ఉందన్న భావన పార్టీ వర్గాల్లోనే వ్యక్తమౌతోంది. ఇందుకు నిదర్శనంగా మాజీ స్పీకర్ తమ్మినేని సీతారాం కుమారుడు తమ్మినేని చిరంజీవి నాగ్ భవిష్యత్తులో వైఎస్సార్సీపీ ఒక్క స్థానాన్ని కూడా గెలుచుకోలేదంటూ తాజాగా చేసిన కామెంట్లను నిదర్శనంగా చూపుతున్నారు పరిశీలకులు. ఈ వార్త కూడా చదవండి సిట్టింగ్ స్థానాల్లోనూ పట్టు కోల్పోతున్న వైసీపీ https://teluguone.com/news/prevsingle/ycp-pride-diminishing-daybyday-2013+09-39-218165.html ఈ నేపథ్యంలోనే తన విదేశీ పర్యటన పెట్టుకున్న జగన్.. నష్ట నివారణ చర్యలకు ఉపక్రమించారు. బొత్స, తమ్మినేనిలతో భేటీ అయ్యారు. వారిని బుజ్జగించారు. వచ్చే ఎన్నికలలో మీకు పార్టీ టికెట్లు ఖాయమంటూ భరోసా ఇవ్వడమే కాకుండా వారు ఎక్కడ నుంచి పోటీ చేయాలో కూడా చెప్పేశారు. అది చాలదనుకున్నారో ఏమో బొత్స కుమార్తెకు కీలక పదవి కట్టబెట్టారు. పార్టీ ఒక్క స్థానం కూడా గెలుచుకోలేదు అంటూ వ్యాఖ్యలు చేసిన తమ్మినేని కుమారుడిపై చర్యలు తీసుకోవడం అటుంచి కనీసం మందలించను కూడా లేదు. వీటన్నిటినీ బట్టి చూస్తుంటే.. పార్టీపై జగన్ కు గతంలో ఉన్న పట్టు సడలిందని అంటున్నారు. అందుకే కీలక సమయంలో విదేశీ పర్యటకు వెడుతూ.. స్థానిక ఎన్నికలలో వైసీపీ వైఫల్యం ప్రభావం తన నాయకత్వంపై పడకుండా ఉండేలా జాగ్రత్త తీసుకుంటున్నారని విశ్లేషిస్తున్నారు. [Jagan, YCP, Loose Grip, YCP Internal, Crisis, Leaders Leave Party, Telugu One]

Published on: Sat Sep 19, 2026 2:42PM

తెలుగు రాష్ట్రాలలో విపక్షాల సెల్ఫ్ గోల్ రాజకీయం.!

తెలుగు రాష్ట్రాలలో విపక్షాలు విధ్వంస రాజకీయాలు చేస్తున్నాయన్న విమర్శ గట్టిగా వినిపిస్తోంది. తెలంగాణలో ప్రధాన ప్రతిపక్షం బీఆర్ఎస్, ఆంధ్రప్రదేశ్ లో ప్రతిపక్ష హోదా లేకున్నా ఉన్న ఏకైక విపక్షం వైసీపీలు అనుసరిస్తున్న విధానాలు, తీసుకుంటున్న నిర్ణయాలు, వ్యూహాలు ఇప్పుడు హాట్ టాపిక్ గా మారాయి. తమతమ రాష్ట్రాలలో అధికారం కోల్పోయిన తరువాత బీఆర్ఎస్, వైసీపీలు పట్టు నిలుపుకోవడానికి చేస్తున్న ప్రయత్నాలు, అనుసరిస్తున్న విధానాలు ప్రజాస్వామ్య పద్ధతులకు భిన్నంగా ఉన్నాయన్న విమర్శలు వెల్లువెత్తుతున్నాయి. తెలంగాణలో బీఆర్ఎస్, ఏపీలో వైసీపీ.. ప్రస్తుతం గడ్డు పరిస్థితులను ఎదుర్కొంటున్నాయి. తెలంగాణలో దశాబ్దం పాటు అధికారంలో ఉన్న బీఆర్ఎస్ 2023 ఎన్నికలలో ప్రజాతీర్పు కారణంగా ప్రతిపక్ష పాత్రకు పరిమితం అయ్యింది. ఇక ఏపీలో 2024 ఎన్నికలలో ఘోర పరాజయాన్నిఎదుర్కొన్న వైసీపీ కనీసం ప్రతిపక్ష హోదా కూడా లేకుండా మిగిలింది. ఈ నేపథ్యంలో రెండు రాష్ట్రాల్లోనూ అధికారంలో ఉన్న ప్రభుత్వాలను నిలదీయడంలో, ప్రజా సమస్యలపై పోరాడడంలో ఈ పార్టీలు అనుసరిస్తున్న పద్ధతులు విమర్శల పాలౌతున్నాయి. ప్రజాస్వామ్యానికి ప్రతిపక్షమే ఆయువుపట్టు. అటువంటి ప్రతిపక్ష స్థానంలో ఉన్న బీఆర్ఎస్.. హోదా లేకున్నా అదే పాత్రలో ఉన్న వైసీపీ వ్యక్తిగత ఈగో, అహంకారం, స్వార్థపూరిత అజెండాతో వ్యవహరిస్తున్నాయన్న విమర్శలు వెల్లువెత్తుతున్నాయి. తెలంగాణలో బీఆర్ఎస్, ఏపీలో వైసీపీ రెండు కూడా ప్రజా సమస్యల ఊసెత్తకుండా తమ సొంత రాజకీయ అజెండాతో.. విమర్శల పేర దూషణలకు పాల్పడుతూ శాంతి భద్రతల సమస్య ఉత్పన్నం అయ్యేలా వ్యవహరిస్తున్నాయని పరిశీలకులు విశ్లేషిస్తున్నారు. ముందుగా తెలంగాణలో ప్రధాన ప్రతిపక్షం బీఆర్ఎస్ విషయానికి వస్తే.. రాష్ట్ర ఆవిర్భావం నుంచి దశాబ్దం పాటు అధకారంలో ఉన్న ఆ పార్టీ.. ప్రతిపక్షంగా మారి మూడేళ్లు కావస్తున్నా.. క్షేత్రస్థాయిలో ప్రజా సమస్యలపై గళం ఎత్తడం లేదు సరికదా.. ఆ పార్టీ అధినేత ఇంత వరకూ అసెంబ్లీలో గళమెత్తిన పాపాన పోలేదు. అసలు అసెంబ్లీకే హాజరు కావడం లేదు. రాష్ట్రంలో కాంగ్రెస్ సర్కార్ పై ఆటోమేటిగ్గా ప్రజా వ్యతిరేకత వస్తుందనీ, వస్తోందని భావిస్తూ వచ్చే ఎన్నికల్లో అధికారం మాదేనన్న కలల ప్రపంచంలో ఊరేగుతున్న పరిస్థితి. క్షేత్రస్థాయిలో ప్రజల నాడిని పట్టించుకోకుండా కేవలం వచ్చే ఎన్నికలలో తిరిగి అధికారం చేపడతామన్న ఊహాలోకంలో విహరిస్తున్నట్లు కనిపిస్తోంది. ఇందుకు నిదర్శనంగా ఈ మూడేళ్లలో బీఆర్ఎస్ ప్రజాసమస్యలపై రోడ్డెక్కి ఆందోళనలు చేపట్టిన దాఖలాలు లేకపోవడమే. ఇదే విషయాన్ని ఆ పార్టీ సీనియర్ నేతలు బాహాటంగానే చెబుతున్నారు. తాము నిజమైన ప్రతిపక్షంగా వ్యవహరించడం లేదనీ, క్షేత్రస్థాయిలో ప్రజలతో మమేకమై సమస్యలపై గళమెత్తడం లేదనీ బాహాటంగానే చెబుతున్నారు. ప్రజా సమస్యలపై ప్రభుత్వాన్ని నిలదీయాల్సిన బీఆర్ఎస్.. అది గాలికొదిలేసి.. ముఖ్యమంత్రి రేవంత్ రెడ్డిపై దూషణలకు పరిమితమైంది. ప్రెస్ మీట్లు పెట్టి విమర్శలు గుప్పించడంతో సరిపెట్టేస్తోంది. సోషల్ మీడియా ట్రోలింగ్ స్ట్రాటజీలతో ప్రభుత్వాన్ని ఇరుకున పెట్టేస్తున్నామని సంబరపడిపోతోంది. ఇదే పరిస్థితి ఇలాగే సాగితే.. బీఆర్ఎస్ రాష్ట్రంలో బలమైన పొలిటికల్ పవర్ గా ఉండే అవకాశం ఇసుమంతైనా లేదని పరిశీలకులు విశ్లేషిస్తున్నారు. ఇక ఏపీలో వైసీపీ వ్యవహరిస్తున్న తీరు గురించి ఎంత తక్కువ చెప్పుకుంటే అంత మంచిది. ఆ పార్టీకి రాజకీయంగా ఒక దశ, దిశ ఉన్నట్లు కనిపించడం లేదు. అసలు ఆ పార్టీ వ్యవహరిస్తున్న తీరు చూస్తుంటే ఉనికి కోసం ఆరాటం తప్ప.. ప్రజాసమస్యలపై అవగాహన కానీ, అక్కడ కానీ కాగడా పెట్టి వెతికినా కనిపించడం లేదన్న చర్చ పొలిటికల్ సర్కిల్స్ లో జోరుగా సాగుతోంది. జనం కూడా ఆ పార్టీ ప్రకటనలూ, మీడియా సమావేశాలలో చేసే వ్యాఖ్యలు తమకు ఏమాత్రం సంబంధం లేనివిగా భావించే పరిస్థితికి వచ్చేశారు. అసలు రాష్ట్రంలో ప్రజల సమస్యలు ఏమిటి? ఏ సమస్యపై తాము గళమెత్తితే జనంలో స్పందన ఉంటుంది? అన్న విషయాన్ని గుర్తెరకుండా వైసీపీ అగ్రనాయకత్వం లేని సమస్యలను లేవనెత్తి ప్రజలలో పలుచన అవుతున్నది. కేవలం ఉనికిని చాటుకోవడానికి ఏదో ఒక హడావుడి చేస్తూ కాలక్షేపం చేస్తున్నట్లుగా వైసీపీ తీరు ఉందన్నది పరిశీలకుల విశ్లేషణ. ఇక వైసీపీ అధినేత.. తాను మరోసారి పాదయాత్ర చేస్తే చాలు 2019 నాటి విజయం పునరావృత మౌతుందన్న భ్రమలో ఉన్నట్లు కనిపిస్తున్నది. అయితే అప్పటి వరకూ పార్టీ శ్రేణులలో తన నాయ కత్వంపై నమ్మకాన్ని కాపాడుకోవడానికి ఆయన చేస్తున్న ప్రయత్నాలు శూన్యం అంటున్నారు. అసలు ప్రభుత్వ విధానాలను ఎండగట్టడంలో, ప్రజలకు చేరవ అవ్వడంలో అనుసరించాల్సిన పద్ధతి ఏమిటి? ఏ అంశాలపై మాట్లాడితే జనానికి చేరువ అవుతామన్న స్పష్టత పార్టీ అధినేతలో కొరవడటమే ఈ పరిస్థితికి కారణంగా చెబుతున్నారు. ప్రజాసమస్యలను గాలికొదిలేసి.. ప్రజలు స్వాగతిస్తున్న రాజధాని అమరావతిపై బురద జల్లడం, ఐదేళ్లు అధికారంలో ఉండగా ఒక్క డీఎస్సీ నిర్వహించని వైసీపీ ఇప్పుడు తెలుగుదేశం కూటమి సర్కార్ హయాంలో జరుగుతున్న డీఎస్సీలను విమర్శించడం వైసీపీని జనాలకు దూరం చేస్తున్నది. పార్టీ అగ్రనాయకత్వం వ్యవహరిస్తున్న ఈ విధానాల కారణంగా క్యాడర్ కూడా ప్రజల ముందుకు వెళ్లలేక ముఖం చాటేస్తోంది. మొత్తంగా వైసీపీకి తాను లేవనెత్తుతున్న అంశాలపై కానీ, లేవనెత్తాల్సిన సమస్యలపై కానీ అవగాహన లేకపోవడమే ఈ పరిస్థితికి కారణమంటున్నారు. మొత్తం మీద రెండు తెలుగు రాష్ట్రాలలోనూ కూడా ఆయా రాష్ట్రాలలోని విపక్షంపై ప్రజలలో విశ్వాసం, నమ్మకం పెరగడం అటుంచి సన్నగిల్లుతున్న ఛాయలు కనిపిస్తున్నాయి. ఇప్పటికైనా బీఆర్ఎస్, వైసీపీలు తన తీరు మార్చుకుని క్షేత్రస్థాయిలో ప్రజాసమస్యలపై వారితో కలిసి గళమెత్తకుంటే.. రాజకీయంగా కోలుకోలేని విధంగా నష్టపోవడం ఖాయమని అంటున్నారు. తెలుగు రాష్ట్రాలలో ప్రస్తుతం విపక్షాలు అనుసరిస్తున్న విధానం సెల్ఫ్ గోల్ రాజకీయంగా కనిపిస్తోందని చెబుతున్నారు. [opposition Parties In Telugu States, Brs politics, YCP politics, Telugu states politics, r Telangana, Andhra Pradesh, Telugu One]

Published on: Fri Sep 18, 2026 9:28AM

జగన్ కు తత్వం బోధపడిందా?

తాను పట్టిన కుందేటికి మూడే కాళ్లు అనే జగన్ తన వైఖరిని ఇప్పుడు మార్చుకుంటున్నారా? మరీ ముఖ్యంగా ఉత్తరాంధ్రలో వైసీపీ ఖాళీ అయిపోయే పరిస్థితులు ఉత్పన్నం కావడంతో ఆ ప్రాంతంలో పార్టీని కాపాడుకోవడానికి ధిక్కరించిన, ధిక్కరిస్తున్న నేతలను బుజ్జగించడానికి ఆయన స్వయంగా దిగి వచ్చారా? అంటే వరుసగా జరిగిన పరిణామాలను గమనిస్తే ఔనన్న జవాబే వస్తుంది. ఉత్తరాంధ్ర రాజకీయ రంగంలో చోటుచేసుకుంటున్న పరిణామాలు, ముఖ్యనేతల మధ్య వ్యక్తమవుతున్న అసంతృప్తులు జగన్ లో ఆ ప్రాంతంలో పార్టీ ఉనికి మాత్రంగా కూడా మిగలదా అన్న భయాన్ని రాజేశాయంటున్నారు పరిశీలకులు. మరీ ముఖ్యంగా స్థానిక ఎన్నికల ముంగిట పార్టీ నుంచి వరుస వరసలు జగన్ ను కలవర పెడుతున్నాయి. శ్రీకాకుళం, విజయనగరం జిల్లాల్లో ఇటీవల కాలంలో జరిగిన పరిణామాలు జగన్ లో ఆందోళనరేకెత్తించాయంటున్నారు. ఒకరి తర్వాత ఒకరుగా కీలక నేతలు పార్టీ వీడుతుండటం, మరికొందరు అసంతృప్తి గళం వినిపిస్తుండటంతో జగన్ స్వయంగా ఉత్తరాంధ్రలో పార్టీని పటిష్ఠం చేయడం కోసం నడుం బిగించారు. ఈ నేపథ్యంలోనే అసంతృప్త నేతలను బుజ్జగించేందుకు చర్యలకు ఉపక్రమించారు. ఇందులో భాగంగానే.. తన సహజసిద్ధ స్వభావానికి విరుద్ధంగా.. అసంతృప్త నేతలను స్వయంగా తాడేపల్లి ప్యాలెస్ కు ఆహ్వానించి వారితో సంప్రదింపులు జరిపారు. జగన్ లో ఈ మార్పు స్థానిక ఎన్నికలపై ఏ మేరకు ప్రభావం చూపుతాయనేది ఇప్పుడు ఆసక్తికరంగా మారింది. క్షేత్రస్థాయిలో ప్రజల అభిప్రాయాలను గమనిస్తూ, , తప్పులను సరిదిద్దే ప్రయత్నం రానున్న స్థానిక ఎన్నికలలో పార్టీకి ఏ మేరకు ప్రయోజనం చేకూర్చుతుందన్న దానిపై ఇప్పుడు వైసీపీలోనే చర్చోపచర్చలు జరుగుతున్నాయి. కాగా జగన్ తమ్మినేని, బొత్సలతో వేర్వేరుగా భేటీ అయినా.. ఆ ఇద్దరికీ కూడా 2029 ఎన్నికలలో పార్టీ టికెట్ ఖాయమన్న హామీ ఇచ్చినట్లు తెలుస్తోంది. శ్రీకాకుళం లోక్‌సభ నియోజకవర్గ వైసీపీ అభ్యర్థిత్వం తమ్మినేని సీతారాంకే అని హామీ ఇచ్చిన జగన్, విజయనగరం జిల్లా చీపురుపల్లి నుంచి పార్టీ అభ్యర్థిగా బొత్స సత్యనారాయణను ఖరారు చేసినట్లు చెప్పారు. మొత్తం మీద బొత్స, సీతారాంల విషయంలో జగన్ తన సహజశైలికి విరుద్ధంగా వారిద్దరినీ పార్టీకి దూరం కావద్దనీ, తాను వారి రాజకీయ భవిష్యత్ కు పూచిపడతాననీ బుజ్జగించినట్లు వైసీపీ వర్గాలలోనే విస్తృతంగా ప్రచారం అవుతోంది. [YCP Supreme, YS Jagan, North Andhra politics, Botsa Satyanarayana, Tammineni Sitaram, YCP defections, Telugu One, AP News]

Published on: Thu Sep 17, 2026 2:44PM

ఉత్తరాంధ్రలో బొత్స ప్రభ మసకబారిందా?

ఉత్తరాంధ్ర రాజకీయాలలో బొత్స కుటుంబ ఆధిపత్యానికి చెక్ పడినట్లేనా? వైసీపీ సీనియర్ నాయకుడు, శాసనమండలిలో ప్రతిపక్ష నేత బొత్స సత్యనారాయణ మేనల్లుడు, వైసీపీ విజయనగరం జిల్లా అధ్యక్షుడిగా బాధ్యతలు నిర్వర్తించిన మజ్జి శ్రీనివాసరావు వైపీపీని వీడి తెలుగుదేశం తీర్థం పుచ్చుకోవడం, పార్టీలో బొత్స ప్రాధాన్యతకు గండి కొడుతుందా? అంటే పరిశీలకులు ఔననే అంటున్నారు. బొత్స ఆశీస్సులతో విజయనగరం జిల్లాలో క్షేత్రస్థాయి రాజకీయ వ్యవహారాలను, పార్టీ వ్యవహారాలనూ చిన్న శ్రీను అదేనండి బొత్స మేనల్లుడు మజ్జి శ్రీనివాసరావే చూసుకుంటున్నారు. ఒక విధంగా చెప్పాలంటే మజ్జి శ్రీనివాసరావు బొత్సకు కుడి భుజంగా వ్యవహరించేవారు. అటువంటి మజ్జి శ్రీనివాసరావు అలియాస్ చిన్న శ్రీను పార్టీ మారడం వెనుక బొత్స వ్యూహం ఉందా అన్న అనుమానాలు కూడా వ్యక్తమౌతున్నాయంటున్నారు. అయితే బొత్స సత్యనారాయణతో చిన్న శ్రీను విభేదించడం ఇదే తొలిసారి కాదనీ, గతంలో అంటే 2024 ఎన్నికల సమయంలో కూడా చిన్న శ్రీను, బొత్స సత్యనారాయణ మధ్య విభేదాలు తలెత్తిన సంగతిని ఈ సందర్భంగా గుర్తు చేస్తున్నారు. 2024 ఎన్నికలలో పార్టీ ఓటమి తరువాత బొత్సకు ఎమ్మెల్సీ పదవితో పాటు మండలిలో ప్రతిపక్ష నేత బాధ్యతలను పార్టీ అధినేత జగన్ అప్పగించారు. బొత్సకు అంతటి ప్రాధాన్యత ఇచ్చిన జగన్.. అదే సమయంలో బొత్సతో విభేదిస్తున్న చిన్న శ్రీనును విజయనగరం జిల్లా అధ్యక్షుడిగా కొనసాగించడంతో పాటు, భీమిలి అసెంబ్లీ నియోజకవర్గ ఇన్ చచార్జ్ బాధ్యతలను కూడా అప్పగించారు. బొత్స అభీష్ఠానికి వ్యతిరేకంగా జగన్ చిన్న శ్రీనును ప్రోత్సహించారని పరిశీలకులు గుర్తు చేస్తున్నారు. ఆ సంగతి అలా ఉంచితే.. ఇటీవల కొంత కాలంగా బొత్స జనసేన గూటికి చేరనున్నారంటూ పెద్ద ఎత్తున ప్రచారం జరిగింది. స్వయంగా ఆ ప్రచారాన్ని బొత్స ఖండించారనుకోండి. అది వేరే విషయం. ఇటువంటి పరిస్థితుల్లో చిన్న శ్రీను వైసీపీని వీడి తెలుగుదేశం తీర్థం పుచ్చుకోవడంపై వైసీపీయులే పలు అనుమానాలు వ్యక్తం చేస్తున్నారు. చిన్న శ్రీను నిష్క్రమణ బొత్స ఆశీస్సులతోనే జరిగిందా అన్న సందేహాలూ వెల్లువెత్తుతున్నాయి. ఏది ఏమైనా చిన్న శ్రీను పార్టీని వీడటం విజయనగరం జిల్లాలో మరీ ముఖ్యంగా భీమిలి నియోజకవర్గంలో వైసీపీకి కోలుకోలేని దెబ్బగానే పరిగణించాల్సి ఉంటుందంటున్నారు పరిశీలకులు. ఇక వైసీపీలో బొత్స ప్రతిష్ఠ, పరపతికీ కూడా చిన్న శ్రీను తెలుగుదేశం గూటికి చేరడం దెబ్బేనని చెబుతున్నారు. [Botsas influence waned in North Andhra, Botsa Satyanarayana, Chinna Srinu, YSRCP, TDP, Vizianagaram Politics, Uttarandhra News]

Published on: Thu Sep 10, 2026 9:58AM