చంద్రబాబు రూటే సపరేటు

సెక్రటేరియట్‌లో ఏపీ సీఎం చంద్రబాబు నాయుడు ప్రవేశించే రూటు మారబోతోంది. సచివాలయంలో ప్రస్తుత వున్న రూటు బాబు బయటకు వెళ్లే దారి కానుంది. ఉద్యోగులు కాలినడకన వస్తున్న పాత గేటుని సీఎం కాన్వాయ్‌ ప్రధాన మార్గం కానుంది. దానికి అనుగుణంగా మార్పులు చేసేందుకు అధికారులు సిద్ధమవుతున్నారు. భద్రతా పరంగా ఎదురయ్యే ఇబ్బందులను ఎదుర్కోవడానికి బిర్లా మందిర్ దగ్గర వాచ్ టవర్‌ను ఏర్పాటు చేసే యోచనలో అధికారులు వున్నారు. ఎల్‌ బ్లాకు సీఎం ఛాంబర్ సమీపంలో ఎత్తైన భవనాలు ఉండడంతో భద్రతా పరంగా బిర్లా మందిర్ దగ్గర వాచ్ టవర్‌ను ఏర్పాటు చేస్తే మంచిదని అధికారులు భావిస్తున్నారు.

బాబోయ్ స్వైన్ ఫ్లూ... ముందు జాగ్రత్తలివే!

  హైదరాబాద్‌ ప్రజల్ని అప్పుడప్పుడూ వణికించే స్వైన్ ఫ్లూ మహమ్మారి మళ్ళీ నగరంలోకి ఎంటరైంది. ఈ ప్రమాదకర వ్యాధి కారణంగా 2012లో ఒక్క హైదరాబాద్ నగరంలోనే 36 మంది చనిపోయారు. 2013 సంవత్సరంలో తొమ్మదిమందిని ఈ వ్యాధి పొట్టనపెట్టుకుంది. 2014లో ఇప్పటికే ముగ్గురు చనిపోయారు. తాజాగా గత వారం రోజులుగా స్వైన్ ఫ్లూ వ్యాధి బారిన పడి ఆస్పత్రులలో చేరిన వారి సంఖ్య పదుల్లో వుంది. వర్షాలు మొదలవుతున్నాయి కాబట్టి ఈ సీజన్‌లో ప్రజలు అప్రమత్తంగా వుండాల్సిన అవసరం వుందని వైద్యులు సూచిస్తున్నారు. జ్వర లక్షణాలు కనిపిస్తే అవి స్వైన్ ఫ్లూ అవునా, కాదా అనే విషయాన్ని వైద్యులను సంప్రదించి నిర్ధారించుకోవాలని చెబుతున్నారు. ముందు జాగ్రత్తలు తీసుకుంటే స్వైన్ ఫ్లూ గతంలో మాదిరిగా ప్రాణాంతకం అయ్యే అవకాశం లేవని వైద్యులు అంటున్నారు. ఇంటి పరిసరాల్లో పందులు సంచరించేవారు మరింత జాగ్రత్తగా వుండాలని చెబుతున్నారు.

షరపోవా ఇష్యూ: సచిన్ సంస్కారానికి హేట్సాఫ్!

  క్రికెట్ దిగ్గజం సచిన్ టెండూల్కర్ ఆకాశమంత ఎత్తు ఎదిగినా ఆయన సంస్కారం ఎంతమాత్రం తగ్గలేదు. ఉన్నతమైన ఆ సంస్కారం మరోసారి మారియా షరపోవా విషయంలో కూడా బయటపడింది. టెన్నిస్ స్టార్ మారియా షరపోవా సచిన్ గురించి ప్రస్తావన వచ్చినప్పుడు సచిన్ అంటే ఎవరని ప్రశ్నించడం, సచిన్ అంటే ఎవరో నీకు తెలియదా అని ఆమె మీద భారత క్రికెట్ అభిమానులు, సచిన్ అభిమానులు ఆగ్రహం వ్యక్తం చేసిన విషయం తెలిసిందే. ఈ వివాదం గురించి సచిన్ ఇంతకాలం స్పందించలేదు. తాజాగా ఈ అంశం మీద సచిన్ తన ప్రతిస్పందన తెలిపారు. రష్యన్ క్రీడాకారిణి షరపోవాకు క్రికెట్ గురించి తెలిసి వుండకపోవచ్చునని, అంతమాత్రానికి ఆమె విషయంలో పరుషంగా వుండటం తగదని అన్నారు. మనం ఎవరినీ మన వ్యాఖ్యలతో బాధపెట్టకూడదని సచిన్ హితవు పలికారు. షరపోవాని మాటలతో గాయపరచడం మంచిది కాదని సచిన్ అనడం ఆయన సంస్కారానికి నిదర్శనం.

రంభకి ఏ పాపమూ తెలియదు: సోదరుడు

  సినీ నటి రంభ మీద ఆమె మరదలు పల్లవి బంజారా హిల్స్ పోలీస్ స్టేషన్‌లో గృహ హింస కేసు నమోదు చేసిన విషయం తెలిసిందే. ఈ అంశం మీద రంభ సోదరుడు శ్రీనివాస్ స్పందించారు. తనతో వ్యక్తిగత విభేదాలు వున్న తన భార్య పల్లవి పబ్లిసిటీ కోసమే రంభ పేరును ఈ కేసులో ఇరికించిందని, పాపం రంభకు ఏ పాపమూ తెలియదని వివరణ ఇచ్చారు. రంభపై ఆరోపణలు చేసిన తన భార్యపై చర్యలు తీసుకుంటానని హెచ్చరించారు.. తన భార్య కుటుంబ సభ్యులు వెనుక నుంచి తన భార్య చేత ఈ డ్రామా ఆడిస్తున్నారని శ్రీనివాస్ అన్నారు. తన భర్త శ్రీనివాస్‌తో పాటు ఆయన సోదరి అయిన నటి రంభ, అత్త ఉషారాణి, మామ వెంకటేశ్వరరావు తనను అదనపు కట్నం కోసం వేధిస్తున్నారంటూ పల్లవి పోలీసులకు ఫిర్యాదు చేశారు.

బీజేపీ ఎంపీలకు మోడీ రూల్స్!!

  బీజేపీ ఎంపీలకు ప్రధానమంత్రి నరేంద్రమోడీ కొన్ని నియమ నిబంధనలు పెట్టారు. పార్లమెంట్ సమావేశాలు జరుగుతున్నప్పుడు బీజేపీ పార్లమెంట్ సభ్యులు ఎట్టి పరిస్థితుల్లోనూ విదేశాలకు వెళ్లకూడదని నరేంద్రమోడీ ఆంక్షలు విధించారు. పార్టీ కీలక సమావేశాలకు భారతీయ జనతాపార్టీ ఎంపీలు తప్పనిసరిగా హాజరైతీరాలని పేర్కొన్నారు. అలాగే బీజేపీ అధికార ప్రతినిధులు ప్రతి మంగళవారం తప్పనిసరిగా ఆర్థికమంత్రి అరుణ్ జైట్లీ‌తో సమావేశం అవ్వాలని, పార్టీని సంప్రదించకుండా బీజేపీ ఎంపీలు పార్లమెంట్‌లో ఏ రకమైన తీర్మానాలనూ ప్రవేశ పెట్టరాదని సూచించారు.

వీడి దుంపతెగ.. రోడ్డుమీదే తాళి కట్టేశాడు!

  తమిళనాడులోని తంజావూరులో ఓ ప్రియుడు తన ప్రియురాలి కుటుంబ సభ్యులు ఆమెని తన నుంచి దూరం చేసేస్తారేమోనని భయపడిపోయి అర్జెంటుగా రోడ్డుమీదే తాళి కట్టేశాడు. ఊటీకి చెందిన ఆనంద్, దివ్య అనే ప్రేమజంట చాలాకాలం నుంచి ప్రేమలో మునిగి వున్నారు. వీరి వ్యవహారం తెలిసిన దివ్య తల్లిదండ్రులు ప్రేమ, దోమ అన్నారంటే కాళ్ళు తీసేస్తాం అని ఇద్దర్నీ హెచ్చరించారు. అయినా దివ్య ప్రేమ మైకం వదలకపోవడంతో ఆమెని తంజావూరులోని తమ బంధువుల ఇంట్లో వుంచారు. దివ్యని వెతుక్కుంటూ ఆనంద్ కూడా తంజావూరుకి వెళ్ళాడు. వెళ్ళేవాడు మామూలుగా వెళ్ళకుండా జేబులో ఓ తాళిబొట్టు కూడా పెట్టుకుని వెళ్ళాడు. దివ్య కోసం తంజావూరు రోడ్లు పట్టుకుని తిరిగిన ఆనంద్‌కి ఓ చోట రోడ్డుమీద దివ్య కనిపించింది. అంతే మనోడు ఎంతమాత్రం ఆలస్యం చేయకుండా దివ్య దగ్గరకి వెళ్ళిపోయి ఆమె మెళ్ళో తాళి కట్టేశాడు. ఈ విషయం పోలీసుల వరకూ వెళ్ళింది. ఇద్దరూ మేజర్లు కావడంతో నువ్వు కట్టిన తాళి చెల్లదంటూ పోలీసులు ఇద్దరికీ కౌన్సిలింగ్ ఇచ్చి పంపేశారు.

భద్రాచలంకి భారీగా వరద నీరు

ఎగువ ప్రాంతాల్లో భారీ వర్షాల కారణంగా భారీగా వరద నీరు వచ్చి చేరడంతో భద్రాచలం దగ్గర నీటిమట్టం 27అడుగులకు చేరింది. చీకపల్లి వాగు పొంగిపొర్లుతోంది. 25 గ్రామాలకు నిలిచిన రాకపోకలు. తాలిపేడు ప్రాజెక్టులో రెండు గేట్లను ఎత్తేశారు. 30 వేల క్యూసెక్కుల వరద నీరు గోదారిలోకి వదిలారు. గత కొన్ని సంత్సరాలుగా ఈ చీకుపల్లి వాగు సమస్య ఉంది. వరద వచ్చినప్పుడల్లా 25 నుండి 30 గ్రామాలకు రాకపోకలు నిలిచిపోతాయి.

ప్రీతీజింటా లేఖ.. బాలీవుడ్‌లో సంచలనం!

  తన మాజీ ప్రియుడు నెస్ వాడియా తనను మానసికంగా, శారీరకంగా హింసించాడంటూ ఫిర్యాదు చేస్తూ ప్రీతీజింటా మంగళవారం ముంబై పోలీసు కమిషనర్‌కి రాసిన దేశవ్యాప్తంగా సంచలనం సృష్టించింది. ముఖ్యంగా ప్రీతీజింటా బాలీవుడ్ సహచరులు ఈ లేఖలోని విషయాలను తెలుసుకుని బిత్తరపోయారు. వారంతా ఈ అంశంలో షాకింగ్ ఎక్స్.పీరియన్స్ అనుభవిస్తున్నారని చెప్పవచ్చు. తమ మధ్య నవ్వుతూ, తుళ్ళుతూ వుంటూ, క్రికెట్ టీమ్ ఓనర్‌గా కూడా యాక్టివ్‌గా వుంటే ప్రీతీజింటా జీవితంలో ఇన్ని చీకటి కోణాలు ఉన్నాయా అని ఆశ్చర్యపోతున్నారు. నెస్ వాడియాతో ప్రీతీజింటాకి వున్న గొడవలు టీ కప్పులో తుఫానులాగా సమసిపోతాయని వారంతా భావించారు. అయితే మేటర్ చాలా సీరియస్‌గా వుందన్న విషయం ప్రీతీజింటా తాజా లేఖతో బయటపడటంతో వారందరూ ప్రీతీ జింటా మీద సానుభూతి వ్యక్తం చేస్తున్నారు. ఈ సమస్య నుంచి ప్రీతీ జింటా సాధ్యమైనంత త్వరగా బయటపడాలని బాలీవుడ్ కోరుకుంటోంది.

జగన్ చాప కింద నీరు...!!

రాజధాని కృష్ణ - గుంటూరు మధ్య బెస్ట్.. ఎందుకంటే..!

  ఆంధ్రప్రదేశ్ రాష్ట్ర కొత్త రాజధానికి కృష్ణా- గుంటూరు జిల్లాల మధ్య ప్రాంతం అన్నివిధాలా అనుకూలంగా ఉంటుందని ఆంధ్రప్రదేశ్ రాష్ట్రం భావిస్తున్నట్టు తెలుస్తోంది.ఈ విషయాన్ని రాజధాని మీద నియమించిన శివరామకృష్ణన్ కమిటీకి తెలిపారు. రాజధాని కోసం రాష్ట్ర ప్రభుత్వం ఏర్పాటు చేసిన సలహా కమిటీ ఛైర్మన్, ఏపీ పురపాలక శాఖ మంత్రి డాక్టర్ పి.నారాయణ రాజధానికి ఈ ప్రాంతం ఎందుకు బెస్టో వివరించారు. కృష్ణా - గుంటూరు మధ్యలో రాజధాని ఏర్పాటు చేస్తే ఉత్తర కోస్తా, రాయలసీమ జిల్లాలకు సమాన దూరంలో ఉండడంతోపాటు నీటి వసతి, విమానా శ్రయాలు, రైలు, రోడ్డు సదుపాయాలు అందుబాటులో ఉంటాయని వారికి వివరించామన్నారు. రాజధాని ఎక్కడ ఏర్పాటు చేయాలన్న దానిపై వచ్చే నెలాఖరున శివరామకృష్ణన్ కమిటీ నివేదిక ఇవ్వనుంది. ఈ నేపథ్యంలో రాజధానికి ఏర్పాటుకు సంబంధించిన అంశాలను పరిగణనలోకి తీసుకోవాలని కమిటీని మరోమారు కోరినట్టు ఆయన తెలిపారు.

కోరిక తీర్చలేదని లవర్నే చంపేశాడు!

  ఒక శాడిస్టు ప్రియుడు ప్రియురాలు తన కోరిక తీర్చడానికి నిరాకరించడంతో ఆమెని దారుణంగా హత్య చేశాడు. ఈ ఘోర సంఘటన తమిళనాడులోని తిరువళ్ళూరు జిల్లాలో జరిగింది. చాముండేశ్వరి (19) అనే అమ్మాయి రాజ్‌కుమార్ అనే యువకుడిని గత కొంతకాలంగా ప్రేమిస్తోంది. ఈమధ్యకాలంలో చాముండేశ్వరి మరో కుర్రాడి ప్రేమలో పడటంతో రాజ్‌కుమార్‌ని దూరం పెడుతోంది. అయితే ఈ నేపథ్యంలో ఆమెను ఒక్కసారి ఏకాంతంగా కలవాలని కోరిన రాజ్‌కుమార్ ఆమె వచ్చినప్పుడు తన కోరిక తీర్చమని ఆమెని బలవంతం చేశాడు. అయితే ఆమె దానికి నిరాకరించడంతో రాజ్‌కుమార్ ఆమె తలమీద బండరాయితో మోది దారుణంగా హత్య చేశాడు. రాజ్‌కుమార్ ప్రస్తుతం పోలీసుల అదుపులో వున్నాడు.

తెలంగాణలో మావోయిస్టులు..!

  తెలంగాణ కరీంనగర్ జిల్లా పెద్దపల్లిలో మావోయిస్టులు ఉన్నట్లు పోలీసులకు సమాచారం అందింది.దీంతో పోలీసులు పెద్దపల్లిలోని ప్రధాన కూడళ్లలో విస్త్రతంగా సోదాలు నిర్వహిస్తున్నారు. రహదారిపై వచ్చిపోయే ప్రతి వాహనాన్ని పోలీసులు క్షుణ్ణంగా తనిఖీచేసిన తర్వాతనే పంపిస్తున్నారు. దీంతో ప్రయాణికులు తీవ్ర ఇబ్బందిని ఎదుర్కొంటున్నారు.   బీహార్ లో మరోసారి మావోయిస్టులు దుశ్చర్యకు పాల్పడ్డారు. గయ వద్ద రైల్వే ట్రాక్ ను పేల్చివేశారు. దీంతో ఢిల్లీ-హౌరా మధ్య రైళ్ల రాకపోకలకు తీవ్ర అంతరాయం ఏర్పడింది. రాత్రి నుంచి 15 రైళ్లు నిలిచిపోయాయి. యముక్ వద్ద నీలాంబర్ ఎక్స్ ప్రెస్ నిలిచిపోయింది. గయా ఘటనపై రైల్వే శాఖ మంత్రి సదానంద గౌడ విచారణకు ఆదేశించారు. 

దాశరథి స్మారక పురస్కారం!

  ప్రముఖ కవి, సాహితీవేత్త దివంగత దాశరథి కృష్ణమాచార్య పేరిట స్మారక పురస్కారాన్ని ఏర్పాటు చేయనున్నట్టు తెలంగాణ ముఖ్యమంత్రి కేసీఆర్ ప్రకటించారు. ఉత్తమ ప్రతిభ కనబరిచిన కవికి ప్రతి సంవత్సరం దాశరథి పురస్కారం పేరిట లక్షా నూట పదహారు రూపాయలు అందజేసి సన్మానిస్తామని కేసీఆర్ తెలిపారు. దాశరథి 89వ జయంతిని తెలంగాణ ప్రభుత్వం అధికారిక కార్యక్రమంగా రవీంద్రభారతిలో నిర్వహించింది. ఈ కార్యక్రమానికి తెలంగాణ సీఎం కేసీఆర్ ముఖ్య అతిథిగా హాజరయ్యారు. ఈ సందర్భంగా దాశరథి పేరిట కేసీఆర్ ప్రకటించిన మరికొన్ని అంశాలు..   1. తెలంగాణ రాష్ట్రంలోని ఏదైనా విశ్వవిద్యాలయం లేదా విద్యాసంస్థకు దాశరథి పేరు.   2. నగరంలోని ముఖ్యమైన ప్రాంతంలో దాశరథి విగ్రహాన్ని ప్రతిష్ఠించడం.   3. దాశరథి కుమారుడికి . ఆయన కుమారుడికి ప్రభుత్వంలో మంచి ఉద్యోగం.

రైల్లోంచి తోసేశారు..నేడు చితకబాదారు

రైళ్ళలో తనిఖీలు చేయాలంటేనే టీసీలు తెగ భయపడిపోతున్నారట. ఎవరిని టికెట్ అడిగితె ఎవడూ ఏం చేస్తాడోనని టీసీలు బిక్కుబిక్కుమంటూ తమ విధులు నిర్వహిస్తున్నారు. దీనికి హైదరాబాద్ నగరంలో రైళ్ళలో టీసీలపై జరుగుతున్న దారుణాలే కారణం. మొన్న హఫీజ్‌పేట రైల్వేస్టేషన్‌లో టిక్కెట్ చూపించమని అడిగిన పాపానికి టికెట్ కలెక్టర్ గీతను కొందరు దుండగులు రైలులో నుండి తోసివేశారు. ఆ సంఘటన జరిగి ఇంకా పట్టుమని పదిరోజులు కూడా కాలేదు. తాజాగా బేగంపేట రైల్వేస్టేషన్‌లో మరో సంఘటన చోటుచేసుకుంది. టికెట్ తనిఖీల్లో భాగంగా విధులు నిర్వహిస్తున్న టీసీ కౌసల్యను టికెట్ లేకుండా ప్రయాణిస్తున్న కొందరు ప్రయాణికులు చితకబాదారు. ప్రయాణికుల దాడిలో తీవ్రంగా గాయపడిన ఆమెను అధికారులు చికిత్స నిమిత్తం ఆసుపత్రికి తరలించారు. ఈ సంఘటలనలతో భయపడిపోతున్న టీసీలు తమ రక్షణ కోసం తగిన చర్యలు తీసుకోవాలని అధికారులకు విజ్ఞప్తి చేస్తున్నారు.

తెలంగాణలో పరిశ్రమలకు సింగిల్ విండో!

  తెలంగాణ ప్రభుత్వం పరిశ్రమల ఏర్పాటు విషయంలో సింగిల్ విండో విధానాన్ని అమలు చేసే ఆలోచనలో వుంది. ఈ విషయాన్ని తెలంగాణ ముఖ్యమంత్రి కేసీఆర్ తెలిపారు. హైదరాబాద్‌లో పలువురు పారిశ్రామికవేత్తలతో సమావేశమైన ఆయన తెలంగాణ ప్రభుత్వ పారిశ్రామిక విధానం గురించి వివరించారు. తమ ప్రభుత్వం అనుసరించే కొత్త పారిశ్రామిక విధానం వల్ల ఉద్యోగాలతోపాటు ఉత్పత్తి కూడా పెరుగుతుందని కేసీఆర్ అన్నారు. తెలంగాణలో పరిశ్రమలు ఏర్పాటు చేయాలనుకునే పారిశ్రామికవేత్తలు తనను నేరుగా సంప్రదించవచ్చని కేసీఆర్ తెలిపారు. పరిశ్రమల ఏర్పాటుకు తెలంగాణలో రెండున్నర లక్షల ఎకరాల భూములు ఉన్నాయని, పరిశ్రమల స్థాపనకు దరఖాస్తు చేసుకోవడానికి ప్రత్యేక వెబ్‌సైట్‌ను రూపొందిస్తామని, దరఖాస్తు చేసుకున్న 12 నుంచి 21 రోజుల్లో పరిశ్రమలకు అనుమతులు జారీ చేస్తామని సీఎం చెప్పారు. దీనికోసం సింగిల్ విండో విధానాన్ని అమలు చేయనున్నామని చెప్పారు.

బిగ్‌బాస్ కోసం భారీ ఆఫర్... 5 కోట్లు!

  టీవీ రియాల్టీ షో ‘బిగ్ బాస్’ గురించి అందరికీ తెలిసిందే. ఈ షోలో సెలబ్రిటీలు ఒక ఇంటిలో కొంతకాలం బయటి ప్రపంచాన్ని చూడకుండా నివసిస్తారు. వారి ప్రవర్తన మొత్తం సీసీ కెమెరాల్లో రికార్డవుతూ వుంటుంది. కాలం గడిచేకొద్దీ సెలబ్రిటీల ఎమోషన్లు బయటపడుతూ వుంటాయి. ఆ ఫుటేజ్‌తో టీవీ ఎపిసోడ్స్ రూపొందిస్తారు. ఈ కార్యక్రమం కోసం ఆమ్ ఆద్మీ పార్టీ నేత కుమార్ విశ్వాస్‌కు బిగ్ బాస్ నిర్వాహకులు భారీ ఆఫర్ ఇవ్వజూపినట్టు జోరుగా ప్రచారం సాగుతోంది. ఈ బంపర్ ఆఫర్‌లో భాగంగా ఆయనకు రూ.5 కోట్లు ఇచ్చేందుకు రియాలిటీ షో నిర్వాహకులు ఆసక్తి చూపుతున్నట్టు వార్తలు వస్తున్నాయి. ఇటీవల జరిగిన ఎన్నికల్లో కాంగ్రెస్ పార్టీ ఉపాధ్యక్షుడు రాహుల్ గాంధీపై అమేథీ లోక్‌సభ స్థానం నుంచి పోటీ చేసి ఓడిపోయిన విషయం తెల్సిందే. స్వతహాగా మంచి కవి అయిన కుమార్ విస్వాస్ ఆతర్వాత రాజకీయ నేతగా మారారు. దీనిమీద విస్వాస్ సన్నిహితులు స్పందిస్తూ.. బిగ్‌బాస్ ఆఫర్ వాస్తవమేనని చెప్పారు. అయితే తాను పాల్గొంటున్నదీ లేనిదీ మాత్రం విశ్వాస్ ఇంకా నిర్ణయించుకోలేదని చెప్పారు.

టిడిపిలోకి జగ్గారెడ్డి..!!

  సంగారెడ్డి మాజీ ఎమ్మెల్యే తూర్పు జయప్రకాశ్‌ రెడ్డి త్వరలో 'సైకిల్' ఎక్కబోతున్నట్లు రాజకీయవర్గాలలో వార్తలు వినిపిస్తున్నాయి. వచ్చే ఎన్నికలలో ఎలాగైన గెలవాలని పట్టుదలతో వున్న జగ్గారెడ్డి తెలంగాణ లో కాంగ్రెస్ పార్టీలో వుంటే గెలవడం కష్టమేనని ఆయన అనుకుంటున్నారట. 2019 ఎన్నికలలో టీఆర్ఎస్ పార్టీని దీటుగా ఎదుర్కొగల పార్టీపై ఆయన్ దృష్టి సారించారట. దానికి టిడిపి పార్టీ అయితెనే బెటర్ అని ఆయన భావిస్తున్నారట. మరోవైపు తెలంగాణలో టీడీపీకి తిరిగి పునర్వైభవం తేవాలని భావిస్తున్న పార్టీ అధినేత చంద్రబాబు, తెలంగాణలో బలమైన రెడ్డి సామాజిక వర్గంపై కన్నేశారట. ఈ వర్గం వారిని టిడిపిలోకి చేర్చుకుంటే మంచి ఫలితాలు సాధించగలమని ఆయన భావిస్తున్నారు. ఇందులో భాగంగానే జగ్గారెడ్డిని పార్టీలో చేర్చుకోవడానికి ఆయన సుముఖంగా వున్నట్లు తెలుస్తోంది. అయితే జగ్గారెడ్డి కూడా పార్టీ అధ్యక్షుడు చంద్రబాబు ఆహ్వానం పలికితే టీడీపీలో చేరేందుకు సిద్ధమేనని ఆ పార్టీ నేతలకు సంకేతలిచ్చారట. దీంతో ఆయన సైకిలేక్కడం ఖాయమని తెలుస్తోంది.     ఇంకా తెలంగాణ కాంగ్రెస్‌ ముఖ్య నాయకులు కొంతమంది టిడిపి నేతలతో సంప్రదింపులు జరుపుతున్నారని రాజకీయవర్గాల సమాచారం.

ప్రీతీ జింటా: నెస్ వాడియా శాడిజం గుట్టు ఇదే!

  తన మాజీ ప్రియుడు నెస్ వాడియా తనను గతంలో ఎన్నోసార్లు శారీరకంగా దారుణంగా హింసించాడని బాలీవుడ్ నటి ప్రీతీజింటా ముంబై పోలీసులకు ఫిర్యాదు చేసింది. ముంబై పోలీసు కమిషనర్‌కి రాసిన లేఖలో నెస్ వాడియా తనను ఎలా హింసించాడో ప్రీతీ జింటా వివరంగా రాసింది!   1. నెస్ వాడియా చాలా దుర్మార్గుడు. నన్ను శారీరకంగా చాలా హింసించేవాడు. నేను అతన్ని చాలా ఇష్టపడుతున్నానని తెలిసినా నన్ను హింసించేవాడు. సిగరెట్లతో నా ముఖాన్ని కాల్చేవాడు.   2. నెస్ వాడియా బయటి ప్రపంచానికి ఎంతో సౌమ్యుడిలా కనిపిస్తాడు. అతని నిజ స్వరూపం అతనితో ఏకాంతాన్ని పంచుకున్న నాకే తెలుసు. చాలాసార్లు అతను చాలా భయంకరంగా, శాడిస్టులా ప్రవర్తించేవాడు.   3. చాలాసార్లు అతను నన్ను హింసించే సమయంలో అతని ముఖంలోని క్రూరత్వాన్ని చూసి నేనెంతో భయపడిపోయేదాన్ని. అతను నన్ను చంపేస్తాడేమోనన్న అనుమానం నాకు ఏర్పడింది.   4. ఐపీఎల్ మ్యాచ్ సందర్భంగా అతను నా చెయ్యి లాగి దూషించిన విషయం చాలా చిన్నది. అంతకు మించిన శాడిజం అతనిలో నేను చూశాను. అతని ఆగడాలు భరించలేక, ప్రశాంతంగా వుండాలన్న ఉద్దేశంతోనే అతన్ని నేను దూరంగా పెట్టాను.   5. అతన్ని దూరంగా పెట్టకపోతే అతను ఏదో ఒకరోజు నన్ను కచ్చితంగా చంపేస్తాడు. ఆ విషయం నాకు అర్థమైపోయింది.   6. నెస్ వాడియా భవిష్యత్తులో కూడా నాకు ప్రత్యక్షంగా గానీ, పరోక్షంగా గానీ హాని చేస్తాడన్న భయం నాకు వుంది.   7. నేను నెస్ వాడియా మీద పోలీసులకు ఫిర్యాదు ఇస్తోంది అతనికి హాని చేద్దామన్న ఉద్దేశంతో కాదు.. నన్ను నేను రక్షించుకోవాలన్న భయంతో.

ఉస్మానియా విద్యార్థుల ఆందోళన ఉద్ధృతం

  తెలంగాణలో కాంట్రాక్ట్ ఉద్యోగులను పర్మినెంట్ చేయాలని కేసీఆర్ ప్రభుత్వం తీసుకున్న నిర్ణయం ఉస్మానియా విశ్వవిద్యాలయ విద్యార్థుల గుండెల పగిలేలా చేసింది. దాంతో వారు ఆందోళన బాట పట్టారు. శాంతియుతంగా ఉద్యమం చేస్తున్న విద్యార్థులను అణచివేసే ప్రయత్నాలను ప్రభుత్వం చేయడంతో ఉస్మానియా విశ్వవిద్యాలయం విద్యార్థులు అగ్ని పర్వతాల్లా బద్దలవుతున్నారు. ప్రభుత్వ నిర్ణయానికి వ్యతిరేకంగా ఉద్యమం ఉద్ధృతం చేశారు. మంగళవారం నాడు నిరుద్యోగ విద్యార్థుల ఆందోళనలతో ఉస్మానియా విశ్వవిద్యాలయం హోరెత్తింది. ఆర్ట్స్ కళాశాల నుంచి తార్నాక వరకు విద్యార్థులు చేపట్టిన ర్యాలీని అడ్డుకోవాలనిపోలీసులు ఓయు చేసిన ప్రయత్నాలను విద్యార్థులు వ్యతిరేకించారు. దీంతో పోలీసులకు విద్యార్థులకు మధ్య తోపులాట జరిగింది. పోలీసులు ఏర్పాటుచేసిన బారికేడ్లను దాటి విద్యార్థులు తార్నాకకు చేరుకుని చౌరస్తాలో ధర్నా, రాస్తారోకో చేపట్టారు. ఆందోళన చేస్తున్న విద్యార్థులను పోలీసులు అరెస్టు చేశారు. ఆందోళన చేపట్టిన విద్యార్థులు తెలంగాణ ప్రభుత్వ విధానాలను తప్పుబట్టారు. ఉస్మానియా విద్యార్థులపై కేసీఆర్ కక్షసాధింపు ధోరణిని ప్రదర్శిస్తున్నారని, ఉద్యమాలు కేసీఆర్‌కి కొత్తేమో కాని ఓయు విద్యార్థులకు కాదని మొన్నటి వరకు తెలంగాణ ప్రజల ఆత్మగౌరవం కోసం పోరాటం చేశామని, ఇపుడు తమ జీవితాల కోసం ఉద్యమిస్తున్నామని వారు అన్నారు.