నందమూరి బాలకృష్ణ (Nandamuri Balakrishna) హోస్ట్ గా వ్యవహరిస్తున్న 'అన్ స్టాపబుల్' షోకి ఎంతటి క్రేజ్ ఉందో తెలిసిందే. ఓటీటీ వేదిక ఆహాలో ప్రసారమవుతున్న ఈ షో మూడు సీజన్లు పూర్తి చేసుకోగా.. మూడూ ఒక దానిని మించి ఒకటి హిట్ అయ్యాయి. ఇప్పుడు నాలుగో సీజన్ తో అలరించడానికి సిద్ధమైంది. (Unstoppable with NBK Season 4)

అక్టోబర్ 25 నుంచి అన్ స్టాపబుల్ సీజన్-4 ప్రసారం కానుంది. మొదటి ఎపిసోడ్ గెస్ట్ గా ఆంధ్రప్రదేశ్ ముఖ్యమంత్రి, బాలకృష్ణ బావ నారా చంద్రబాబు నాయుడు రావడం విశేషం. ఇప్పటికే విడుదలైన ఈ ఎపిసోడ్ ప్రోమోకి మంచి రెస్పాన్స్ వచ్చింది. ప్రోమో ఎమోషనల్ గానూ, ఎంటర్టైనింగ్ గానూ సాగింది. ఇందులో రాజకీయ అంశాలతో పాటు, కుటుంబ విషయాలను కూడా చంద్రబాబు పంచుకున్నారు. (Nara Chandrababu Naidu)

అయితే ఈ షోలో చంద్రబాబుకి పలు పదునైన ప్రశ్నలను బాలకృష్ణ సంధించినట్లు తెలుస్తోంది. అభివృద్ధికి పెట్టపీట వేసే బాబు, ఓట్ల కోసమే సంక్షేమ బాట పట్టారా? 50 రోజుల జైలు జీవితం నేర్పిన పాఠాలేంటి? జనసేనతో బంధం ఎన్నేళ్లు ఉంటుంది? లోకేష్ కి తెలుగుదేశం పార్టీ పగ్గాలు అప్పగిస్తారా? వచ్చే ఎన్నికలకు ముందు సీఎం క్యాండిడేట్ గా అనౌన్స్ చేస్తారా? జాతీయ రాజకీయాలపై బాబు ఫోకస్ పెట్టనున్నారా? ఇలా ప్రశ్నల వర్షం కురిపించినట్లు తెలుస్తోంది. అంతేకాదు బాలకృష్ణ, చంద్రబాబు మధ్య జూనియర్ ఎన్టీఆర్ ప్రస్తావన కూడా వచ్చినట్లు ప్రచారం జరుగుతోంది. దీంతో ఎన్టీఆర్ గురించి ఈ ఇద్దరు ఏం మాట్లాడారనే ఆసక్తి నెలకొంది.