రక్తపోటు గురించి కొత్త విషయాలు

  ఇవాళా రేపట్లో అధిక రక్తపోటు అనేది సాధారణం అయిపోయింది. మారుతున్న జీవనశైలి వల్లనో లేకపోతే ఆరోగ్యం పట్ల శ్రద్ధ పెరగడం చేతనో... ఇప్పుడు ఎవరిని కదిపినా రక్తపోటు గురించి తెగ కబుర్లు చెప్పేస్తున్నారు. ఇంకా మాట్లాడితే భయపెట్టేస్తున్నారు. కానీ నిజానికి రక్తపోటును అదుపులో ఉంచుకోవడం ఏమంత బ్రహ్మవిద్య కాదంటూ మధ్యమధ్యలో కొన్ని నివేదికలూ స్పష్టం చేస్తున్నాయి. AARP అనే ఒక వైద్య పరిశోధనా పత్రిక ఇటీవల ప్రచురించిన ఒక నివేదికే ఇందుకు ఉదాహరణ. వాటిలో ముఖ్య అంశాలు ఇవిగో....   చిన్నపాటి వ్యాయామం:  చేతితో నొక్కే చిన్నపాటి వ్యాయామ పరికరం ఇప్పుడు ఎక్కడ పడితే అక్కడే మనకు కనిపిస్తోంది. ఈ HAND GRIPPER తో వ్యాయామం చేస్తే దాదాపు 10 శాతం రక్తపోటు తగ్గిపోతుందట. ఈ విషయాన్ని నిరూపించేందుకు 2013లో ఒక పరిశోధన కూడా జరిగిందని చెబుతోంది AARP. దీని ప్రకారం చేతికి ఒత్తిడి కలిగించే ఈ వ్యాయామాన్ని రెండు నిమిషాల చొప్పున పావుగంట పాటు... వారానికి మూడుసార్లు చేస్తే కనుక రక్తపోటులో గణనీయమైన మార్పులు వస్తాయట. బహుశా రక్తపోటుని నివారించుకునేందుకు ఇంతకంటే చవకైన సులువైన ఉపాయం దొరకదేమో!   రక్తపోటు అనివార్యం:  చాలామంది, ముఖ్యంగా 50 ఏళ్లు దాటిన పెద్దవారు రక్తపోటు వచ్చిందనగానే కంగారుపడిపోతూ ఉంటారు. నిజానికి వయసుతో పాటుగా రక్తపోటు పెరగడం సహజమే అంటోంది AARP నివేదిక. వయసు పెరిగేకొద్దీ మన రక్తనాళాలు గట్టిపడిపోతాయనీ, దీనివల్ల మన రక్తపోటులో హెచ్చుతగ్గులు కనిపిస్తాయని చెబుతోంది. అందుకే మన పెద్దలు 100+ మన వయసుని రక్తపోటు కోసం పరిగణలోకి తీసుకునేవారని గుర్తుచేస్తోంది.   శ్వాసలో మార్పు తెస్తే:  రక్తపోటు కనుక ఎక్కువగా ఉందని అనిపిస్తే ఊపిరిని కాస్త నిదానంగా పీల్చమని చెబుతోంది AARP. మన శ్వాసని కనుక నిమిషానికి 12 సార్లకు తగ్గించగలిగితే తాత్కాలికంగా అయినా రక్తపోటు తగ్గుముఖం పడుతుందని వివరిస్తోంది. ఇలా చేయడం వల్ల మన రక్తపోటులో అప్పటికప్పుడు ఒక మూడు పాయింట్ల తగ్గుదల కనిపించే అవకాశం ఉందట!   మందుల విషయంలో జాగ్రత్త!  రోజువారీ జలుబు, నొప్పులకు వాడే మందులు కూడా రక్తపోటు మీద ప్రభావం చూపించే అవకాశం ఉందంటున్నారు. సాధారణంగా మనం ఇలాంటి సమస్యలకు దగ్గరలో ఉన్న మందుల షాపుకి వెళ్లిపోయి ఏ మందు ఇస్తే ఆ మందుని వాడేస్తూ ఉంటాము. కానీ ఒకోసారి ఇవే మన రక్తపోటు మీద ప్రతికూలంగా వ్యవహరించే అవకాశం ఉందని హెచ్చరిస్తున్నారు. కాబట్టి రక్తపోటు ఉన్నవారు సాధారణ ఆరోగ్య సమస్యల వచ్చినప్పుడు ఏ మందులు తీసుకోవచ్చునో ముందుగానే తమ వైద్యుని దగ్గర తెలుసుకుని ఉండమని సూచిస్తున్నారు.   నాలుక చేసే మోసం:  రక్తపోటు ఉన్నవారు వీలైనంత తక్కువ ఉప్పుని తీసుకోవాలన్న సూచనలు తరచూ వినిపించేవే! కానీ ఇందులో మరో కోణం కూడా ఉందట. వయసు పెరిగే కొద్దీ, నాలుకలో రుచిని గ్రహించే శక్తి తగ్గిపోతుందనీ... కాబట్టి చాలామంది పెద్దలు తాము ఎంత ఉప్పుని తీసుకుంటున్నామో తెలియని అయోమయంలో ఉంటారనీ AARP విశ్లేషిస్తోంది. పైగా బేకరీ వంటి పదార్థాలు రుచిగా ఉండటానికీ, అందులో విచ్చలవిడిగా వాడే ఉప్పే కారణం అని చెబుతున్నారు. కాబట్టి వయసు మీరుతున్న ఉప్పు విషయంలో మరింత జాగ్రత్తగా ఉండాలని హెచ్చరిస్తున్నారు. - నిర్జర.

40 తర్వాత కూడా స్లిమ్ గా వుండాలంటే ?

పిల్లల గుండెతీరు బాగుండటం లేదు!

  పుట్టిన పిల్లలు ఇంచుమించుగా ఒకే తరహా ఆరోగ్యంతో పుడతారు. కానీ రానురానూ వారి జన్యు నిర్మాణం వల్ల రకరకాల ఆరోగ్య సమస్యలను ఎదుర్కొంటారు. పుట్టుకతో వచ్చిన జన్యువుల ప్రభావాన్ని మన పెద్దగా నివారించలేకపోవచ్చు. కానీ అనారోగ్యకరమైన జీవనశైలితో వారు రోగాల దిశగా వెళ్తుంటే చూస్తూ ఎలా ఊరుకుంటాం! ఇవే విషయాన్ని ‘అమెరికన్‌ హార్ట్ అసోసియేషన్‌’ స్పష్టం చేస్తోంది. ఆ సంస్థ ప్రచురిస్తున్న ఒక జర్నల్‌లో నేటి పిల్లలు గుండెజబ్బులకు ఎలా సిద్ధమవుతున్నారో హెచ్చరిస్తోంది.   ఇదీ పరిశోధన మినెసొటా విశ్వవిద్యాలయానికి చెందిన జూలియా స్టెయిన్‌బర్గర్ అనే పిల్లల వైద్యుని నేతృత్వంలో ఈ పరిశోధన జరిగింది. ఇందులో భాగంగా 2007-08 సంవత్సరంలో అమెరికాలోని పిల్లల ఆహారపు అలవాట్ల గురించి చేసిన సర్వేలోని గణాంకాలన్నింటినీ పరిశీలించారు. వీటిని పిల్లల బరువు, వారి వ్యాయామపు అలవాట్లు, ఆహారం, శరీరంలో కొవ్వు శాతం, రక్తంలో చక్కెర నిల్వలు... వంటి ఏడు కొలబద్దల ఆధారంగా విశ్లేషించారు.   ఇదీ ఫలితం - పిల్లల్లో దాదాపు 91 శాతం మంది సరైన ఆహారాన్ని తీసుకోవడం లేదని తేలింది. వీరి ఆహారంలో ఎక్కువగా చక్కెర అధికంగా ఉన్న పదార్థాలూ, శీతలపానీయాలే ఉన్నట్లు తేలింది.   - ఈ చక్కెర పదార్థాలు ఒక ఎత్తైతే.... పోషక విలువలు అధికంగా ఉండే పండ్లు, కూరగాయలు, చేపలు, తృణధాన్యాలు వంటి ఆహారాన్ని దూరంగా ఉంచడం మరో ఎత్తు అంటున్నారు స్టెయిన్‌బర్గర్.   - ఆడుతూ పాడుతూ ఉండాల్సిన వయసులో కూడా చాలామంది పిల్లలలో తగిన శారీరిక వ్యాయామమే ఉండటం లేదన్నది మరో ఆశ్చర్యకరమైన ఫలితం. ఇక 16 ఏళ్లు దాటిన వారిలో అయితే శారీరిక శ్రమ, వ్యాయామం అన్న లక్షణాలే కనిపించడం లేదట!   - టీనేజి దశలోకి చేరుకున్న అమెరికన్‌ పిల్లల్లో దాదాపు మూడోవంతు మంది పొగతాగే వ్యసనానికి లోనవుతున్నారని తేలింది. ఇలాంటి అలవాట్లు అన్నింటివల్లా నాలుగో వంతు పిల్లలు ఊబకాయులుగా మారిపోతున్నారు; మూడోవంతు మంది పిల్లల్లో కొలెస్ట్రాల్‌ నిల్వలు అధికంగా ఉన్నాయి; టీనేజిలో ఉన్న 37% మంది మగపిల్లల్లో చక్కెర నిల్వలు కూడా అధికంగా నమోదవుతున్నాయి. ఏతావాతా స్టెయిన్‌బర్గర్ బృందం పరిశీలించిన గణాంకాల ప్రకారంగా, కేవలం ఒకే ఒక్క శాతం మంది పిల్లలు ఆరోగ్యకరమైన జీవనాన్ని సాగిస్తున్నారు!   ఇదీ నివారణ పిల్లల జీవన విధానం కనుక ఇలాగే కొనసాగితే మున్ముందు వారిలో గుండెజబ్బులు వచ్చే అవకాశం చాలా తీవ్రంగా ఉందని హెచ్చరిస్తున్నారు నిపుణులు. అందుకోసం ఇప్పటికైనా మేలుకొమ్మని... మేలుకొని కొన్ని నివారణ చర్యలు మొదలుపెట్టమని సూచిస్తున్నారు. అవేమిటంటే...   - పిల్లల్లో సిగిరెట్‌ అలవాటు వారి ఆరోగ్యం మీద తీవ్రమైన ప్రభావం చూపుతుంది. కాబట్టి సిగిరెట్‌ అలవాటుని వారి దరి చేరకుండా తగిన జాగ్రత్తలు తీసుకోవాలి.   - వారి ఎత్తుకి తగిన బరువు ఉన్నారో లేదో ఎప్పటికప్పుడు గమనించుకుంటూ ఉండాలి.   - పిల్లల దినచర్యలో కనీసం ఒక గంట సేపైనా శారీరిక శ్రమ ఉండేలా చర్యలు తీసుకోవాలి.   అన్నింటికీ మించి, ఎప్పటికప్పుడు వారికి తగిన పోషక పదార్థాలు అందేలా జాగ్రత్త పడాలి. ఫాస్ట్‌ఫుడ్స్‌, చక్కెర అధికంగా ఉండే పదార్థాలు, శీతల పానీయాలు... వంటి పదార్థాల మోతాదు తగ్గిస్తూ వాటి స్థానంలో పోషక విలువలుండే సంప్రదాయ ఆహారాన్ని చేర్చాలి. లేకపోతే అమెరికన్లయినా, భారతీయులైనా అపసవ్యమైన జీవన విధానం ఎవరికైనా చేటు చేయక తప్పదు కదా!   - నిర్జర.

టీనేజిలోనే మానసిక వ్యాధులు!

  పిల్లలు ఎప్పటికీ పిల్లలుగానే ఉండిపోరు. వారు ఎదుగుతుంటారు. రెక్కలు చాచుకుని ఎగురుతుంటారు. యుక్తవయసుకి రాగానే వాళ్లకి స్వేచ్ఛతో పాటుగా సామాజిక సమస్యలూ మొదలైపోతాయి. ఇలాంటి సందర్భంలోనే వారిలో మానసిక వ్యాధులూ బయటపడితే...   ఓ పరిశోధన!  ఇంగ్లండులోని కేంబ్రిడ్జి విశ్వవిద్యాలయం, లండన్ కాలేజి విశ్వవిద్యాలయం కలసి ఈ మధ్యనే ఒక పరిశోధన చేశాయి. ఇందులో భాగంగా 14 నుంచి 24 సంవత్సరాల వయసు ఉన్న దాదాపు 300 మందిని ఎన్నుకొన్నారు. MRI పరీక్షల ద్వారా వారి మెదడు పనితీరుని నమోదు చేశారు.   ఫలితం!  MRI పరీక్షలు జరిపిన కుర్రవాళ్ల మెదళ్లలో చూపు, వినికిడి వంటి నేర్పుకి సంబంధించిన భాగాలన్నీ అప్పటికే ఒక పరిపూర్ణతకు చేరుకున్నాయి. కానీ ఆలోచించడం, నిర్ణయాలు తీసుకోవడం వంటి క్లిష్టమైన చర్యలకు తోడ్పడే భాగాలు మాత్రం విపరీతమైన మార్పులకు లోనవుతున్నాయి. అంటే మెదడు నిర్మాణంలో ఎలాంటి వృద్ధి లేకున్నా, అది పనిచేసే తీరులో మాత్రం ఇంకా సర్దుబాట్లు జరుగుతూనే ఉన్నాయన్నమాట!   వ్యాధుల ఉనికి:  ఇక పరిశోధకులను ఆందోళనకు గురి చేసిన మరో అంశం... స్కిజోఫ్రీనియా వంటి వ్యాధులను రెచ్చగొట్టే కొన్ని రకాల జన్యువుల ఈ దశలోనే తమ ఉనికిని చాటుకోవడం. పైగా ఆలోచనా తీరుని ప్రభావితం చేసే ‘మేలిన్‌’ అనే పొర మరింత బలపడుతున్నట్లు కూడా తేలింది. మెదడు ఉపరితలం మీద ఉండే ఈ మేలిన్‌, మెదడులోని నాడీకణాలు మరింత చురుకుగా సమాచారాన్ని అందించుకునేందుకు దోహదపడుతుంది.   ఎందుకిలా! తీవ్రమైన మానసిక వ్యాధులకు సంబంధించిన లక్షణాలు ఇలా యుక్తవయసులోనే ఎందుకు బయట పడుతున్నాయి అన్న ప్రశ్నకి స్పష్టమైన సమాధానాలైతే లేవు. కానీ జన్యువులు, పెరిగిన వాతావరణం, చిన్నతనంలో ఎదుర్కొన్న ఒత్తిడి వల్ల... ఒక వయసుకి చేరుకునేనాటికి రకరకాల సమస్యలు తలెత్తే అవకాశం ఉందని మాత్రం ఊహిస్తున్నారు. చాలామంది యుక్తవయస్సులో క్రుంగుబాటుకి లోనుకావడానికి కారణం... మెదడులో ఒక్కసారిగా బయటపడే ఈ మార్పులే అంటున్నారు.   మరేం చేయడం: యుక్తవయసులో ఉన్న కుటుంబీకుల మానసిక స్థితిని కాస్త జాగ్రత్తగా అంచనా వేస్తుండాలి. వారిలో పూర్తి అసహజంగా కనిపించే ప్రవర్తన ఏదన్నా కనిపించినప్పుడు వారితో మాట్లాడటం, వైద్యులను సంప్రదించడం వంటి చర్యలు తీసుకోవడంలో భేషజాలకు పోకూడదు. వారిలో మానసికమైన వ్యాధులు తలెత్తే అవకాశం ఉంది అని పరీక్షలలో తేలినప్పుడు, మరిన్ని జాగ్రత్తలు తీసుకోవాలని సూచిస్తున్నారు పరిశోధకులు. తరచూ వైద్యులను సంప్రదించడం, జీవనశైలిలో మార్పులు తీసుకురావడం, అవసరమైతే చికిత్స తీసుకోవడం ద్వారా వ్యాధుల దాడిని వీలైనంత దూరానికి నెట్టేయవచ్చని ఆశిస్తున్నారు.   -నిర్జర.  

యోగా మంచిదే కానీ...

యోగా మంచిదే! ఈ విషయాన్ని ఎవరూ కాదనలేరు. కానీ ప్రతి శాస్త్రానికీ ఉన్నట్లే యోగాను ఆచరించేందుకు కొన్ని పద్ధతులు ఉన్నాయి వాటిని కనుక విస్మరిస్తే ఇబ్బందులు తప్పవు. యోగాసనాలు వేయాలనుకునేవారు వాటికి సంబంధించి కొన్ని జాగ్రత్తలను కూడా గుర్తుంచుకుంటే మంచిది.   గురుముఖత: యోగాసనాలు ఎలా వేయాలో చెప్పేందుకు సవాలక్ష మార్గాలు ఇప్పుడు అందుబాటులో ఉన్నాయి. డీవీడీలు, పుస్తకాలు, వెబ్‌సైట్లు, ఆఖరికి లైవ్‌ షోలు కూడా యోగాసనాల గురించి మార్గనిర్దేశనం చేస్తూ ఉంటాయి. కానీ యోగాను ఏదో కాలక్షేపంగా కాకుండా పూర్తి నిబద్ధతతో నేర్చుకోవాలనుకునేవారు మంచి యోగా గురువుని ఆశ్రయించడం మంచిది. దీని వల్ల భంగిమల్లో మనం చేసే చిన్న చిన్న తప్పులను వారు నివారించే అవకాశం ఎలాగూ ఉంటుంది. పైగా మన వ్యక్తిత్వం, జీవనశైలి, ఆరోగ్య సమస్యలకు అనుగుణంగా గురువులు తగిన యోగాసనాలను వ్యక్తిగత శ్రద్ధతో నేర్పించే అవకాశం ఉంటుంది. ఆహారం: యోగా నేర్చుకునేటప్పుడు వీలైనంత సాత్విక ఆహారం, మరింతగా మంచినీరు తీసుకోవాలి. శరీరాన్ని త్వరగా స్వస్థత పరిచేందుకు, మలినాలను తొలగించేందుకు ఇది చాలా అవసరం. కానీ భోజనం చేసిన వెంటనే యోగాసనాలు వేయడం ఏమాత్రం మంచిది కాదు. దీనికి రెండు కారణాలు చెప్పుకోవచ్చు. ఒకటి- యోగాసనాలు ఎప్పుడూ కూడా రక్తప్రసారం మీదే ఆధారపడతాయి. భోజనం చేశాక రక్తప్రసారం అంతా కూడా జీర్ణవ్యవస్థ వద్ద కేంద్రీకృతం అవుతుంది కాబట్టి, అసలుకే మోసం వస్తుంది. రెండు- యోగాసనాలలో ఎక్కువ శాతం ఉదరభాగం మీద ఆధారపడి ఉంటాయి కనుక, పొట్ట మీద అదనపు భారం మోపినట్లు అవుతుంది. వజ్రాసనం వంటి ఒకటి రెండు ఆసనాలకే ఇందుకు మినహాయింపు ఉంది.   ఆరోగ్యం: కొన్ని కొన్ని ఆరోగ్య సమస్యలు ఉన్నప్పుడు కొన్ని కొన్ని ఆసనాలకు దూరంగా ఉండాలి. ఉదాహరణకు గుండెజబ్బులు ఉన్నవారు శీర్షాసనానికి దూరంగా ఉండాలి. అలాగే ఆస్తమా, రక్తపోటు, స్పాండిలైటిస్ ఉన్నవారు గురువుల సలహా మేరకే ఆసనాలను వేయాలి. ఇక గర్భిణీ స్త్రీలు, రుతుక్రమంలో ఉన్నవారు, జ్వరంతో బాధపడుతున్నవారు.... ఇలా శరీర స్థితిని బట్టి కూడా ఆసనాల విషయంలో జాగ్రత్త వహించాల్సి ఉంటుంది.   ప్రాణాయామం: ఆసనాల విషయంలో ఎంత జాగ్రత్తను వహిస్తామో ప్రాణాయామం విషయంలో అంతే జాగ్రత్తను తీసుకోవలసి ఉంటుంది. గాలి, వెలుతురు, వాతావరణం... ప్రాణాయామం చేసేటప్పుడు ఇవన్నీ కూడా దృష్టిలో ఉంచుకోవాలి. మన ఆరోగ్య పరిస్థితిని బట్టి కూడా చేయాల్సిన ప్రాణాయామం మారుతుంది. ఉదాహరణకు అధిక రక్తపోటు ఉన్నవారు కపాలభాతిని చేస్తే ప్రమాదాన్ని కొనితెచ్చుకున్నట్లే!   తొందరపాటు: యోగాను నేర్చుకోవడం మొదలుపెట్టగానే త్వరత్వరగా ఆసాంతం నేర్చేసుకోవాలన్న తొందర చాలామందికి ఉంటుంది. అందుకనే శరీరం పూర్తిగా అలవాటు పడకుండానే త్వరత్వరగా ఆసనాలను వేయడం, ప్రారంభంలోనే కష్టమైన ఆసనాలను ప్రయత్నించడం చేస్తుంటారు. వీటి వల్ల కాళ్లు బెణకడం దగ్గర నుంచి వెన్ను దెబ్బతినడం వరకూ ఏ ప్రమాదమైన సంభవించవచ్చు. ‘ఆసనాలు వేశాం కదా, అదే సర్దుకుంటుందిలే’ అని తేలికగా తీసుకోకుండా, వాటిని ఆచరించే సమయంలో ఏదన్నా సమస్య తలెత్తితే వెంటనే వైద్యుని సంప్రదించాలి. - నిర్జర.  

అలసందలంటే అలుసా

అలసందలు - వీటినే బొబ్బర్లు అని కూడా అంటారు. నవధాన్యాలలో ఒకటైన అలసందలలో పోషకవిలువలు అమోఘంగా ఉంటాయి. వీటిలో కాలరీలు తక్కువగా ఉండటం వల్ల లో కాలరీ ఫుడ్ గా పేరు పొందాయి. అలాగే పీచుపదార్థం ఎక్కువగా ఉండటం వల్ల జీర్ణక్రియకు మంచిది. షుగర్ పేషెంట్స్ కి అద్భుతమైన ఆహారం.   ఇంతకీ ఇందులో దాగి ఉన్న గుణాలు ఏంటో చూద్దామా? ఈ బొబ్బర్లలో యాంటీఆక్సిడెంట్స్ పుష్కలంగా ఉంటాయి. అందుకే కొన్ని రకాల వ్యాధులను నివారించడంలోనూ వ్యాధి వ్యాప్తి చెందకుండా ఉంచడంలోనూ సహాయపడతాయి. అంతే కాదు శరీరంలో వైరస్ వ్యాప్తి చెందకుండా హానికరమైన టాక్సిన్స్ ను కూడా నియంత్రిస్తాయి.     అలసందలు జీర్ణక్రియను మెరుగుపరుస్తాయి. అలసందల్లో అధిక ఫైబర్ కలిగి ఉండటం వల్ల కడుపులో అనుకూల ప్రభావంను కలిగి ఉండి జీర్ణక్రియను మెరుగుపరుస్తుంది. ఇందులో ఉండే ఫైబర్ కంటెంట్ జీర్ణ సంబంధిత సమస్యలను నివారిస్తుంది. పొట్ట అసౌకర్యాన్ని నివారిస్తుంది . మలబద్దకాన్ని నివారించి జీర్ణక్రియను మెరుగుపరుస్తుంది.   వీటిలో పుష్కలంగా లభించే విటమిన్ k మెదడు చురుగ్గా పనిచేయటంలో దోహదపడుతుంది. అంతేకాక నరాలకు కూడా బలాన్నిస్తుంది. బొబ్బర్లలో ఉండే ఐరన్,మెగ్నీషియం మన ఎనర్జీ లెవెల్స్ పెరిగేలా చేస్తాయి.   ఇవి రక్తంలో కొలెస్ట్రాల్ లెవెల్స్ ని తగ్గిస్తాయి. ఇందులో ఉండే ఫ్లెవనాయిడ్స్, మినిరల్స్ పొటాషియం గుండె ఆరోగ్యంగా ఉండటానికి సహాయపడతాయి. ఒంట్లో కొవ్వు తగ్గాలి అనుకునే వాళ్ళు రోజుకో కప్పు నానబెట్టి ఉడికించిన అలసందలు తింటే కొన్ని రోజుల్లోనే మంచి ఫలితం కనిపిస్తుంది.   అలసందల్లో గ్లిజమిక్స్ ఇండెక్స్ తక్కువగా ఉంటుంది. మధుమేహంతో బాధపడే వారికి లోగ్లిజమిక్ ఇండెక్స్ కలిగిన అలసందలు చాలా ఆరోగ్యకరం . ఇవి బ్లడ్ షుగర్ లెవల్స్ ను నార్మల్ గా ఉంచడంలో సహాయపడతాయి. వీటిని తినటం వల్ల  కడుపు బరువుగా ఉండి ఎక్కువసేపు ఆకలి వేయకుండా ఉంటుంది. లావుగా ఉంది సన్నగా తయారనుకునేవారు కూడా వీటిని క్రమం తప్పకుండా తీసుకుంటే ఆ తేడాను గమనించచ్చు.   ఇన్ని విధాలుగా  ఆరోగ్యాన్ని మెరుగుపరిచే అలసందలని అలుసుగా చూడకుండా రోజువారి ఆహారంలో తింటూ ఉంటే మనకి ఆరోగ్యంతో పాటు ఆనందం కూడా లభిస్తుంది.    ...కళ్యాణి

క్యాబేజీ... ఖావోజీ...

  క్యాబేజీ అనగానే మొహం చిట్లిస్తారు చాలామంది. రుచిగా వుండదని దూరంగా పెడతారు. అది ఉడికేటప్పుడు వచ్చే వాసన కూడా నచ్చడు చాలామందికి. కానీ, క్యాబేజీ మన ఆరోగ్యానికి ఎంతో మంచిదని, ఇందులో ఎన్నో పోషకాలు వున్నాయని చెబుతున్నారు పౌష్టికాహార నిపుణులు. పైగా ఇందులో కేలరీలు చాలా ఎక్కువ. పోషకాలు ఎక్కువే:- క్యాల్షియం, ఐరన్, అయోడిన్, పొటాషియం, సల్ఫర్, ఫాస్పరస్ వంటివి క్యాబేజీలో సమృద్ధిగా వుంటాయి. ఇక విటమిన్ల విషయానికి వస్తే విటమిన్ ‘ఎ’ నుంచి ‘బి’, ‘సి’, ‘ఇ’, ‘కె’, ఫోలిక్ యాసిడ్లు ఇందులో ఎక్కువగానే వుంటాయి. యాంటీ బ్యాక్టీరియల్ గుణం ఎక్కువ:- క్యాబేజీకి యాంటీ బ్యాక్టీరియల్, యాంటీ వైరల్ గుణాలు వున్నాయి. అందుకే అమెరికన్ క్యాన్సర్ సంస్థ అత్యుత్తమ స్థాయిలో సిఫారసు చేసిన కూరగాయల్లో క్యాబేజీ  ఒకటి. ఇందులో యాంటీ క్యాన్సర్, యాంటీ ఆక్సిడెంట్లకు కొదవే లేదు. ఆరోగ్యంగా వుండాలంటే మన శారీరక వ్యవస్థ బాగా పనిచేయాలి. అందుకు ఉపయోగపడే ఫిటో న్యూట్రియెంట్లు క్యాబేజీలో చాలా ఎక్కువ వున్నాయిట. ఇవి క్యాన్సర్‌కి కారణమయ్యే హార్మోన్లతో పోరాడే యాంటీ బాడీల ఉత్పత్తిని పెంచుతాయి. కాబట్టి క్యాబేజీని పచ్చిగా లేదా కొద్దిగా ఉడికించి వారానికి రెండుమూడుసార్లు తిన్నవారిలో బ్రెస్ట్ క్యాన్సర్ వచ్చే అవకాశాలు బాగా తక్కువని గుర్తించారు. కేవలం క్యాన్సరే కాదు... గుండె ఆరోగ్యానికీ క్యాబేజీ మంచిదే. రుమటాయిజం, చర్మ సంబంధిత వ్యాధులకి క్యాబేజీ మంచి ఆహారంట. బరువు తగ్గాలననుకునే వారికి దివ్య ఔషధం:- బరువు తగ్గాలనుకునేవారు క్యాబేజీని ఆహారంలో చేర్చుకుంటే చాలు... ఆ పని అది చేస్తుంది. క్యాబేజీలో వుండే కొన్ని పదార్ధాలు చక్కెరలు, ఇతర కార్బో హైడ్రేట్లు కొవ్వుగా మారకుండా అడ్డుకుంటాయి. వండే విధానం ముఖ్యం:- * క్యాబేజీని ఎక్కువగా ఉడికించడం వల్ల కొన్ని పోషక విలువలు కోల్పోయే అవకాశం వుందిట. కాబట్టి క్యాబేజీని తక్కువ సమయం మాత్రమే ఉడికించాలి. * అలాగే ఎప్పుడూ కుక్కర్లో ఉడికించకూడదు. దాని వలన మన ఆరోగ్యానికి లాభం కంటే నష్టం ఎక్కువ జరుగుతుంది. క్యాబేజీని ఉడికించేటప్పుడు మూత కూడా పెట్టకూడదు. పోషకాలు పోకూడదంటే:- క్యాబేజీని కొనేటప్పుడు ఎప్పుడైనాసరే పూర్తి క్యాబేజీనే కొనాలి. కోసి వున్నవి కొనకూడదు. ఒక్కసారి క్యాబేజీని కోశాక పోషక విలువలు తగ్గడం మొదలవుతుంది. ఎప్పుడైనా సగం కోసి వాడాల్సి వస్తే ఓ డబ్బాలో పెట్టి ఫ్రిజ్‌లో వుంచితే అందులోని పోషక విలువలు పోకుండా వుంటాయి. -రమ

నిద్రలేమితో బాధపడుతున్నారా?

    ఈ సమస్యను ' పూర్ స్లీప్ కన్సాలిడే షన్ ' అంటారు. అంటే బెడ్ పైనే ఎక్కువ సేపు గడుపుతారు కాని, నిద్రపోయే సమయం తక్కువ,చాలదు. ఈ పరిస్థితి తగ్గాలంటే కొన్ని జాగ్రత్తలు,శ్రద్ధ అవసరం. బెడ్ టైమ్ కు ముందుగా కునుకులు తీయకండి. బాగా అలసటగా,నిద్ర వస్తున్న ఫీలింగ్ కలిగి నపుడే పడుకోవాలి. ఒత్తిడి ఏమాత్రం లేనపుడే పడక పైకి చేరాలి. ఏవైనా విషయాలు ఆందోళన కలిగిస్తుంటే మంచం దిగేసి మనస్సు మళ్ళించాలి. తిరిగి నిద్ర వస్తున్నప్పుడే పడుకోవాలి. వీకెండ్స్ అయినా సరే వేళ ప్రకారం నిద్రలేస్తుండాలి. రాత్రి లేట్ అయిందనే కారణంతో నిద్రలేచే సమయాన్ని పొడిగించు కోవద్దు. మద్యాహ్నం వేళ ఎక్కువ నిద్ర పోవద్దు.   ఇరవై నిమిషాల కునుకుచాలు. అదికూడా మద్యాహ్నం మూడు నాలుగు గంటల మధ్యలోనే. ఇవన్ని పాటించండి ,నెమ్మదిగా సమస్య తగ్గిపోయి నిద్రించే సమయాలు క్రమబద్ధం అవుతాయి. చక్కటి నిద్ర ,ఆహ్లాదభరితమైన ఉదయం మీ సొంతం అవుతాయి.  ...సాయి లక్ష్మీ మద్దాల

బీపీ... ఇలా చేస్తే హ్యాపీ

  బీపీ (blood pressure) ఇప్పుడు చాలామందిలో కనిపిస్తోంది. ఇటీవల వైద్య మార్గదర్శకాల ప్రమాణాల ప్రకారం ఒక వ్యక్తి బీపీ 140- 90 కంటే ఎక్కువగా ఉంటే అది అసాధారణం. అలాంటప్పుడు అతనికి ఎలాంటి బీపీ లక్షణాలు కనిపించకపోయినా చికిత్స ప్రారంభించాల్సిందే. సాధారణంగా హైబీపీతో బాధపడుతున్న రోగులకు తమకు బీపీ వ్యాధి ఉన్న సంగతి తెలియదు. ఈ వ్యాధి ఉన్న వారు తరుచుగా పరీక్ష చేయించుకుంటూ ఉండాలి. ఎందుకంటే ఎప్పుడైనా వారు కిడ్ని సరిగా పనిచేయకపోవడం, గుండెపోటు వంటి సమస్యలకు గురైతే తప్ప వారిలో ఎలాంటి రోగ లక్షణాలు కనిపించవు. కుటుంబంలో ఎవరికైనా హైబీపీ ఉన్నట్లయితే 30 ఏళ్ల  వయసులోనే చెక్ చేయించుకుంటే దానిని నియంత్రించవచ్చు.   డాక్టర్లు రోగి అవసరానికి తగిన మందులను, అలాగే జీవన విధానంలో మార్పులను అంటే వాకింగ్, యోగా, ఉప్పు వాడకం మొదలైన విషయాలను సూచిస్తారు. బీపీ 140 నుంచి 159 ఎంఎం మధ్య ఉంటే సిస్టాలికే ప్రెషర్ గా 90-90 మధ్య ఉంటే డైయాస్టాలిక్ ప్రెషర్ గా గుర్తిస్తారు. ఒక్కసారి హైబీపీ సమస్య మొదలైతే ఒక్కసారి మందులు వాడితే పోయే జబ్బు కాదు. మనమే దానిని కంట్రోల్‌లో పెట్టుకోవాలి.   చికిత్స ప్రారంభించడానికి ముందు మన జీవనజైలిలో  కొన్ని మార్పులు అవసరం. ఒక 6 వారాల నుండి 3 నెలలు వరకు మన జీవన విధానాన్ని పరిశీలించుకోవాలి. ఇలా చేయకపోతే మందులు ప్రభావవంతంగా పని చేయవు.  దీర్ఘకాలికంగా మందులు వాడినా ఎలాంటి ప్రమాదం ఉండదు. అతి తక్కువ కేసుల్లో మాత్రమే దుష్ర్పభావం చూపుతుంది. అలాంటి సమయంలో కూడా డాక్టర్లు వెంటనే మరో రకం మందు ఇచ్చి నియంత్రిస్తారు.  నియంత్రణకు సాధ్యంకాని సెకండరీ హైబీపీ వల్ల అవయవాలు కాపాడుకోవడమే మన లక్ష్యం. ఎట్టిపరిస్థితిల్లోనూ మందులు మానకూడదు.   ఒక్కసారి మందులు వాడటం మానేస్తే మళ్లీ బీపీ పెరుగుతుంది. బీటా బ్లాకర్స్ లాంటి మందును వాడుతున్నప్పుడు కొందరు రోగుల్లో బీపీ సాధారణ వైద్యానికి లొంగనంతగా పెరిగిపోతుంది. కనుక హైబీపీ తగ్గినా మందులు మాత్రం వాడుతూనే ఉండాలి. సెకండరీ హైబీపీకి గురైన గర్భిణులు మాత్రం ఈ మందులు ఆపడం జరుగుతుంది. ఒక్కసారి హైబీపీ వ్యాధి వచ్చిందంటే ఇక జీవితం ముగిసిపోయినట్టే అనే అపోహను వదిలిపెట్టి, సరైన వైద్య విధానం ద్వారా నియత్రించి సాధారణ జీవనవిధానాన్ని కొనసాగించవచ్చు. అందుకు మనం చేయాల్సింది క్రమంతప్పకుండా మందులు వేసుకోవడమే. కొంతమందికి వ్యాధిని గుర్తించలేక దురదృష్టవశాత్తు కిడ్నీలు దెబ్బతినడం, గుండెపోటు లాంటి సమస్యలు వస్తున్నాయి.   ఇలాంటి వారికి ముందు వారి జీవనవిధానంలో  అలవాట్లను మార్చాల్సి ఉంటుంది.  అలా చేయడం వల్ల శరీరంలో గుండె రక్త ప్రసారమయ్యే తీరు, కిడ్నీ పని విధానం బాగుపడతాయి. ఎవరికైనా షుగర్ లేదా ఇతర సమస్యలు ఉంటే అవసరాన్ని బట్టి ఇతర మందులను నిరభ్యంతరంగా వాడుకోవచ్చు. పెయిన్ కిల్లర్స్, సంతాన నిరోధక మాత్రలు లాంటి మందులను తీసుకున్నపుడు మాత్రం అవి బీపీని ప్రభావితం చేసి ఇతర సమస్యలకు కారణమవుతాయి. కనుక ఎలాంటి మందులనైనా వైద్యుల సలహాల ప్రకారమే తీసుకోవాలి.

కడుపులో మంటగా ఉంటే....?

  చాలామంది ఉన్నట్లుండి కడుపులో మంట పుడుతోందంటూ కుర్చీలో అలాగే వాలిపోతుంటారు. దీనికి అసిడిటీయే కారణం. అసిడిటీ రావడానికి కారణాలు ఏమిటి అని చూస్తే... 1. సరిగా నిద్ర లేకపోవడం. 2. ఆహారాన్ని త్వరగా భుజించడం. సరిగా నమిలి తినకపోవడం. 3. ఆహారంలో మసాలా దినుసులతో కూడుకున్న ఆహారం ఉండటం. 4. ధూమపానం, మద్యపానం సేవిస్తుండటం. 5. ఉండాల్సిన బరువుకన్నా ఎక్కువ బరువు ఉండటం. రుచిగా ఉందని ఎక్కువ మోతాదులో ఆహారం తీసుకోవటం మూలాన జీర్ణక్రియ సరిగా జరుగదు. దీంతో ఉదరం, గుండెల్లో మంట ప్రారంభమౌతుంది. 6. సమయానికి భోజనం చేయకపోవడం వంటివి ప్రధాన కారణాలు.   అసిడిటీ మరియు గుండెల్లో మంటను అదుపు చేసేందుకు కొన్ని చిట్కాలు : *  అసిడిటీతో బాధపడే వారికి అరటిపండు అత్యుత్తమమైన ఔషధం. ప్రతిరోజు అరటిపండును ఆహారంగా తీసుకుంటుంటే అసిడిటీ నుంచి ఉపశమనం కలుగుతుంది. *  ఆహారంలో వీలైనంత మేరకు వేపుడు పదార్థాలను తగ్గించాలి. దీంతోపాటు ఊరగాయ, మసాలా దినుసులతో కూడిన ఆహారం, చాక్లెట్లను తీసుకోకుండా ఉండేందుకు ప్రయత్నించాలి. *  యాపిల్ పండు రసం, వెనిగర్, తేనెను తగినంత నీటిలో కలుపుకోండి. ఈ మిశ్రమాన్ని భోజనానికి ముందు సేవించి భోజనం తీసుకుంటే అసిడిటీ నుంచి ఉపశమనం కలుగుతుంది *  పచ్చి కూరగాయలతో తయారుచేసిన సలాడ్‌ను తగు మోతాదులో తీసుకోండి. *  తీసుకునే ఆహారంలో భోజనానికి భోజనానికి మధ్య ఎక్కువ సమయం ఖాళీ కడుపుతో ఉండకండి. దీంతో పొట్టలో గ్యాస్ పేరుకుపోయే ప్రమాదం ఉంది. *  ప్రతిరోజు ఎనిమిది గ్లాసుల నీటిని సేవిచేందుకు ప్రయత్నించండి. భోజనం తీసుకున్న వెంటనే నిద్రకు ఉపక్రమించకండి. *  మద్యపానం, ధూమపానం అలవాటుంటే వాటిని మానేసేందుకు ప్రయత్నించండి. *  తులసి ఆకులను ఉదయంపూట తీసుకుంటే అసిడిటీ నుంచి ఉపశమనం కలుగుతుంది.

ఇది తాగితే ఆరోగ్యమే

    చల్లటి కాలంలో వేడి వేడి ‘‘టీ’’ గొంతులోంచి జారుతుంటే ఎంత హాయిగా వుంటుందో కదా.. నిజమే! అయితే ఈసారి ఓ చిన్న మార్పు చేసి చూడండి. హాయితోపాటు ఆరోగ్యం కూడా మీ స్వంతం అవుతుంది అంటున్నారు యూనివర్సిటీ ఆఫ్ టోక్యోకు చెందిన అధ్యయనకర్తలు. అదే మామూలు టీ బదులు గ్రీన్ టీ తాగడం. ఎందుకు అంటే... బోల్డన్ని లాభాలు ఉన్నాయట మరి. అవేంటో చూద్దామా... 1. గుండె ఆరోగ్యానికి, క్యాన్సర్ నిరోధానికి పనికొచ్చే యాంటీ ఆక్సిడెంట్స్ (ఎపిగాల్లో కొటెచిన్) గ్రీన్ టీలో ఉన్నాయి. 2. ఇక మంచి కొలెస్ట్రాల్‌ని పెంచి, చెడు కొలెస్ట్రాల్‌ని తగ్గిస్తుంది.  బరువు తగ్గాలనుకుంటే గ్రీన్ టీ మంచి మందు. ఎందుకంటే, చక్కగా కేలరీలను ఖర్చు చేస్తుంది. పొట్ట ప్రాంతంలో నిల్వ వుండే కొవ్వును కరిగిస్తుంది. 3. పిల్లలకి రోజూ ఓ కప్పు గ్రీన్ టీని తాగిస్తే దంత సమస్యలు దూరమవుతాయి. బ్యాక్టీరియాను నిర్మూలించే సుగుణాలు అందులో వున్నాయి. 4. డయాబెటిక్ పేషెంట్లు రోజూ రెండు కప్పులు అయినా గ్రీన్ టీ తాగితే మంచిది. రక్తంలో చక్కెర స్థాయులను అదుపులో వుంచే గుణం దీనికి వుందని అధ్యయనాల్లో తేలింది. 5. రోగ నిరోధక శక్తి పెరగాలన్నా, ఎముకల ఆరోగ్యాన్ని కాపాడుకోవాలన్నా, కాలేయానికి హానిచేసే ఫ్రీ రాడికల్స్ నుంచి తప్పించుకోవాలన్నా రోజుకి రెండు కప్పుల గ్రీన్ టీ అయినా తాగి తీరాల్సిందే. 6. ‘‘అంతెందుకు చెప్పండి... ఒక్క సంవత్సరం పాటు క్రమం తప్పకుండా గ్రీన్ టీ తాగి చూడండి. అధిక రక్తపోటు సుమారు 46 శాతం తగ్గడం మీరే గమనిస్తారు’’ అంటున్నారు అధ్యయనకర్తలు.   ఇన్ని సుగుణాలు ఉన్నాయని తెలిశాక గ్రీన్ టీ తాగకుండా ఉండగలమా? అయితే ఒక్కటే సమస్య. మనం అన్ని విషయాలూ తెలుసుకుంటాం. కానీ, ఆచరించడం మర్చిపోతాం. ఈసారి అలా కాదు. రాయడం అవ్వగానే నేను, చదవడం అవ్వగానే మీరు వెంటనే ఓ కప్పు గ్రీన్ టీని వేడివేడిగా తాగేద్దాం... ఏమంటారు? - రమ

సముద్రం దగ్గరకి వెళ్తే... ప్రశాంతత దొరికినట్లే!

  మనలో చాలామందికి సముద్రమంటే భలే ఇష్టం. కొంతమందిలో ఆ ఇష్టం ఏ స్థాయిలో ఉంటుందంటే, రిటైర్‌ అయ్యాక సముద్రపు ఒడ్డునే ఓ ఇల్లు కట్టుకోవాలని కలలు కంటూ ఉంటారు. మనిషి జీవితంలో సముద్రానికి ఉన్న ప్రాముఖ్యత తక్కువేమీ కాకపోవచ్చు. వ్యాపారం దగ్గర్నుంచీ, వర్షాల వరకూ సముద్రం లేనిదే బతుకు సాగదు. అంతవరకూ బాగానే ఉంది కానీ.... విశాలమైన సముద్రపు ఒడ్డున సమయాన్ని గడపాలని మనిషి ఎందుకంతగా తపించిపోతాడు? ప్రపంచంలో ఇన్ని సౌఖ్యాలు ఉన్నా మనిషి సమద్రపు ఒడ్డుకే ఎందుకు పరిగెడతాడు! సముద్ర తీరంలో ఉండే ప్రదేశాలు, అక్కడ ఉండే ఇళ్లకి ఎందుకంత గిరాకీ? ఈ ప్రశ్నలన్నింటికీ సమాధానం ఉందంటున్నారు శాస్త్రవేత్తలు. సముద్రం, మనిషికి ప్రకృతి ఒడిలో ఉన్న అనుభూతిని ఇస్తుందట. ఆ సముద్రపు నీలపు రంగు, అందులో నుంచి వచ్చే అలల శబ్దాలు, ఆ అలల మీదుగా తేలియాడుతూ వచ్చే సముద్రపు గాలి, ఆ గాలిలోని స్వచ్ఛమైన వాసన... అతని ఇంద్రియాలన్నింటికీ ఉత్తేజాన్ని కలిగిస్తాయట. ఇవన్నీ ఎవరా దారిన పోయే దానయ్య చెప్పిన విషయాలు కాదు. మిచిగాన్‌ విశ్వవిద్యాలయంలోని పరిశోధకులు తేల్చిన అంశాలు. ఇందుకోసం వాళ్లు వెల్లింగ్‌టన్‌, హవాయ్‌ వంటి సముద్ర తీర ప్రాంతాలను గమనించారు. అక్కడి ప్రజలు మిగతా ప్రాంతాల ప్రజలతో పోలిస్తే చాలా సంతోషంగా ఉన్నట్లు గ్రహించారు. ఆదాయం, ఆస్తులు, వయసు.... వీటన్నింటికీ అతీతంగా అక్కడి ప్రజలు ప్రశాంతంగా ఉన్నట్లు తేలింది. అంతేకాదు! అక్కడ ప్రజల్లో మానసికమైన సమస్యలు కూడా తక్కువగా ఉన్నట్లు గణాంకాలు స్పష్టం చేశాయి.   అదండీ విషయం! సిమెంటు కట్టడాలు ఎన్ని కనిపించినా, భౌతికమైన సుఖాలు ఎన్ని ఊరిస్తున్నామనిషి అంతరంగం ప్రకృతిలోనే సేదతీరుతుంది. భూమ్మీద మూడు వంతులుగా ఉన్న సముద్రం ఆ పకృతికి ఓ ప్రతిరూపంగా నిలుస్తుంది. అందుకే ఈసారి కాస్త సేదతీరాలనుకుంటే దగ్గరలో ఏదన్నా సముద్రపు ఒడ్డు ఉందేమో చూసుకోండి!

పోకెమాన్‌గోతో ఆరోగ్యం!

  కబాలి హడావుడి ముగిసింది. కానీ పోకేమాన్‌ మాత్రం దూసుకునిపోతున్నాడు. ప్రపంచానికంతా ఇప్పుడు పోకెమాన్‌ జాడ్యమే పట్టేసింది. ఇలాంటి ఆటలు ఆడుతూ, లేని జంతువులను ఊహించుకుంటూ రోడ్ల మీద తిరగడం వల్ల రకరకాల సమస్యలు వస్తాయన్న వార్తలు పుంఖానుపుంఖాలుగా వినిపిస్తూనే ఉన్నాయి. ఇన్ని విమర్శల మధ్య కొన్ని సానుకూలమైన మాటలు కూడా వినిపిస్తున్నాయో. అవేంటంటే...   విటమిన్‌ డి లభ్యం- పొద్దస్తమానం, అయితే ఇంట్లోనూ లేకపోతే కారులోనూ గడిపేసే పాశ్చత్యులని ఆరుబయలకు తీసుకువచ్చిన ఘనత పోకెమాన్‌దే. ఇందులో ఎలాంటి అనుమానమూ లేదు! ఇలా రోజూ కాసేపు ఎండపట్టున తిరగడం వల్ల ఇంతవరకూ దూరంగా ఉన్న విటమిన్‌ డి ఇప్పుడు పుష్కలంగా లభిస్తోందంటున్నారు పోకెమాన్‌ ప్రియులు. కీళ్ల నొప్పుల నుంచి చర్మవ్యాధుల వరకూ విటమిన్‌ డి ఎంత అవసరమో చెప్పేదేముంది. జీవనశైలిలో మార్పు- ఆధునిక జీవనశైలి అంటే, నిరంతరం ఏదో ఒక చోట కూర్చుని ఉండటమే! దానికి తోడు ఇప్పటి వరకూ ప్రచారంలో ఉన్న వీడియో గేమ్స్ అన్నీ కూడా కూర్చుని అడేవే. పోకెమాన్‌తో ఇలాంటి పరిస్థితి నుంచి మార్పు వచ్చిందంటున్నారు. పోకెమాన్‌తో ఇంతవరకూ కుర్చీలోంచి కదలని వారంతా లేచి నాలుగు అడుగులు వేస్తున్నారట.     వేగం.. వేగం-  పోకెమాన్‌గోని పట్టుకోవాలంటే అలా ఓ నాలుగడుగులు వేస్తే సరిపోదు. కాస్త వేగంగా నడవాలి. కాస్త చురుగ్గా పోకెమాన్ల కోసం వెతకాలి. దీని వల్ల కావల్సినంత వ్యాయామం అవుతోందంటున్నారు కొందరు. ఈ ఆట ఆడుతున్న దగ్గర్నుంచీ రోజుకి కనీసం గంట తక్కువ కాకుండా నడుస్తున్నాం అనేవారి సంఖ్య నానాటికీ పెరిగిపోతోంది. పని ఒత్తిడి నుంచి విశ్రాంతి- ఈ రోజుల్లో ఉద్యోగాలు ఎంత ఒత్తిడితో కూడుకుని ఉంటాయో చెప్పేదేముంది! రోజుకి పది పన్నెండు గంటలు పనిచేసినా కూడా ఇంకా మెదడు మీద ఆ ఉద్యోగభారం ఉంటూనే ఉంటుంది. పోకెమాన్‌గోతో అలాంటి ఒత్తిడి నుంచి సులువుగా దూరం కావచ్చునంటున్నారు. ఒత్తిడి నుంచి ఉపశమనం పొందేందుకు సిగిరెట్టు, మద్యపానాల జోలికి పోకుండా, పోకెమాన్‌తో ఆడుకోవడం మంచిదే కదా అని దబాయిస్తున్నారు.   డోపమైన్‌:  పోకెమాన్‌గో ఆడుతున్నప్పుడు శరీరంలో డోపమైన్‌ అనే రసాయనం విడుదల అవుతుందనీ, ఇది ఒకరకమైన సంతృప్తిని కలిగిస్తుందనీ చెబుతున్నారు. నిరంతరం ఈ సంతృప్తిని కోరుకోవడం కోసమే పోకెమాన్‌గో అంటే పడి చస్తున్నారు జనం.   సరే! పోకెమాన్‌గోతో ఇలాంటి ఉపయోగాలు కొన్ని ఉంటే ఉండవచ్చుగాక! కానీ ఎక్కడ నడుస్తున్నామో చూసుకోకుండా, ఏ హద్దులు దాటుతున్నామో గమనించుకోకుండా... గంటల తరబడి జీవితాలను వెచ్చించే ఈ పోకెమాన్‌గో ఏ వ్యసనానికీ తీసిపోదంటున్నారు పెద్దలు. ఇలా ఎవరి వాదనని వారు వినిపించేశారు. ఇక నిర్ణయించుకోవల్సింది మనమే!   - నిర్జర.

నైట్ షిఫ్ట్ వల్ల బ్రెస్ట్ కాన్సర్

  ఒకప్పుడు ఉద్యోగం పురుష లక్షణం అనే నానుడి ఉండేది.  కాలం మారింది ఆ నానుడి కూడా పాతబడిపోయింది. ఇప్పుడు అన్ని రంగాల్లో మగవారితో పాటు ఆడవాళ్ళు కూడా ఎందులోనూ మేము తక్కువ కాము అన్నట్టు ఉద్యోగాలు చేస్తున్నారు. ఈ మధ్య కాలంలో అమెరికన్ టైమింగ్స్ కి అనుగుణంగా రాత్రిళ్ళు కూడా పనిచెయ్యాల్సి వస్తే దానికి కూడా ఎక్కడా వెనకడుగు వెయ్యకుండా ముందుకు దూసుకేళ్తున్నారు. జీతాలు ఎక్కువ విశ్రాంతి తక్కువ అయిపోతోంది.   ఇలాంటి నైట్ షిఫ్ట్ లు అమ్మాయిల ఆరోగ్యంపై ఎలాంటి ప్రభావం చూపిస్తున్నాయి అని అడిగితే చెడు ప్రభావమే అంటున్నారు పరిశోధకులు. రాత్రిళ్ళు డ్యూటి చేసే ఆడవారిలో బ్రెస్ట్ కాన్సర్ వచ్చే అవకాశం ఎక్కువగా ఉంటుందిట. శరీరంలో మెలటోనిన్‌, హార్మోన్లపై ప్రభావం చూపటం వల్లే రాత్రి డ్యూటీలు క్యాన్సర్‌కు కారణమవుతున్నట్లు పరిశోధకులు స్పష్టం చేస్తున్నారు. ఈ మెలటోనిన్‌ రక్తంలో ఈస్ట్రోజన్‌ను తగ్గిస్తుంది, క్యాన్సర్‌ కణాల పెరుగదలనూ నిరోధిస్తుంది. మామూలుగా మన మెదడు మెలటోనిన్‌ను ఎక్కువగా మధ్యరాత్రి వేళల్లో వాతావరణం చీకటిగా ఉన్నప్పుడే ఉత్పత్తి చేస్తుంది. అలాంటి  సమయంలో నిద్రపోకుండా సహజ సిద్ధమైన వెలుతురులో కాకుండా కృత్రిమ వెలుతురు కింద, లైట్ల కాంతిలో పని చేసేటప్పుడు మెదడు మెలటోనిన్‌ విడుదలను ఆపేస్తుంది. దీనికారణంగా ఆరోగ్యం దెబ్బతిని రొమ్ము క్యాన్సర్‌ ఒక్కటే కాకుండా, పలురకాల అనారోగ్య సమస్యల ముప్పు పొంచి ఉంటుందన్నారు.     ఈ కారణంగానే పగటి వేళల్లో విధులు నిర్వర్తించే వారితో పోలిస్తే, రాత్రి డ్యూటీలు చేసే మహిళల్లో రొమ్ము క్యాన్సర్‌ ముప్పు48 శాతం దాకా ఎక్కువగా ఉంటున్నట్లు తేలింది. ఈ సమస్యని నివారించుకోవాలంటే శరీరానికి  వ్యాయామం ఎంతైనా అవసరం. అలాగే నీళ్ళు ఎక్కువగా  తాగుతూ ఉండాలి. వెల్లుల్లి అన్ని వంటకాలలో తగిన విధంగా వాడాలి. దానిమ్మ పండుని ఎక్కువగా తినాలి. మాములు టీ బదులు గ్రీన్ టీ అలవాటుచేసుకోవటం మంచిది. రాత్రిపూట భోజనం బరువైనది కాకుండా చూసుకోవాలి. తేలికగా అరిగె పదార్థాలు తింటే సమస్య మన దగ్గరకి రాకుండా ఉంటుంది.         ...కళ్యాణి

కార్బైడ్‌ పండ్లు ప్రాణాంతకాలు!

  పండ్లంటే ఎవరికి ఇష్టం ఉండదు! అందులోనూ మామిడి, అరటి, యాపిల్‌ అంటే నోరూరనివారు ఎవరుంటారు? కాని ఆ పండ్లని మగ్గపెట్టేందుకు వాడే విషపదార్థాల గురించి వింటుంటేనే భయం కలుగుతోంది. మరీ ముఖ్యంగా కార్బైడ్‌తో పండించిన పండ్లని ముట్టుకోవాలంటేనే దడ పుడుతోంది. మరి నిజంగానే కార్బైడ్‌ అంత ప్రమాదకరమైనదా? అయితే దాన్ని ఎందుకు వాడుతున్నారు? దాని బారిన పడకుండా ఉండటం ఎలా?... మీరే చూడండి!   ఇందుకు వాడతారు! మామిడి, అరటి వంటి పండ్లను చెట్టు మీద నుంచి కోసిన తరువాత కూడా మగ్గేందుకు కాస్త సమయం పడుతుంది. ఇది నిదానంగా జరిగే చర్య. పైగా వాటిని మగ్గపెట్టేందుకు చాలా జాగ్రత్తలు తీసుకోవాలి. అలా కాకుండా కాస్త కేల్షియం కార్బైడ్‌ని కనుక వాటి మీద ప్రయోగిస్తే... అవి ఇట్టే పండిపోతాయి. లేదా కనీసం పండినట్లు కనిపిస్తాయి. ఇందులో మరో లాభం కూడా ఉంది! పచ్చిగా ఉండగానే కాయలని కోయడం, అవి గట్టిగా ఉన్నప్పుడే మార్కెట్‌కు తరలించడం వల్ల పండ్లు దెబ్బతినే అవకాశం చాలా తక్కువగా ఉంటుంది. పైగా కార్బైడ్‌తో పండిన పండ్లు లోపల ఇంకా పచ్చిగానే ఉంటాయి కాబట్టి చాలా రోజులు నిలవ ఉంటాయి కూడా! ఇక మిలమిలా మెరిసిపోయే కార్బైడ్‌ పండ్లని చూసిన కొనుగోలుదారులకి, వాటిని రుచి చూడాలన్ని ఆశ ఎలాగూ కలుగుతుంది.   ఇదీ ప్రమాదం! కేల్షియం కార్బైడ్‌లో అర్సెనిక్‌, ఫాస్పరస్‌ అనే రసాయనాలు ఉంటాయి. ఇవి అధిక మొతాదులో శరీరంలోకి చేరితే ఏర్పడే సమస్యలు అన్నీఇన్నీ కావు. తలనొప్పి, కళ్లు తిరగడం, నిద్రలేమి మొదలుకొని నరాలకు సంబంధించిన నానారకాల సమస్యలకూ ఇది దారితీయవచ్చు. చర్మం మీద కూడా కార్బైడ్‌ ప్రభావం అధికంగా ఉంటుంది. దద్దుర్లు నుంచి చర్మక్యాన్సర్‌ వరకూ కార్బైడ్‌ పండ్లని తినేవారిలే ఎలాంటి రోగమైనా తలెత్తవచ్చు. ఇక గుండె, మెదడు, కీళ్లు, జీర్ణాశయం వంటి శరీర భాగాల మీద ఈ కార్బైడ్‌ తీవ్ర ప్రభావం చూపుతుందనే వార్తలూ వినిపిస్తూ ఉంటాయి. గర్భిణీ స్త్రీలు కనుక కార్బైడ్‌తో మగ్గపెట్టిన పండ్లని తింటే... అవి వారికీ, వారి కడుపులో ఉన్న బిడ్డకీ కూడా ప్రమాదమని హెచ్చరిస్తున్నారు వైద్యులు.   మరేం చేయడం! కార్బైడ్‌ గురించి ప్రభుత్వాలు, న్యాయస్థానాలు ఎన్ని హెచ్చరికలు చేసినా కూడా, రూపాయి కోసం వ్యాపారస్తులు పడే కక్కుర్తి ముందు ఉపయోగం లేకుండా పోతోంది. ఆరోగ్య శాఖ అధికారులు కూడా కార్బైడ్‌ వాడకాన్ని చూసీచూడనట్లు ఊరుకుంటారన్న ఆరోపణలూ ఉన్నాయి. కాబట్టి కార్బైడ్‌ పండ్ల నుంచి దూరంగా ఉండాల్సిన బాధ్యత వినియోగదారులదే. ఇప్పుడు కార్బైడ్‌తో పండించని పండ్లు అంటూ ప్రత్యేకంగా కొన్ని దుకాణాలు వెలుస్తున్నాయి. నమ్మకం ఉంటే వాటిలో పండ్లను తీసుకోవచ్చు. లేదా పండ్లని కొనుగోలు చేసేటప్పుడు ఈ జాగ్రత్తలు తీసుకున్నా సరిపోతుంది.   - కార్బైడ్‌తో పండించిన పండ్లు చూడ్డానికి మరీ పచ్చగా కొట్టొచ్చినట్లుగా కనిపిస్తాయి.   - చాలా సందర్భాలలో పండ్లు ఒక చోట మగ్గి, మరో చోట పచ్చిగా ఉన్నట్లు రెండు రంగులలో ఉంటాయి.   - పైకి పండిపోయినట్లు ఉండి, లోపల పచ్చిగా ఉందంటే.... అది ఖచ్చితంగా కార్బైడ్‌ మహిమే!   - కార్బైడ్‌తో పండిన పండ్లు కృత్రిమంగా మగ్గి ఉంటాయి కాబట్టి, వాటిలోని తీపిశాతం కూడా చాలా తక్కువగా ఉంటుంది.   - అన్నింటికీ మించి మామూలు పండ్లు మగ్గినప్పుడు వచ్చే ఆ సువాసన, కార్బైడ్ పండ్లలో కనిపించదు. అంటే రంగు, రుచి, వాసనల ద్వారా ఫలానా పండు కార్బైడ్‌తో మగ్గించారు అని తేలిపోతుందన్నమాట.   ఇదీ కార్బైడ్ పండ్ల కథ! ఇంత జాగ్రత్తగా ఉన్నా కూడా ఒకోసారి మోసపోయే ప్రమాదం ఉంది కనుక, తినబోయే ముందర కాసేపు పండ్లను నీటి ధార కింద ఉంచితే, వాటిలోని విష రసాయనాలు చాలావరకూ కొట్టుకుపోయే అవకాశం ఉందని సూచిస్తున్నారు నిపుణులు.   - నిర్జర.

ఉద్యోగమే కాదు.. ఆరోగ్యమూ ముఖ్యమే

    కాస్త ఆరోగ్యం మీద శ్రద్ధ పెట్టండి... అంటూ స్త్రీలకు ఓ హెచ్చరిక చేస్తున్నారు అధ్యయనకర్తలు. ‘‘అసోసియేటెడ్ చాంబర్ ఆఫ్ కామర్స్ అండ్ ఇండస్ట్రీస్’’ ఓ అధ్యయనం నిర్వహించింది. సుమారు మూడువేల మంది మహిళలపై నిర్వహించిన ఈ అధ్యయనంలో చాలా ఆసక్తికర అంశాలు తెలిశాయి. 1. ఉద్యోగం చేసే మహిళల్లో 70 శాతం మంది కన్నా ఎక్కువమంది అనారోగ్యం బారిన పడుతున్నారనీ, అదీ 32 సంవత్సరాల వయసు  నుంచేనని తెలిసింది. 2. ఊబకాయం, నడుం నొప్పి, మధుమేహం, అధిక రక్తపోటు వంటి అనారోగ్య సమస్యలు అధికంగా ఉన్నట్టు కూడా తెలిసింది. 3. ఇక దీర్ఘకాలిక అనారోగ్యంతో బాధపడే వారి సంఖ్య ఇంచుమించు 22 శాతంగా వుంటే, 14 శాతం మహిళలు తీవ్ర సమస్యలతో పోరాడుతున్నట్టు వెల్లడైంది. 4. ఇక శారీరక అనారోగ్యంతోపాటు మానసిక ఆరోగ్యంపై కూడా మహిళలు తక్కువ శ్రద్ధ పెడుతున్నట్టు ఈ అధ్యయనంలో తేలింది. ఒత్తిడి, ఒంటరితనం, ఆందోళన వంటివన్నీ మహిళలను తీవ్రస్థాయిలో ఇబ్బందిపెట్టే అంశాలని, వాటి నుంచి బయటపడే మార్గాలను అన్వేషించాలని చెబుతున్నారు నిపుణులు. ఈ అధ్యయనంలో తేలిన అంశాల ఆధారంగా మహిళలకి కొన్ని సూచనలు చెప్తున్నారు. అవి ఏంటంటే... 1. పోషకాహారం తప్పనిసరిగా తీసుకోవాలి. 2. వ్యాయామం, ధ్యానం వంటివి జీవన శైలిలో భాగం కావాలి.   కుటుంబాన్ని, ఉద్యోగాన్ని రెండింటినీ సమర్థవంతంగా నిర్వహించాలంటే మహిళలు తప్పకుండా వారి ఆరోగ్యం పట్ల శ్రద్ధ పెట్టాల్సిందే అని గట్టిగా చెబుతున్నారు నిపుణులు. మరి ఆలోచించండి. మహిళల ఆరోగ్యం ప్రమాదకర స్థాయిలో ఉందని అధ్యయనాలు చెబుతున్నప్పుడు ఆరోగ్యకర జీవనశైలిని ఆచరించేలా ప్రణాళిక సిద్ధం చేసుకోవాలి. అలాగే... మహిళలు ఆరోగ్యంపై శ్రద్ధ పెట్టేలా, ఇంట్లో కుటుంబ సభ్యులు కూడా ప్రోత్సహిస్తూ, వారికి ఇంటి పనుల్లో సహాయపడితే ఇంటి ఇల్లాలు ఆరోగ్యం వుంటుంది. -రమ

చెవి నొప్పికి ఇంటి వైధ్యం

  మన పిల్లల్ని బాధించే వాటిలో చెవి నొప్పి ఒక పెద్ద సమస్య. పెద్దవాళ్ళకి చెవి పోటు వస్తే చక్కగా వాళ్ళకి తెలిసిపోతుంది.  అదే పిల్లల్లో వస్తే వాళ్లకి చెప్పటం రాకపోవటం వల్ల ఏదో ఒక రకమైన పేచీ పెట్టి ఏడుస్తూ కూర్చుంటారు. అస్తమాట్లు చెవిని నలుపుకుంటూ ఉంటారు. వాళ్ళని చూసి మనకి బాధ. డాక్టర్ దగ్గరకి తీసుకువెళ్ళే లోపు కాస్త నొప్పి సర్దుకోవటానికి కొన్ని ఇంటి వైద్యాలు చేస్తే మంచి ఫలితం ఉండచ్చేమో.   సాదారణంగా పిల్లలు ఇయర్ బడ్స్ తో ఆడుకుంటూ చెవిలో పెట్టి తిప్పుకుంటూ ఉంటారు. పొరపాటున దానికి ఉన్న దూది చెవిలో ఉండిపోయినా పెద్దగా పట్టించుకోకుండా ఆడేసుకుంటారు. దాని ఫలితంగా కొన్నాళ్ళు పోయేసరికి చెవిపోటు రావటం, దాని వల్ల జ్వరం రావటం ఇలాంటివన్నీ మొదలవుతాయి. అందుకే వీలయినంత వరకు చిన్న పిల్లలు ఉన్న ఇంట్లో అసలు ఇయర్ బడ్స్ వారికి అందుబాటులో ఉంచకుండా జాగ్రత్త పడటం మంచిది. ఇక అనేక కారణాల వల్ల వచ్చే చెవిపోటు కోసం ఏం చెయ్యాలో చూద్దాం.     హైడ్రోజెన్ పెరోక్సైడ్ ఇలాంటి సమస్యలకి ఒక మంచి విరుగుడు. పిల్లల చెవిలో ఏదైనా చెత్త ఉండిపోయినా లేదా చీమలు, చిన్న పురుగులు లాంటివి ఉండిపోయినా పిలల్ని పడుకోబెట్టి చెవిలో ఐదు చుక్కల హైడ్రోజెన్ పెరోక్సైడ్ వేసి కాసేపు అలానే ఉంచాలి. దానితో చెవిలో ఏదైనా ఉంటే నురుగుతో పాటు బైటకి వచ్చేస్తుంది.   చెవిపోటు వల్ల ఇబ్బంది పడుతున్నప్పుడు గళ్ళ ఉప్పుని కాస్త కడాయిలో వేడి చేసి దానిని పల్చటి బట్టలో కట్టి ఓర్చుకునే వేడి ఉన్నప్పుడు చెవి చుట్టూ కాపడం పెడితే నొప్పి తగ్గి పిల్లలు హాయిగా నిద్ర పోతారు. వాళ్ళు నిద్రపోయేటప్పుడు తల కింద పిల్లో పెట్టకుండా పడుకోబెడితే మంచి ఫలితం కనిపిస్తుంది.   తులసి రసం కూడా చెవి నొప్పికి బాగా పనిచేస్తుంది. ఒక పది తులసి ఆకుల్ని చేతితో నలిపి రసం పిండి దానిని రెండు చుక్కల చొప్పున రోజులో కనీసం నాలుగు ఐదు సార్లు వేస్తూ ఉండాలి. దొరికితే నల్ల తులసి ఇంకా మంచిది. చెవి పోటుతో ఇబ్బంది పడే పిల్లల కోసం తీసుకోవల్సిన జాగ్రత్తల్లో ముఖ్యమైనది వాళ్ళు స్నానం చేసేటప్పుడు నీరు లోపలకి వెళ్ళకుండా చూసుకోవటం. స్నానానికి ముందు వేసలైన్ పోసిన దూదిని చెవిలో పెట్టి స్నానం చేయిస్తే అది నీటిని లోపాలకి రానీయకుండా ఉంటుంది. చెవి లోపల ఉండే ఇన్ఫెక్షన్స్ పెరగకుండా ఉంటుంది. ఆలివ్ ఆయిల్ కాస్త వేడి చేసి చెవిలో పోసి ఉంచడం వల్ల లోపల ఏదైనా గడ్డకట్టి ఉండిపోయినా కరిగిపోయి త్వరగా బయటకి వస్తాయి. అలాగే వేడి నీళ్ళు ఒక హాట్ బాగ్ లో పోసి దానిని చెవి చుట్టూ పెడుతూ ఉంటే నొప్పి నుంచి కాస్త ఉపశమనం కలుగుతుంది.   కొంతమంది పిల్లలు సెల్ ఫోన్ లో పాటలు పెద్ద సౌండ్ పెట్టుకుని చెవికి ఆనించుకుని వింటూ ఉంటారు. ఇలా చేస్తున్న వాళ్ళని కాస్త మెల్లిగా నచ్చచెప్పి అలా చేయకుండా చూసుకోవాలి. అలాగే పెన్సిళ్ళు, పెన్నులు చెవిలో పెట్టి తిప్పుకునే అలవాటుని కూడా తగ్గించాలి. మొత్తానికి చెవి నొప్పికి కారణాలు అనేకం ఉన్నా ఆ సమస్యని సరైన ఇయర్ స్పెషలిస్ట్ దగ్గరకి తీసుకువెళ్ళే లోపు పైన చెప్పినలాంటి చిన్న చిన్న ప్రయత్నాలు చేయటం మంచిదే కదా. ...కళ్యాణి

అతినిద్ర లోలుడు... మృత్యువుకి ఆప్తుడు...

మత్తు వదలరా నిద్దుర మత్తు వదలరా... ఆ మత్తులోన పడితే గమ్మత్తుగా చిత్తై పోదువురా అని ఓ సినిమా కవి చెప్పిన మాట అక్షర సత్యం. నిద్ర మనకు విశ్రాంతిని ఇస్తుంది. అయితే అతి నిద్ర విశ్రాంతినిచ్చే సంగతి దేవుడెరుగు... అసలు ప్రాణాలే హరించే ప్రమాదం వుందని పరిశోధకులు హెచ్చరిస్తున్నారు. అతనిద్రాలోలుడు.. తెలివిలేని మూర్ఖుడు అని అంటారు.. కానీ ఇప్పుడు అతినిద్రాలోలుడు మృత్యువుకి ఆప్తుడు అని నిస్సందేహంగా అనవచ్చు. ఎందుకంటే, ఈ విషయాన్ని సిడ్నీ యూనివర్సిటీకి చెందిన శాస్త్రవేత్తలు బల్ల గుద్ది మరి చెబుతున్నారు. సదరు శాస్త్రవేత్తలు బల్ల గుద్దిన శబ్దం విని అయినా అతి నిద్ర లోలులకు మెలకువ వస్తుందో... రాదో! నిద్ర అనే అంశం మీద సిడ్నీ యూనివర్సిటీకి చెందిన శాస్త్రవేత్తలు ఈమధ్య భారీ స్థాయిలో పరిశోధనలు చేశారు. వారి పరిశోధనలకు సంబంధించిన సారాంశాన్ని బయటి ప్రపంచానికి వెల్లడిస్తూ, ‘‘రోజుకు తొమ్మిది గంటలకు మించి నిద్ర పోయేవారు త్వరగా మృత్యువుకు చేరువవుతారు’’ అని తేల్చారు. దాదాపు రెండు లక్షల 30 వేల మందికి పైగా అనారోగ్యంతో బాధపడుతున్న వారి ఆరోగ్య పరిస్థితిని పరిశీలించిన అనంతరం ఈ శాస్త్రవేత్తలు ఈ నిద్రారణకు.. కాదు.. నిర్ధారణకు వచ్చారు. ఎక్కువగా నిద్రపోయేవారు మాత్రమే కాదు.. ఎక్కువగా కూర్చునే వుండేవారు కూడా త్వరగా బాల్చీ తన్నేసే ప్రమాదం వుందని వారు హెచ్చరిస్తున్నారు. ఎంత నిద్ర పోవాలో అంత నిద్రపోయేవారు, ఎంతసేపు కూర్చోవాలో అంతసేపే కూర్చుని శరీరాన్ని ఎక్కువగా అలసిపోయేలా చేసేవారికంటే ఎక్కువగా నిద్రపోయేవారు, ఎక్కువసేపు కూర్చునే వుండేవారు త్వరగా మృత్యువు ఒడిలోకి జారిపోతారని సిడ్నీ యూనివర్సిటీ శాస్త్రవేత్తలు చెబుతున్నారు. అతిగా మద్యపానం చేసేవారు, అతిగా ధూమపానం చేసేవారికంటే అతిగా నిద్రపోయేవారికే మృత్యుగండం ఎక్కువగా వుంటుందని వారు హెచ్చరిస్తున్నారు. రోజుకు ఆరు గంటలు మాత్రమే నిద్రపోవడం చాలా మంచిదని వారు సూచిస్తున్నారు. ఎంత తక్కువగా కూర్చుంటే అంత మంచిదని కూడా చెబుతున్నారు.  

ఆహారమే ఆరోగ్యాన్ని రక్షించే ఆయుధం

మంచి ఆరోగ్యానికి పౌష్ఠిక విలువలున్న ఆహారం ఎంతో ముఖ్యమని అందరికీ తెలిసిందే. ఏమాత్రం ఒంట్లో కొంచెం నలతగా వున్నా సరైన ఆహారం తీసుకోండంటూ వైద్యులు హెచ్చరిస్తారు కూడా. ఆ అనారోగ్యాన్ని ఎదుర్కొనే ఆహార పదార్థాలని సూచిస్తారు కూడా. ఉదాహరణకి రక్తహీనతకి దానిమ్మ, ఆకుకూరలు అలాగే డయాబెటిక్‌కి మెంతులు ఇలా. సరే ఇవన్నీ మన శారీరక అనారోగ్యానికి వైద్యులు చేసే సూచనలు. కానీ, మన మానసిక ఆరోగ్యానికి, ఆహారానికి కూడా సంబంధం ఉందంటే నమ్మగలరా. ఒత్తిడిగా వున్నా,  చిరాకుగా, కోపంగా వున్నా, మూడ్ సరిగా లేకపోయినా కొన్ని రకాల ఆహార పదార్థాలు తీసుకుంటే అవన్నీ వాటంతట అవే సర్దుకుంటాయిట. మరి మూడ్ ఫుడ్ గురించి నిపుణులు ఏం చెబుతున్నారో చూద్దాం. ఎప్పుడైనా చాలా చిరాకుగా, లేదా చాలా టెన్షన్‌గా అనిపిస్తే ఒక్క అరటిపండు తినేయ్యండి వెంటనే. ఎందుకంటే, అరటిపళ్ళలో వుండే ట్రిప్టోఫాన్స్ మూడ్‌ను బాగుచేసే అతి మంచి అమినో యాసిడ్లుట. ఈ అరటిపండు తినగానే సెరోటానిక్ అనే పదార్థం విడుదలయ్యి, చికాకుని, టెన్షన్‌ని తగ్గిస్తుందిట. కాబట్టి చిరాకుగా వుంటే ఆ చిరాకుని బ్రేక్ చేసేందుకు అరటిపండుని తీసుకోవడమే తక్షణ కర్తవ్యం. ఇక ఏదైనా తీవ్ర ఆలోచనలో వుంటే, ఆ ఆలోచన క్రుంగదీస్తుంటే ఓట్స్‌ని తీసుకోవాలిట. ఈ ఓట్స్‌లో ఉండే ‘బి6’ విటమిన్ మనల్ని తిరిగి ఉత్సాహంగా ఉండేలా చేస్తుందిట.  ఇవేకాదు, ఒత్తిడిని దూరం చేసేందుకు, అలసటని, డిప్రెషన్‌ని ఎదుర్కొనేందుకు కూడా ఆహారమే ఆయుధం. ఒప్పుడైనా ఒత్తిడిగా ఉన్నట్టు అనిపిస్తే బంగాళాదుంపలు, చిలకడ దుంపల్ని ఆహారంలో చేర్చండి చాలు. నీర్సంగా వున్నప్పుడు వీటిని తీసుకున్నా వెంటనే శక్తి లభిస్తుంది. -రమ