Home  
Politics

నడిరోడ్డుమీద కాంగ్రెస్ నేత హత్య

  గుంటూరు జిల్లా పిడుగురాళ్లలో ఓ కాంగ్రెస్ నేతని రాజకీయ ప్రత్యర్ధులు నడిరోడ్డుమీద నరికి చంపారు. చాలాకాలంపాటు తెలుగుదేశం పార్టీలో పనిచేసి ఈ మధ్యే కాంగ్రెస్ పార్టీలో చేరిన నరేంద్రని హెల్మెట్లు ధరించిన కొందరు దుండగులు వేటకొడవళ్లతో నరికి చంపారు.   చనిపోయిన నరేంద్ర స్వగ్రామం జానపాడు. జానపాడు రోడ్డులో నుంచున్నప్పుడే దాడి జరిగింది. ప్రాణభయంతో పారిపోయే ప్రయత్నం చేశాడు. అక్కడే ఉన్న ఓ హోటల్లోకి పారిపోయే ప్రయత్నం చేశాడు. చుట్టూ కమ్మిన దుండగులు అతి దారుణంగా వేటకొడవళ్లతో మెడ నరికి చంపేశారు.   తీవ్రగాయాలపాలైన నరేంద్రని స్థానికులు వెంటనే ఆసుపత్రికి తరలించినప్పటికీ ప్రాణాలు దక్కలేదు. ఎమ్మెల్సీ జి.వి.కృష్ణారెడ్డి అనుచరుడిగా నరేంద్రకి మంచి గుర్తింపుంది. ఆయన సహకారంతోనే గ్రామంలో అభివృద్ధి పనులుకూడా చేస్తున్నారు. ఎదుగుదలని చూసి ఓర్వలేని కొందరు నరేంద్రని మట్టుపెట్టారని కొందరు ఆరోపిస్తున్నారు.

ఎమర్జెన్సీ అలారం ఎందుకు మోగినట్టు..?

  జగన్ ఉంటున్న చంచల్ గూడ జైలుకి విజిటర్ల తాకిడి పెరుగుతోంది. చాలామంది విజిటర్లు అనఫిషియల్ గా జైలుకెళ్లి జగన్ ని కలుస్తున్నారని టిడిపి నేతలు ఆరోపిస్తున్నారు. జైలు అధికారులు ఇందుకు పూర్తిగా సహకరిస్తున్నారని, జైల్లో జగన్ దగ్గర ఓ సెల్ ఫోన్ కూడా ఉందని టిడిపి నేత యనమల తారా స్థాయిలో ఆరోపణలు చేస్తున్నారు. చంచల్ గూడా జైల్లో జగన్ ని ఎవరెవరు ఎప్పుడెప్పుడు కలుసుకున్నారు అనే అధికారికి సమాచారాన్ని యనమల సంపాదించారు.   ఉన్నట్టుండి చంచల్ గూడ ఎమర్జెన్సీ సైరన్ ఎందుకు మోగిందో తెలుసుకునేందుకు అధికారులు హడావుడిగా పరిగెత్తారు. జైల్లో అంగుళం అంగుళం గాలించి కారణాన్ని వెతికి పట్టుకున్నారు. కానీ.. అది బైటికి పొక్కకుండా జాగ్రత్త పడ్డారు. ఇంతకీ .. ఎమర్జెన్సీ అలారం ఎందుకు మోగినట్టు అన్న అనుమానం మాత్రం ఇప్పటికీ జనానికి అలాగే ఉంది.   ఈ మధ్యకాలంలో చంచల్ గూడ జైలుకి విఐపిల రాక బాగా పెరిగింది. సెక్యూరిటీని టైట్ చేశారు. అన్ని వైపులా సీసీ కెమెరాలతో కవర్ చేశారు. జైలు చుట్టుపక్కల ప్రాంతాల్లోకూడా భద్రతని కట్టుదిట్టం చేశారు. సెంట్రీలు కళ్లలో ఒత్తులేసుకుని కాపలా కాస్తున్నారు.. అయినా ఎమర్జెన్సీ అలారం మోగింది..   చంచల్ గూడ జైలు జగన్ పార్టీ కార్యాలయంగా మారిందని టిడిపి నేతలు గట్టిగా ఆరోపణలు చేస్తున్నారు. వైకాపాలో చేరదామనుకున్నవాళ్లంతా నేరుగా జైలుకెళ్లి జగన్ ని కలిసి మాట్లాడొస్తున్నారంటున్నారు. వైఎస్సాఆర్ సీపీ నేతలు మాత్రం జైల్లో జగన్ కి భద్రత లేదని ఆరోపిస్తున్నారు. వేళకాని వేళలో విద్యుత్ సరఫరా నిలిచిపోవడం, ఎమర్జెన్సీ అలారం మోగడం దీనికి తార్కాణాలని ఆరోపిస్తున్నారు.  

రాజీనామాలో మెలిక పెట్టిన కావూరి

    మంత్రి వర్గంలో చోటు దక్కలేదని ఏలూరు ఎంపీ కావూరి సాంబశివరావు రాజీనామా చేశారు. పార్టీలో సీనియర్ లకు అన్యాయం జరుగుతుందని, పార్టీని నమ్ముకుని పనిచేసినా ప్రయోజనం లేదని, అందుకే తాను సీనియర్ల కోసం రాజీనామా చేశానని చెప్పుకొచ్చారు. చివరకు ప్రధాని పిలిచి మాట్లాడిన తాను బెట్టు వీడేది లేదని బీరాలు పోయారు. అమ్మ పిలిచి మాట్లాడితే గాని ఆలోచించను పొమ్మన్నారు. రాజీనామాపై వెనక్కు తగ్గనన్నారు. అయితే రాజీనామా లేఖలోనే కావూరి లాజిక్కు ఉందని తెలిస్తే మాత్రం మన ఆశ్చర్యపోక తప్పదు. ఇంతవరకు పార్లమెంటు చరిత్రలో ఎవరూ రాజీనామా లేఖ ఇవ్వని విధంగా కావూరి రాజీనామా లేఖ ఇచ్చారు. అవును లోక్ సభ సభ్యత్వానికి రాజీనామా చేసిన ఆయన జనవరి ఒకటవ తేదీ నుండి రాజీనామా ను ఆమోదించాలని పేర్కొనడం విడ్డూరం. అధిష్టానానికి అంతర్గతంగా చెప్పిన కావూరి ఆ మేరకు జనవరి ఒకటి తుదిగడువు ఇచ్చారేమో. అసలు ఎలాంటి షరతులు లేకుండా రాజీనామా చేస్తేనే అప్పుడు స్పీకర్ సంబంధిత సభ్యుడిని పిలిచి ఓ సారి మాట్లాడి నిర్ణయం తీసుకుంటారు. ఇలాంటి రాజీనామాలు చెల్లవు. గతంలో సమైక్యాంధ్రకు మద్దతుగా రాజీనామాలు చేసిన ఎమ్మెల్యేలు ఇలాగే వరసకట్టి రాజీనామాలు చేశారు. ఇప్పుడు రాజీనామా ఆమోదించాలంటే కావూరి మరో సారి రాజీనామా చేయక తప్పదు.

జగన్‌కు తెలంగాణలో 50 సీట్లు వస్తాయా..?

    ఇప్పటికిప్పుడు ఎన్నికలొచ్చినా, ఎప్పటికొచ్చినా అన్ని విధాలా లాభం మా పార్టీకే తప్ప మరోపార్టీకి ఏమీ కలిసిరాదంటూ జగన్ పార్టీ వర్గాలు తెగ డబ్బా కొట్టుకుంటున్నాయ్. ఎప్పుడు ఎన్నికలొచ్చినా ఆఖరికి తెలంగాణలోకూడా అరవై సీట్లు రావడం ఖాయమని కొండా సురేఖ అనడం దీనికి సరైన ఉదాహరణ.   షర్మిల పాదయాత్రలో పాల్గొన్న సురేఖ చేసిన వ్యాఖ్యలు కాస్తంత గట్టిగానే జనం గుండెల్లోకి నాటుకుపోవచ్చన్న భయం ప్రత్యర్దుల్లో కనపడుతూనే ఉందికూడా.. పనిలోపనిగా చంద్రబాబు పాదయాత్రమీద విరుచుకుపడ్డ సురేఖ,, వీలైనంతగా బాబు యాత్రని ఏకే ప్రయత్నం కూడా చేశారు. నిజానికి వై.ఎస్.ఆర్.కాంగ్రెస్ కు తెలంగాణ లో అరవై సీట్లు వస్తే రాష్ట్రంలో ఆ పార్టీకి అదికారం వచ్చినట్లే లెక్క. రెండువేల తొమ్మిదిలో కాంగ్రెస్ కు తెలంగాణలో ఏబై సీట్లు వస్తే తెలుగుదేశం పార్టీకి ముప్పై తొమ్మిది స్థానాలు దక్కాయి. టీఆర్ ఎస్ ఖాతాలో పడ్డవి మాత్రం కేవలం పది స్థానాలే.. రెండువేల నాలుగులో కాంగ్రెస్ టిఆర్ఎస్ లకు కలిపి సుమారు ఎనబై వరకు వచ్చాయి. అందులో టిఆర్ఎస్ కే ఇరవై ఆరొచ్చాయి. టిడిపికి అప్పట్లో కేవలం పదకొండు స్థానాలు మాత్రమే దక్కాయ్. 1999 లో కాంగ్రెస్,తెలుగుదేశం లు పోటాపోటీగా సీట్లు సంపాదించుకున్నట్టే లెక్క. అప్పట్లో.. కోస్తా, రాయలసీమలలో టిడిపి అత్యదికంగా సీట్లు సంపాదించుకుని అదికారంలోకొచ్చింది. 1994లో కాంగ్రెస్ కు తెలంగాణలో కేవలం ఆరు సీట్లు మాత్రమే వచ్చాయి. హైదరాబాద్ లో నాలుగు, నిజామాబాద్ జిల్లాలో ఒకటి, వరంగల్ జిల్లాలో మరొకటి. ఇండిపెండెంట్లు, మజ్లిస్ పార్టీకి చెందిన అరడజను మంది  అభ్యర్ధులు మినహా టిడిపి, వామపక్షాలు క్లీన్ స్వీప్ చేశాయి. తెలంగాణలో టిడిపికి 1983లో నలభైమూడు స్థానాలు మాత్రమే రాగా, 1985 లో మాత్రం ఏబై కి పైగా వచ్చాయి. 1989లో టిడిపికి కూడా గణనీయంగానే తెలంగాణ లో సీట్లు వచ్చినా, మెజార్టీ స్థానాలు మాత్రం కాంగ్రెస్ పరమయ్యాయి.  ఈ లెక్కల్నిబట్ట చూస్తే తెలంగాణలో యాభై సీట్లు తెచ్చుకుంటే మిగతా రెండు ప్రాంతాల్లో కచ్చితంగా వంద సీట్లొచ్చినట్టే లెక్క. కొండా సురేఖ చెప్పిన జోస్యం నిజమైతే.. వైకాపా పూర్తి మెజారిటీతో అధికార పీఠమెక్కినట్టే లెక్క.. సురేఖ చెబుతున్నవి కాకి లెక్కలో లేక, నిజమైన లెక్కలో తెలుసుకునే రోజు దగ్గర్లోనే ఉందని అటు అధికార పక్ష నేతలూ, ఇటు ప్రతిపక్షనేతలూ విమర్శిస్తున్నారు. జగన్ పార్టీ నేతలు పెద్దఎత్తున అంచనాలు పెంచుకుంటూ తమని తాము ఎక్కువగా ఊహించుకోవడం పరిపాటైపోయిందంటున్నారు. వచ్చే ఎన్నికల్లో జనం విలక్షణమైన తీర్పు చెబుతారన్న ఆత్మవిశ్వాసాన్ని వ్యక్తం చేస్తున్నారు.

నామా పై మండిపడ్డ కెటిఆర్

    తెరాస, టిడిపి మధ్య మాటల యుద్ధం మొదలైంది. తెలంగాణ రాష్ట్ర సమితి అధినేత కేసీఆర్ దమ్ముంటే ఖమ్మం లోక్ సభ స్థానంలో పోటీ చేసి గెలిచి చూపించాలని టీడీపీ ఖమ్మం ఎంపీ నామా నాగేశ్వరరావు సవాల్ కు కెసిఆర్ కుమారుడు తారక రామారావు స్పదించారు. నామా నాగేశ్వరరావు ముసుగులో ఉన్న సమైక్యవాది అని ఆరోపించారు. ఖమ్మం నుంచి తాము పోటిచేస్తామని చెప్పకుండా, తెలంగాణ వాదం ఖమ్మంలో బలంగా ఉందని చెప్పారు. టీడీపీ అధినేత చంద్రబాబు నాయుడును ప్రసన్నం చేసుకోవడానికి ఎంపీ నామా నాగేశ్వరరావు కేసీఆర్ మీద అనవసర విమర్శలకు దిగుతున్నారని అన్నారు. రెండువేల తొమ్మిదిలో కెసిఆర్ ను జైల్లో పెడితే ఆ జిల్లాకు చెందిన యువత సత్తా చూపారని కూడా ఆయన అన్నారు.

రాం జెత్మలానీకి బిజెపి రామ్ రామ్

    మొదట్నుంచీ రామ్ జెత్మలానీకి యాంగ్రీ యంగ్ మ్యాన్ పాపులారిటీ అంటే కాస్త మక్కువ ఎక్కువే. పదునైన పదాలతో చురకత్తుల్ని విసిరేయడం, అవి దీపావళి టపాసుల్లా మారి తెగపేలుతుంటే సంబరపడిపోవడం జెత్మలానీకి ఆనందం కలిగించే విషయం. తనని మాట అనగలిగినవాళ్లు ఇంటాబైటా లేరన్న ధీమా కూడా జెత్మలానీ మాటల్లో స్పష్టంగా కనిపిస్తుంది. మొదట్నుంచీ దుందుడుక మాటలకు పెట్టింది పేరుగా ఉన్న ఈ సీనియర్ లాయర్ గారు బిజెపి నేతగా మారిన దగ్గర్నుంచీ నోటికొచ్చినట్టల్లా మాట్లాడి పార్టీని తెగ ఇరుకున పెడుతున్నారు. జెత్మలానీ వ్యాఖ్యలతో తలబొప్పికట్టించుకున్న బిజెపి పార్టీ ఇకపై ఆయన్ని ఉపేక్షించే ప్రశ్నే లేదని నిర్ణయించుకుని అవకాశంకోసం కాచుక్కూర్చున్న తరుణంలో రామ్ మరోసారి వాడివాడి మాటలనే తూటాల్ని ప్రయోగించారు. సిబిఐ డైరెక్టర్ గా రంజిత్ సిన్హా నియామకంపై తీవ్రస్థాయిలో అసంతృప్తిని వ్యక్తం చేయడమే కాక, దమ్ముంటే నాపై చర్య తీసుకోండంటూ బిజెపి అధిష్ఠానానికి సవాల్ కూడా విసిరారు. అడ్డగోలుగా మాట్లాడ్డం ఒక ఎత్తైతే, నాకంటే మొనగాడెవరూ పార్టీలో లేరన్నట్టుగా అర్ధం వచ్చేలా దమ్ముంటే నా మీద చర్య తీసుకోండి ఛాలెంజ్ అంటూ జెత్మలానీ విసిరిన సవాల్ నేరుగా గడ్కరీ గుండెల్లో గుచ్చుకుంది. చాలా రోజులుగా తనని ఏకి పారేస్తున్న జెత్మలానీమీద గుర్రుగా ఉన్న బిజెపి అధ్యక్షుడు గడ్కరీ.. ఘనత వహించిన లాయర్ గారిపై వేటు వేశారు. మొదట్నుంచీ జెత్మలానీని వెనకేసుకొస్తున్న శత్రుఘ్న సిన్హా, యశ్వంత్ సిన్హా వంటి నేతలకుకూడా ఇండైరెక్ట్ గా వార్నింగిచ్చేందుకే బిజెపి అధిష్ఠానం ఇలాంటి నిర్ణయం తీసుకున్నట్టు తెలుస్తోంది. అన్నీ బాగానే ఉన్నాయ్.. కానీ.. తనపై పార్టీ వేటువేసిన తర్వాత ఇంతవరకూ జెత్మలానీ నోరు విప్పనే లేదు. ఆయన సైలెన్స్ బ్రేక్ చేస్తే ఎలాంటి మాటాలు దూసుకొస్తాయోనన్న ఉత్కంఠ జనంలో విపరీతంగా పెరిగిపోతోంది.

కేసిఆర్ తో విభేధాలు లేవు : రాములమ్మ

    సూర్యపేటలో జరిగిన తెరాస సమరభేరికి విజయశాంతి హాజరుకాలేదు. తెలంగాణ రాష్ట్ర సమితి ఆధ్వర్యంలో ప్రతిష్టాత్మకంగా జరిగిన ఈ సభకు తెరాస ఎంపిగా ఉన్న విజయశాంతి హాజరుకాకపోవడం చర్చనీయాంశంగా మారింది. కేసిఆర్ కు విజయశాంతికి విభేదాలు వచ్చాయని ప్రచారం ఆరంభమైంది. దీనిపై విజయశాంతి వివరణ ఇచ్చారు. కేసిఆర్ తో తనకు ఎలాంటి విభేదాలు లేవని, తీవ్ర అస్వస్థతతో బాధ పడుతుండటంతో సమరభేరి సభకు హాజరుకలేకపోయానని చెప్పారు. అంతేకాని తనకు కేసిఆర్ మధ్య ఎలాంటి విభేదాలు లేవని స్పష్టం చేశారు. గతంలో రాజశేఖరరెడ్డి ముఖ్య మంత్రి ఉన్నపుడు విజయశాంతి తెరాసకు రాజీనామా చేసి కాంగ్రెస్ లో చేరుతారనే ప్రచారం జోరుగా సాగింది. కాని రాజశేఖరరెడ్డి మరణించడంతో ఆ ప్రచారానికి తెరపడింది.

కేసీఆర్ కి దడపుడుతోందా..?

    తెలంగాణ రాష్ట్రం రావడం అసలు కేసీఆర్ కే ఇష్టంలేదని వాదించేవాళ్ల సంఖ్య రోజురోజుకీ రాష్ట్రంలో పెరిగిపోతోంది. కావాలనే తెలంగాణ అంశాన్ని కేసీఆర్ బంగారు గుడ్లుపెట్టే బాతులా చూస్తున్నారని, తెలంగాణ ప్రజలకు ద్రోహం చేస్తున్నారని ఆరోపణలు వెల్లువెత్తుతున్నాయ్.   చంద్రబాబు మంత్రి పదవి ఇవ్వని కారణంగా టిఆర్ ఎస్ అనే సొంత కుంపటిపెట్టుకుని రాష్ట్రంలో వేర్పాటువాదమనే నిప్పుని రాజేసిన ఘనత కేసీఆర్ కే దక్కుతుందన్న భావన తెలంగాణవాదుల్లో కూడా విపరీతంగా పెరిగిపోతోందని కొందరు పొలిటీషియన్లు ఆరోపిస్తున్నారు.   వై.ఎస్ బతికున్న రోజుల్లో కేసీఆర్ కి తెలంగాణ విషయంలో మాట్లాడ్డానికేం పెద్దగా మిగల్లేదు. అడపాదడపా ఏవో దీక్షలు చేసినా అవి చప్పగా చల్లారిపోయాయేతప్ప నిప్పులు కక్కిన దాఖలాల్లేవన్నది కొందరు కాంగ్రెస్ తెలంగాణ నేతల మాట. కాకపోతే.. కేసీఆర్ వల్లే ఎప్పుడో మూలనపడ్డ ఉద్యమం మళ్లీ తారా స్థాయికి చేరిందని నమ్మేవాళ్లూ చాలామందే ఉన్నారు.   ఉద్యమం పూర్తిగా పొలిటికల్ జెఎసి అధ్యక్షుడు కోదండరామ్ చేతుల్లోకి పోతోందని భయపడిన కేసీఆర్ హుటాహుటిన లాబీయింగ్ కోసం ఢిల్లీకి పరిగెత్తారు. ఢిల్లీ పెద్దల బందుల దొడ్లో కట్టేసినా, ఛీ.. అన్నా.. ఛా.. అన్నా ఓరిమితో అన్నీ భరించారు. టిఆర్ఎస్ ని కాంగ్రెస్ లో కలిపేస్తానని బేరం పెట్టినా సోనియా మాత అనుగ్రహం దక్కనేలేదు   ఢిల్లీలో పడిగాపులు పడీ.. పడీ.. విసుగెత్తిన కేసీఆర్ చివరికి రాష్ట్రానికి ఉత్తచేతులు ఊపుకుంటూ వచ్చారు. అందర్నీ కలుపుకుపోతేనే తనని జనం చీదరించుకోవడం తగ్గుతుంది తప్ప మరో మార్గం లేదని గ్రహించి కోదండకి స్నేహహస్తం చాచారు. ఆయన కాస్తంత మెత్తబడడంతో పాతస్నేహం కొత్త పుంతలు తొక్కింది. నల్గొండజిల్లాలో ఏర్పాటు చేసిన భారీ గర్జనలో కేసీఆర్ పులిలా ఎంతగా గర్జించాలని ప్రయత్నించినా డొల్లతనం పైకి బాగా కనిపించింది. చేసేదేం లేక తనుకూడా కాంగ్రెస్, టిడిపిల బాటలోనే నడుస్తూ వరాల్ని గుప్పించారు. తెలంగాణ రాజ్యం గురించి ఆయన కంటున్న కలలు పెద్దగా జనాన్ని కదిలించలేకపోయాయనే చాలామంది అభిప్రాయపడుతున్నారు. కేసీఆర్ తాటాకు చప్పుళ్లు చివరాఖరికి జనానిక్కూడా బాగానే తెలుస్తున్నాయని చాలామంది గట్టిగానే అనుకుంటున్నారుకూడా..

కెసిఆర్ ను కసబ్ లా ఉరితీయాలి: మోత్కుపల్లి

    తెలంగాణ ప్రజలను కేసీఆర్ మోసం చేశాడని, ఉగ్రవాది కసబ్ లా ఉరి తీయాలని కేసీఆర్ ను ఉరితీయాలని టీడీపీ ఎమ్మెల్యే మోత్కుపల్లి నరసింహులు ద్వజమెత్తారు. సూర్యాపేటలో టిఆర్ఎస్ సమరబేరి జరుగుతున్న సందర్భంగా కెసిఆర్ తెలంగాణ ప్రజలను మోసం చేస్తున్నాడంటూ నరసింహులు గన్ పార్కు వద్ద నిరశన దీక్షకు దిగారు.   తెలంగాణ అదిగో వస్తుంది, ఇదిగో వస్తుంది అని చెప్పి ప్రజలను ఇంతకాలం మోసం చేసిన కెసిఆర్ ఇప్పుడు రెండువేల పద్నాలుగు వరకు రాదని, వంద సీట్లే వస్తుందని చెబుతూ మళ్లీ తెలంగాణ వాసుల్ని మోసం చేయడానికి ప్రయత్నిస్తున్నారని ఆరోపించారు.

వైఎస్ తెలంగాణ పాలిట రాక్షసుడు

    కేసిఆర్ తనయుడు సిరిసిల్ల ఎమ్మెల్యే కేటిఆర్ వైఎస్ పై తీవ్ర స్థాయిలో విరుచుకుపడ్డారు. వైఎస్ రాజశేఖర్ రెడ్డి అధికారం చేతికి అందాక తెలంగాణ పాలిట యముడిలా..సైంధవుడిలా మారాడు. టీఆర్ఎస్ అండతో అధికారం చేజిక్కించుకుని ఆ తరువాత మిత్ర ద్రోహం చేశాడు. 2009 ఎన్నికల్లో తెలంగాణలో ఓటింగ్ ముగిశాక తెలంగాణకు వెళ్లాలంటే పాస్ పోర్ట్ కావాలి..వీసా కావాలి అని సీమాంధ్ర ప్రజలను రెచ్చగొట్టాడు’’ అని టీఆర్ఎస్ ఎమ్మెల్యే కేటీఆర్ అన్నారు. జగన్ పార్టీ నేతలు వైఎస్ దేవుడు అని వేదాలు వల్లిస్తున్నారని, వైఎస్ తెలంగాణకు అంతా చేసింది ద్రోహమేనని విమర్శించారు. రాజకీయ పార్టీలుగా వైఎస్ఆర్ కాంగ్రెస్ వారి కార్యక్రమాలు పూర్తి చేసుకోవాలని, అంతేకాని తెలంగాణ ప్రజలపై దండయాత్ర చేస్తే పరిస్థితులు వేరేగా ఉంటాయని హెచ్చరించారు.

టీఆర్ఎస్ ‘సమరభేరి’

    తెలంగాణ రాష్ట్ర సాధన ఉద్యమం ఉదృతం చేసేందుకు టీఆర్ఎస్ నల్లగొండ జిల్లా సూర్యాపేటలో ఆదివారం ‘సమరభేరి’ సభ నిర్వహిస్తోంది. దక్షిణ తెలంగాణ జిల్లాలలో ప్రజలను సమాయాత్తం చేసేందుకు ఈ సభను నిర్వహిస్తున్నారు. దానికితోడు టీడీపీ, వైఎస్సార్ కాంగ్రెస్ పార్టీల వైపు నాయకులు వెళ్లకుండా వాళ్లకు ప్రత్యామ్నాయం టీఆర్ఎస్ అని చాటి చెప్పేలా కేసీఆర్ ఈ సభను నిర్వహిస్తున్నారని పార్టీ వర్గాలు చెబుతున్నాయి. గత కొన్ని రోజులుగా పార్టీ శ్రేణులన్నీ సభ కోసం భారీ ప్రచారం చేశాయి. 10 జిల్లాల నుండి భారీ జన సమీకరణకు ఏర్పాట్లు చేశారు. 40 ఎకరాల్లో సభకు ఏర్పాట్లు చేశారు. దాదాపు 5 లక్షలమంది హాజరవుతారని అంచనా. ఈ సభకు ఆ పార్టీ అధినేత కల్వకుంట్ల చంద్రశేఖర్‌రావు, రాజకీయ జేఏసీ చైర్మన్‌ కోదండరాంల తో పాటు పార్టీకి చెందిన ముఖ్య నేతలు హాజరుకానున్నారు. ఆదివారం మధ్యాహ్నం 3.30నిషాలకు తెలంగాణ సమరభేరి సభ ప్రారంభం కానుంది. నేడు సమరభేరి సభ జరగనున్న నేపధ్యంలో సూర్యాపేట గులాబిమయమైంది. తెలంగాణ జిల్లాల నుంచి సభకు వచ్చే వాహనాలను పార్కింగ్‌ చేసేందుకు ప్రత్యేక ఏర్పాట్లు జరిగాయి. జిల్లా ఎస్పీ నవీన్‌గులాఠి ఆధ్వర్యంలో భారీ పోలీస్‌ బందోబస్తును ఏర్పాటు చేశారు.

షర్మిలకు తెలంగాణ సెగ, వైకాపా దాడి

    షర్మిల పాదయాత్రకు తెలంగాణ సెగ తగిలింది. మహబూబ్ నగర్ జిల్ల వడ్డేపల్లి మండలం శాంతినగర్‌లో షర్మిల పాదయాత్రను తెలంగాణ వాదులను అడ్డుకున్నారు. తెలంగాణపై స్పష్టమైన వైఖరి చెప్పాలని, జైతెలంగాణ అనాల్సిందేనని వారు డిమాండ్ చేశారు. వైఎస్సార్‌సీపీ పార్టీ కార్యకర్తలు తెలంగాణవాదులపై విరుచుకుపడి విపరీతంగా చితకబాదారు. దీంతో పోలీసులు రంగప్రవేశం చేసి తెలంగాణ వాదులపై లాఠీ ఝళిపించారు. పలువురు తెలంగాణ వాదులను పోలీసులు అరెస్టు చేశారు. తెలంగాణవాదులపై వైఎస్‌ఆర్‌సీపీ నేతల దాడికి నిరసనగా ఐజాలో టీఆర్‌ఎస్‌వీ కార్యకర్తలు ఐజా చౌరస్తాలో రాస్తారోకో చేపట్టారు.  భారీగా వాహనాల రాకపోకలు నిలిచిపోయాయి. తెలంగాణపై వైఎస్‌ఆర్‌సీపీ వైఖరి స్పష్టం చేయాలని డిమాండ్ చేస్తూ వడ్డేపల్లి మండలం శాంతినగర్‌లో తెలంగాణవాదులు షర్మిల పాదయాత్రను అడ్డుకుంటే వైఎస్‌ఆర్‌సీపీ నేతలు దాడి చేశారు. దీనికి నిరసనగా ఈ రాస్తారోకో జరుగుతుంది.

కేజ్రీవాల్ పార్టీ పేరు ఆమ్ ఆద్మీ

    సామాజిక కార్యకర్త, అవినీతి ఉద్యమకారుడు అరవింద కేజ్రీవాల్ తమ కొత్త పార్టీకి 'అమ్ ఆద్మీ' పేరును ప్రకటించారు. 350 మంది సభ్యులతో కార్యవర్గం ఏర్పాటు చేసినట్లు తెలిపారు. 25 మంది సభ్యులతో ఆమ్‌ఆద్మీ పార్టీకి కోర్‌కమిటీని ఏర్పాటు చేశారు. తమది ప్రజల పార్టీ అని కేజ్రీవాల్ పేర్కొన్నారు. స్వరాజ్‌ స్థాపనే లక్ష్యంగా సామాన్య ప్రజల అభ్యున్నతే పార్టీ లక్ష్యంగా ఈ సరికొత్త ఉద్యమపార్టీ ఉండబోతోందని కేజ్రీవాల్‌ ఇప్పటికే వెల్లడించారు. తన మద్దతుదారులతో అరవింద్‌ కేజ్రీవాల్‌ సమావేశమయ్యారు. కేజ్రీవాల్‌ పార్టీలో యోగీందర్‌ యాదవ్‌, ప్రశాంత్‌ భూషణ్‌, శాంతిభూషణ్‌ వంటి ప్రముఖులు కీలక పాత్ర పోషించనున్నారు.

బాలకృష్ణ కు మద్దతుగా ప్రచారం చేస్తా: ఎన్టీఆర్

    ‘వచ్చే ఎన్నికల్లో తెలుగుదేశం పార్టీ తరపున ప్రచారం చేస్తా..రాబోయే శాసనసభ ఎన్నికల్లో తెలుగుదేశం పార్టీ అఖండ మెజారిటీతో విజయం సాధిస్తుంది. బాబాయ్ బాలకృష్ణ ఎన్నికల్లో పోటీ చేస్తే ఆయనకు మద్దతుగా ఎన్నికల్లో ప్రచారం చేస్తా’’ అని ప్రముఖ సినీ నటుడు జూనియర్ ఎన్టీఆర్ అన్నారు. వచ్చే ఎన్నికల్లో ప్రచారం చేస్తారా ? అని ప్రశ్నించగా ఎందుకు చేయను చేస్తాను అని అన్నారు.  2014లో తెలుగుదేశం అధికారంలోకి వస్తుందని, వందకు 101 శాతం రావాలని అప్పుడే రాష్ట్రం అభివృద్ధిపథంలోకి వెళుతుందన్నారు. మన రాష్ట్రం ముందుకు పోవాలంటే తెలుగుదేశం పార్టీ అధికారంలోకి రావాలని, చంద్రబాబు ముఖ్యమంత్రి కావాల్సిందేనంటూ ఆయన ఆకాంక్షించారు.

ఎమ్మెల్యేగానే పోటిచేస్తా: బాలకృష్ణ

    ప్రముఖ నటుడు, న౦దమూరి బాలకృష్ణ వచ్చే ఎన్నికల్లో హిందూపురం నుంచి లోక్ సభకు పోటి చేస్తున్నారని కొన్ని రోజులుగా వార్తలోచ్చాయి. ఈ వార్తలను బాలకృష్ణ ఖండించారు. తాను ఎంపీగా పోటి చేయనని, ఎమ్మెల్యేగానే ఎన్నికల బరిలో పోటి చేస్తానని ప్రకటించారు. బసవతారకం క్యాన్సర్ ఆసుపత్రిలో అవగాహన కార్యక్రమానికి హాజరైన బాలకృష్ణ రాష్ట్ర రాజకీయాల గురించి మాట్లాడారు. టిడిపిని వీడి ఇతర పార్టీలోకి వెళ్ళే వారంతా అవకాశవదులేనని అన్నారు. కొంత మంది వాళ్ళ స్వార్ధం కోసమే ఇతర పార్టీల్లోకి వలస పోతున్నారని...వారితో టిడిపికి నష్టం లేదని పేర్కొన్నారు. ప్రజల బలం తమ పార్టీకి ఉందని చెప్పారు. ఎక్కుడి నుంచి పోటీ చేయాలని తాను అనుకుంటున్నానో తాను కూడా చెప్తానని, పార్టీలో చర్చించిన తర్వాత తాను పోటీ చేసే స్థానాన్ని పార్టీ నిర్ణయిస్తుందని ఆయన అన్నారు. వెళ్లేవారు వెళ్లినా ఫరవా లేదని, పార్టీని తాము బలోపేతం చేసుకుంటామని ఆయన అన్నారు. బాలకృష్ణ కు లోకసభ టికెట్ ఇచ్చేందుకు చంద్రబాబు నాయుడు కూడా సుముఖంగానే వున్నారని ఈ మధ్య టాక్ వచ్చింది. లోకసభ ఎన్నికల్లో కాక అసెంబ్లీ ఎన్నికల్లో పోటిచేసి ఎమ్మెల్యే గా గెలిచి రాష్ట్ర అసెంబ్లీలో కాలు మోపేందుకే బాలయ్య నిర్ణయించుకున్నట్లు కనిపిస్తోంది.

తెలంగాణ బిల్లు ఎందుకు పెట్టలేదు?: బాబు

      ఎవరి మద్ధతు లేకుండానే కేంద్రం అణుఒప్పందం బిల్లును ఆమోదించిన కేంద్ర ప్రభుత్వం తెలంగాణ ప్రత్యేక రాష్ట్ర ఏర్పాటుకోసం పార్లమెంట్ లో తెలంగాణ బిల్లు ఎందుకు పెట్టలేదని టీడీపీ అధ్యక్షుడు నారా చంద్రబాబు నాయుడు ప్రశ్నించారు. టీడీపీ హయాంలో ఎన్ని ఇబ్బందులు ఎదురైనా వ్యవసాయానికి 9 గంటలపాటు నిరంతర కరెంట్ ఇచ్చిన ఘనత టీడీపీదేనని అన్నారు. చంద్రబాబు ’వస్తున్నా…మీకోసం’ పాదయాత్ర మెదక్ జిల్లాలో కొనసాగుతోంది. ధరలు విపరీతంగా పెరిగిపోతున్నాయని, సామాన్య ప్రజలు ఏవీ కొనుక్కునే పరిస్థితి కనిపంచడంలేదని ఆవేదన వ్యక్తం చేశారు.   పిల్లా కాంగ్రెసుకు చెందిన పత్రికలో గీత కార్మికులను అవమానించేలా రాతలు వచ్చాయని, బెల్టు షాపులను రద్దు చేస్తానని తాను చెప్పానని, కానీ గీత కార్మికులను కూడా ఆ పత్రిక కలిపిందని చంద్రబాబు మండిపడ్డారు. కల్లుకు, బెల్టు షాపులకు సంబంధం లేదన్నారు. కల్లుని నిషేధిస్తానని తాను చెప్పలేదన్నారు. వైయస్ ఉన్నప్పుడు గీత కార్మికుల పొట్ట కొట్టాడన్నారు. అప్పుడు రెండు లక్షల కుటుంబాలు రోడ్డున పడ్డాయన్నారు. తెలుగుదేశం పార్టీ అధికారంలోకి రాగానే గీత కార్మికులకు లైసెన్సులు ఇస్తామన్నారు.

మమతా బెనర్జీ కి ఎదురు దెబ్బ

    పశ్చిమ బెంగాల్ ముఖ్యమంత్రి మమతా బెనర్జీ కి ఎదురు దెబ్బ తగిలింది. ప్రభుత్వాన్ని పడగోడతానని సవాల్ విసిరిన మమతా అవిశ్వాసానికి కావలసిన మద్దతును కూడగట్టలేకపోయారు. అవిశ్వాసానికి మద్దతు లేకపోవడంతో స్పీకర్ తీర్మానాన్నిఅనుమతించలేమని ప్రకటించారు. దాంతో తృణమూల్ సభ్యులు నిరసనకు దిగారు. ఎఫ్‌డీఐలను వ్యతిరేకిస్తూ విపక్షాలు ఆందోళనకు దిగాయి. సభలో గందరగోళం నెలకొంది. సభను మధ్యాహ్నం రెండు గంటల వరకు స్పీకర్ వాయిదా వేశారు. ప్రభుత్వం పార్లమెంట్ విలువలను దిగజార్చిందని ప్రతిపక్ష నాయకురాలు సుష్మా స్వరాజ్ ఆరోపించారు. 184 నిబంధన కింద ఎఫ్డీఐలపై చర్చ జరపాలని డిమాండ్ చేశారు.

పాదయాత్రలో 8వ సెంచరి పూర్తి చేసిన బాబు

    తెలుగుదేశం అధినేత చంద్రబాబు పాదయాత్రలో మరో మైలు రాయి దాటారు. పాదయాత్ర 800 కిలోమీటర్ల మైలురాయిని దాటింది. ఇప్పటివరకు మొత్తం ఐదు జిల్లాల్లోని 327 గ్రామాల గుండా చంద్రబాబు పాదయాత్ర కొనసాగింది. యాభై రోజులు పూర్తి చేసుకున్న బాబు మరుసటి రోజే దూరంలో ఎనిమిది సెంచరీలు పూర్తి చేశారు. మెదక్ జిల్లా ఆంధోల్ నియోజకవర్గంలోని మునిపల్లి గ్రామంలోకి అడుగుపెట్టడంతో యాత్ర ఎనిమిది వందల కిలోమీటర్లు పూర్తయింది. యాభై ఒకటి రోజుల్లో ఆయన మొత్తం 20 నియోజకవర్గాలు పర్యటించినట్లయింది. పాదయాత్ర తొలిరోజు నుంచి చంద్రబాబు రైతులు, కుల వృత్తుల వారితో ఎక్కువగా మమేకం అవుతున్నారు. మధ్య మధ్యలో పలు రకాల ప్రజలతో మాట్లాడుతున్నారు. అప్పుడపుడు స్కూళ్లు, కాలేజీలు సందర్శిస్తూ పిల్లలకు పాఠాలు చెబుతున్నారు. వారికి స్ఫూర్తి పాఠాలు బోధిస్తున్నారు.  

జైలు వాకిట్లో జనం డబ్బు చెట్టు....జగన్ పై

  స్వామి నిత్యానందకు వ్యంగంగా స్వాగతం పలుకుతూ రాష్ట్రంలో అందరిని ఆకర్షించిన గుంటూరుకు చెందిన ‘ది మూన్ సేన’ తాజాగా తన తాజా అస్త్రాలను వైఎస్ జగన్ మీద ఎక్కుపెట్టింది. ఈ సంఘటన గుంటూరులో కలకలం రేపింది. జైలు వాకిట్లో జనం డబ్బు..అంటూ ఓ ప్లెక్సీని ఏర్పాటు చేసిన మూన్ సేన దాని మీద ఇలా రాసింది. ఏముందక్కడ..బెల్లం ముక్క..పోతున్నారెందుకో ఈగల్లెక్క..ఐదేళ్లకు ఓటేశాం మనుషుల లెక్క…అధికారం ఇచ్చాం మనమే పక్కా..అమ్ముడుపోతున్నారు సంతలో పశువుల్లెక్క..ఎంఎల్ఏ అయితేనే అంతటి లక్కా ? అంటూ రాష్ట్రంలో పార్టీలు మారుతున్న ఎంఎల్ఏలపై విమర్శనాస్త్రాలు విసిరారు. జనం సొమ్ముతో ఆకర్ష్ జాతర..ప్రజాస్వామ్య విలువలకు పాతర అంటూ ఆవేదనను వ్యక్తం చేశారు. ఈ ప్లెక్సీ గుంటూరులో సంచలనం అయింది. వైఎస్సార్ కాంగ్రెస్ పార్టీ నేతలు దీని మీద మండి పడ్డారు. కార్యకర్తలు ఆందోళన చేపట్టారు. దీంతో పోలీసులు ఆ ప్లెక్సీని ఏర్పాటు చేశారు. ది మూన్ సేన ప్రతినిధి రాజేంద్ర పలు ఫోన్ల ద్వారా బెదిరింపులు చేశారు. నీ సంగతి చూస్తాం అని హెచ్చరించారు. దీని మీద పో లీసులు కేసు కూడా నమోదు చేశారు.