Home  
Politics

బడ్జెట్: కాకినాడలో హార్డ్‌వేర్ పార్క్!

  కేంద్ర బడ్జెట్‌లో కాకినాడకు గొప్ప అవకాశం ఇచ్చారు. లోక్ సభలో 2014-15 ఆర్థిక బడ్జెట్ ప్రవేశపెడుతూ కేంద్ర ఆర్థిక మంత్రి అరుణ్ జైట్లీ కాకినాడకు వరాలు ప్రకటించారు. కాకినాడ కేంద్రంగా హార్డ్ వేర్ పార్క్ ఏర్పాటు చేయనున్నామని కేంద్ర ఆర్థికమంత్రి అరుణ్ జైట్లీ తెలిపారు. కాకినాడ పోర్టుపై ప్రత్యేక దృష్టి సారిస్తామని హామీయిచ్చారు. అలాగే కృష్ణపట్నం ఓడరేవుకు అదనపు నిధులిస్తామన్నారు. విశాఖ- చెన్నై ఇండస్ట్రియల్ కారిడార్ లో 20 పారిశ్రామిక క్లస్టర్లు ఏర్పాటు చేస్తామన్నారు ప్రకటించారు.

విశాఖ-చెన్నై మధ్య పారిశ్రామిక కారిడార్.. అదుర్స్!

  కేంద్ర బడ్జెట్‌లో ఆంధ్రప్రదేశ్ మీద కురుస్తున్న వరాల జల్లు ఆంధ్రప్రదేశ్ ప్రజలు ఆనందంతో పులకరించేలా చేస్తోంది. ఈసారి కేంద్ర బడ్జెట్ అదుర్స్ అని అరవాలనిపించేలా అనిపిస్తోంది. మిగతా అంశాలు అలా ఓ పక్కన వుంచితే, ఆంధ్రప్రదేశ్‌లోని విశాఖ పట్టణం నుంచి తమిళనాడు రాజధాని చెన్నై మధ్య పారిశ్రామిక కారిడార్‌ను ఏర్పాటు చేయాలని కేంద్ర ఆర్థిక మంత్రి అరుణ్ జైట్లీ కేంద్ర బడ్జెట్‌లో ప్రతిపాదించారు. విశాఖ-చెన్నై మధ్య పారిశ్రామిక కారిడార్ అంటే, అది పూర్తిగా ఆంధ్రప్రదేశ్‌కే చెందినట్టు అవుతుంది. ఈ రెండు నగరాల మధ్య దాదాపు మొత్తం భూభాగం ఆంధ్రప్రదేశ్‌కే చెందినదే వుంది. మాట వరసకి విశాఖ - చెన్నై నగరాల మధ్య పారిశ్రామిక కారిడార్ ఏర్పాటు అని అన్నప్పటికీ, అది ఆంధ్రప్రదేశ్ రాష్ట్రంలోనే పారిశ్రామిక కారిడార్‌ని ఏర్పాటు చేస్తున్నట్టుగా భావించవచ్చు.

జైట్లీజీ... పర్లేదు కూర్చునే చదవండి!

  సాధారణంగా కేంద్ర బడ్జెట్ రైల్వే బడ్జెట్, రాష్ట్రాల బడ్జెట్.. బడ్జెట్ ఏదైనా ఆర్థిక మంత్రులు మంత్రులు నిలబడే తమ బడ్జెట్ ప్రసంగం మొత్తాన్ని చదువుతారు. అదే సంప్రదాయాన్ని అనుసరిస్తూ కేంద్ర ఆర్థిక మంత్రి అరుణ్ జైట్లీ నిల్చుని బడ్జెట్ ప్రసంగాన్ని చదవడం ప్రారంభించారు. అయితే, బడ్జెట్ ప్రసంగం ప్రారంభించిన 45 నిమిషాల తర్వాత ఆర్థిక మంత్రి ఐదు నిమిషాల పాటు విరామం తీసుకున్నారు. ఆ తర్వాత మంత్రి నిలుచునే బడ్జెట్ ప్రసంగం చదివే ప్రయత్నం చేస్తూ వుండగా స్పీకర్ సుమిత్రా మహాజన్ అరుణ్ జైట్లీని కూర్చునే బడ్జెట్ చదవండని చెప్పారు. దాంతో ఆయన కూర్చునే బడ్జెట్ ప్రసంగం చదవడం ప్రారంభించారు.

లైవ్ బడ్జెట్ 2014-15: ముఖ్యాంశాలు

  గురువారం లోక్‌సభలో సాధారణ బడ్జెట్‌ని కేంద్ర ఆర్థిక శాఖ మంత్రి అరుణ్ జైట్లీ ప్రవేశపెట్టారు. అందులోని ముఖ్యాంశాల వివరాలు:   # ఈ బడ్జెట్ మనం ఆశించే ఆర్థికస్థితికి మొదటి అడుగు మాత్రమే # పేదరిక నిర్మూలనపై ఎక్కువ దృష్టి # నిరుద్యోగంతో ఇంకా తల్లడిల్లాలని ఈ దేశం అనుకోవట్లేదు. # తయారీ, మౌలిక సదుపాయాల రంగాలను వృద్ధిబాట పట్టించాలి. # దేశంలో మార్పునకు ప్రజలు ఓటేశారు. # అవసరాలకు భిన్నంగా వ్యయం చేయలేను. # స్థూల జాతీయోత్పత్తి ఇంకా పెరగాలి. # వ్యయ నిర్వహణ సంస్థను కేంద్రం నియమిస్తుంది. # వస్తు సేవల పన్నుపై చర్చకు ముగింపు పలకాలి. # పెట్టుబడులకు స్నేహపూర్వక పన్నుల విధానం. # ఆర్థిక వ్యవస్థకు నల్లధనం ప్రమాదకారిగా మారింది. # రాబోయే 3, 4 ఏళ్లలో 7 నుంచి 8 శాతం వద్ధిని ఆశిస్తున్నాం. #దారిద్య్రరేఖ నుంచి బయటకు రావడానికి పేదలు ఎదురుచూస్తున్నారు. #నిర్ణయాల జాప్యం వల్ల అవకాశాలు కోల్పోయాం. # రానున్న కాలంలో ద్రవ్యోల్బణం తగ్గుతుందని ఆశిస్తున్నాం. # ఈ బడ్జెట్ సమగ్ర కార్యాచరణ ప్రణాళికతో రూపొందింది. # ఈ బడ్జెట్ నుంచి అతిగా ఆశించొద్దు. # పన్నుల వివాదాల వేగవంత పరిష్కారం దిశగా ట్రైబ్యునల్స్. # నైపుణ్యాల పెంపునకు స్కిల్ ఇండియా కార్యక్రమం. #  9 విమానాశ్రయాల్లో ఈ విసా సదుపాయం. # బ్యాంకింగ్ వ్యవస్థకు మరింత స్వేచ్ఛ, జవాబుదారీతనం పెంపు. # బీమా రంగంలో ఎఫ్‌డీఐలు 26 శాతం నుంచి 49 శాతంకు పెంపు. # రక్షణ రంగంలోనూ ఎఫ్‌డీఐలు 26 శాతం నుంచి 49 శాతంకు పెంపు. # ఆర్థిక వ్యవస్థ కోలుకోవడానికి నిలకడైన నిర్ణయాలే పునాది. # తయారి మౌలిక సదుపాయాల పునర్నిర్మాణానికి రూ. 2.4 లక్షల కోట్లు. # తక్కువ వ్యయంతో గహ నిర్మాణం, ఎఫ్‌డీఐలకు ప్రోత్సాహం. #బ్యాంకింగ్ వ్యవస్థకు మరింత స్వేచ్ఛ, జవాబుదారీతనం పెంపు. #గుజరాత్ ప్రభుత్వం తలపెట్టిన సర్థార్ పటేల్ ప్రతిమకు రూ. 200 కోట్లు. # నీటిపారుదల రంగంలో ప్రధానమంత్రి కృషీ సిచియాన్ యోజన. # 2019 నాటికి పరిశుభ్ర భారత్. # దేశంలోని అన్ని నివాసాలకు 24 గంటలూ విద్యుత్ ఇవ్వాలనే లక్ష్యం. # ఎస్సీల అభివృద్ధికి 50,548 కోట్లు కేటాయింపు. # ఏకీకత ప్రావిడంట్ ఫండ్ విధానం కోసం ఈపీఎఫ్‌ఓ ప్రారంభం. # గ్రామీణ విద్యుదీకరణకు రూ. 500 కోట్లు. # ఎంపిక చేసిన రంగాల్లోనే విదేశీ ప్రత్యక్ష పెట్టుబడులు. # దళిత, గిరిజన, సీనియర్ సిటిజన్ల కోసం ప్రత్యేక పథకాలు. # అంధులకు అర్థమయ్యేలా బ్రెయిలీ కరెన్సీ నోట్లు ప్రచురణ. # మహిళల భద్రత కోసం రూ. 150 కోట్లు. # త్వరలో ప్రతి రాష్ట్రంలో ఎయిమ్స్. # ఉపాధి హామి పథకాన్ని మరింత సమర్థవంతంగా తీర్చిదిద్దుతాం. # లింగవివక్షకు వ్యతిరేకంగా పాఠశాలల్లో బోధనలో మార్పులు. # ఆడపిల్లలను రక్షించండి, చదివించండి పథకానికి రూ. 500 కోట్లు

బడ్జెట్: ఏపీలో ఐఐటీ, ఏజీ వర్సిటీ

  కేంద్ర బడ్జెట్‌లో ఆంధ్రప్రదేశ్ రాష్ట్రానికి వరాల జల్లు కురుస్తోంది. ఆంధ్రప్రదేశ్‌లో ఎయిమ్స్ ఏర్పాటు చేస్తామని కేంద్ర ఆర్థిక మంత్రి అరుణ్ జైట్లీ బడ్జెట్ ప్రసంగంలో తెలిపారు. అలాగే ఆంధ్రప్రదేశ్‌ రాష్ట్రానికి ఐఐటీని కూడా మంజూరు చేస్తున్నట్టు ఆయన ప్రకటించారు. అదేవిధంగా వ్యవసాయం విస్తారంగా వుండే ఆంధ్ర ప్రదేశ్ రాష్ట్రంలో వ్యవసాయ విశ్వవిద్యాలయాన్ని కూడా ఏర్పాటు చేయబోతున్నట్టు ఆయన వెల్లడించారు. బడ్జెట్ ప్రసంగం ప్రారంభమైన కొద్దిసేపటికే ఆంధ్రప్రదేశ్ మీద వరాల జల్లు కురవడం ప్రారంభమైంది.

బడ్జెట్: ఆంధ్రప్రదేశ్‌లో ఎయిమ్స్ స్థాపన

  ఆంధ్రప్రదేశ్ రాష్ట్రానికి కేంద్ర ప్రభుత్వం ఎయిమ్స్ (ఆల్ ఇండియా మెడికల్ సైన్సెస్) ఆస్పత్రిని మంజూరు చేసింది. గురువారం లోక్‌సభలో సాధారణ బడ్జెట్‌ని ప్రవేశపెట్టిన కేంద్ర ఆర్థిక శాఖ మంత్రి అరుణ్ జైట్లీ ఈ విషయాన్ని ప్రకటించారు. ఆంధ్రప్రదేశ్‌లో ఎయిమ్స్ నిర్మాణానికి తొలి దశగా 500 కోట్ల రూపాయలను మంజూరు చేస్తున్నట్టు ఆయన ప్రకటించారు. దేశంలోని మిగతా రాష్ట్రాల్లో కూడా దశలవారీగా ఎయిమ్స్ లను ఏర్పాటు చేయనున్నట్టు ఆయన వెల్లడించారు.

బడ్జెట్‌ ప్రసంగ౦ ప్రారంభించిన అరుణ్‌జైట్లీ

నాలుగవ రోజు పార్లమెంట్ సమావేశాలు ప్రారంభమయ్యాయి. కేంద్ర ఆర్థికమంత్రి అరుణ్‌జైట్లీ పార్లమెంట్ లో బడ్జెట్‌ ప్రసంగాన్ని ప్రారంభించారు. అంతకముందు సాధారణ బడ్జెట్‌కు కేంద్ర మంత్రివర్గం ఆమోదం తెలిపింది. పార్లమెంట్‌లో జరిగిన మంత్రివర్గ సమావేశం ముగిసింది. సమావేశంలో పార్లమెంట్‌లో ప్రవేశపెట్టబోయే బడ్జెట్‌ను ఆర్థికమంత్రి అరుణ్‌జైట్లీ బడ్జెట్‌ను మంత్రివర్గ సభ్యులకు వివరించారు. భేటీలో బడ్జెట్‌కు మంత్రివర్గం ఆమోదం తెలిపింది. విభజన నేపథ్యంలో తెలంగాణ, ఆంధ్రప్రదేశ్ రాష్ట్రాలు బడ్జెట్ పైన కోటి ఆశలు పెట్టుకున్నాయి. మోడీ ప్రభుత్వం తొలి సాధారణ బడ్జెట్ కావడంతో అందరి కళ్లు దీని పైనే ఉన్నాయి.

లోక్ సభలో నిద్రపోయిన రాహుల్

బుధవారం లోక్ సభ సమావేశాలో ఓ సరదా సన్నివేశం చోటుచేసుకుంది. కాంగ్రెస్ ఉపాధ్యక్షుడు, భావి ప్రధానిగా కాంగ్రెస్ పార్టీ కీర్తించిన రాహుల్ గాంధీ లోక్ సభలో నిద్రపోతూ కెమెరాకి చిక్కారు. ఒక పక్క ధరల పెంపు విషయంలో సభలో వాడివేడిగా చర్చ జరుగుతుంటే రాహుల్ గాంధీ తనకు సంబంధమే లేదు అన్నట్లు కునుకేశారు! ఇప్పుడు సోషల్ మీడియాలో ఈ ఫోటో హాట్ టాపిక్ గా మారింది. రాహుల్ గాంధీ లోక్ సభలో నిద్రపోవడంపై సర్వత్రా విమర్శలు వెల్లువెత్తుతున్నాయి.'దేశంలో ధరల పెరుగుదల విషయంలో కాంగ్రెస్ పార్టీ నిద్రపోయింది. ఇప్పుడు ఆ అంశం మీద చర్చ జరుగుతుంటే ఆ పార్టీ యువరాజు నిద్రపోయారు. గత పదేళ్లుగా కాంగ్రెస్‌ అదే చేస్తోంది’ అని బిజెపి విమర్శించింది. కాంగ్రెస్ నేతలు మాత్రం రాహుల్ గాంధీని వెనకేసుకొచ్చారు. సభలో కళ్ళు మూసుకుని కూర్చున్న౦త మాత్రాన నిద్రపోయినట్లు కాదని, కొందరు చర్చను జాగ్రత్తగా వినేందుకు కళ్లు మూసుకుంటారని గుర్తు చేశారు.

చంద్రబాబుకి ఏపీ ఎన్జీవోలు సన్మానం

  మళ్ళీ పదేళ్ళ తరువాత ముఖ్యమంత్రిగా అధికారం చేప్పట్టిన చంద్రబాబు నాయుడు ప్రభుత్వోద్యోగుల పదవీ విరమణ వయసును 58సం.ల నుండి 60సం.లకు పెంచడం ద్వారా వారి ఆధరణ పొందగలిగారు. అందుకు ఉద్యోగులు కూడా చాలా సంతోషిస్తున్నారని వేరే చెప్పనవసరం లేదు. అందుకే ఏపీఎన్జీవోలు అందరూ కలిసి ముఖ్యమంత్రి చంద్రబాబు నాయుడికి ఈనెల 12న విజయవాడ లయోలా కాలేజీ ఆడిటోరియంలో ఘనంగా సన్మానం చేయాలనుకొంటున్నారు. అందుకు చంద్రబాబు కూడా అంగీకరించడంతో ఏపీఎన్జీవోలు ఈ కార్యక్రమాన్ని చాలా అట్టహాసంగా నిర్వహించేందుకు తగిన ఏర్పాట్లు చేసుకొంటున్నారు. రాష్ట్ర ఆర్ధిక వ్యవస్థను మళ్ళీ గాడిలో పెట్టి, రాష్ట్ర పునర్నిర్మాణం చేస్తూనే మరో పక్క రాష్ట్రానికి కొత్త రాజధాని నిర్మాణం చేయవలసిన ఈ కీలక తరుణంలో ప్రభుత్వోద్యోగుల పాత్ర చాలా కీలకం కానుంది. వారి సమర్ధత, అనుభవం ఇప్పుడు రాష్ట్రానికి చాలా అవసరం ఉంది.ఇటువంటి తరుణంలో ప్రభుత్వం, ఉద్యోగులమధ్య చక్కటి సమన్వయము, సహకారం చాలా అవసరం. అది పుష్కలంగా ఉందని ఈ కార్యక్రమం ద్వారా స్పష్టమవుతోంది.

అక్టోబరు 2 నుంచి 24 గంటల విద్యుత్

అక్టోబరు 2 నుండి ఆంధ్రప్రదేశ్ రాష్ట్రానికి 24 గంటల విద్యుత్ సరఫరా చేస్తామని ముఖ్యమంత్రి నారా చంద్రబాబు నాయుడు అన్నారు. రాజస్థాన్, ఢిల్లీ, ఆంధ్రప్రదేశ్ రాష్ట్రాలకు ఇరవై నాలుగు గంటలు విద్యుత్ సరఫరా చేసే పథకానికి కేంద్ర ప్రభుత్వం ఆమోదం తెలిపిందని చెప్పారు. గత ప్రభుత్వాల ముందు చూపు లేని కారణంగా విద్యుత్ విషయంలో ఇబ్బందులు ఏర్పడ్డాయని, ప్రస్తుతం ఆంధ్రప్రదేశ్ కు విద్యుత్ ను పశ్చిమ బెంగాల్ నుండి తీసుకుంటున్నామని చంద్రబాబు నాయుడు అన్నారు. కేంద్ర బడ్జెట్ లో ఏపీ రెవెన్యూ లోటును ఇవ్వాల్సి ఉందని, రుణాలు మాఫీ చేసేందుకు అవసరం అయిన వనరులను సమకూర్చుకునేందుకు మార్గాలు వెతుకుతున్నామని బాబు అన్నారు. అప్పు తేవడానికి ఆర్ధిక యాజమాన్యం చట్టం అడ్డు వస్తుందని అన్నారు.

రాహుల్ ని చూసి బిత్తరపోతున్నారు..!

  మూడు రోజుల క్రితం పార్లమెంట్ సమావేశాలు ప్రారంభమయ్యాయి. ఈ సందర్భంగా పార్లమెంటులోనూ, పార్లమెంటు ఆవరణలోనూ రాహుల్ గాంధీని చూస్తున్న జనం బిత్తరపోతున్నారట. ఎందుకంటే ఆయన ఈ మూడు రోజులుగా చాలా ఉత్సాహంగా కనిపిస్తూ వున్నారు. ఎప్పుడు చూసినా అందర్నీ నవ్వుతూ పలకరిస్తున్నారట. అధికారంలో ఉన్నప్పటికంటే చాలా ఉత్సాహంగా కనిపిస్తున్నారట. భారత ప్రజలు తమని, తమ పార్టీని ఇంటికి సాగనంపారన్న దిగులు ఏ కోశానా ఆయన ముఖంలో కనిపించడం లేదట. తన జీవితంతో ఎప్పుడూ ఎవరినీ పలకరించి ఎరుగని వాళ్ళని కూడా పేరు పెట్టి మరీ పిలిచి పలకరిస్తూ చాలా ఉల్లాసంగా మాట్లాడుతున్నారట. రాహుల్ గాంధీ ఈ యవ్వారమంతా చూసి కాంగ్రెస్ పార్టీ నాయకులు, ఆయన గారి మాతృమూర్తి సోనియాగాంధీ మురిసిపోతూ వుండొచ్చేమోగానీ, మిగతా రాజకీయ వర్గాలు మాత్రం రాహుల్ గాంధీ చాలా ఓవర్ యాక్షన్ చేస్తున్నారని అభిప్రాయపడుతున్నారు.

సోనియాకు ఐటీ నోటీసులు.. కక్ష సాదిస్తున్నారా..!

కాంగ్రెస్ అధ్యక్షురాలు సోనియాగాంధీ, ఆమె కుమారుడు రాహుల్ గాంధీకి ఆదాయపన్ను శాఖ నోటీసులు జారీ చేసింది. దీనిపై సోనియా గాంధీ స్పందిస్తూ మోడీ ప్రభుత్వం కక్ష సాధింపు చర్యలు మొదలుపెట్టిందని, అటువంటి వాటికి తాను భయపడేది లేదని, తమను ఎంతగా ఇబ్బందిపెడితే తాము అంత శక్తివంతంగా తయారయ్యి మళ్ళీ అధికారంలోకి వస్తామని అన్నారు. అయితే ఇంతకాలం మిత్ర పక్షాలను, ప్రతిపక్షాలను వేదించిన కాంగ్రెస్ అధ్యక్షురాలు సోనియాగాంధీకి ఇప్పుడు తనవంతు రాగానే దానిని కక్ష సాధింపు చర్యలని వర్ణించడం హాస్యాస్పదం. సోనియా గాంధీ అధ్వర్యంలో నడిచిన నేషనల్ హెరాల్డ్ అనే పత్రిక మూతపడిన తరువాత, దాని ఆస్తులను ఇతర సంస్థలకు అప్పుగా ఇవ్వడం వ్యాపారపరమయిన లావాదేవీగానే భావిస్తూ, ఆ లావాదేవీలపై వచ్చిన ఆదాయంపై పన్నుఎగవేసినందుకు ఆదాయపన్ను శాఖా నోటీసులు జారీ చేసింది.

సీబీఐ విచారణ పూర్తి..నరసింహన్ ఏం చేస్తారో?

రాజ్‌భవన్‌లో సీబీఐ విచారణ ముగిసింది. అగస్టా వెస్ట్‌ల్యాండ్ హెలికాఫ్టర్ల కుంభకోణం కేసులో ఆంధ్రప్రదేశ్, తెలంగాణ రాష్ట్రాల గవర్నర్ నరసింహన్‌ను సీబీఐ గంటన్నరపాటు ప్రశ్నించింది. ఈ ఉదయం రాజ్‌భవన్‌కు చేరుకున్న సీబీఐ అధికారులు గవర్నర్‌కు ప్రశ్నావళిని అందించి వాంగ్మూలం తీసుకున్నారు. సెక్షన్ 161(ఏ) ప్రకారం గవర్నర్ వాంగ్మూలాన్ని సీబీఐ నమోదు చేసుకుంది. అగస్టా వెస్ట్ ల్యాండ్ హెలికాఫ్టర్ల కొనుగోలు సమయంలో గవర్నర్ నరసింహన్ ఐబీ చీఫ్‌గా ఉన్నారు. అగస్టా హెలికాప్టర్ల కొనుగోలు అంశంతో ప్రమేయం వున్న నారాయణన్, వాంగ్ ఛూలను సీబీఐ ఇప్పటికే ప్రశ్నించడం, మొన్నటి వరకూ గవర్నర్ పదవులను వెలగబెట్టిన వారిద్దరూ తమ పదవుల నుంచి తప్పుకోవడం తెలిసిందే. ఇప్పుడు సీబీఐ నరసింహన్‌ని ప్రశ్నించింది. ఈ నేపథ్యంలో నరసింహన్ గవర్నర్‌ గిరీకి రాజీనామా చేయక తప్పదా అనే సందేహాలు కలుగుతున్నాయి.

ఆర్థిక సర్వేను ప్రవేశపెట్టిన అరుణ్‌జైట్లీ

  కేంద్ర ఆర్థిక మంత్రి అరుణ్‌జైట్లీ ఆర్థిక సర్వేను లోక్‌సభలో ప్రవేశపెట్టారు.2012-13, 2013-2014లో వృద్ధిరేటు 5 శాతంకు తక్కువగానే ఉందని ఆర్థిక సర్వే తెలిసింది. 2014-15లో జీడీపీ వృద్ధి 5.4నుంచి 5.9 శాతం పెరుగుతుందని అంచనా. ఏప్రిల్ నుంచి పారిశ్రామిక రంగంలో వృద్ది సాధించవచ్చని ఆర్థిక సర్వే తెలుపుతోంది. ద్రవ్యోల్భణం తగ్గినప్పటికి ఆమోదయోగ్యమైన స్థాయికి చేరాల్సి ఉందని ఆర్థిక సర్వే తెలుపుతోంది. దేశీయ, బాహ్య పరిణామాల వల్ల ఆర్థిక వృద్ధిరేటు మందగించింది. రేపు జైట్లీ ఆర్థిక బడ్జెట్‌ను ప్రవేశపెట్టనున్న సంగతి తెలిసిందే.

గవర్నర్ నరసింహన్‌ను విచారించిన సిబిఐ

ఆగస్టా హెలికాప్టర్ల కొనుగోలు కుంభకోణం కేసులో ఆంధ్రప్రదేశ్‌, తెలంగాణ రాష్ట్రాల ఉమ్మడి గవర్నర్‌ నరసింహన్‌ను సీబీఐ అధికారులు విచారిస్తున్నారు. బుధవారం రాజ్‌భవన్‌కు చేరుకున్న సీబీఐ అధికారులను ఆగస్టా కేసులో గవర్నర్‌ నుంచి వాంగ్మూలం నమోదు చేస్తున్నారు. ఇప్పటికే ఈ కేసులో పశ్చిమబెంగాల్ గవర్నర్ ఎమ్.కె.నారాయణన్ ను, అలాగే గోవా గవర్నర్ వాంచూని వాంగ్మూలాలను కూడా సిబిఐ నమోదు చేసింది. ఆ తరువాత వారు తమ పదవులకు రాజీనామా చేశారు. రాజకీయవర్గాల తాజా సమాచారం ప్రకారం అప్పట్లో గవర్నర్ లెజెన్స్ బ్యూరో ఛీప్ అధికారిగా వున్నారు కాబట్టి ప్రధాని వద్ద జరిగే కీలక సమావేశాలకు హాజరు కావాల్సి ఉంటుంది. ఆ హోదాలో ఆయన ఆ సమావేశానికి హాజరయ్యారు తప్ప ఆయనకు ఆ కేసుతో ఎలాంతో సంబంధం లేదు. కానీ ఆ సమావేశానికి హాజరయ్యారు కాబట్టే ఇప్పుడు సిబిఐ విచారణను ఎదుర్కోవాల్సి వచ్చిందని గవర్నర్ సన్నిహితులు అంటున్నారు. మరీ నరసింహన్ ఇప్పుడు మిగతా గవర్నర్ల బాటలో నడుస్తారా లేదా అన్న దానిపై ఆసక్తి నెలకొంది.

పోలవరం డిజైన్ మార్పు సాధ్యంకాదు

  పోలవరం ప్రాజెక్టు డిజైన్‌పై ఇష్టమొచ్చినట్లు మాట్లొద్దని టీడీపీ ఎంపీ సుజానా చౌదరి అన్నారు. పార్లమెంట్‌ వద్ద బుధవారం ఆయన మీడియాతో మాట్లాడారు. పోలవరం డిజైన్‌పై నాయకులు సూచనలు చేయడం తగదని, ఇంజినీర్లు చెప్పినట్లు వినాలన్నారు. సమస్యను సృష్టించేందుకే పోలవరంపై రగడ చేస్తున్నారని తెలిపారు. విభజన చట్టంలో పోలవరం అంశం సృష్టంగా ఉందని తెలిపారు. పోలవరం ఆర్డినెన్స్ పై టీఆర్ఎస్ కావాలనే గొడవ చేసి, ఏదోక సమస్య సృష్టించాలని అనుకుంటుందని ఆరోపించారు. ఉమ్మడి రాజధానిపై గవర్నర్ అధికారం, పోలవరం ముంపు ప్రాంతాల ఆర్డినెన్స్ ఎన్డీఏ ప్రభుత్వం నిర్ణయించినవి కావని అన్నారు. రైల్వే బడ్జెట్ అభివృద్ధి దిశగా వుందని, ఆంధ్ర ప్రదేశ్ కు వచ్చే బడ్జెట్ లో మరింత న్యాయ౦ జరుగుతుందని అన్నారు.

గవర్నర్ నరసింహన్ రాజీనామా చేస్తారా?

  ఆంధ్రప్రదేశ్, తెలంగాణ రాష్ట్రాల ఉమ్మడి గవర్నర్ నరసింహన్ త్వరలో తన పదవికి రాజీనామా చేయనున్నారా? ఆగస్టా వెస్ట్ ల్యాండ్ కుంభకోణం కేసులో ఇప్పటికే సాక్షులుగా సిబిఐ విచారణను ఎదుకొన్న ఇద్దరూ గవర్నర్లు ఎంకే నారాయణ్, బివి వంచూ తమ పదవులకు రాజీనామా చేశారు. అదే బాటలో గవర్నర్ నరసింహన్ కూడా తన పదవి నుంచీ వైదొలగక తప్పదా? ఆగస్టా కుంభకోణం కేసులో గవర్నర్ నరసింహన్ ను ఈరోజు సిబిఐ అధికారులు ప్రశ్నించనున్నారు. హెలికాప్టర్ కొనుగొళ్ళ కోసం సాంకేతిక పరమైన నిర్ణయాలు తీసుకున్న సమయంలో జాతీయ భద్రతా సలహాదారు ఎంకే నారాయణన్‌, ఎస్‌పీజీ చీఫ్‌ బీవీ వాంఛూ, ఇంటెలిజెన్స్‌ బ్యూరో చీఫ్‌గా ఉన్న నరసింహన్‌ వున్నారు. ఆ తర్వాత ఈ డీల్‌ ఆంగ్లో-ఇటాలియన్‌కు చెందిన అగస్టావెస్ట్‌ల్యాండ్‌కు ఓకే అయ్యింది. ఈ కొనుగొళ్ళలో 360 కోట్లు ముడుపులు చేతులు మారినట్లు ఆరోపణలు వున్నాయి.

బీజేపీ జాతీయ అధ్యక్షునిగా అమిత్ షా

    బీజేపీ జాతీయ అధ్యక్షుడు రాజ్ నాథ్ సింగ్ హోంమంత్రిగా మోడీ ప్రభుత్వంలో బాధ్యతలు చెప్పట్టడంతో, ఆ పదవికి మరొకరిని ఎంపిక చేయవలసిన అవసరం ఏర్పడింది. ప్రధాని నరేంద్ర మోడీకి అత్యంత సన్నిహితుడైన బీజేపీ సీనియర్ నేత అమిత్ షా పేరు బీజేపీ జాతీయ అధ్యక్షునిగా దాదాపు ఖరారయింది. ఈరోజు డిల్లీలో జరిగే పార్టీ సమావేశంలో లాంఛనంగా ఆయనను ఎన్నుకొని పార్టీ అధ్యక్షునిగా ప్రకటించనున్నారు. ఇటీవల జరిగిన సార్వత్రిక ఎన్నికలలో బీజేపీ ఘన విజయానికి ఆయన కూడా ముఖ్య కారకుడు.   దేశ రాజకీయాలను శాసించే ఉత్తరప్రదేశ్ రాష్ట్రంలో పార్టీని బలోపేతం కానిదే పార్టీ విజయం సాధించడం కష్టమని గ్రహించిన ఆయన, ఎన్నికలకు కొన్ని నెలల ముందుగా ఉత్తరప్రదేశ్ బాధ్యతలు స్వీకరించి అక్కడ పార్టీని బలోపేతం చేయడంతో ఊహించినట్లుగానే బీజేపీ ఘన విజయం సాధించింది. ఉత్తరప్రదేశ్ ప్రజలను ఆకట్టుకొనే ప్రయత్నంలోనే ఆయన నరేంద్ర మోడీని వారణాసి నుండి పోటీ చేయాలని తీవ్ర ఒత్తిడి చేసి చివరికి అనుకొన్నది సాధించారు. అమిత్ షా పదునయిన వ్యూహాల ముందు ఉత్తరప్రదేశ్ రాష్ట్రంలో అధికారంలో ఉన్న సమాజ్ వాదీ పార్టీ, ప్రధాన ప్రతిపక్ష పార్టీ బహు జన్ సమాజ్ వాదీ పార్టీలు నిలవలేకపోవడంతో బీజేపీ అఖండ విజయం సాధించింది. ఆ ప్రభావం ఇరుగు పొరుగు రాష్ట్రాలయిన బీహార్, మధ్యప్రదేశ్, డిల్లీపై కూడా పడటంతో అక్కడ కూడా బీజేపీ ఘన విజయం సాధించింది.   ప్రధాని నరేంద్ర మోడీ పరిపాలనపై పట్టు సాధించి, దేశాన్ని అన్ని రంగాలలలో అభివృద్ధి చేసేందుకు దృష్టి సారిస్తున సమయంలో, సమర్ధుడు, నమ్మకస్తుడు తనకు అత్యంత సన్నిహితుడు అయిన అమిత్ షా చేతికి పార్టీ పగ్గాలు అప్పగించినట్లయితే, తన ప్రభుత్వం అమలు చేస్తున్న పలు అభివృద్ధి, సంక్షేమ పధకాల గురించి దేశ వ్యాప్తంగా విస్తృతంగా ప్రచారం చేస్తూ పార్టీని అన్ని వర్గాలు, మతాల ప్రజలకు సన్నిహితం చేయడం ద్వారా దేశవ్యాప్తంగా పార్టీని బలోపేతం చేస్తారని ఆశిస్తునందున అమిత్ షాను ఆ పదవికి ఎంచుకొన్నారు. 

రైల్వే బడ్జెట్ ముఖ్యాంశాలు

  ఈసారి రైల్వే బడ్జెటులో చాలా ఆసక్తికరమయిన అంశాలున్నాయి. గంటకు 160-200కి.మీ వేగంతో నడిచే హై స్పీడ్ రైళ్ళు, గంటకు 300-350కి.మీ వేగంతో నడిచే బుల్లెట్ రైళ్ళు ప్రవేశపెట్టబోతున్నారు. రైల్వేల చరిత్రలో మొట్ట మొదటిసారిగా విదేశీ పెట్టుబడులను ఆహ్వానించబోతున్నారు. లక్షల కోట్లు ఖర్చయ్యే బుల్లెట్ రైళ్ళ కావాలనుకొంటే ఇంతకంటే మంచి మార్గం లేదు. కానీ భద్రతా కారణాల చేత రైల్వేల నిర్వహణ (ఆపరేషన్స్)లో మాత్రం ఈ పెట్టుబడులను అనుమతించబోమని రైల్వే మంత్రి తెలిపారు.   ప్రస్తుతం నిమిషానికి కొన్ని వందలు ఆన్ లైన్ టికెట్స్ మాత్రమే ఇవ్వగలుగుతున్నారు. దానిని ఏకంగా నిమిషానికి 7200 టికెట్స్ ఇచ్చే విధంగా, ఒకేసారి లక్షమంది లాగిన్ అయినా తట్టుకొనే విధంగా ఆన్ లైన్ విధానాన్ని ఆదునీకరిస్తామని రైల్వే మంత్రి ప్రకటించారు. అంతే కాక ఆన్ లయిన్ ద్వారా ప్లాట్ ఫారం టికెట్లు, స్టేషన్లలో ఉండే రిటైరింగ్ రూములు బుకింగ్ చేసుకోవచ్చని తెలిపారు. ఇంతవరకు ఆన్ లైన్ ద్వారా ఒకసారి కేవలం 5-6 టికెట్లు మాత్రమే బుక్ చేసుకొనే అవకాశం ఉండేది. కానీ తీర్ధయాత్రలు లేదా శుభ కార్యాలకు వెళ్ళేవారు ఏకంగా ఒక బోగీని లేదా ఏకంగా ఒక రైలుని కూడా బుక్ చేసుకొనే అవకాశం కల్పించబోతున్నారు. ఇక సరుకు రవాణా చేసుకొనే సంస్థలు కూడా ఆన్ లైన్ ద్వారా రైల్వే వేగన్లను బుక్ చేసుకొనే సదుపాయం కల్పించాబోతున్నారు. పోస్ట్ ఆఫీసులలో రైల్వే టికెట్స్ విక్రయిస్తామని తెలిపారు.   అన్ని ఏ కేటగిరీ రైళ్ళలో ఉచిత ‘వై ఫై’ సౌకర్యం, బయో టాయిలట్లు, స్టేషన్ల కప్పుల మీద సోలార్ విద్యుత్ ఫలకాలు ఏర్పాటు ద్వారా స్టేషన్లకు కావలసిన విద్యుత్ ఉత్పత్తి చేసుకోవడం వంటి ప్రతిపాదనలు ఉన్నాయి. రైళ్ళలో ప్రయాణిస్తున్న ఉద్యోగులు, వ్యాపారస్తులు , పారిశ్రామిక వేత్తలు తదితరులు ప్రయాణంలోనే తమ ఉద్యోగ, వ్యాపార వ్యవహారాలు చక్కబెట్టుకోవడానికి రైళ్ళలోనే వర్క్ స్టేషన్లను ఏర్పాటు చేయబోతున్నట్లు ప్రకటించారు. అంటే రైళ్ళలోనే ఇంటర్నెట్ సౌకర్యం కలిగిన కంప్యూటర్లు, ఫోన్లు, వీడియో కాన్ఫరెన్స్ వంటి ఏర్పాట్లు ఉండవచ్చను.   ఇక రైల్వే ప్రయాణికులు ఎదుర్కొనే అతిపెద్ద సమస్య శుభ్రమయిన, రుచికరమయిన ఆహారం, మంచి నీళ్ళు, టాయిలట్లు, భద్రత. వీటన్నిటి కోసం వేర్వేరు ఏర్పాట్లు ప్రకటించారు. స్టేషన్లలో ఫుడ్ కోర్టులు ఏర్పాటు, కార్పోరేట్ సంస్థలను ప్రోత్సహించడం ద్వారా స్టేషన్లలో స్వచ్చమయిన నీళ్ళు ఏర్పాటు, వృద్ధులు, వికలాంగులను ప్లాట్ ఫారంలపైకి చేర్చేందుకు బ్యాటరీతో నడిచే వాహనాల ఏర్పాటు, అవుట్ సోర్సింగ్ ద్వారా పారిశుద్య పనులు నిర్వహించడం, వీటన్నిటిపై పర్యవేక్షణకు ప్రత్యెక వ్యవస్థల ఏర్పాటు చేయబోతున్నట్లు రైల్వే మంత్రి సదానంద గౌడ ప్రకటించారు.   అయితే గుర్తుంచుకోవలసిన విషయం ఏమిటంటే సౌకర్యాలు పెరుగుతున్న కొద్దీ, ప్రయాణం, రవాణా కూడా మరింత భారం అయ్యే అవకాశం ఉంది. జనరల్ బోగీకి- స్లీపర్-ఏసీ-క్లాసుల ధరలలో ఏవిధంగా తీవ్ర వ్యత్యాసం ఉంటుందో అదేవిధంగా ఒక సాధారణ్ ఎక్స్ ప్రెస్ రైలు ప్రయాణానికి-హై స్పీడ్-బుల్లెట్ రైలు ప్రయాణానికి కూడా టికెట్ ధరలలో తీవ్ర వ్యత్యాసం ఉంటుంది.