Home  
Latest News

సింహపురి వర్సిటీలో సిత్రం చూశారా? 5,360 మార్క్స్ ఔటాఫ్ 800

నెల్లూరులోని సింహపురి విశ్వవిద్యాలయంలో బోధన ఎంత ఘనంగా సాగుతోందో చెప్పడానికి ఆ వర్సిటీ కాలేజీలో నాలుగో సెమిస్టర్ పేపర్ల వాల్యుయేషన్ తీరును చూస్తే ఇట్టే అర్ధమైపోతుంది. ఫోర్త్ సెమిస్టర్ ఫలితాలలో తమకు వచ్చిన మార్కులు చూసి విద్యార్థులు నవ్వాలో ఏడవాలో తెలియని పరిస్థితుల్లో పడ్డారు. 800 మార్కులకు నిర్వహించిన పరీక్షలకు ఒక్కొక్కరికి 2 వేలకు పైగానే మార్కులొచ్చాయి. ఓ విద్యార్థికైతే ఏకంగా 5,360 మార్కులు వచ్చాయి. ఆ మార్కులు చూసిన విద్యార్థులు అయోమయానికి గురయ్యారు. తాము ఏ గ్రేడ్ లో పాసయ్యామో తెలియక గందరగోళంలో పడ్డారు.   పరీక్షలు నిర్వహించిన ఎనిమిది నెలల తరువాత విడుదల చేసిన ఈ ఫలితాలలో మార్కులు తప్పుల తడకగా ఉండటంపై విద్యార్థులు ఆగ్రహం వ్యక్తం చేస్తున్నారు. 800 మార్కులకు నిర్వహించిన పరీక్షల్లో తమకు రెండు వేలకు పైగా మార్కులువచ్చినట్లు ఫలితాలలో ఉండటంపై విద్యార్థులు తీవ్ర నిరసన వ్యక్తం చేస్తున్నారు. అయితే దీనిని యూనివర్సిటీ రిజిస్ట్రార్ చాలా లైట్ గా తీసుకున్నారు. మార్కుల జాబితాలో తప్పులుంటే ఏమైంది.. సరి చేసి మళ్లీ విడుదల చేస్తామంటూ కూల్ గా సమాధానమిస్తున్నారు. 

జగన్ పాలనపై వైఎస్ ‘ఆత్మ’ ఘోష

దివంగత ముఖ్యమంత్రి, వైఎస్ రాజశేఖరరెడ్డి ఆత్మ కేవీపీ రామచంద్రరావు ఎట్టకేలకు నోరు విప్పారు. అదీ.. తన ప్రాణ స్నేహితుడు వైఎస్సార్ తనయుడు ఆంధ్రప్రదేశ్ ముఖ్యమంత్రి వైయస్ జగన్ పాలనా తీరు పై  వైఎస్‘ఆత్మ’  ఘోష వినిపించింది. దాదాపు జగన్ అధికారంలోకి వచ్చిన తర్వాత .. అదీ మూడున్నరేళ్ల అనంతరం.... కేవీపీ రామచంద్రరావు ఈ విధంగా స్పందించడం జగన్ పాలనా వైఫల్యానికి అద్దంపడుతోంది. మూడున్నరేళ్లలో జగన్ పాలన గురించి కానీ, విపక్షాలపై ఆయన సాగించిన అణచివేత గురించి కానీ పన్నెత్తి మాట్లాడని కేవీపీ తాజాగా ఏపీలో జగన్ పాలనపై ఆవేదన వ్యక్తం చేశారు. పోలవరం, విభజన హామీలు, ప్రత్యేక హోదా ఇలా ఏ విషయంలోనూ జగన్ సర్కార్ కేంద్ర ప్రభుత్వాన్ని నిలదీయడం సంగతి అటుంచి కనీసం విజ్ణప్తి కూడా చేయకపోవడాన్ని కేవీపీ తప్పుపట్టారు. విశాఖ స్టీల్ ప్రైవేటీకరణకు కేంద్రం సిద్ధపడుతున్న సమయంలో దానిని ఆపేందుకు సీఎం జగన్ ఒక్క ప్రయత్నం కూడా చేయడం లేదని కేవీపీ  విమర్శించారు. పోలవరం ప్రాజెక్టును కేంద్రమే నిర్మిస్తుందని చట్టంలో ఉందని వైఎస్ కుటుంబానికి ఎంతో సన్నిహితుడైన కేసీపీ... జగన్ కాంగ్రెస్ నుంచి విడిపడి కొత్త పార్టీని పెట్టుకున్నా ఆయన మాత్రం కాంగ్రెస్ లోనే కొనసాగుతున్నారు. కాంగ్రెస్ పార్టీలోనే ఉంటూ సీఎం జగన్ కు సాయం చేస్తున్నారని కేవీపీ విమర్శలు లేకపోలేదు. అయితే తాజాగా కేవీపీ జగన్ ప్రభుత్వంపై విమర్శలు చేయడంతో హాట్ టాపిక్ గా మారింది. వైఎస్ కు సన్నిహితుడైన మాజీ ఎంపీ ఉండవల్లి అరుణ్ కుమార్ కూడా సీఎం జగన్ పై విమర్శలు చేశారు. జగన్ ముఖ్యమంత్రిగా ప్రమాణ స్వీకారానికి హాజరైన కేవీపీ ఆ తర్వాత సీఎంను కలవలేదు. కానీ హైదరాబాద్ కేంద్రంగా వైఎస్సార్ వర్ధంతి సందర్భంగా విజయమ్మ నిర్వహించిన సదస్సులో  కేవీుపీ పాల్గొన్నారు.  అధికారం చేపట్టిన తరువాత ఒక్కరొక్కరుగా వైఎస్ సన్నిహితులు, చివరికి కుటుంబ సభ్యులు ఇలా అందరూ దూరం అవుతున్నా.. కేవీపీ మాత్రం ఇంత వరకూ జగన్ కు తెరవెనుక సహాయం అందిస్తున్నారన్న ప్రచారం ఉంది. తాజాగా ఆయన వ్యాఖ్యలతో ఆయన కూడా జగన్ కు దూరం జరిగారని తేటతెల్లమైపోయింది.  ఏపీ విభజన అంశాలను నెరవేర్చడానికి జగన్ ప్రయత్నించలేదనీ,  బీజేపీకి దగ్గరై  జగన్ ఏపీ అభివృద్ధిని దెబ్బతీస్తున్నారని కేవీపీ అనడం ప్రాధాన్యత సంతరించుకుంది. ఇప్పటి వరకూ జగన్ బీజేపీకి దగ్గరవ్వడం కాదు.. కేసుల భయంతో ఆ పార్టీ అగ్రనాయకత్వం ఏం చెబితే అది చేస్తున్నారనీ ఉన్న విమర్శలకు కేవీపీ వ్యాఖ్యలు మరింత బలం చేకూర్చేవిగా ఉన్నాయి. కేవీపీ బహిరంగంగా జగన్ పాలనపై విమర్వలు చేయడంతో..ఇప్పుడు అందరి దృష్టీ సూరీడు అనే వ్యక్తిపై పడింది. కేవీపీ వైఎస్ కు ఆత్మ అయితే సూరీడు అనే వ్యక్తి వైఎస్ కు అంగరక్షకుడిగా ఆ రోజుల్లో గుర్తింపు పొందారు. ప్రభుత్వ కార్యక్రమమైనా, ప్రైవేటు కార్యక్రమం అయినా వైఎస్ ఎక్కడుంటే అక్కడ సూరీడు ఉండేవాడు. ఇంతకీ సూర్యనారాయణ రెడ్డి అనే సూరీడు కూడా వైఎస్ మరణానంతరం జగన్ పక్కన ఎక్కడా కనిపించిన దాఖలాలు లేవు. వైఎస్ కు అత్యంత సన్నిహిడుడిగా గుర్తింపు పొందిన సూరీడు ఆయన మరణం తరువాత ఎందుకు జగన్ కు దూరం జరిగారు. కనీసం వైఎస్ వర్దంతి, జయంతి సందర్భాలలో కూడా ఆయన ఎక్కడా కనిపించడం లేదు. ఇంత కాలానికి వైఎస్ ‘ఆత్మ’ కేవీపీ బహిరంగంగా జగన్ పాలనను తప్పుపడితే.. జగన్ తీరు, వ్యవహార శైలిని గుర్తించిన సూరీడు వైఎస్ మరణం తరువాత జగన్ కు దూరమయ్యారని నెటిజన్లు అంటున్నారు.       

మళ్లీ పెద్ద నోటు రద్దు

మళ్లీ నోట్ల రద్దు ప్రకటనకు రంగం సిద్దమవుతోందా? అదీ ముఖ్యంగా రెండు వేల రూపాయిలు.. ఇకపై   ఆదృశ్యం కానుందా?  గతంలో ఐదు వందల రూపాయిలు.., వెయ్యి రూపాయిల నోట్ల రద్దు చేసిన కేంద్రం ఇప్పుడు మరో సారి నోట్ల రద్దుకు సిద్ధమౌతోందా?   ఈ సారి  రెండు వేల రూపాయిల నోట్లను రద్దు చేయనున్నారా?  ఔననే సమాధానమే వస్తోంది. ఇప్పటికే రెండు వేల రూపాయల నోట్ల రద్దుపై  మోదీ ప్రభుత్వం ఓ కీలక నిర్ణయం తీసుకుందన్న చర్చ   హస్తినలో వాడీ వేడిగా నడుస్తోంది.  మరోవైపు రాజ్యసభలో సోమవారం బీజేపీ ఎంపీ సుశీల్ మోదీ.. రెండు వేల రూపాయిల నోటు... బ్లాక్ మనీకి కేరాఫ్ ఆడ్రస్‌గా మారిందని అన్నారు. అలాగే మనీ లాండరింగ్‌కి, మాదకద్రవ్యాల అక్రమ రవాణాలకు, ఉగ్రవాద మూకలకు నిధులకు..  రెండు వేల రూపాయిల నోట్లు అత్యంత కీలకంగా మారాయని ఆయన ఆందోళన వ్యక్తం చేశారు. ఈ నేపథ్యంలో రెండు వేల రూపాయిల నోట్లను దశల వారీగా రద్దు చేయాలంటూ ఆయన కేంద్రాన్ని డిమాండ్ చేశారు. ఓ వేళ  రెండు వేల నోట్ల రద్దు చేసేటట్లు అయితే.. వాటిని మార్చుకోనేందుకు దేశ ప్రజలకు రెండేళ్ల సమయం ఇవ్వాలని ఆయన కేంద్రానికి సూచించారు. ఇప్పటికే ఏటీఎంల్లోరెండు వేల రూపాయిల నోట్లు కనిపించడం లేదని ఈ సందర్భంగా ఆయన గుర్తు చేశారు. ఇప్పటికే రెండు వేల నోట్లపై ప్రజల్లో ఓ విధమైన ఊహాగానాలు ఊపందుకోన్నాయని.. వీటిపై ప్రజలకు స్పష్టత ఇవ్వాల్సిన బాధ్యత   ప్రభుత్వానిదేనంటూ ఆయనీ సందర్బంగా చెప్పారు. మరో వైపు రిజర్వు బ్యాంక్ ఆఫ్ ఇండియా సైతం.. గత మూడేళ్లు నుంచి అంటే 2019 నుంచి   రెండు వేల రూపాయిల నోట్లు ముద్రణను నిలిపి వేసిందని ఈ సభ సాక్షిగా ఎంపీ సుశీల్ మోదీ గుర్తు చేశారు.  2016 నవంబర్ 8న దేశంలో నల్లధనాన్ని నిర్మూలించడం కోసం.. పెద్ద నోట్ల రద్దు చేస్తున్నట్లు దేశ ప్రధాని మోదీ ప్రకటించారు. ఆ క్రమంలో ఐదు వందలు, వెయ్యి రూపాయిల నోట్లను రద్దు చేశారు. కానీ ఆ తర్వాత.. అదే మోదీ ప్రభుత్వం రెండు వేల రూపాయిల నోట్లను   ముద్రించి చెలామణీలోకి తెచ్చింది. దీంతో పెద్ద నోట్లను రద్దు చేసి.. వాటి స్థానంలో మరీ పెద్ద నోట్లు పెట్టడం ఏమిటనే విమర్శ అప్పట్లో పెద్దగా వినిపించింది.   ఆ తర్వాత మోదీ ప్రభుత్వం ఏమనుకుందో ఏమో కానీ.. 2019 నుంచి రెండు వేల రూపాయిల నోట్ల ముద్రణను నిలిపివేసింది. అదీకాక... ఓ వైపు సార్వత్రిక ఎన్నికలతో పాటు వివిధ రాష్ట్రాల అసెంబ్లీ ఎన్నికలు దూసుకొస్తున్నాయి. ఇప్పటికే బహిరంగ మార్కెట్‌లో రెండు వేల రూపాయిల నోట్లు నేపాలి మాంత్రికుడు మాయం చేసినట్లు మాయమైపోయాయి. ఎన్నికల వేళ.. ఓటర్ల కోసం వివిధ రాజకీయ పార్టీలు.. ఇప్పటికే రెండు వేల రూపాయిల నోట్లను.. కట్టలుగా పేర్చి  గోదాముల్లో దాచేశాయనే ఓ వదంతి అయితే అటు ప్రజల్లో.... ఇటు నెటిజన్లుల్లో షికారు చేస్తోంది. అలాంటి వేళ.. ఓ వేళ రెండు  వేల నోట్ల రద్దు చేస్తే మాత్రం.. అధికార పార్టీలకే కాదు.. ప్రతిపక్ష పార్టీలకు సైతం పట్టపగలే చుక్కలు  కనిపిస్తాయనడంలో ఏ మాత్రం సందేహం లేదని పరిశీలకులు అంటున్నారు. 

ఏపీలో బీఆర్ఎస్ కు వైసీపీ స్వాగతం

వైసీపీ కేసీఆర్ జాతీయ పార్టీ బీఆర్ఎస్ కు స్వాగతం పలుకుతోంది. ఇంకా ఏపీలో అడుగే పెట్టని బీఆర్ఎస్ కు వైసీపీ రెడ్ కార్పెట్ లో స్వాగతం పలకడానికి సిద్ధమౌతోంది. రాజకీయ లబ్ధి కోసం.. వైసీపీ పాలనా వైఫల్యాలను ఎత్తి చూపుతూ తెలంగాణలో మైలేజ్ పెంచుకున్న టీఆర్ఎస్ పార్టీయే పేరు మార్చుకుని బీఆర్ఎస్ గా మారింది. అటువంటి బీఆర్ఎస్ పార్టీకి రాష్ట్రంలోకి ఆహ్వానిస్తే తనకు రాజకీయంగా ప్రయోజనం కలుగుతుందని వైసీపీ భావిస్తోంది. బీఆర్ఎస్ ఏపీలో అడుగుపెడితే ఎవరికి రాజకీయంగా నష్టం జరుగుతుందన్న చర్చ తెరమీదకు వచ్చిన నేపథ్యంలో వైసీపీ కేసీఆర్ బీఆర్ఎస్ కోరితే ఆ పార్టీకి మద్దతు కూడా ఇస్తామని ప్రకటించింది. దీనిని బట్టే బీఆర్ఎస్ ఎంట్రీ తెలుగుదేశం కు రాజకీయంగా ఒకింత నష్టం చేస్తుందన్న భావన వైసీపీలో ఉందన్నది అవగతమౌతోంది. వైసీపీ సీనియర్ నేత ప్రభుత్వ సలహాదారు సజ్జల రామక్రిష్ణారెడ్డి  అందుకే ఏపీలో బీఆర్ఎస్ పోటీ చేస్తేనే మంచిదన్న అభిప్రాయాన్ని వ్యక్తం చేశారు. అంతే కాదు   ఏపీలో బీయారెస్ కు ఆ పార్టీ అధినేత కేసీఆర్ మద్దతు కావాలని కోరితే ఇచ్చేందుకు కూడా తాము సిద్ధమని చెప్పకనే చెప్పేశారు.   ఇప్పటికే బీఆర్ఎస్ ఏపీలో ఎంటర్ అయితే రాజకీయంగా వైసీపీకి లబ్ధి చేకూరుతుందన్న అంచనాలలో ఆ పార్టీ ఉంది.  అందుకే తెలంగాణ సీఎం కోరితే జగన్ ఆలోచించి సానుకూల నిర్ణయం తీసుకుంటారని సజ్జల చెబుతున్నారు. ప్రస్తుతం ఏపీలో అన్ని విధాలుగా వైసీపీ గ్రాఫ్ పడిపోతోంది. వైసీపీకి అనుకూలంగా ఏ పార్టీ కూడా లేదు. పైపెచ్చు విపక్షాలన్నీ ముఖ్యంగా జనసేన, బీజేపీలు తెలుగుదేశం పార్టీకి దగ్గరౌతున్న సూచనలు కనిపిస్తున్నాయి. ఈ నేపథ్యంలో ప్రభుత్వ వ్యతిరేక ఓటును చీలి అధికార పార్టీకి లబ్ధి చేకూరాలంటే బీఆర్ఎస్ ఏపీలో ఎంట్రీయే మార్గమని వైసీపీ తలపోస్తున్నది. అయితే ఇరు రాష్ట్రాలూ మళ్లీ కలవాలన్న నోటితోనే సజ్జల బీఆర్ఎస్ కు మద్దతు అనడాన్ని ప్రజలు ఎలా రిసీవ్ చేసుకుంటారన్న అనుమానాలు అయితే రాజకీయ వర్గాలలో వ్యక్తమౌతున్నాయి. ఇప్పటికే ఇరు రాష్ట్రాలూ మళ్లీ కలిసిపోతే స్వాగతించే విషయంలో వైసీపీ ముందుంటుంది అన్న వైసీపీ సీనియర్ నేత, రాజకీయ సలహాదారు సజ్జల మాటల వెనుక ఉన్నది కేసీఆర్ వ్యూహమేనన్న భావన కూడా రాజకీయ వర్గాలలో వ్యక్తమౌతోంది. ఇందుకు ఏపీ సీఎం జగన్, తెలంగాణ సీఎం కేసీఆర్ ల మధ్య బహిరంగ రహస్య మైత్రి కూడా ఒక కారణమేనని చెప్పక తప్పదు. ఒకే సమయంలో ఉమ్మడి ఆంధ్రప్రదేశ్ (తెలుగు రాష్ట్రాల పున: విలీనం గురించి, బీఆర్ఎస్ గా పేరు మార్చుకున్న తెరాసకు ఏపీలో స్వాగతం గురంచీ సజ్జల చెబుతున్న మాటల వెనుక ఉన్న వ్యూహమేమిటన్న చర్చ ఇప్పుడు రాజకీయవర్గాలలో జోరుగా సాగుతోంది. 

పాద యాత్ర ..పోరు బాట

తెలంగాణలో ఇప్పడు రాజకీయ నాయకుల పాద యాత్రల సీజన్ నడుస్తోంది. ఓ వంక బీజేపీ రాష్ట్ర అధ్యక్షుడు బండి సంజయ్, ప్రజా సంగ్రామ యాత్ర  ఐదవ విడత పాద యాత్ర సాగుతోంది. మరో వంక వైఎస్సార్ తెలంగాణ పార్టీ, (వైఎస్సార్ టీపీ) అధినాయకురాలు వైఎస్ షర్మిల సుమారు సంవత్సర కాలానికి పైగా, అంచెల వారీగా సాగిస్తూ వస్తున్న  ప్రజాప్రస్థానం పాద యాత్రకు బ్రేక్ పడింది. వారం రోజుల క్రితం వరంగల్ లో ఆమె యాత్రను తెరాస నాయకులు అడ్డుకున్నారు. ఇక అక్కడి నుంచి ఆమె యాత్రకు ముందుకు సాగకుండా, ఒకదానివెంట ఒకటిగా అనేక నాటకీయ పరిణామాలు చోటు చేసుకుంటున్నాయి. ఇప్పడు ఆమె యాత్ర అనుమతి కోసం ‘దీక్ష’ చేసి ఆసుపత్రి పాలయ్యారు. ఆమె పాదయాత్రకు కోర్టు అనుమతి ఇచ్చినా, తెరాస సర్కార్,మాత్రం ససేమిరా అంటోంది.  నిజానికి, బండి సంజయ్  యాత్రకు మొదట్లో పోలీసులు అనుమతి నిరాకరించారు. అయితే, కోర్టు అనుమతి ఇచ్చిన తర్వాత పోలీసులు బండి యాత్రకు ఓకే చెప్పారు. కానీ, షర్మిల విషయంలో మాత్రం కోర్టు అనుమతించినా, పోలీసు పూజారులు నో  అంటున్నారు. అయితే, ఇంతవరకు ఎప్పుడూ షర్మిల యాత్రను అడ్డుకోని తెరాస, ఇప్పడు హటాత్తుగా షర్మిల యాత్రను అడ్డుకోవడం వెనక ఉభయ తెలుగు రాష్ట్రాల ముఖ్యమంత్రుల ఉమ్మడి వ్యూహం ఉందనే ప్రచారం జరుగుతోంది. అయితే ఆ వ్యూహం ఏమిటో కానీ, ఇదేదో ట్రయాంగిల్  పొలిటికల్ స్టొరీలా ఉందనే  అనుమానాలు అయితే వ్యక్తమవుతున్నాయి.  అదలా ఉంటే, టీపీసీసీ అధ్యక్షుడు రేవంత్ రెడ్డి కూడా పాదయాత్రకు సిద్డంవుతున్నట్లు తెలుస్తోంది. నిజానికి డిసెంబర్ 9 నుంచి ఆయన పాదయాత్ర మొదలవుతుందని, కొంత ప్రచారం జరిగింది. అయితే,డిసెంబర్ 7 నుంచే పార్లమెంట్ శీతాకాల సమావేశాలు ప్రారంభం కావడంతో, ఆయన యాత్రను వాయిదావేసుకున్నట్లు తెలుస్తోంది. అయితే, అదొక కారణమా అయితే కావచ్చును కానీ, అసలు కారణం వేరే ఉందని పార్టీ వర్గాల్లో చర్చ జరుగుతోంది. గతంలో, రేవంత్ రెడ్డి, మహబూబ్ నగర్ నుంచి హైదరాబాద్ వరకూ చేసిన పాదయాత్ర వివాదాస్పదమైన నేపధ్యంలో, ఆయన ఆచి తూచి అడుగులు వేస్తున్నారని అంటున్నారు. అయితే, రాహుల్ గాంధీ భారత్ జోడో పాదయాత్రకు కొనసాగింపుగా రాష్ట్రంలో రేవంత్ రెడ్డి పాదయాత్రకు రాహుల్ గాంధీ, కాంగ్రెస్ అధిష్టానం అనుమతి ఇచ్చిందని, రూట్ మ్యాప్  కూడా ఓకే అయిందని, పాటలు, ప్రచార సామగ్రి సైతం సిద్ధమైందని రేవంత్ వర్గం ప్రచారం చేస్తోంది. పార్లమెంట్ సమావేశాలు ముగిసిన తర్వాత, కొత్త సంవత్సరంలో రేవంత్  రెడ్డి పాదయాత్ర మొదలవుతుందని అంటున్నారు.  అదలా ఉంటే ఇప్పటికే, ఉమ్మడి ఖమ్మం జిల్లాలో పాదయాత్ర చేసిన, సీఎల్పీ నేత భట్టి విక్రమార్క కూడా, నేను సైతం అంటూ పాదయాత్రకు నడుం బిగిస్తున్నారు. హైకమాండ్ అనుమతి ఇస్తే తెలంగాణ వ్యాప్తంగా పాదయాత్ర చేస్తానని ఆయన ప్రకటించారు. మరోవంక కాంగ్రెస్ సీనియర్ నాయకులు కొందరు, రేవంత్ రెడ్డి పాదయాత్ర లక్ష్యం పార్టీని బలోపేతం చేయడం కాదని, పాదయాత్ర ద్వారా రేవంత్ రెడ్డి వ్యక్తిగత ఇమేజ్ పెంచుకునేందుకే పాదయాత్రకు తొందర పడుతున్నారని, సీనియర్లు కాంగ్రెస్ పార్టీ హైకమాండ్‌కు ఫిర్యాదు చేసినట్లు తెలుస్తోంది. ఒక్కరేవంత్ రెడ్డి మాత్రమే కాకుండా ఇతర నేతలు కూడా పాదయాత్ర చేసేలా అంగీకరించాలని సీనియరాలు కోరుతున్నట్లు పార్టీలో ప్రచారం జరుగుతోంది. ఇప్పటికే కాంగ్రెస్ హైకమాండ్ రాహుల్‌గాంధీ చేపట్టిన భారత్‌ జోడో యాత్ర ముగిసిన రాష్ట్రాల్లో ఆయా రాష్ట్రాలకు చెందిన కాంగ్రెస్‌ నేతలంతా పాదయాత్ర చేయాలని ఆదేశించింది. అందులో భాగంగా, పీసీసీ, సీఎల్పీ నేతలు ఇద్దరు, కలిసి పాదయాత్ర చేయాలనే ప్రతిపాదనను అదిష్టానం పరిశీలిస్తున్నట్లు తెలుస్తోంది. అలాగే, పార్టీ ఐక్యతను చాటే విధంగా పార్టీ కీలక నేతలంతా కలిసి బస్సు యాత్ర చేయాలన్నమరో  ప్రతిపాదన కూడా హైకమాండ్ పరిశీలనలో ఉన్నట్లు చెపుతున్నారు.  అయితే, గమ్మతుగా, రేవంత్ రెడ్డి పాద యాత్ర చేపడితే, మద్దతు ఇస్తానని, జగ్గా రెడ్డి ప్రకటించారు. మరోవంక, రాష్ట్ర వ్యాప్తంగా పాదయాత్ర చేసి, రాష్ట్రంలో కాంగ్రెస్ పార్టీని గెలిపిస్తాని శపధం చేసిన, కోమటి రెడ్డి వెంకట రెడ్డికి కాంగ్రెస్ అధిష్టానం పొమ్మన కుండా పొగ పెట్టింది. అయన పార్టీలో ఉన్నా లేనట్లే, తాజాగా ప్రకటించిన కాంగ్రెస కమిటీలు వేటిలోనూ ఆయనకు స్థానం కల్పించలేదు. మరో వంక,మాణిక్ ఠాగూర్, రేవంత్ మీదనే కాంగ్రెస్ అధిష్టానం పూర్తి విశ్వాసం ఉంచింది. ఈ నేపధ్యంలో కొత్త సంవత్సరంలో రేవంత్ రెడ్డి పాదయాత్ర ఖాయంగా ఉంటుదని,అయితే ఆయన వెంట భట్టి ఉంటారా లేదా అన్నదే తెలవలసిల్సి ఉందని అంటున్నారు.  అయితే ఎవరు ఏ యాత్రలు చేసినా రాష్ట్ర రాజకీయాలపై యాత్రల ప్రభావం ముపటిలా ఉండదని పరిశీలకులు అంటున్నారు. ముఖ్యంగా తెలంగాణలో పాదయాత్రల ప్రభావం పెద్దగా ఉందని, అంటున్నారు. మునుగోడు ఎన్నికల ప్రచారంలో రేవంత్ రెడ్డి ఒకటి రెండు రేజులు పాదయాత్ర చేశారు. అయినా కాంగ్రెస్ అభ్యర్ధి డిపాజిట్, కోల్పోయారు. అలాగే, పాదయాత్రలు చేసిన నాయకులు అందరూ గెలుస్తారనే భరోసా కూడా లేదని, అంటున్నారు.

‘వారాహి’ రైట్ రైట్

జనసేనాని పవన్ కల్యాణ్ ఎన్నికల  ప్రచార వాహనం ‘వారాహి’కి లైన్ క్లియర్  అయ్యింది. ఆ వాహనానికిరిజిస్ట్రేషన్ పూర్తయ్యింది. పవన్ ఎన్నికల ప్రచార వాహనం ‘వారాహీ’ ఇటీవలి కాలంలో వార్తలలో ప్రముఖంగా నిలిచింది. ఆ వాహనం రంగు, ఎత్తు, వాహనానికి ఉన్నటైర్లు.. ఇలా పలు అంశాలు కేంద్ర ట్రాన్స్ పోర్ట్ చట్టానికి అనుగుణంగా లేవంటూ ఆరోపణలు, విమర్శలు వెల్లువెత్తాయి. ఏపీ మాజీ మంత్రి  పేర్ని నాని అయితే ఆ వాహనానికి రోడ్లపై తిరిగే అర్హత లేదంటూ మీడియా మీట్ పెట్టి  మరీ చెప్పారు. ఇక ఏపీ ట్రాన్స్ పోర్ట్ కమిషనర్ అయితే.. వాహనం రంగు ప్రస్తావిస్తూ.. ఆ రంగు అంటే అలీవ్ గ్రీన్ కేవలం మిలిటరీ వాహనాలకు మాత్రమే పరిమితమని, మరో ఇతర వాహనాలకూ ఆ రంగు నిషిద్ధమని చెప్పారు. అందుకే వాహన తయారీ కంపెనీలేవీ అలీవ్ గ్రీన్ రంగుతో వాహనాన్ని విడుదల చేయలేదని అన్నారు. అంతే కాకుండా ఈ రంగుతో పవన్ కల్యాణ్ తన వాహనానికి రిజిస్ట్రేషన్ చేయించుకోవడం అసాధ్యమని కూడా అన్నారు. మొత్తం మీద జనసేనాని తన ఎన్నికల ప్రచార రథం ఫొటోలు విడుదల చేసిన క్షణం నుంచీ, ఆ వాహనం ‘వారాహి’ ఇంకా రోడ్ల మీదకు రాకముందే వివాదాలలో చిక్కుకుంది.  అయితే ఈ వాదనలూ, వివాదాలతో సంబంధంలేకుండా తెలంగాణ ట్రాన్స్ పోర్టు అధికారులు ‘వారాహి’ కి రిజిస్ట్రేషన్ చేశారు. దీంతో ఈ వాహనం చుట్టూ చుట్టుముట్టిన వివాదాలు దూది పింజెల్లా తేలియోయాయి. అయితే ఇప్పటి వరకూ అందరూ చెబుతున్నట్లుగా పవన్ కల్యాణ్ ఎన్నికల ప్రచార వాహనం రంగు అలీవ్ గ్రీన్ కాదనీ, డాక్యుమెంట్లలో దానిని ఆల్ట్రాగ్రీన్ గా పేర్కొన్నారని తెలిసింది. వారాహికి రిజిస్ట్రేషన్ ప్రక్రియ పూర్తి కావడంతో ఈ వాహనం రోడ్లపైకి వస్తుందో రాదో అన్న అనుమానాలకు తెరపడినట్లైంది.  అన్ని సర్టిఫికెట్ పరిశీలించిన మీదట, వారాహి’కి  రిజిస్ట్రేషన్  చేశామని తెలంగాణ డిప్యూటీ ట్రాన్స్పోర్ట్ కమిషనర్ పాపారావు వెల్లడించారు. వాహనానికి రిజిస్ట్రేషన్ నెంబర్ TS13EX 8384ను కేటాయించారని తెలిపారు.  దీంతో వాహనం రోడ్లపైకి వచ్చేందుకు అడ్డంకులు తొలగిపోయినట్లేనని అంటున్నారు. అయితే ఏదో ఒక సాంకేతిక కారణం చూపి ఏపీ రోడ్లపై తిరగకుండా ‘వారాహి’ని  అడ్డుకుంటారా అన్న అనుమానాలు మాత్రం జనసేన శ్రేణుల్లో వ్యక్తమౌతున్నాయి.

పొత్తులపై జనసేన పరస్పర విరుద్ధ ప్రకటనలు

జనసేన.. పవన్ కల్యాణ్ నేతృత్వంలోని ఈ పార్టీ ఏపీ రాజకీయాలలో కీలకంగా మారింది. సొంతంగా పోటీ చేస్తే విజయం సంగతి ఎలా ఉన్నా..ఇతర పార్టీల గెలుపు ఓటములను మాత్రం తీవ్రంగా ప్రభావితం చేస్తుందని పరిశీలకులు విశ్లేషణలు చేస్తున్నారు. అసలు రాష్ట్రంలో పొత్తుల చర్చకు తెరతీసిన జనసేనాని పవన్ కల్యాణ్.. ఆ తరువాత మాత్రం పొత్తుల విషయంపై మాట్లాడకుండా.. రాష్ట్రంలో ఒంటరి ప్రయాణమంటూ సంకేతాలు ఇచ్చారు. దీంతో రాష్ట్రంలో రాజకీయ సమీకరణాలపై పెద్ద ఎత్తున ఊహాగానాలు వ్యక్తమయ్యాయి. ఒక వైపు బీజేపీతో మైత్రి ఉన్నా జనసేనాని ఆ పార్టీ రాష్ట్ర నాయకత్వంతో అంటీముట్టనట్టుగానే వ్యవహరిస్తూ వచ్చారు. ఇక బీజేపీ హైకమాండ్ పలు సందర్భాలలో పవన్ ను విస్మరించినా.. ఇటీవల విశాఖ సంఘటనల తరువాత మాత్రం ఆయనకు ఒకింత ప్రాధాన్యత ఇవ్వడం ప్రారంభించింది. అలాగే రాష్ట్రంలో అధికారంలో ఉన్న జగన్ సర్కార్ పై చార్జిషీట్ తయారు చేయాలంటూ విశాఖ పర్యటన సందర్భంగా మోడీ రాష్ట్ర బీజేపీ నాయకత్వాన్ని ఆదేశించడంతో వచ్చే ఎన్నికలలో ఏపీలో త్రిముఖ పోటీకి రంగం సిద్ధమౌతోందా అన్న అనుమానాలూ వ్యక్తమయ్యాయి. అదే జరిగితే పార్టీల గెలుపోటములపై పలు విశ్లేషణలూ వెల్లువెత్తాయి. మొత్తం మీద ఏపీ రాజకీయాలలో జనసేన కీలకం కానున్నదనే రాజకీయవర్గాలు అంచనా వేస్తూ వచ్చాయి. అయితే మొత్తంగా జనసేన రాజకీయ ప్రస్థానం మాత్రం పవన్ కల్యాణ్ ‘మూడ్’ కు అనుగుణంగానే సాగుతోంది. అయితే సామాన్య జనం  మాత్రం ఆయనను ఇంకా సినిమా హీరోగానే చూస్తున్నారు తప్ప పరిపూర్ణ రాజకీయ నేతగా గుర్తించడం లేదు. ఇందుకు ఆయన సినిమాలకు అగ్ర ప్రాధాన్యత ఇచ్చి.. రాజకీయాలను ఇప్పటికీ పార్ట్ టైమ్ గానే చూస్తున్న తీరే కారణమని పరిశీలకులు విశ్లేషణలు చేస్తున్నారు. ఒక సారి ఆయన అధికారమే లక్ష్యం అంటారు.. మరో సారి ప్రశ్నించే పార్టీగా జనసేన ఉంటుంది.. అధికారమే పరమావధి అంటారు. తన షెడ్యూల్ ప్రకారమే ప్రజా జీవితాన్ని కొనసాగిస్తున్న తీరు ప్రజలలో   ఒక సంపూర్ణ ప్రజా నాయకుడిగా, రాజకీయ నాయకుడిగా గుర్తింపు విషయంలో పవన్ కు విషయంలో ఆయన రెండు పడవల మీద ప్రయాణమే కారణమనడంలో సందేహమే లేదు. ఆయన వరుస సినిమాలు అంగీకరిస్తూ వార్తల్లో నిలుస్తున్నారే తప్ప.. రాజకీయ నాయకుడిగా నిరంతరాయంగా ప్రజలతో మమేకమౌతూ.. ప్రజానాయకుడిగా గుర్తింపు పొందే విషయంలో మాత్రం పెద్దగా చొరవ చూపడం లేదు. అందుకే ఆయన సభలకు వచ్చే జనసందోహం ఒక సినిమా హీరోను చూడటానికి వస్తున్నట్లుగా ఉంది తప్ప ఆయన చెప్పే విషయాలు, అంశాలపై శ్రద్ధతో కాదు. ఇలా చెప్పడానికి కారణమేమిటంటే.. పవన్ బయటకు వచ్చినప్పుడు మాత్రమే జనసేన కనిపిస్తుంది. ఆయన మళ్లీ తన షూటింగ్ కు వెళ్లిపోతే జనసేన కార్యక్రమాలు ఏవీ ఉండవు. ఆయన సభలు, ఆయన పర్యటనలు మాత్రమే జనసేన కార్యక్రమాలు. ఆ తరువాత పార్టీ ఊసే రాష్ట్రంలో ఎక్కడా వినపడని పరిస్థితి. రాజకీయంగా ఆయన అడుగులు ఒకడుగుముందుకు ఒకడుగు వెనక్కు చందంగా ఉండడానికి ఆయన జోడు పడవల ప్రయాణమే ప్రధాన కారణంగా చెబుతున్నారు. గతంలో సినిమాల నుంచి రాజకీయాలలోకి వచ్చి రాణించిన వారెంత మంది ఉన్నారో... వైఫల్యం చెందిన వారూ అంతే మంది ఉన్నారు. తెలుగుదేశం వ్యవస్థాపకుడు ఎన్టీఆర్ విషయం తీసుకుంటే.. ఆయన ప్రజా జీవితంలోకి రావాలని నిర్ణయించుకున్న తరువాత ఇక సినిమాల వైపు చూడలేదు. ఆ తరువాతెప్పుడో ఒకటి రెండు సినిమాలు చేసినా ఆయన ప్రథమ ప్రాధాన్యత మాత్రం రాజకీయ రంగానికే ఇచ్చారు. పవన్ కల్యాణ్ కు స్వయానా సోదరుడు అయిన చిరంజీవి కూడా రాజకీయాలలో ఉన్నంత కాలం సినిమాల ఊసెత్తలేదు. దాదాపు రెండున్నరేళ్లు పూర్తిగా సినిమాలకు దూరమయ్యారు. ఆయన రాజకీయాల నుంచి విరమించుకున్న తరువాత ఇప్పుడు సినిమాలపైనే దృష్టి కేంద్రీకరించారు. ఆయన అడపాదడపా రాజకీయాల గురించి ఇప్పుడు మాట్లాడుతున్నా.. అవన్నీ సినిమాలలో లేదా సినిమా ప్రమేషన్లలో భాగంగానే ఉంటున్నాయి. అయితే పవన్ కల్యాణ్ విషయం అది కాదు.. ఆయన అటు సినిమాలూ, ఇటు రాజకీయాలు అంటూ రెండు పడవల ప్రయాణం చేస్తున్నారు. ప్రజా జీవితం కోసం సినిమాలను, సినిమాల కోసం ప్రజాజీవితాన్ని వదులుకోలేనని చెబుతున్నారు. అటో ఇటో తేల్చుకుంటే తప్ప ఆయన పరిపూర్ణ నాయకుడిగా జనం గుర్తించే పరిస్థితి లేదనే చెప్పాలి. సినిమా హీరోగా రాజకీయాలు చేస్తున్నంత కాలం ఆయన రాజకీయం కూడా ఒక సినిమాలానే జనం చూస్తున్నారు. అందుకే ఆయన అడుగేస్తేనే జనసేన పార్టీ , ఆయన షూటింగ్ లలో ఉంటే అందుకు సంబంధించిన విషయాలు తప్ప జనసేన గురించి మాట్లాడేందకు ఎవరూ లేరు. జనసేన  ఆవిర్బవించి ఇన్నేళ్లయినా ఇప్పటికీ క్షేత్ర స్థాయి నుంచీ పార్టీ నిర్మాణం లేదంటేనే పవన్ కల్యాణ్  పార్టీకి ఇస్తున్న ప్రాధాన్యత ఎంత, ఏమిటి అన్నది అవగతమౌతుంది.  వచ్చే ఏడాది జనవరి నుంచి  పవన్ కళ్యాణ్ రాష్ట్ర వ్యాప్తంగా బస్సుయాత్ర చేయనున్నట్లు ప్రకటించారు.  వారాహి అన్న పేరుతో ఆయన యాత్రకు వాహనం కూడా సిద్ధమైంది. అయితే స్పష్టమైన కార్యాచరణతో షెడ్యూల్ విడుదల కాకపోవడానికి డేట్స్ అడ్జస్ట్ కాకపోవడమే కారణం. ఇప్పుడాయన వరుసగా చేస్తున్న సినిమా ప్రకటనలు గమనిస్తే, ఆయన బస్సుయాత్ర నిరాటంకంగా సాగుతుందా అన్నది అనుమానమే. ఈ అనుమానాన్ని జనసేన శ్రేణులే వ్యక్తం చేస్తున్నాయి. సినిమా షూటింగ్ ల మధ్య విరామంలో ఆయన తన బస్సుయాత్రను ఒక విరామ యాత్రగా సాగిస్తారన్న సెటైర్లూ పేలుతున్నాయి. అందుకే ఆయన ఒక సమయంలో పొత్తులు అంటారు.. మళ్లీ పొత్తుల సంగతి పక్కన పెట్టేసి.. అధికారమే లక్ష్యమని ప్రకటనలు చేస్తారు. ఇలా పరస్పర విరుద్ధప్రకటనలతో తనలోని కన్ఫ్యూజన్ ను పార్టీ శ్రేణులకూ, జనాలకు కూడా పంచుతారు. దీంతో అసలు జనసేన లక్ష్యం ఏమిటన్న విషయంలో పార్టీ శ్రేణులకే ఇంకా స్పష్టత లేని పరిస్థితి.  కొంత కాలం కిందట రాష్ట్రంలో ప్రభుత్వ వ్యతిరేక ఓటును ఎట్టి పరిస్థితుల్లోనూ చీలనివ్వననీ, ఇందు కోసం అవసరమైతే బీజేపీతో మాట్లాడతాననీ ప్రకటించి..  తొందరపడి ఒక కోయిలా ముందే కూసింది అన్న చందంగా పొత్తు పొడుపులపై చర్చకు తెరలేపారు. ఆ తరువాత ఎమైందో ఏమో కానీ పొత్తు చర్చలు కాదు.. రాష్ట్ర పగ్గాలు చేజిక్కించుకోవడమే లక్ష్యమని ప్రకటించారు.  సరే తాజాగా మళ్లీ ఆ పార్టీ రాజకీయ వ్యవహారాల కమిటీ చైర్మన్ నాదెండ్ల మనోహర్ పొత్తు పొడుపుల గురించి మాట్లాడారు. పవన్ కల్యాణ్ గతంలో ఏం చెప్పారో మళ్లీ అదే విషయాన్ని మనోహర్ వల్లె వేశారు. వైసీపీ విముక్త ఆంధ్రప్రదేశ్ లక్ష్యంగా జనసేన పని చేస్తుందనీ, ఇందు కోసం ప్రభుత్వ వ్యతిరేక ఓటు చీలకుండా అవసరమైన చర్యలన్నీ తీసుకుంటుందని ఉద్ఘాటించారు. ఇందుకోసం అవసరమైతే పొత్తులకు కూడా వెనుకాడబోమన్నారు. అతి త్వరలో పొత్తులపై క్లారిటీ ఇస్తామన్నారు. దీని వల్ల రాష్ట్రంలో పొత్తల చర్చ మరో సారి తెరమీదకు రావడం వినా మరో ప్రయోజనం అయితే సిద్ధించదు. జనసేన క్యాడర్ లో కన్ఫ్యూజన్ పెరగడం తప్ప మరో లాభం ఉండదు. గతంలో క్షేత్ర స్థాయిలో జనసేన తెలుగుదేశం శ్రేణులు కలిసి పని చేసేవి. పొత్తులు కాదు.. అధికారం కోసమే జనసేన అన్న జనసేనాని పిలుపుతో ఆ వాతావరణం పోయింది. ఇప్పుడు మళ్లీ పొత్తుల గురించిన ప్రస్తావనతో క్షేత్ర స్థాయిలో జనసేన క్యాడర్ అసలు తామేం చేయాలి, ఎలా మెలగాలి అన్న దిశానిర్దేశం లేక నిస్తేజంగా మారిపోయే పరిస్థితి నెలకొంది. ఇప్పటికైనా జనసేనాని క్యాడర్ కు దిశా నిర్దేశం చేయడంలో క్లారిటీగా ఉండాల్సిన అవసరం ఎంతైనా ఉంది.  

కవిత చుట్టూ ఉచ్చు బిగుస్తోందా? లిక్కర్ స్కాంలో కవితకు మరో నోటీసు

ఢిల్లీ లిక్కర్ స్కాంలో కవిత చుట్టూ ఉచ్చు బిగుస్తోందా? విచారణ పేరిట సీబీఐ దూకుడు గమనిస్తే ఔననే సమాధానం వచ్చేలా ఉంది. ఈ కుంభకోణంలో ఇప్పటికే కవితకు సన్నిహితులుగా ఉన్నవారిని విచారించి, కొందరిని అరెస్టు చేసిన సీబీఐ కవితను కూడా ఆదివారం ఆమె నివాసంలో సుదీర్ఘంగా విచారించింది. దాదాపు ఏడున్నర గంటల పాటు కవితను విచారించిన సీబీఐ.. ఆ విచారణ ముగిసిన అనంతరం ఆమెకు మరో నోటీసు జారీ చేసింది. తొలి నోటీసు సీఆర్పీసీ 160కింద ఇచ్చిన సీబీఐ.. ఆ నోటీసు మేరకు విచారణ పూర్తయిన తరువాత ఇచ్చిన నోటీసు సీఆర్పీసీ 91 కింద ఇచ్చింది. అంటే తొలి నోటీసులో ఆమె వివరణ తీసుకుందుకు మాత్రమే నంటూ ఆమె ఎక్కడ కావాలంటే అక్కడ విచారణ జరుపుతామని పేర్కొన్న సీబీఐ.. ఆమె   ఎంపిక చేసుకున్న విధంగా ఆమె నివాసంలోనే విచారించింది. అయితే రెండవ సారి జారీ చేసిన నోటీసులో మాత్రం ఆమెకు అటువంటి వెసులు బాటు ఇవ్వలేదు. ఈ సారి  సీబీఐ తాను ఎక్కడికి రమ్మంటే అక్కడికి ఆమె విచారణ నిమిత్తం వెళ్లాల్సి ఉంటుంది. తొలి నోటీసు మేరకు ఆమె నివాసానికి వెళ్లి దాదాపు ఏడున్నర గంటల పాటు సుదీర్ఘంగా విచారించిన సీబీఐ అధికారులు..మలి నోటీసుకు సంబంధించి మాత్రం సమయం, తేదీ, ప్రాంతం తరువాత తెలియజేస్తామని పేర్కొంది. ఈ నోటీసులు విచారణకు వచ్చేముందు ధ్వంసం చేసి ఫోన్లు, లిక్కర్ స్కాంకు సంబంధించిన డాక్యుమెంట్లు  అన్నిటినీ తమకు సమర్పించాల్సి ఉంటుందని పేర్కొన్నారు. ఢిల్లీ లిక్కర్ స్కాంలో ఇవన్నీ కూడా సాక్ష్యాలుగా పరిగణిస్తారు. మలి నోటీసు మేరకు కవితను విచారించిన అనంతరం ఆమెను లిక్కర్ స్కాం కేసులో నిందితురాలిగా చేర్చే అవకాశాలున్నాయని న్యాయనిపుణులు చెబుతున్నారు.  ఇక ఫోన్ల ధ్వంసం సంబంధించిన కచ్చితమైన ఆధారాలను నిర్దారణ చేసుకున్న తరువాతనే సీబీఐ అధికారులు ఆమెను సీఆర్పీసీ 91 కింద నోటీసు జారీ చేశారని భావిస్తున్నారు. సీబీఐ కోరిన మేరకు కవిత ఆ వివరాలన్నీ అందించితే ఒక ఇబ్బంది, అందించకుంటే మరో ఇబ్బంది అన్నట్లుగా ఆమె ఇరుక్కున్నారన్న అభిప్రాయం కూడా వ్యక్త మౌతోంది. అయితే మలి నోటీసు మేరకు ఆమెను ఎప్పుడు విచారిస్తారన్న విషయంపై మాత్రం స్పష్టత లేదు.  ఎందుకంటే త్వరలోనే విచారణకు ఎక్కడకు హాజరు కావాలి, ఏ తేదీన హాజరుకావాలి, ఏ సమయంలో హాజరు కావాలని అన్న వివరాలను త్వరలోనే తెలియజేస్తామని సీబీఐ అధికారులు ఆ నోటీసులో పేర్కొన్నారు.   ఈ కేసులో ఇప్పటి వరకూ సీబీఐ విచారణ తీరును గమనిస్తున్న వారు కవితను సీబీఐ హస్తినకు పిలిపించుకుని విచారణ జరిపే అవకాశాలే మెండుగా ఉన్నాయంటున్నారు.  కాగా ఆదివారం సీబీఐ విచారణ పూర్తి అయిన వెంటనే కవిత తన నివాసం నుంచి నేరుగా ప్రగతి భవన్ కు చేరుకుని  సీఎం కేసీఆర్‌తో భేటీ అయ్యారు. విచారణ తీరును వివరాలను.. కవిత కేసీఆర్ తో భేటీ తరువాత మీడియాకు ప్రకటిస్తారని అంతా భావించినా అది జరగలేదు. కేసీఆర్ తో బేటీ అనంతరం కవిత ప్రగతి భవన్ నుంచి నేరుగా తన నివాసానికి వెళ్లిపోయారు.   

షర్మిల.. సునీత ఒకరికి ఒకరు

వైఎస్సార్టీపీ అధినేత్రి షర్మిల కోర్టు అనుమతించినా తన పాదయాత్రను పోలీసులు అడ్డుకోవడంతో నిరశన దీక్ష చేపట్టారు. అయితే ఆమె దీక్షను పోలీసులు భగ్నం చేయడంతో ఆమె లోటస్ పాండ్ లోనే దీక్ష కొనసాగించారు. ఈ నేపథ్యంలోనే వైఎస్ నిర్మల ఆరోగ్య పరిస్థితిని ఎప్పటికప్పుడు ఒక వైద్యురాలు పర్యవేక్షిస్తున్నారు. ఆమె ఎవరంటే.. వైఎస్ వివేకా కుమార్తె సునీత. తన తండ్రివ హత్య కేసు తన సోదరుడు ముఖ్యమంత్రిగా ఉన్న ఏపీలో  పారదర్శకంగా, నిష్పాక్షికంగా జరిగే అవకాశం లేదంటూ సుప్రీం కోర్టుకు వెళ్లి మరీ విచారణను పొరుగు రాష్ట్రానికి మార్పించుకున్న సుసీత.. షర్మిల ఆరోగ్య పరిస్థితిని ఎప్పటికప్పుడు పర్యవేక్షిస్తున్నారు. ఇందుకు సంబంధించిన వీడియో క్లిప్పింగ్ సామాజిక మాధ్యమంలో తెగ వైరల్ అయ్యింది.  శత్రువుకు శత్రువు.. మిత్రుడు అన్నట్లుగా   షర్మిల..   వివేకా కుమార్తె వైయస్ సునీత ఒకరికొకరు స్నేహభావంతో ఉన్నారంటూ నెటిజన్లు వ్యాఖ్యానిస్తున్నారు. తన తండ్రి వివేకా హత్య కేసు.. తన సోదరుడు వైయస్ జగన్ ముఖ్యమంత్రి అయితే అతి సూనాయాసంగా ఛేదించవచ్చునని వైయస్ సునీత తొలుత ఆశపడ్డారనీ,   ఆ క్రమంలో సీఎం జగన్‌ను కలిసి.. ఈ కేసు ఛేదించడంలో జరుగుతోన్న జాప్యాన్ని  ఆయనకు  సోదాహరణగా వివరించారనీ,   అయితే జగన్ స్పందనతో ఆమె హతాశురాలయ్యారనీ.. ఈ నేపథ్యంలో సోదరుడు జగన్‌ని నమ్ముకునే కంటే.. న్యాయస్థానాన్ని నమ్ముకోవడం ఉత్తమని భావించి ఆమె ఆ దిశగా అడుగులు వేశారనీ నెటిజన్లు అంటున్నారు.    జగన్ అధికారంలోకి రావడం కోసం జగనన్న వదిలిన బాణమంటూ ఉమ్మడి రాష్ట్రంలో  షర్మిల పాదయాత్ర చేశారనీ, అయితే  ఆ తర్వాత   జగన్ అధికారంలోకి వచ్చిన తరువాత షర్మిలను దూరం పెట్టిన సంగతి తెలిసిందే.  ఈ నేపథ్యలోనే  సునీత తండ్రి వివేకా హత్య కేసులో  జగన్ సొంత సోదరి  షర్మిల.. స్వయంగా ఢిల్లీకి వెళ్లి సీబీఐకి సైతం వాంగ్మూలం ఇచ్చిన సంగతీ విదితమే. ఈ విధంగా జగన్ సోదరి, సవతి సోదరి ఇద్దరూ కూడా జగన్ కు వ్యతిరేకంగా మారారు.  శత్రువుకు శత్రువు మిత్రుడన్నట్లు ఇప్పుడు వీరిద్దరు ఒక్కటై.. జగనన్నకు బాణం దెబ్బ రూచి చూపించనున్నారని నెటిజన్లు వ్యాఖ్యలు చేస్తున్నారు.   వివేకా హత్య అనంతరం చోటుచేసుకున్న పరిణామాల నేపథ్యంలో పులివెందుల్లో   అవినాష్ రెడ్డి కుటుంబానికి ఒక్క  జగన్ ఫ్యామిలీ మాత్రమే అండగా ఉందనీ, మిగిలిన వెఎస్ ఫ్యామిలీ  మొత్తం సునీత,  షర్మిలలకే మద్దతుగా ఉన్నారనీ కూడా సోషల్ మీడియాలో పోస్టులు వెల్లువెత్తుతున్నాయి.   ఏదీ ఏమైనా..   వివేకా హత్య కేసులో పాత్రదారులు, సూత్రదారులు ఎవరు అనేది వెలుగులోకి వస్తే.. అలాగే తెలంగాణలో వైయస్ఆర్టీపీ అధినేత్రి షర్మిల వచ్చే ఎన్నికల్లో కింగ్ మేకర్‌గా మారితే... జగన్‌ ఇబ్బందులు తప్పవన్న అభిప్రాయాన్ని నెటిజన్లు వ్యక్తం చేస్తున్నారు. అలాగే  హైదరాబాద్‌లో  షర్మిల  అరెస్టు, వాహనంలో ఉండగానే టోవింగ్ తదితర పరిణామాలపై  ప్రధాని మోదీ సైతం స్పందించినా... జగన్ మాత్రం స్పందించకపోవడాన్ని కూడా సామాజిక మాధ్యమంలో విపరీతంగా ట్రోల్ చేస్తున్నారు. 

అన్నంలో తలవెంట్రుక వచ్చిందని భార్యకు శిరోముండనం

పురుషాధిక్యతకు ఎల్లలు ఉండవా అని పిస్తుంది కొన్సి సంఘటనల గురించి వన్నప్పుడు. ఇక భార్య అంటే లోకువగా చూసే పురుష పుంగవులు కోకొల్లలు. చిన్న చిన్న విషయాలను పెద్ద పెద్ద శిక్షలు వేయడంలో మృగాళ్లు ఎప్పుడూ ముందుంటారు. మహిళలపై అఘాయిత్యాలు చేయడంలో, వారిని వేధింపులకు గురి చేయడంలో ఒకరిని మించి మరొకరు అన్నట్లుగా వ్యవహరిస్తుంటారు. అలాంటి శాడిస్ట్ భర్త తాను బతికుండగానే భార్యకు గుండు కొట్టించేశారు. ఈ సంఘటన ఉత్తరప్రదేశ్‌లోని పిలిభిత్‌లో చోటుచేసుకుంది. ఇంతకీ ఆ పురుష పుంగవుడు భార్యకు ఎందుకు గుండు కొట్టించాడో తెలిస్తే ఎవరైనా సరే ముక్కున వేలేసుకోకమానరు. సాధారణంగా ఇంట్లోనే కాకుండా.. రెస్టారెంట్లు, హోటల్స్‌లో మనం తినే ఫుడ్‌లో తలవెంట్రుకలను చూస్తుంటాం. అలాంటి సందర్భాల్లో ఎంతో కొంత కోపం, అసహనం సహజం. అయితే అన్నంలో తల వెంట్రుకలు రావడం అన్నది కూడా అంతే సహజం. ఎవరైనా సరే అలా వస్తే సర్దుకు పోతారు. ఆహారంలో వచ్చిన తల వెంట్రుకను తీసి పక్కన పారేసి తినేస్తారు. కానీ ఆ భర్త మాత్రం ఏకంగా  కట్టుకున్న భార్యకు గుండు కొట్టించాడు.  భోజనం చేస్తుండగా.. ఆహారంలో తల వెంట్రుక వచ్చిందని భార్యతో  వాగ్వాదానికి దిగాడు. అంతటితో ఊరుకోకుండా.. ఇంకోసారి అలా తలవెంట్రుకలు రాకుండా ఉండాలంటే భార్యకు గుండు చేయించడమే మార్గమని నిర్ణయం తీసేసుకున్నారు. వెంటనే అమలు చేసేశాడు. ఇందుకు ఆ వ్యక్తికి   అమ్మ , నాన్న అంటే సదరు బాధితురాలి అత్తమామలు కూడా తన వంతు సహకారం అందించారు.  దీంతో ఆ బాధితురాలు   భర్త, అత్తమామలపై   కేసు పెట్టింది. మహిళ పిర్యాదు మేరకు పోలీసులు కేసు నమోదు చేసి భర్తను అరెస్ట్‌ చేశారు. ఉత్తరప్రదేశ్‌ లోని పిలిభిత్ జిల్లా మిలాక్ గ్రామానికి చెందిన జహీరుద్దీన్‌కు, సీమాదేవితో ఏడేళ్ల క్రితం వివాహం అయ్యింది. పెళ్లయినప్పటి నుంచి రూ.15 లక్షలు కట్నం ఇవ్వాలని అత్తింటివారు ఆమెను వేధిస్తున్నారు. ఆ వేధింపులలో భాగంగానే  ఆమె వండిన భోజనంలో వెంట్రుక వచ్చిందని శిరోముండనం చేశారు. ఆమె కాళ్లు, చేతులు కట్టేసి నోట్లో గుడ్డలు పెట్టి  శిరోముండనం చేశారని  సీమాదేవి తన ఫిర్యాదులో పేర్కొంది.  

ఏపీ బీఆర్ఎస్ ఇన్ చార్జ్ తలసాని?

బీఆర్ఎస్ ఏపీపై దృష్టి సారించింది. ఇప్పటకే బీఆర్ఎస్ బ్యానర్లు, పోస్టర్లు  విజయవాడలో వెలిశాయి. తొలుత బీఆర్ఎస్ పేరు నిర్ణయించే సమయంలో సభ ఏర్పాటు తరువాత కూడా ఏపీలో పలు ప్రాంతాలలో బీఆర్ఎస్ కు మద్దతుగా పోస్టర్లు వెలిసిన సంగతి విదితమే. కోనసీమ జిల్లా కేంద్రం అమలాపురం సహా పలు ప్రాంతాలలో అప్పట్లో పోస్టర్లు వెలిశాయి. ఇప్పుడు మూడు రోజుల కిందట బీఆర్ఎస్ అధికారికంగా ఆవిర్భవించిన తరువాత విజయవాడలో పోస్టర్లు వెలిశాయి. బీఆర్ఎస్ విస్తరణలో భాగంగా ఆ పార్టీ అధినేత తొలుత దృష్టి పెట్టింది ఏపీపైనే అని చెబుతారు.  ఆంధ్రప్రదేశ్‌లో  బీఆర్‌ఎస్‌ను బలోపేతం చేసే బాధ్యతను తెలంగాణ సీనియర్ మంత్రి తలసాని శ్రీనివాస  యాదవ్‌కు కేసీఆర్ అప్పగించనున్నారని ఆ పార్టీ వర్గాలలోనే గట్టిగా వినిపిస్తోంది.    2019 ఎన్నికలకు ముందు బీసీలను ఏకం చేసి, వారిని వైసీపీ వైపు మళ్లించేందుకు  తలసాని విజయవాడలో పర్యటించిన సంగతి విదితమే. అప్పట్లో ఆయనకు  ఘన స్వాగతం లభించింది. ఏపీలో పెద్ద సంఖ్యలో ఉన్న యాదవులను బీఆర్‌ఎస్ వైపు మళ్లించే వ్యూహంతో, తలసానినిని బీఆర్‌ఎస్ ఏపీ ఇన్చార్జిగా నియమించనున్నట్లు పార్టీ వర్గాలు చెబుతున్నాయి. ఏపీలో కాపుల తరువాత సంఖ్యాపరంగా పెద్ద  సమాజిక వర్గం యాదవులే కావడంతో వారిని బీఆర్ఎస్ వైపు ఆకర్షించడమే లక్ష్యంగా, వారి మద్దతు పొందడమే ధ్యేయంగా కేసీఆర్ అడుగులు వేస్తున్నారంటున్నారు. సమైక్య రాష్ట్రంలో తలసాని చిత్తూరు జిల్లా ఇన్చార్జి మంత్రిగా పనిచేశారు.  ఏపీలోని అనేక వర్గాలతో ఆయనకు సత్సంబంధాలున్నాయి.   తలసాని,   తలసాని టీడీపీలో ఉండగా, ఆయనతో ఏపీకి చెందిన టీడీపీ నేతలతో మంచి స్నేహ సంబంధాలు ఉన్నాయి. రాష్ట్ర విభజన తరువాత ఆవి కొనసాగుతున్నాయి. దీంతో ఏపీ నేతలతో తలసానికి ఉన్న సంబంధాలను దృష్టిలో ఉంచుకున్న కేసీఆర్.. బీఆర్‌ఎస్ పార్టీకి,  ఏపీ ఇన్చార్జిగా తలసానినేనియమించాలని నిర్ణయించారని అంటున్నారు.ఈ నేపథ్యంలోనే విజయవాడలో బీఆర్ఎస్ కార్యాలయం ఏర్పాటుకు స్థల పరిశీలన కోసం తలసాని శ్రీనివాస యాదవ్ డిసెంబర్ నెలలో విజయవాడలో పర్యటించే అవకాశాలు ఉన్నాయని అంటున్నారు.  

50 ఇళ్లు ధ్వంసం చేసిందేవరో తెలుసా?

ఒక గుంపు ఏకంగా 50 ఇళ్లను ధ్వంసం చేసేసింది. తమిళనాడు కోయంబత్తూరు జిల్లా కడలూరులో ఈ దారుణం జరిగింది. దీంతో ముందు ముందు ఇంకెన్ని ఇళ్లను ఆ గుంపు ధ్వంసం చేస్తుందో అన్న ఆందోళన ప్రజలలో వ్యక్తమౌతోంది. ఆ గుంపు జనావాసాల మధ్యలోకి రాకుండా అవసన చర్యలు తీసుకోవాలని జనం అధికారులను వేడుకుంటున్నారు. ఇంతకీ ఇళ్లను ధ్వంసం చేస్తున్నది ఒక ఏనుగుల గుంపు. కడలూరు సమీపంలోని అటవీ ప్రాంతం నుంచి ఓ ఏనుగుల గుంపు జనావాసాలపై పడి ఇళ్లను ధ్వంసం చేసింది. స్థానికులు ఇళ్లకు కాపాడు కోవడం సంగతి పక్కన పెట్టి ప్రాణాల కోసం పరుగులు తీశారు. ఏనుగుల గుంపు వెళ్లిపోయిన తరువాత వచ్చి చూస్తే ఏముంది.. దాదాపు 50 గృహాలు పూర్తగా ధ్వంసమయ్యాయి. ఆ ఏనుగుల గుంపు మళ్లీ మళ్లీ జనావాసాల వైపు రాకుండా చర్యలు తీసుకోవాలని వారు అధికారులను కోరారు. అధికారులు అందుకు అవసరమైన చర్యలు తీసుకుంటామనీ, అటవీ ప్రాంతం నుంచి ఏనుగులు రాకుండా ఫెన్సింగ్ ఏర్పాటు చేస్తామనీ హామీ ఇచ్చారు. అలాగే జనావాసాలకు సమీపంలో అటవీ ప్రాంతం నుంచి ఏనుగులను దూరంగా వెళ్లేలా మళ్లించారు.

పెళ్లికి గంటల ముందు వధువు బలవన్మరణం.. కారణమేమిటంటే?

కోటి ఆశలతో కొత్త జీవితంలోకి అడుగు పెట్టాల్సిన అమ్మాయి.. పెళ్లికి గంటల ముందు బలవన్మరణానికి పాల్పడింది. దీంతో పెళ్లింట విషాదచ్ఛాయలు అలుముకున్నాయి. ఈ సంఘటన నిజామాబాద్ జిల్లా నవీపేటలో ఆదివారం (డిసెంబర్11) జరిగింది. ఆదివారం మధ్యాహ్నం తన వివాహం. అప్పటి వరకూ ఎంతో ఆనందంగా బంధు మిత్రులతో గడిపిన రవళి తెల్లవారు జామున ఉరి వేసుకుని ఆత్మహత్యకు పాల్పడింది. పోలీసులు దర్యాప్తు చేస్తున్నారు. చివరిగా ఆమె తనకు కాబోయే భర్తతో ఫోన్ లో మాట్లాడినట్లు తెలిసింది. వివాహం కుదిరినప్పటి నుంచీ కాబోయే భర్త ఆంక్షల పేర వేధిస్తుండటంతోనే రవళి బలవన్మరణానికి పాల్పడిందని పెళ్లికూతురు తల్లిదండ్రులు ఆరోపిస్తున్నారు. పెళ్లికూతురి అలంకరణలోనే రవళి విగత జీవిగా పడి ఉండటం చూపరులను కలచివేస్తోంది.  

సానియాతో విడాకులపై షోయబ్ స్పందన.. అంతరార్ధమేమిటి?

ఇండియన్ టెన్నిస్ స్టార్ సానియామీర్జా, పాక్ క్రికెటర్ షోయబ్ మాలిక్ వివాహ బంధానికి చెల్లుచీటీ ఇచ్చేస్తున్నారన్న వార్తలపై ఇప్పటి వరకూ ఇరువురూ పెదవి విప్నని సంగతి తెలిసిందే. గత కొంత కాలంగా సానియా, షోయబ్ జంట విడిపోనున్న వార్తలు మీడియాలో, సోషల్ మీడియాలో విస్తృతంగా ప్రచారమౌతున్నాయి. అయితే ఈ వార్తల పట్ల ఇంత వరకూ ఇరువురిలో ఎవరూ స్పందించకపోవడంతో చాలా మంది ఇరువురూ విడాకులకు సిద్ధమయ్యారనే నమ్ముతూ వచ్చారు. అయతే తాజాగా షోయబ్ మాలిక్ విడాకుల విషయంలో స్పందించాడు. సానియాతో విడాకుల విషయంపై మీడియా ముఖంగా ఒకింత అసహనం వ్యక్తం చేసిన షోయబ్ మాలిక్.. అది మా వ్యక్తిగత విషయం అని ముక్తసరిగా సమాధానం ఇచ్చాడు. అంతే కాకుండా తాను కానీ తన భార్య కానీ ఇప్పటి వరకూ ఈ విషయంలో స్పందించలేదని చెప్పిన షోయబ్ మాలిక్ ఇక్కడితో ఈ విషయాన్ని వదిలేయమని మీడియాకు సూచించాడు. అయితే షోయబ్ మాలిక్ స్పందన  తరువాత కూడా సానియాతో అతడు విడిపోతున్నాడా.. లేదా అన్న విషయంపై స్పష్టత రాలేదు. దీంతో వీరిరువురి విడాకులు ఖాయమన్న వార్తలు జోరందుకున్నాయి.  సానియా–షోయబ్ విడిపోయారని చాలా కాలం నుంచి ప్రచారం జరుగుతోంది. అయితే  ఇటీవలి కాలంలో ఈ ప్రచారం ఎక్కువైంది. పైగా సానియా తన సోషల్ మీడియా ఖాతాలో చేస్తున్న పోస్టులు ఈ ప్రచారానికి తావిస్తున్నాయి.   సానియా తన భర్త ఫొటో లేకుండానే  ఫొటోల్ని షేర్ చేస్తోంది. అలాగే సానియా సన్నిహితులు కూడా వాళ్లిద్దరూ ఇప్పటికే విడాకులకు దరఖాస్తు చేసుకున్నారని, ఎప్పటి నుంచో విడిగా ఉంటున్నారని చెబుతున్నారు. కాగా, సానియా మీర్జా–పాక్ క్రికెటర్ షోయబ్ మాలిక్ 2010లో పెళ్లి చేసుకున్నారు. ప్రస్తుతం వీళ్లు దుబాయ్‌లో ఉంటున్నారు.

కోహ్లీ నెక్ట్స్ టార్గెట్ సచిన్

పరుగుల యంత్రం కింగ్ కోహ్లీ నెక్ట్స్ టార్గెట్ సచిన్ టెండూల్కర్. ఔను నిజమే క్రికెట్ లో ప్రపంచ రికార్డులను బద్దలు కొట్టడమే లక్ష్యంగా పెట్టుకుని పరుగుల దాహం తీర్చుకుంటున్న విరాట్ కోహ్లీ.. తరువాతి టార్గెట్ సచిన్ టెండూల్కర్ అత్యధిక సెంచరీల రికార్డు బద్దలు కొట్టడమే. ఔను సచిన్ తరువాత అత్యధిక సెంచరీల రికార్డు ఇప్పుడు కోహ్లీ పేరిటే ఉంది. సచిన్ టెండూల్కర్ మొత్తం 100 సెంచరీలతో ఫస్ట్ ప్లేస్ లో ఉండగా, 72 ఇంటర్నేషనల్ సెంచరీలతో కోహ్లీ రెండో స్థానంలో నిలిచాడు. బంగ్లాదేశ్ తో చిట్టగ్యాంగ్ వేదికగా జరిగిన మూడో వన్డేలో విరాట్ సెంచరీ చేశాడు. ఈ సెంచరీతో ఆస్ట్రేలియా మాజీ కెప్టెన్ రికీ పాంటింగ్ 71 సెంచరీల రికార్డును బ్రేక్ చేశాని అత్యధిక సెంచరీలు చేసిన క్రికెటర్ల జాబితాలో రెండో స్థానానికి చేరుకున్నాడు. వన్డేలలో కోహ్లీకి ఇది 44వ సెంచరీ మొత్తంగా ఇంటర్నేషనల్ క్రికెట్ లో ఇది అతడికి 72వ సెంచరీ. క్రికెట్ దిగ్గజం టెండూల్కర్ ఒక్కడే కోహ్లీ కంటే ఎక్కువ సెంచరీలు చేసి అగ్రస్థానంలో ఉన్నాడు.  కాగా బంగ్లాతో మూడో వన్డేలో చేసిన సెంచరీతో  కోహ్లీ మరో అరుదైన రికార్డు కూడా తన ఖాతాలో వేసుకున్నాడు. బంగ్లాదేశ్‌ గడ్డపై వన్డేల్లో అత్యధిక పరుగులు చేసిన ఆటగాడిగా విరాట్‌ నిలిచాడు. బంగ్లాదేశ్‌తో మూడో వన్డేలో 59 పరుగుల వ్యక్తిగత స్కోర్‌ వద్ద కోహ్లీ ఈ మైలు రాయిని అందుకున్నాడు. ఇప్పటివరకు ఈ రికార్డు శ్రీలంక మాజీ కెప్టెన్ కుమార్ సంగక్కర (1045) పేరిట ఉండేది. తాజా మ్యాచ్‌తో సంగా రికార్డును విరాట్ బ్రేక్‌ చేశాడు. 

కోమటరెడ్డికి దారి చూపిన కాంగ్రెస్

కోమటిరెడ్డి బ్రదర్స్.. కాంగ్రెస్ ఈ రెండింటినీ వేరు చేసి చూడటం సాధ్యం కాదన్న పరిస్థితి నుంచి వారిరువురి వల్ల తెలంగాణ కాంగ్రెస్ భ్రష్టుపట్టిపోయిందన్నంత వరకూ పరిస్థితి వచ్చింది. వచ్చింది అనే కంటే కోమటిరెడ్డి బ్రదర్స్ తీసుకు వచ్చారని చెప్పడమే సబబు. కాంగ్రెస్ పార్టీ అంటే అంతర్గత విభేదాలు, గ్రూపుల కుమ్ములాటలూ సహజమే. అయితే కోమటి రెడ్డి బ్రదర్స్ మాత్రం పార్టీలో తమఅసమ్మతి, అసంతృప్తి ని ప్రదర్శించే విషయంలో వేరే లెవల్ చూపించారు. ఇటు రాష్ట్ర పార్టీ నాయకత్వానికీ, అటు హై కమాండ్ కీ కూడా చుక్కలు చూపించారు. నల్గొండ జిల్లాలో తమకు ఉన్న పట్టు కాంగ్రెస్ పార్టీకి అవసరమ్మన్న అతి ధీమానూ ప్రదర్శించారు. తామేం చేసినా చెల్లి పోతుందన్న అతిశయంతో వ్యవహరించారు.  తెలంగాణ ప్రదేశ్ కాంగ్రెస్ కమిటీ చీఫ్ పదవిని ఆశించిన కోమటిరెడ్డి వెంకటరెడ్డి అది దక్కకపోయే సరికి.. తన అసమ్మతి రాగాన్ని పార్టీలో గందరగోళ పరిస్థితి ఏర్పడేందుకు దారితీసే విధంగా వినిపించారు. పీసీసీ చీఫ్ పదవిని రేవంత్ రెడ్డికి కట్టబెట్టడాన్ని పార్టీలో పలువురు సీనియర్లు వ్యతిరేకించారు. తమ వ్యతిరేకతను, అసమ్మతిని తమ తమ స్థాయిల్లో ప్రదర్శించారు కూడా అయితే.. ఆ విషయంలో కోమటిరెడ్డి వెంకటరెడ్డి మాత్రం తన స్థాయిని మించి వ్యక్తం చేశారు. అధిష్ఠానానికి విధేయుడిని అని అంటూనే.. అవిధేయతను వ్యక్త పరచడంలో కొత్త పుంతలు తొక్కారు. కోమటిరెడ్డి బ్రదర్స్ తెలంగాణ కాంగ్రెస్ బ్రాండ్ అన్నంతగా రెచ్చిపోయారు. కానీ హై కమాండ్ నుంచి బుజ్జగింపులే తప్ప.. తాము కోరుకున్న విధంగా పదవి రాకపోవడంతో.. ముందుగా సొదరుడు కోమటిరెడ్డి రాజగోపాల్ రెడ్డి పార్టీకి గుడ్ బై చెప్పి కమలం గూటికి చేరారు. తన శాసనసభ సభ్యత్వానికి రాజీనామా చేసి మునుగోడు ఉప ఎన్నికకు తెరతీశారు. మునుగోడు కాంగ్రెస్ సిట్టింగ్ స్థానం. రాష్ట్రంలో కాంగ్రెస్ వరస ఓటములు చవి చూస్తున్న సమయంలో  సిట్టింగ్ సీటుకు ఉప ఎన్నిక జరగడం కాంగ్రెస్ కు ఏ విధంగానూ కలిసి వచ్చే వ్యవహారం కాదు. అయినా అనివార్యంగా ఉప ఎన్నికను తీసుకు వచ్చి కాంగ్రెస్ బలహీనతలను బట్టబయలు చేసి సత్తాచాటాలన్న వ్యూహంతోనే రాజగోపాలరెడ్డి మునుగోడు ఉప ఎన్నికకు తెర తీశారు. ఇక అక్కడి నుంచి కోమటిరెడ్డి వెంకటరెడ్డి అసమ్మతి ప్రదర్శనలో విశ్వరూపం ప్రదర్శించారు. అనుక్షణం తన ప్రకటనలతో పార్టీని, పార్టీ అధినాయకత్వాన్ని ఇబ్బందుల పాల్జేశారు. స్టార్ క్యాంపెయినర్ గా ఉండి కూడా మునుగోడు ఉప ఎన్నికలో పార్టీ ప్రచారానికి దూరంగా ఉన్నారు. పీసీసీ చీఫ్ రేవంత్ పై విమర్శలతో చెలరేగారు. మునుగోడులో కాంగ్రెస్ ఓటమి తథ్యమంటూ ఆయన చేసిన వ్యాఖ్యలు, మునుగోడు పరాజయం తరువాత రాష్ట్ర పార్టీ పగ్గాలు తనవే అంటూ ఆయన చేసిన కామెంట్లూ కాంగ్రెస్ ను చీకాకు పెట్టాయి. అయినా చర్య తీసుకోకుండా కాంగ్రెస్ హై కమాండ్ మీనమేషాలు లెక్కిస్తూ కూర్చుంది. లోక్ సభలో అసలే అంతంత మాత్రంగా ఉన్న కాంగ్రెస్ మరో ఎంపీని వదులు కోవడానికి సిద్ధంగా లేకపోవడంతో వెంకటరెడ్డిపై చర్యలకు వెనుకాడింది. దీంతో కోమటిరెడ్డి వెంకటరెడ్డి పార్టీ కంటే తానే ఎక్కువ అన్న భావనతో తనది రాజకీయ విరామమే తప్ప సన్యాసం కాదంటూ కాంగ్రెస్ ను వీడనున్నట్లు ఘనంగా ప్రకటించారు. ఇంత జరిగిన తరువాత కానీ కాంగ్రెస్ కళ్లు తెరవలేదు. కన్నెర్ర చేయలేదు. ఇక లాభం లేదన్న నిర్ణయానికి వచ్చి కోమటిరెడ్డి వెంకటరెడ్డికి బయటకు దారి చూపింది. తనంత తాను పొమ్మనకుండానే.. పొగబెట్టిన చందంగా తాజాగా కాంగ్రెస్ పార్టీ ప్రకటించిన పీసీసీ కమిటీలలో కోమటిరెడ్డి వెంకటరెడ్డిని పూర్తిగా విస్మరించింది. 22 మందితో పొలిటికల్ ఎఫైర్స్ కమిటీని, ఉపాధ్యక్షుల్ని, జనరల్ సెక్రటరీస్‌ని.. అలాగే 26 జిల్లాలకు అధ్యక్షుల్ని ప్రకటించింది. ఈ జాబితాలో ఎక్కడా కోమటిరెడ్డి వెంకటరెడ్డి పేరు లేదు. అంతే కాదు పార్టీలో ఆయన అనుయాయులనూ దూరం పెట్టింది.  అంటే కోమటిరెడ్డిని కాంగ్రెస్ హైకమాండ్ పూర్తిగా విస్మరించింది. మీ సేవలు చాలు ఇక దయచేయండని మర్యాదగా చెప్పింది. దీంతో ఇక రాష్ట్ర కాంగ్రెస్ లో విభేదాల వేడి కూడా చల్లారుతుందని పార్టీ హైకమాండ్ భావిస్తోంది. పార్టీ కంటే ఎవరూ ఎక్కువ కాదని కోమటిరెడ్డిని పూర్తిగా విస్మరించడం ద్వారా అసమ్మతీయులకు బలమైన సంకేతాన్ని పంపింది. 

జగన్మాత..జగన్మాయ

ఆంధ్రప్రదేశ్ ముఖ్యమంత్రి   జగన్ రెడ్డికి, వైఎస్సార్టీపీ అధ్యక్షురాలు   షర్మిలకు తల్లి అయిన వైఎస్ విజయమ్మ తాజా వ్యవహారశైలిపై పై సామాజిక మాధ్యమంలో నెటిజన్లు విపరీతంగా ట్రోల్ చేస్తున్నారు. ఎప్పటికప్పుడు మాటలు మారుస్తూ ఆమె తన గౌరవాన్ని తానే తగ్గించుకుంటున్నారంటూ విమర్శలు గుప్పిస్తున్నారు. ఇటీవల హైదరాబాద్‌లో  షర్మిల అరెస్ట్, వాహనంలో ఉండగానే షర్మలను టోవింగ్ చేసి మరీ ఎస్ ఆర్ నగర్ పోలీస్ స్టేషన్‌కు   తరలించడం.. ఆ సందర్భంగా విజయమ్మ ఆందోళనకు దిగడం.. ఆ సమయంలో మీడియా ప్రతినిధులు అడిగిన ప్రశ్నకు.. పక్క రాష్ట్రంతో,  జగన్‌తో మనకేమిటమ్మా సంబంధం అంటూ వ్యాఖ్యానించడం తెలిసిందే. ఇప్పుడు   తన పాదయాత్రకు తెలంగాణలో అనుమతి ఇవ్వకపోవడంపై వైయస్ షర్మిల ఆందోళనకు దిగారు. అలాగే .. టీఆర్ఎస్ అంతర్ధానమై బీఆర్ఎస్ ఆవిర్భవించింది. ఈ నేపథ్యంలో ఈ పరిణామాలు ఆంధ్రప్రదేశ్‌పైన.. జగన్ మోహన్ రెడ్డిపైన ఎలాంటి ప్రభావం చూపుతాయంటూ మీడియా ప్రశ్నలకు..   జగన్‌ను ఎవరు తాకలేరంటూ ఆమె సమాధానం  ఇచ్చారు. ఈ పరస్పర విరుద్ధమైన విజయమ్మ మాటలపైనే నెటిజన్లు తీవ్ర ఆగ్రహం వ్యక్తం చేస్తున్నారు. మొన్న పక్క రాష్ట్రంతో, వైయస్ జగన్‌తో మనకేం పనమ్మా అన్న విజయమ్మ, రోజుల వ్యవధిలోనే ఆయన్ని ఎవరు తాకలేరంటూ వెనకేసుకురావడంలో ఆంతర్యం ఎమిటని నిలదీస్తున్నారు.  2019 ఎన్నికలకు ముందు.. రాజన్న రాజ్యం కోసం జగన్ ను గెలిపించండి.. ఆయనకు ఒక్క ఛాన్స్ ఇచ్చి గెలిస్తే.. మీ సమస్యలన్నీ హుష్ కాకి అన్నట్లుగా పరిష్కరించేస్తారని  విజయమ్మ ప్రచారం చేసిన విషయాన్ని నెటిజన్లు ఈ సందర్భంగా ప్రస్తావిస్తున్నారు. అలాగే  జగనన్న వదిలిన బాణమంటూ  షర్మిల సైతం సోదరుడి కోసం పాదయాత్ర చేశారు. తీరా జగన్ ఏపీలో అధికారంలోని రాగానే ప్రజలను పట్టించుకోక పోవడమే కాదు.. తల్లి, చెల్లిని సైతం పక్క రాష్ట్రానికి సాగనంపాడని నెటిజన్లు గుర్తు చేస్తున్నారు. జగన్ అధికారంలోకి వచ్చిన తర్వాత.. రాష్ట్ర ప్రజలు తీవ్ర ఇబ్బందులు పడుతున్నారని.. ముఖ్యంగా మూడు రాజధానులంటూ ఆయన చేస్తున్న విన్యాసాల కారణంగా.. రాజధాని అమరావతికి భూములు ఇచ్చిన రైతులు, అలాగే పీఆర్సీ, సీపీఎస్ ల విషయంలో జగన్ తీరుతో  ప్రభుత్వ ఉద్యోగులు, జాబ్ కాలెండర్ వాగ్దానాన్ని నిలుపుకోకపోవడంతో నిరుద్యోగులు, నిత్యావసర ధరల పెంపుతో సామాన్యులు, ఇలా జగన్ పాలనలో రాష్ట్రంలోని ఏ వర్గమూ కూడా సంతోషంగా లేని పరిస్ధితి ఉంది. ఇలా ప్రతిపక్ష నేతగా  జగన్ చేసిన వాగ్దానాలు... ఏవీ నేటికి నెరవేరలేదని... ఆ క్రమంలో జగనన్న రాజ్యంలో ప్రతి వర్గం తీవ్ర అసంతృప్తితో ఉందని.... కానీ ఈ మూడున్నరేళ్లలో ప్రజల ఎదుర్కొంటున్న ఇబ్బందులపై ఏ ఒక్క రోజు  విజయమ్మ కానీ  షర్మిల కానీ పెదవి అయితే విప్పిందే లేదని నెటిజనులు   గుర్తు చేస్తున్నారు.   కానీ తన కుమార్తెకు కానీ.. తన కొడుకుకు కానీ ఏదైనా చిన్నపాటి సమస్య వచ్చినా..   విజయమ్మ  ఆగమేఘాల మీద స్పందిస్తారని.. మరి ప్రజలకు సమస్య వస్తే.. ఎందుకు స్పందించరనీ నిలదీస్తున్నారు.  మొన్న  జగన్‌తో మనకెందుకమ్మా అన్నారు.  ఇప్పుడు అదే జగన్‌ను ఎవరూ తాకలేరంటున్నారు జగన్మాత, జగన్మాయ అంటూ సెటైర్లు వేస్తున్నారు.

హిమాచల్’లో కమలం కకావికాలం నడ్డాకు ఉద్వాసన?

హిమాచల్ ప్రదేశ్  అసెంబ్లీ ఎన్నికల ఫలితాలు వచ్చి  రోజులు గడచి పోతున్నాయి  కానీ వేడి మాత్రం తగ్గడం లేదు.అలాగే హిమాచల్ ఎన్నికల దుమారం రేపిన ధూళి మాత్రం సర్దుకోవడం లేదు.  ఎన్నికలో విజయం సాధించిన కాంగ్రెస్ పార్టీ ముఖ్యమంత్రి ఎంపిక కసరత్తును పూర్తి చేసింది. కాంగ్రెస్ ప్రచార కమిటీ చైర్మన్ సుఖీందర్ సింగ్ సుంఖుని సీఎఎంగా, ఉప ముఖ్యమంత్రిగా అగిహోత్రిని కాంగ్రెస్ అధిష్టానం ఎంపిక చేసింది. రేపు ఆదివారం(డిసెంబర్ 11) ఉదయం 11 గంటలకు ముఖ్యమంత్రి ప్రమాణ స్వీకారం జరుగుంతుందని కాంగ్రెస్ పార్టీ  అధికారికంగా ప్రకటించింది. అయితే, ఓట్ల శాతంలో పెద్దగా తేడా లేకపోయినా సీట్లు భారీగా కోల్పోయి అధికారం కోల్పోయిన బీజేపీలో మాత్రం రాజకీయ సెగలు బుసలు కొడుతున్నాయి. ముఖ్యంగా, హిమాచల్ ఓటమి  పార్టీ జాతీయ అధ్యక్షుడు జేపీ నడ్డా మెడకు చుట్టుకుంటోంది. హిమాచల్ నడ్డా స్వరాష్ట్రం. అదొకటి అలాఉంటే, హిమాచల్లో బీజేపీ ఓటమికి, గ్రూపు రాజకీయాలే ప్రధాన కారణంగా అధినాయకత్వం గుర్తించినట్లు చెపుతున్నారు. ఈ  నేపధ్యంలో స్వరాష్ట్రంలోనే పార్టీని ఏక తాటిపై నడిపించలేక పోయిన నడ్డా దేశంలో పార్టీని ఏ విధంగా ముందుకు తీసుకుపోతారనే చర్చ పార్టీలో మొదలైనట్లు తెలుస్తోంది.  అంతేకాదు హిమాచల్ బీజేపీలో ముఠా కుమ్ములాటలకు నడ్డానే కారణమని రాష్ట్రంలో తన ప్రత్యర్థి మాజీ ముఖ్యమంత్రి ప్రేమ్ కుమార్ దుమాల్ ను కావాలనే పక్కన పెట్టి ఉద్దేశపూర్వకంగా తిరుగుబాట్లను ఎగ దోశారని బిజెపి పెద్దలకు విశ్వసనీయ సమాచారం అందినట్లు తెలుస్తుంది. ఏకంగా 21 మంది రెబల్స్ రంగంలోకి దిగి పార్టీ విజయావకాశాలను ఘోరంగా దెబ్బ తీశారు. దీనిపై ప్రధానికి నిఘా వర్గాలు నివేదిక కూడా ఇచ్చాయి. నడ్డా ప్రేమ్ కుమార్ ఒకరిని ఒకరు ఓడించుకునే క్రమంలో కాంగ్రెస్ పార్టీ ప్రయోజనం పొందింది. అందుకే ప్రధాని నరేంద్ర మోడీ సైతం నడ్డా విషయంలో కొంత అసంతృప్తిగా ఆగ్రహంగా ఉన్నారని పార్టీ వర్గాలను ఉటంకిస్తూ మీడియాలో చర్చజరుగుతోంది. అలాగే హిమాచల్ వ్యవహారం పై సమగ్ర నివేదిక ఇవ్వాలని ప్రదాని కోరినట్లు తెలుస్తోంది.  యితే నడ్డాను పార్టీ అధ్యక్ష పదవి నుంచి తప్పిస్తారంటూ వస్తున్న వార్తల్లో మాత్రం నిజం లేదని, పార్టీ వర్గాలు చెపుతున్నాయి. నిజానికి నడ్డా పదవీకాలం ముగియక ముందే ఆయన పదవీ కాలాన్ని మరో రెండేళ్ళ పాటు పొడిగిస్తూ, పార్టీ నిర్ణయం తీసుకుంది. నడ్డా పదవీకాలం జనవరి 20న ముగుస్తుంది. అయితే, 2024 ఎన్నికల వరకు ఆయన్నే అధ్యక్ష పదవిలో కొనసాగించాలని 2024 లోక్ సభ ఎన్నికలు కూడా ఆయన సారధ్యంలోనే వెళ్లాలని పార్టీ నిర్ణయించింది. అయితే హిమాచల్ ఓటమి తర్వాత ఆయన స్థానంలో హర్యానా ముఖ్యమంత్రి మనోహర్ లాల్ ఖట్టర్ ను జాతీయ నూతన అధ్యక్షుడిగా నియమించాలని మోడీ షా నిర్ణయానికి వచ్చినట్లు ప్రచారాం జరుగుతోంది. అయితే నడ్డా సన్నిహిత వర్గాలు మాత్రం అలాంటిదేమీ లేదని ఇదంతా మీడియా సృష్టిగా కొట్టి వేస్తున్నారు. కానీ ఒకసారి మోడీ, షా నిర్ణయం తీసుకుంటే, మార్పు ఉండదని అంటున్నారు. గతంలో సీనియర్ మంత్రులకు ఉద్వాసన చెప్పిన విషయాన్ని వారు ఈ సందర్భంగా గుర్తు చేస్తున్నారు.

షర్మిల మైలేజీని పెంచే వ్యూహమేనా?

వైఎస్సార్ టీపీ అధినేత్రి షర్మిల.. ఇప్పుడు రెండు తెలుగు రాష్ట్రాలలోనూ హాట్ టాపిక్. బీఆర్ఎస్ ఆవిర్భావ సభ అయినా, సజ్జల సమైక్యరాగమైనా.. ఈ రెండూ అనేమిటి ఇప్పుడు ఉభయ తెలుగు రాష్ట్రాలలో ప్రతి పొలిటికల్ మూవ్ కూ ఆమె లింక్ ఉందన్న భావన సర్వత్రా వ్యక్తమౌతోంది. వరంగల్ జిల్లాలో ఆమె పాదయాత్రను అడ్డుకోవడం నుంచి.. ప్రగతి భవన్ కు వెళ్లే దారిలో ఆమెను కారులో ఉండగానే టోవింగ్ చేసి పీఎస్ కు తరలించడం దాకా.. కోర్టు అనుమతి ఇచ్చినా  షర్మిల పాదయాత్ర కొనసాగించలేని పరిస్థితి నుంచి.. ట్యాంక్ బండ్ పై నిరసన వరకూ.. ఇంటి ముందు కూడా నిరసనకు అంగీకరించకపోవడం నుంచి విజయమ్మ సైతం నిరశనకు దిగడం వరకూ అన్నీ ఉభయ తెలుగు రాష్ట్ర ప్రభుత్వాలు వ్యూహాత్మకంగా వేస్తున్న అడుగులుగానే పరిశీలకులు విశ్లేషిస్తున్నారు. ఉభయ తెలుగు రాష్ట్రాలలో కూడా ప్రభుత్వ వ్యతిరేకతను అధిగమించడానికి షర్మిలనే తమ బాణంగా ఎంచుకున్నారా అన్న అనుమానాలు వ్యక్తమౌతున్నాయి.  అసలు వైఎస్సార్ టీపీ అధినేత్రి షర్మిల ఎవరికీ పట్టని పాదయాత్రను తెలంగాణలో నిరాటంకంగా సాగిస్తున్నప్పటి నుంచీ కూడా షర్మిల ఎవరు వదిలిన బాణం అన్న ప్రశ్నలు వెల్లువెత్తుతూనే ఉన్నాయి. అసలామె తెలంగాణలో రాజకీయ అరంగేట్రం చేసిన సమయం నుంచే ఈ అనుమానాలు రాజకీయ వర్గాలలోనే కాదు.. సామాన్య జనం నుంచీ వ్యక్తమయ్యాయి.  పక్క రాష్ట్రం ఏపీలో, సొంత అన్న జగన్మోహన్ రెడ్డి ముఖ్యమంత్రిగా ఉండగా,ఆమె ఆ రాష్ట్రం వదిలి తెలంగాణ రాజకీయాల్లో ఎందుకు వేలు పెటినట్లు? అనే చర్చ విస్తృతంగా జరిగింది. అప్పట్లోనే  ‘షర్మిల ఎవరు వదిలిన బాణం?’. అనే ప్రశ్న ప్రముఖంగా వినిపించింది.   ఇప్పుడు మళ్ళీ మరోమారు అదే ప్రశ్న, తెలుగు రాష్ట్రాల రాజకీయ తెరమీద కనిపిస్తోంది. ఎవరికి తోచిన విధంగా వారు షర్మిల రాజకీయ ‘యాత్ర’పై విశ్లేషణలు చేస్తూ వచ్చారు. అయితే  వరంగల్ ఎపిసోడ్ కు ముందు వరకూ షర్మిల పాదయాత్రను కానీ, ఆమె హస్తిన వెళ్లి మరీ చేసిన ఫిర్యాదుల గురించి కానీ పెద్దగా ఎవరూ పట్టించుకోలేదు. కానీ ఎప్పుడైతే వరంగల్ జిల్లాలో ఆమె పాదయాత్రపై రాళ్ల దాడి, కార్ వ్యాన్ దగ్ధం సంఘటనలు జరిగాయో అప్పటి నుంచీ ఆమె రెండు తెలుగు రాష్ట్రాలలో రాజకీయాలకు కేంద్ర బిందువుగా మారిపోయింది. ఏకంగా ప్రధాని మోడీ కూడా ఆమెపై దాడి, అరెస్టులపై స్పందించినట్లు చెబుతున్నారు. ముఖ్యంగా ప్రగతి భవన్ కు వెళ్లే దారిలో షర్మిల కారులో ఉండగానే టోవింగ్ చేసి పీఎస్ కు తరలించిన సంఘటనతో ఆమె పొలిటికల్ మైలేజ్ అనూహ్యంగా పెరిగిపోయింది. ఆ తరువాత కూడా వరుస సంఘటనలు ఆమె మైలేజ్ పెంచేవిగానే సాగుతున్నాయి.  తన పాదయాత్రకు వరంగల్ పోలీసులు అనుమతి ఇవ్వలేదని.. ట్యాంక్ బండ్‌పై అంబేద్కర్ విగ్రహం దగ్గర ఓ ఇరవై మందితో షర్మిల ధర్నాకు దిగారు.  ఆమె ధర్నాను పట్టించుకోకుండా వదిలేసి ఉంటే.. గత ధర్నాలు, నిరసనలలాగే కొద్ది సేపటి తరువాత ఆమే విరమించి వెళ్లిపోయే వారు. కానీ పోలీసులు ఓవర్ యాక్షన్ చేసి  పోలీసులు వచ్చి ఆమెను అదుపులోకి తీసుకుని ఇంటి దగ్గర విడిచి పెట్టారు. ఇంటి దగ్గర కూడా హై డ్రామా నడిచింది. షర్మిల ఇంట్లోకి వెళ్లకుండా రోడ్డుపైనే కూర్చుని నిరసన చేపట్టారు. దీంతో పోలీసులు మళ్లీ రంగ ప్రవేశం చేసి బలవంతంగా ఇంట్లోకి పంపారు. నివాసంలో షర్మల  దీక్ష కొనసాగిస్తున్నారు. పాదయాత్రకు అనుమతి ఇవ్వకుంటే నిరవధిక నిరశనకు దిగుతానని కూడా హెచ్చరించారు.   ఇదిలా ఉంటే.. ఇంత కాలం లేనిది ఇప్పుడు షర్మిల పాదయాత్రకు, నిరసనలకు ఎందుకీ ఆంక్షలు అన్న ప్రశ్నలకు ఉభయ తెలుగు రాష్ట్రాలలో నెలకొన్న రాజకీయ పరిస్థితులే కారణమని చెప్పక తప్పదు. ముందుగా ఏపీ విషయానికి వస్తే.. జగన్ మూడున్నరేళ్ల పాలనలో తీవ్రమైన ప్రజా వ్యతిరేకతను మూటగట్టుకున్నారు.   రాష్ట్రంలోని మూడు ప్రాంతాల మధ్యా చిచ్చు పెట్టైనా సరే పబ్బం గడుపుకుందామని చేసిన ప్రయత్నాలన్నీ బూమరాంగ్ అయ్యాయి. మూడు ప్రాంతాలలోనూ వైకాపాకు చుక్కెదురే అయ్యింది. ఏ ప్రాంతంలోనూ వైసీపీని జనం ఆదరించడం లేదన్న సంగతి ప్రస్ఫుటమయ్యేలా వరుస సంఘటనలు జరిగాయి. ఆఖరికి జగన్ సభలకు కూడా జనం రావడానికి విముఖత చూపుతున్న పరిస్థితి. ఈ పరిస్థితుల నుంచి బయటపడేందుకు జగన్ తెలంగాణ సీఎం కేసీఆర్ సహకారాన్ని కోరుతున్న పరిస్థితి. గత ఎన్నికలలో అంటే 2019 ఎన్నికలలో జగన్ పార్టీ రాష్ట్రంలో విజయం సాధించడానికి పొరుగు రాష్ట్రం తెలంగాణ సీఎం అందించిన ‘సహాయ’ సహకారాలు తెలిసిందే. ఇప్పుడు మరో సారి జగన్ కేసీఆర్ సహకారం కోసం చూస్తున్నారు. అదే సమయంలో వరుసగా రెండు సార్లు కేసీఆర్ తెలంగాణలో తెరాసను అధికారంలోకి రావడానికి కారణాలెన్ని ఉన్నా ప్రధాన కారణం మాత్రం తెలంగాణ సెంటిమెంట్. 2014 ఎన్నికలలో తెలంగాణను సాధించిన నేతగా తనను తాను ప్రమోట్ చేసుకుని ఆ సెంటిమెంట్ తో అధికారంలోకి రాగలిగారు. ఇక 2019 ఎన్నికలలో మళ్లీ సమైక్య వాదుల కుట్ర అంటూ చంద్రబాబు కాంగ్రెస్ సహా పలు పార్టీల పొత్తుతో రాష్ట్రంలో ప్రచారం చేయడాన్ని బూచిగా చూపి సెంటిమెంట్ రగల్చగలిగారు. అయితే ముచ్చటగా మూడో సారి రాష్ట్రంలో అధికార పగ్గాలు అందుకోవాలనుకుంటున్న కేసీఆర్ కు ఈ సారి తెలంగాణ సెంటిమెంట్ ను తురఫు కార్డుగా ఉపయోగించుకునే అవకాశం లేకుండా పోయింది.  ఆయన స్వయంగా జాతీయ రాజకీయాలలో చక్రం తిప్పాలన్న లక్ష్యంతో ఆయన తెరాసను భారాసగా మార్చేశారు.  అలా ఆయన ఇక తెలంగాణ సెంటిమెంట్ అస్త్రాన్ని వదిలేశారు. అయితే రాష్ట్రంలో ప్రజా వ్యతిరేకతను అధిగమించి మరో సారి రాష్ట్రంలో బీఆర్ఎస్ జెండాతో అయినా సరే.. అధికారంలోకి రావాలంటే..  సెంటిమెంటే శరణ్యం అన్న సంగతి కేసీఆర్ కు బాగా తెలుసు. అందుకే తన వైపు నుంచి తెలంగాణ సెంటిమెంట్ రగిల్చే అవకాశం లేని పరిస్థితి ఉండటంతో అటువైపు నుంచి నరుక్కు వద్దామన్న వ్యూహ రచన చేశారు. అటు వైపు అంటే ఏపీ వైపు అన్న మాట. అక్కడ ఎలాగూ.. జగన్ సర్కార్  ఏం చేస్తే ప్రభుత్వ వ్యతిరేకత నుంచి ప్రజల దృష్టిని మరల్చాలా ఉన్న యోచనలో ఉంది. దీంతో రోగీ వైద్యుడూ సామెతలా.. సమైక్య వాదాన్ని ఏపీలో తెరపైకి తీసుకు రావడం... అదే జరిగితే.. మళ్లీ వలస పాలనలోకి తెలంగాణ అంటూ ఇటూ  అంటే తెలంగాణలోనూ సెంటిమెంటును రగల్చవచ్చు. ఈ వ్యూహంతోనే.. ఇరు రాష్ట్రాల ముఖ్యమంత్రులూ ఉన్నారంటున్నారు. అదే సమయంలో షర్మిల మైలేజీని పెంచితే.. తెలంగాణలో కూడా సెంటిమెంట్ బాగా వర్కౌట్ అవుతుందనీ, ఏపీ వ్యక్తి తెలంగాణలో రాజకీయాలేంటనే వాదన కూడా తెరమీదకు తేవచ్చన్నది ఇరు రాస్ట్రాల ముఖ్యమంత్రుల వ్యూహంగా పరిశీలకులు విశ్లేషిస్తున్నారు.