Home  
Politics

పివి ని కిరణ్ ఎలా స్మరించుకొన్నారంటే....

      దివంగత ప్రధాన మంత్రి పి.వి.నరసింహా రావుకు తన తండ్రి అమర్ నాధ్ రెడ్డి నమ్మిన బంటుగా ఉండేవారని ముఖ్య మంత్రి కిరణ్ కుమార్ రెడ్డి అన్నారు. నిన్న హైదరాబాద్ లో జరిగిన ఓ కార్యక్రమంలో కిరణ్ తన కుటుంబానికి పి.వి. తో ఉన్న సాన్నిహిత్యాన్ని గుర్తు చేసుకున్నారు.   తన వివాహానికి హాజరు కావడం కోసం ఆ సమయంలో రష్యాలో ఉన్న పి.వి. ఎంతో శ్రమకోర్చి నాలుగు విమానాలు మారి వచ్చి హాజరయ్యారని కిరణ్ గుర్తు చేసుకున్నారు. ‘1987 లో రాష్త్రపతి ఎన్నికల సమయంలో ఓ దశలో ఆ పదవికి పి.వి. పేరు పరిశీలనలోకి వచ్చింది. దీనితో, ఆయన తన తండ్రికి చేసి, తన స్వగ్రామానికి వెళ్లి ఓటర్ల జాబితా తీసుకురమ్మని చెప్పారు. ఈ విషయం ఇంత వరకూ ఎవరికీ తెలియదు’, అని కిరణ్ అన్నారు. అంతే కాదు, తన తండ్రి మరణించినప్పుడు పి.వి. స్వయంగా పాడె మోశారని ముఖ్య మంత్రి గుర్తు చేసుకున్నారు. తనను నమ్ముకున్న వారికి ఆయన ఏ స్థాయిలో అయినా సహాయపడేవారని కిరణ్ అన్నారు. పి.వి. తనను ముందుగా పార్లమెంట్ కు పోటీ చేయమని సలహా ఇచ్చారని, అయితే,తాను అసెంబ్లీకి మాత్రమే పోటీ చేస్తానని పట్టుబట్టానని ముఖ్య మంత్రి దివంగత ప్రధానితో తనకున్న అనుబంధాన్ని గుర్తు చేసుకున్నారు.  

శ్రీ లక్ష్మికి బెయిల్, చికిత్స కోసం సిఎంసి కి

      ఓబులాపురం అక్రమ మైనింగ్ కేసులో జైలులో ఉన్న ఐఏఎస్ అధికారిణికి చికిత్స కోసం కోర్టు మధ్యంతర బెయిల్ మంజూరు చేసింది. తీవ్ర వెన్ను నొప్పితో బాధపడుతున్న ఆమె ఇంత వరకూ, నగరంలోని కేర్ ఆసుపత్రిలో చికిత్స పొందుతూ ఉంది. అయితే,ఆమె నొప్పి ఇంకా తగ్గకపోవడంతో తమిళనాడులోని వెల్లూరు క్రిస్టియన్ మెడికల్ కాలేజ్ లో చికిత్స చేయించుకోవాలని కోర్టుకు విన్నవించుకొంది. ఆమె బెయిల్ పిటీషన్ ఫై వాదనలు విన్న సిబిఐ ప్రత్యెక కోర్టు న్యాయమూర్తి నిన్న ఆమెకు బెయిల్ మంజూరు చేశారు. ఆమెకు ఇచ్చిన మధ్యంతర బెయిల్ గడువు ముగిసిన వెంటనే కోర్టులో లొంగిపోయేటట్లయితే,బెయిల్ మంజూరు చేయడానికి తమకు ఎలాంటి అభ్యంతరం లేదని న్యాయమూర్తి శ్రీ లక్ష్మి కి సూచించి అమెనుండి హామీని తీసుకొన్న తర్వాత బెయిల్ మంజూరు చేశారు. దీనితో, ఆమె వెల్లూరు వెళ్ళడానికి అడ్డంకులు తొలగిపోయాయి.  

మంత్రుల విచారణకు ప్రభుత్వ అనుమతి అవసరంలేదు: సిబిఐ

      జగన్ మోహన్ రెడ్డి కంపెనీల్లో పెట్టుబడులకు సంభందించిన కేసులో నిందితులుగా ఉన్న రాష్ట్ర మంత్రి ధర్మాన ప్రసాద రావు, మాజీ మంత్రి మోపిదేవి వెంకట రమణ రావులఫై ఉన్న అభియోగాలను అవినీతి నిరోధక చట్టం కింద విచారణ చేసేందుకు ప్రభుత్వ అనుమతి అవసరం లేదని దర్యాప్తు సంస్థ సిబిఐ ప్రత్యేక కోర్టులో వాదించింది. 2004 లో శాసన సభ్యులుగా ఉండి వీరిద్దరూ మంత్రులుగా పని చేసారని అయితే, 2009 లో ఆ అసెంబ్లీ రద్దవడంతో వారికి ప్రజా సేవకుల హోదా వర్తించదని సిబిఐ కోర్టులో వాదించింది. వారి ప్రాసిక్యూషన్ కు ప్రభుత్వ అనుమతి అవసరం లేదని అందువల్ల వారిఫై ఉన్న అభియోగాలఫై అవినీతి నిరోధక చట్టం లోని కొన్ని సెక్షన్ల ప్రకారం విచారణకు స్వీకరించాలని సిబిఐ ప్రత్యెక కోర్టును కోరింది. గతంలో సుప్రీం కోర్టు ఆభాయ్ సింగ్ చౌతాలా కేసులో ఇచ్చిన తీర్పు ప్రకారం, ప్రస్తుతం వీరి ప్రాసిక్యూషన్ కు ప్రభుత్వ అనుమతి అవసరం లేదని దర్యాప్తు సంస్థ కోర్టుకు విన్నవించింది. వాదనలను విన్న అనంతరం తదుపరి విచారణను న్యాయమూర్తి ఈ నెల 4 వ తేదీకి వాయిదా వేసారు. అదే రోజు కోర్టుకు హాజరవ్వాలని కూడా న్యాయమూర్తి ధర్మాన, మోపిదేవిలను ఆదేశించారు.

ఫిబ్రవరిలోనే పెళ్లి, అంతలో........

      ఢిల్లీ లోని ఓ ప్రైవేటు బస్సులో దారుణంగా రేప్ కు గురి అయి, చివరకు మరణించిన 23 సంవత్సరాల ఆ పారా మెడికల్ స్టూడెంట్ కి వచ్చే ఫిబ్రవరి లో వివాహం జరగనుంది. వరుడు, ఆమెతో పాటు ఆగంతకుల చేతుల్లో బస్సులో దెబ్బలు తిన్న యువకుడు.   ఆమె నివసిస్తున్న ఇంటి ఇరుగుపొరుగు వారు అందించిన వివరాల ప్రకారం, తన వివాహం కోసం ఆమె అన్ని ఏర్పాట్లు చేసుకుంది. పెళ్లి విందు ఢిల్లీ లోనే చేయడానికి తగిన ఏర్పాట్లు కూడా ఆ కుటుంబం చేసుకుంది. ఆమె వివాహం ఫిబ్రవరిలో జరగనుందని మాకందరికీ తెలుసని వారు అన్నారు. రేప్ జరిగిన ఆ రోజు తన స్నేహితుడితో షాపింగ్ కు వెళ్ళిందని. అటునుండి అటు వారిద్దరూ సినిమా కు వెళ్లారని బాధితురాలి బంధువు ఒకరు అన్నారు. వివాహానికి కావాల్సిన బట్టలు కొనడానికి ఇటీవలే తమను షాపింగ్ కు తీసుకు వెళ్ళిందని ఆమె ఇంటి పొరుగు మహిళ ఒకరు మీడియా తో అన్నారు. ఆ బస్సులో ఆమె ఆ ఆరుగురు కీచకుల బారిన పడకుండా ఉండి ఉంటే, జనవరి లోనే ఆమె నిశ్చితార్ధం కూడా జరిగేది.  

జగనన్న జైలులో, నో న్యూ ఇయర్ వేడుకలు

      వైఎస్ఆర్ కాంగ్రెస్ పార్టీ నేత జగన్ మోహన్ రెడ్డి జైలులో ఉండటంతో ఈ సారి నూతన సంవత్సర వేడుకలు జరుపుకోరాదని ఆ పార్టీ అధినాయకత్వం పార్టీ నాయకులకు, కార్యకర్తలకు విజ్ఞప్తి చేసింది. జగన్ ను రాజకీయంగా ఎదుర్కోలేక ఇలా నిర్భంధం లో ఉంచారని వారన్నారు.   జగన్ ను ఏడు నెలలుగా అక్రమంగా నిర్భందంలో ఉంచారని, ఆ కారణం వల్ల ఈ సారి ఆ వేడుకలను జరుపుకోరాదనేది పార్టీ సీనియర్ నాయకుల నిర్ణయమని ఆ పార్టీ పార్లమెంట్ సభ్యుడు మేకపాటి రాజమోహన్ రెడ్డి ప్రకటించారు. జగన్ కు బెయిల్ వస్తుందని తమ పార్టీ కార్యకర్తలంతా ఇటీవల ఎదురుచూసారని, అయితే, అది రాకపోవడంతో వారంతా నిరుత్సాహం చెందారని ఆయన అన్నారు. ఈ వేడుకలకు దూరంగా ఉండి, జగన్ ను జైలులో ఉంచడానికి వ్యతిరేకంగా తమ నిరసనను తెలియచేయాలని పార్టీ భావించిందని ఆయన అన్నారు. అధికార కాంగ్రెస్, ప్రతిపక్ష తెలుగు దేశం పార్టీలు రెండూ కలిసి ఈ కుట్ర పన్నాయని, దీనిని ఎదుర్కొనేందుకు రేపు ప్రారంభం కానున్న ‘జగన్ కోసం జనం సంతకాలు’ ఉద్యమాన్ని ఉదృతంగా చేపట్టాలని ఆ నాయకులు కోరారు. జగన్ తన బెయిల్ కోసం ఎనిమిది సార్లు కోర్టుల్లో పిటీషన్లు వేస్తే, వాటిని దర్యాప్తు సంస్థ సిబిఐ కుట్ర పూరితంగా అడ్డుకొదని వారు ఈ సందర్భంగా అన్నారు. ఆ పార్టీ ప్రతినిధి అంబటి రాంబాబు మాట్లాడుతూ, ఈ సారి నూతన సంవత్సర సందర్భంగా మిఠాయిలు పంచడం, కేక్ లు కట్ చేయడం, దండలు స్వీకరించడం వంటివి చేయవద్దని పార్టీ కార్యకర్తలకు సూచించారు.  

టిఆర్ఎస్ లోకి కోమటి రెడ్డి ?

      తెలంగాణా రాష్ట్రం కోసం తన ఎంఎల్ఏ పదవికి రాజీనామా చేస్తానని కోమటిరెడ్డి వెంకట రెడ్డి అన్నారు. ఒక వేళ పార్టీ మారాల్సి వస్తే, ప్రత్యెక రాష్ట్రం కోసం పని చేసే తెలంగాణా రాష్ట్ర సమితి వంటి పార్టీల్లోకి వెళ్తాను తప్ప జగన్ పార్టీలో మాత్రం చేరానని ఆయన అన్నారు. నల్గొండ జిల్లాకు చెందిన ఆయన ఎప్పటికైనా వైఎస్ఆర్ కాంగ్రెస్ పార్టీలోకి వెళ్తారనే ప్రచారం ఇంత వరకూ జరిగేది. ఆయన ఎలాంటి వ్యాఖ్యలు చేసినా, అవి జగన్ పార్టీలోకి చేరడానికేననే ప్రచారాలు కూడా జరిగేవి. ఆయనకు వైఎస్ రాజ శేఖర రెడ్డి తో సంభందాలు బలంగా ఉండటం కూడా ఇందుకు ఒక కారణం. ఆయన మృతి తర్వాత కోమటిరెడ్డి కాంగ్రెస్ పార్టీకి వ్యతిరేకంగా మాట్లాడుతూ, కాంగ్రెస్ పార్టీని విమర్శించిన సందర్భాలు అనేకం ఉన్నాయి. తాను జగన్ పార్టీలోకి వెళ్లనని ఆయన చాలాసార్లు చెప్పినా ఆ ప్రచారం మాత్రం ఆగలేదు.   అయితే, తెలంగాణాఫై జరిగిన అఖిల పక్ష సమావేశం తర్వాత కోమటి రెడ్డి తన అభిప్రాయాన్ని మార్చుకొన్నారని రాజకీయ పరిశీలకులు అంటున్నారు. నిన్న ఆయన చేసిన వ్యాఖ్యలు కూడా ఇందుకు అనుగుణంగానే ఉన్నాయి. ప్రత్యెక తెలంగాణా రాష్ట్రం కోసమే తాను రాజీనామా చేస్తానని చెప్పిన తర్వాత, తెలంగాణా వాదులు నిరంతరం విమర్శలు గుప్పిస్తున్న జగన్ పార్టీలో చేరితే ప్రజలు హర్షించరనే కారణంతోనే ఆయన టిఆర్ఎస్ వైపు మొగ్గు చూపినట్లు తెలుస్తోంది. కోమటిరెడ్డి ఈ తాజా ప్రకటనతో జిల్లా రాజకీయ వాతావరణం ఒక్కసారిగా మారిపోయింది.

ఢిల్లీ గ్యాంగ్ రేప్ బాధితురాలి అంతక్రియలు పూర్తి

      ఢిల్లీలో అత్యాచారానికి గురైన బాధితురాలి అంత్యక్రియలు ఆదివారం ఉదయం 7.35 గంటలకు పూర్తయ్యాయి. సింగపూర్ ఆస్పత్రిలో మరణించిన ఆమె మృతదేహాన్ని ఆదివారం తెల్లవారుజామున 3.30 గంటలకు ఢిల్లీకి తీసుకువచ్చారు. ఢిల్లీ విమానాశ్రయంలో ప్రధాని మన్మోహన్‌సింగ్, సోనియా గాంధీ నివాళులు అర్పించారు. అనంతరం వారణాసిలో అంత్యక్రియలు పూర్తి చేశారు. ఈ అంత్యక్రియలకు కేంద్ర మంత్రి ఆర్పీసింగ్, ఆరోగ్య శాఖ అధికారులు కూడా హాజరయ్యారు.

ఢిల్లీ ఘటనకి ఎవరు బాధ్యులు..?

  డిల్లీలో జరిగిన ఘోరఅత్యాచారానికి ఒక్కసారిగా ఉలిక్కిపడిలేచిన దేశం, అంతకంటే హీనాతిహీనమయిన అత్యాచార వార్తలను విని దేశానికి ఏదో పెద్ద ఉపద్రవం వచ్చినట్లు కంగారుపడింది. అయితే, ఇటువంటి వార్తలు చాలాకాలంగా వస్తున్నాకూడా ఇటు ప్రజలకి కానీ, అటు ప్రభుత్వానికి గానీ పట్టించుకొనే ఓపిక, తీరికా రెండూలేకనే ఇంతకాలం అవి న్యూస్ పేపర్లలో ఉన్నామనకంటికి కనబడలేదు. ఇప్పుడు డిల్లీ సంఘటనతో అవన్నీ మనకి ప్రస్పుటంగా కనిపించడం మొదలయ్యాయని చెప్పవచ్చును.   ఇటువంటి క్రూరమయిన నేరాలకి ప్రభుత్వానికి ఎంత బాద్యత ఉంటుందో, ప్రజలకీ అంటే బాద్యత ఉంటుంది. ప్రభుత్వాన్ని దాని అసమర్దతకి నిందించక తప్పనప్పుడు, సమాజం సంస్కారవంతులయిన పౌరులను దేశానికి అందించలేక పోయినందుకు సమాజాన్ని నిందించక తప్పదు. స్త్రీలను ‘ఆడది’ అనే పదంతో సంబోదించినప్పుడే వారికొక అబలత్వం కూడా దానితో ఆపాదించిన సమాజం పురుషులకు ‘మగాడు’ అనేది ఒక బిరుదో కిరీటమో పెట్టినట్లు పెట్టింది.   తల్లి కడుపులో పడగానే స్త్రీకి మొదలయిన అగ్నిపరీక్షలు ఆమె కట్టెలమీద కాలిపోయేవరకు తప్పవు. గానీ, ‘మగాడు’ పుట్టకమునుపు నుంచే ఒక ప్రత్యేక హోదాతో పుడతాడు. ఇటువంటి తేడాలే అనేకం కలిసి మనసమాజంలో స్త్రీలని మగాడికి లోకువగా చేసాయి.   ఈ మగాహంకారానికి మన సినిమాలు మరింత సొబగులు అద్డుతూ స్త్రీని హీరో, విలన్ల చేతిలో ఒక ఆటబొమ్మగా, హీరో కోసం అవసరమయినప్పుడల్లా సొగసులు ప్రదర్శించే అందాలబొమ్మగా, వీలయినంత అసభ్యంగాను చూపిస్తూ (అందుకు హీరోయిన్లకి ఏ అభ్యంతరము లేదు కూడా) స్త్రీలను సమాజంలో మరింత పలుచన చేస్తున్నారు. అంతే గాకుండా, మన సినిమాలు యువతకి అవసరమయిన ఐడియాలు- అమ్మాయిలని ఎలా పడేయాలి, గర్ల్ ఫ్రెండ్ లేదా బాయ్ ఫ్రెండ్ లేకపోతె ఎంత అవమానకరం, అబ్బాయిలకి కోడ్ బాషలో ఎలాగు మెసేజ్ లుపంపాలి, తల్లితండ్రులను ఎలా మోసంచేయాలి, కాలేజి స్థాయిలోనే మందుకొట్టడం, బ్లూ ఫిలిమ్స్, ఇంటర్నెట్ చాటింగ్, వంటి సమస్త లోకజ్ఞానాన్ని అందజేసి సమాజాన్ని కలుషితం చేయడంలో తన పాత్ర తానూ పోషిస్తూనే “మీరు చెడిపోతె అందుకు బాద్యత మాదికాదు” అని నిర్లజ్జగా చెప్పడమేగాకుండా, “అటువంటి సినిమాలు తీయడానికి యువతే మాకు ప్రేరణ” అని నిర్భయంగా చెప్పగలదు కూడా.   ఉయ్యాలలో నిదురిస్తున్న చిన్నారి మొదలుకొని కాటికి కాళ్ళుజాపుకొని కూర్చొన్న వృద్దురాలివరకూ ఎవరినయినా కేవలం ‘ఆడది’ గానే చూసే మానవరూపంలో తిరిగే కొన్ని మృగాలు సమాజంలో మన మద్యనే విచ్చలవిడిగా తిరుగుతూ నిర్భయంగా అత్యాచారాలకు పాల్పడుతుంటే, అటువంటివారిని ప్రభుత్వాలు ఏమిచేయక, ప్రజలు పట్టించుకొననపుడు స్త్రీలకి భద్రతని ఆశించడం అడియాసే అవుతుంది.   డిల్లీలో ఉవ్వెత్తున యువత ఆందోళనలు చేస్తుంటే మన రాష్ట్రంలో యువత మాత్రం కనీసస్పందన కూడా చూపించలేకపోవడం గర్హనీయం. కులపిచ్చితో తమ అభిమాన సినిమా హీరోలు, రాజకీయనాయకులకు కట్టుబానిసల్లాగ మారి, నిస్సిగ్గుగా వారి వెనుకే తిరగడం, అదే తమ జీవిత పరమార్ధం అన్నట్లు వ్యహరించడం, సినిమాలు రాజకీయ చర్చలతో పొద్దుపుచ్చడం, చాటింగులు, డేటింగులు అంటూ బాధ్యతా రాహిత్యంగా వ్యహరించడంవంటివి తెలిసినంతగా, సమజం పట్ల తమ బాద్యతలను నిర్వర్తించడం మాత్రం చేతకాదు యువతలో చాలామందికి. చాతనయిన యువత నిశబ్దంగా తమ బాధ్యతలను నిర్వర్తించుకు పోతున్నారు తప్ప, మిగిలిన యువతకు ప్రేరణ కల్గించి వారిని తమ మార్గంలోకి మళ్ళించలేక పోతున్నారు.   కుటుంబం పట్ల, సమాజం పట్ల బాధ్యతలేని యువత, బాధ్యతలేని అసమర్ధ ప్రభుత్వాలు, బాధ్యతారాహిత్యంగా వ్యహరిస్తున్న అనేక వ్యవస్తలు, సంస్కరణలకి ఎంత మాత్రం ఇష్టపడని సమాజం, అన్నీ కలగలిసి కొడేద్దుల్లయ్యి కుమ్ములాడుకుంటుంటే మద్యలో బలహీనంగా మిగిలిన లేగదూడవంటి స్త్రీ నలిగి ఈవిధంగా నశించిపోతోంది. ఇప్పటికీ సమాజం మేల్కొనకపోయినట్లయితే, భావితరాల భవిష్యత్తుని చేజేతులా మనమే నాశనం చేసుకోన్నవారమవుతాము.  

ఢిల్లీ గ్యాంగ్ రేప్ బాధితురాలి మృతి : చంద్రబాబు స్పందన

      ఢిల్లీ గ్యాంగ్ రేప్ బాధితురాలు మృతి చెందడం బాధాకరమని తెలుగుదేశం పార్టీ అధినేత చంద్రబాబునాయుడు ఆవేదన వ్యక్తం చేశారు. ఆమె మృతి పట్ల రెండు నిముషాలు మౌనం పాటించి, తమ ప్రగాఢ సంతాపం తెలియజేశారు. నిందితులను శిక్షంచడంలో ప్రభుత్వం ఉదాసీనంగా వ్యవహరిస్తోందని చంద్రబాబు మండిపడ్డారు. రేప్ బాధితురాలి మృతికి సంతాపంగా చంద్రబాబు, నేతలు నల్లబ్యాడ్జీలు ధరించి నిరసనలు తెలుపుతూ పాదయాత్ర చేపట్టినట్లు చెప్పారు. మహిళలకు భద్రత కల్పించడంలో ప్రభుత్వం ఘోరంగా విఫలమైందని ఆయన ఆరోపించారు. మహిళల రక్షణకు కఠిన చట్టాలు తీసుకురావాలని చంద్రబాబు డిమాండ్ చేశారు. దేశ రాజధానిలోనే ఇలాంటి దారుణం జరిగితే ఇక మారుమూల గ్రామాల పరిస్థితేంటని ఆయన ప్రశ్నించారు. ఢిల్లీలో వైద్య విద్యార్తిని అత్యాచార ఘటనపై పీసీసీ అధ్యక్షుడు బొత్స సత్యనారాయణ, రాష్ట్రపతి కుమారుడి వ్యాఖ్యలు బాధాకరమిన చంద్రబాబు అన్నారు. బాధితురాలికి న్యాయం చేయాలని, నిందితులను కఠినంగా శిక్షించాలని కోరుతూ నిరసనకు దిగిన వారిపై లాఠీఛార్జీ, వాటర్ క్యేనాన్లు, భాష్ప వాయువు ప్రయోగించారని చంద్రబాబు ప్రభుత్వంపై మండిపడ్డారు. అత్యాచారం లాంటి ఘటనలకు పాల్పడితే శిక్షలు కఠినంగా ఉంటాయన్న అవగాహన కల్పించాలని అన్నారు.

మంగళూరులో యువతిఫై గ్యాంగ్ రేప్.. !

      ఓ యువతిఫై గ్యాంగ్ రేప్ ఘటనకు నిరసనగా ఢిల్లీ నగరం అట్టుడికే విధంగా తీవ్ర స్థాయిలో జరుగుతున్న ఆందోళనలతో మాకేంటీ అనుకొన్నారు మంగళూరు లోని కొంత మంది యువకులు ! తల్లి తండ్రులు దూరమై ఒంటరిగా జీవిస్తున్న యువతి ఫై సమాజం తలదిన్చుకోనేలా దారుణంగా అత్యాచారానికి ఒడి గట్టారు.   18 సంవత్సరాల ఆ యువతి తండ్రి మరణించాడు. ఆ తర్వాత ఆమె తల్లి వేరే వ్యక్తిని పెళ్లి చేసుకొని వెళ్ళిపోయింది. దీనితో ఆమె ఒంటరిగానే జీవన పోరాటం చేస్తోంది. ఆలాంటి దీనావస్థలో ఉన్న ఆ యువతిఫై కొంత మంది స్థానిక యువకులు కన్నేశారు. వారిలో ఓ యువకుడు ఏదో విషయంలో సహాయం చేస్తామంటూ మాయమాటలు చెప్పి ఆమెను ఓ రహస్య ప్రదేశానికి తీసుకువెళ్ళాడు. అక్కడ తన ముగ్గురు స్నేహితులతో కలిసి ఆమెను రేప్ చేసాడు.   వారి నుండి తప్పించుకొన్న ఆ యువతి చివరకు రోడ్డు మీదకు వచ్చి, ఓ ఆటోవాలా సహాయం కోరింది. అక్కడా ఆమెది అదే పరిస్థితి. అక్కడ నుండి తన స్నేహితుడి ఇంటికి తీసుకువెళ్ళిన ఆ ఆటోవాలా కూడా తన స్నేహితులతో కలిసి ఆమెఫై అత్యాచారం చేసాడు. ఆ తర్వాత ఆమెను కర్ణాటక కేరళ సరిహద్దుల్లో వదిలేసి వెళ్ళిపోయాడు.   అయితే, ఈ సంఘటనలో పోలీసులు వ్యవహరించిన తీరుఫై పలు విమర్శలు వస్తున్నాయి. ఈ వరుస రేప్ లు జరిగిన అనంతరం ఫిర్యాదు చేయడానికి కుంబ్లే పోలీస్ స్టేషన్ కు వెళ్ళిన ఆ యువతిని పోలీసులు వెళ్లిపొమ్మంటూ గెంటివేసినట్లు సమాచారం. కేవలం 24 గంటల వ్యవధిలో ఒకే యువతిఫై రెండు సార్లు గ్యాంగ్ రేప్ జరిగిన, ఆలస్యంగా వెలుగులోకి వచ్చిన ఈ సంఘటన ఈ నెల 23 న జరిగింది.   ఈ విషయం తెలుసుకున్న మహిళా సంఘాల నేతలు స్థానిక మీడియా ప్రతినిధులతో కలిసి పోలీసులను నిలదీసిన తర్వాతే పోలీసులు రంగంలోకి దిగినట్లు తెలుస్తోంది. వెంటనే ఆటోవాలాను పట్టుకొన్న పోలీసులు అతడిఫై థర్డ్ డిగ్రీ ప్రయోగించేసరికి అతడు ఇచ్చిన వివరాలతో మిగిలిన ముగ్గురిని పట్టుకొన్నారు. ప్రస్తుతం ఆ యువతిఫై మొదటగా అత్యాచారం చేసిన వ్యక్తుల కోసం పోలీసులు గాలిస్తున్నారు.   ఆ యువతి ప్రస్తుతం ఓ ఆసుపత్రిలో చికిత్స పొందుతోంది.

లోకేష్ ఈ దూకుడేలా?

  ఇంతవరకూ తెరవెనుకే ఉండి తెలుగుదేశంపార్టీ కోసం ప్రణాళికలు సిద్దం చేస్తూ ఉండిపోయిన ఆ పార్టీ నవతరం నాయకుడు నారాలోకేష్ ఇప్పుడు క్రమంగా తెరముందుకి వస్తూ, గత కొంతకాలంగా పార్టీ కార్యకర్తలతో, నాయకులతో కలిసి మీడియా ముందు తరచూ కనబడుతున్నాడు. అంతే గాకుండా ట్వీటర్ వంటి సామాజిక నెట్ వర్క్ ల ద్వారా తన పార్టీ ప్రత్యర్దుల మీద వ్యంగాస్త్రాలు సందిస్తూ, నెట్-యువతని తమపార్టీ వైపు ఆకర్షించగలుగుతున్నాడు. మొన్న వై.యస్సార్. పార్టీని విమర్శిస్తూ, “ఆ పార్టీ వాళ్ళు ఎంత సేపు జగన్ బెయిలుపై తప్పక బయటకి వస్తాడని చెపుతున్నారు తప్ప నిర్దోషిగా విడుదలయి బయటకి వస్తాడని ఎందుకు చెప్పలేకపోతున్నారు?” అని వ్రాసి తన రాజకీయ పరిణతిని ప్రదర్శించి రాజకీయ విశ్లేషకులను సైతం ఆకట్టుకొన్నాడు. అయితే, ఈ రోజు అతను తెరాస నేత హరీష్ రావును లక్ష్యం చేసుకొని వ్రాసిన మెసేజ్, అతనిలో బలాన్ని, బలహీనతనీ కూడా బయట పెట్టింది అని చెప్పవచ్చును.   ఎప్పుడో ఏడాది క్రితం హరీష్ రావు సిద్దిపేటలో మీడియావారికి ఇచ్చిన స్టేట్మెంట్ ను ఉటంకిస్తూ ఇప్పుడు సమయం, సందర్బం చూసుకొని ఆ విషయాన్ని ఆయనకి గుర్తు చేస్తూ ‘మీ ప్యూను ఉద్యోగం దరఖాస్తుకోరకు మా తెలుగుదేశంపార్టీ ఎదురుచూస్తోంది. ఎప్పుడు దరఖాస్తు చేసుకోబోతున్నారు? అని వ్యంగంగా అడిగి, తానూ తన విరోధిపార్టీల నేతలని, వారి కార్యక్రమాలని నిశితంగా గమనిస్తూనే ఉన్నానని, పార్టీ భవిష్యత్ అవసరాలకి ఉపయోగపడే ఇతర పార్టీల ప్రతీ స్టేట్మెంటుని రికార్డు చేసుకొంటూ, వాటినే తన ఆయుధాలుగా అవసరమయినప్పుడు తీసి వాడగలనని తన తాజా మెసేజ్ ద్వారా రాజకీయ వర్గాలకి తెలియజేయగలిగేడు. మున్ముందు మరింత రాజకీయ పరిణతిని చూపించగల సత్తా ఉన్నవాడిగా లోకేష్ తనను తానూ నిరూపించుకోగలిగేడు.    ఈ ఏడాది జనవరి నెలలో సిద్దిపేటలో జరిగిన ఒక కార్యక్రమంలో పాల్గొన్న తెరాస నేత హరీష్ రావు, తెలుగుదేశం పార్టీకి సవాలు విసురుతూ ‘చంద్రబాబు గానీ హోం మంత్రికి తానూ తెలంగాణాకి అనుకూలమని తెలియజేస్తూ లేఖ వ్రాసినట్లయితే, తానూ తెలుగుదేశం పార్టీలో ఆఫీసుబోయ్ గా పనిచేసేందుకు కూడా సిద్దం అని, దమ్ముంటే చంద్రబాబు ఆవిధంగా లేఖ వ్రాయగలరా? అని సవాలు విసిరేరు హరీష్ రావు. ఈ రోజు డిల్లీలో జరిగిన అఖిలపక్ష సమావేశంలో తెలుగుదేశం పార్టీ సభ్యులు హరీష్ రావు కోరినట్లే వ్రాసి హోంమంత్రికి లేఖ ఇచ్చేరు గనుక, హరీష్ రావు తన మాట నిలబెట్టుకోవాలని ట్వీటర్ లో మెసేజ్ పెట్టాడు లోకేష్.    అందుకు తెరాస నేత కే.తారకరామారావు కొంచెం ఘాటుగా ప్రతిస్పందించగా, హరీష్ రావు మాత్రం ‘లోకేష్ తన మాటల్లో అర్దాన్ని పట్టుకోన్నాడే తప్ప, దాని సారాoశం మాత్రం గ్రహించలేకపోయడని నిశితంగా విమర్శించారు. చంద్రబాబే గనుక ఇప్పటికయినా ప్రత్యెక తెలంగాణా రాష్ట్రం ఏర్పరచాలని స్పష్టంగా ప్రకటించినట్లయితే తానూ ఇప్పటికీ తనమాటకు కట్టుబడి ఉన్నానంటూ’ జవాబిచ్చి, బంతిని లోకేష్ కోర్టులోకి నెట్టేసి ‘ఏమి చేయమంటావో నువ్వే చెప్పు?’ అని ఎదురు ప్రశ్నించాడు.   మీ తండ్రి చంద్రబాబుచేత ‘తెలంగాణా రాష్ట్రం ఏర్పరచాలని’ అందరి ముందూ స్పష్టమయిన ప్రకటన చేయించినట్లయితే తన మాటని తప్పక నిలబెట్టుకొంటానని మరోమారు తెలియజేసి హరీష్ రావు తన రాజకీయపరిణతిని ప్రదర్శించడం ద్వారా లోకేష్ ట్వీటర్ లో పెట్టిన మెసేజ్ ను ఒక చవకబారు ప్రయత్నంగా మలచగలిగేరు. రాజకీయ విశ్లేషకు సైతం హరీష్ రావునే సమర్దించడం చూసినట్లయితే, లోకేష్ ఇకముందు తమ రాజకీయ ప్రత్యర్దులను ఎదుర్కోదలిస్తే, అతను మరికొంత రాజకీయ పరిణతి కనబరచాలని అర్ధమవుతోంది. రాజకీయంగా తమ పార్టీ ప్రత్యర్దులను తన వ్యాక్యాలతో చక్కగా ఇరికించానని తానూ అనుకొంటునపటికీ, హరీష్ రావు వంటి సీనియర్ నేతలతో వ్యవహరించేటప్పుడు, మరింత అప్రమత్తంగా వ్యహరించాలని లోకేష్ గ్రహించాలి.    రాజకీయాలలో కొత్తగా అడుగుపెడుతున్నపుదు చాలా సంయమనం పాటిస్తూ ఆచితూచి మాటలు ఉపయోగించగలిగినప్పుడే ఒక మంచి నాయకుడిగా ఎదగగలుగుతాడు. సిద్దాంతపరంగా అతను ఎన్ని విమర్శలు చేసినా పరువాలేదు గానీ, వ్యక్తిగతంగా చేస్తే మాత్రం నలుగురిలొ నగుబాటు తప్పదు. అలాగ నవ్వులపాలయిన వారిలో పిసిసి అధ్యక్షుడు బోత్ససత్యనారాయణ మొదలుకొని, రాష్ట్రపతి కుమారుడు అభిజిత్ ముఖర్జీ వరకు చాలా మందే ఉన్నారు. అందువల్ల, తనలో ఎంత ఆవేశం, ఆలోచన ఉన్నపటికీ దానిని అదుపులో ఉంచుకొంటూ ప్రతిస్పందిస్తేనే హుందాగా ఉంటుంది లోకేష్ కి.

రాయలసీమ గ్యాంగ్ రేప్ అన్న బైరెడ్డి

    రాజకీయ నాయకుల చేతుల్లో రాయలసీమ ప్రాంతం గ్యాంగ్ రేప్ కు గురయిందని ప్రత్యెక రాయలసీమ రాష్ట్రం కోసం తెలుగు దేశం పార్టీ నుండి బయటకు వచ్చిన బైరెడ్డి రాజ శేఖర రెడ్డి వ్యాఖ్యానించారు. ముఖ్య మంత్రి కిరణ్ కుమార్ రెడ్డి, తెలుగు దేశం పార్టీ అధినేత చంద్ర బాబు నాయుడు, వైఎస్ఆర్ కాంగ్రెస్ పార్టీ అధ్యక్షుడు జగన్ మోహన్ రెడ్డి, సిపిఐ రాష్ట్ర కార్యదర్శి నారాయణ లు రాయలసీమ ప్రాంతానికి తీరని అన్యాయం జరుగుతున్నా, నోరు మెదపడం లేదని ఆరోపించారు.   తెలంగాణా ఇప్పటికే నిర్ణయం అయిపోయిన అంశమని బైరెడ్డి అన్నారు. తమ ప్రాంత పార్లమెంట్ సభ్యులు, అసెంబ్లీ సభ్యులు ఎన్నిక కావడం వరకే రాయలసీమను ఉపయోగించుకొంటారని, దోచుకునేందుకు మాత్రం సమైక్యాంధ్ర కావాలని కోరుతుంటారని దుయ్యబట్టారు. రాయలసీమ భూభాగం కొంచేమేమని, ఆంధ్ర ప్రదేశ్ అయితే ఎక్కువ భూభాగం కలిగిఉంటుంది కాబట్టి దోచుకోవడానికి ఎక్కువ అవకాశం ఉంటుందని తమ నేతలు భావిస్తున్నారని బైరెడ్డి అన్నారు.   ఎన్నికల్లో సీమను వాడుకొంటున్న వారు అసలు సీమ నేతలేనా అని ఆయన ప్రశ్నించారు. తమ ప్రాంతంఫై అభిమానం లేనందుకు సిగ్గుపడాలని ఆయన సీమ నేతలకు హితబోధ చేశారు.

సీల్డ్ కవరులో ఏముందీ? బాబు మనసులో ఏముందీ?

     అఖిలపక్షసమావేశంలో తెలంగాణా అంశంపై తమపార్టీ అభిప్రాయం కుండబద్దలుకొట్టినట్లు చెప్తామని ప్రజలని ఇంతవరకూ ఊరించి, ఊరించి చంపిన చంద్రబాబు మనసులో ఏముందో తెలుసుకోవాలంటే, ఈ రోజు తెలుగుదేశంపార్టీ తరపున వెళ్ళిన ఇద్దరు ప్రతినిధుల ద్వారా సీల్డ్ కవరులో హోంమంత్రి షిండేకి ఇచ్చిన లేఖని, అక్కడ సమావేశంలో ఆ పార్టీ ప్రతినిధులు ఏమి చెప్పారో అనే విషయాన్నీ కలిపి చూసినట్లయితే, చంద్రబాబు (తెలుగుదేశం పార్టీ) మనసులో మాట స్పష్టంగా అర్ధం అవుతుంది.     తన లేఖలో స్పష్టంగా తెలంగాణ ఇవ్వమని గానీ వద్దని గానీ వ్రాయకుండా రాష్ట్రాన్ని పాలిస్తున్నముఖ్యమంత్రుల అసమర్ధ పాలన వల్ల ప్రజలు ఎదుర్కొంటున్న కష్టాలు, రాష్ట్రంలో నెలకొన్న అనిశ్చిత పరిస్తితుల వల్ల రాష్ట్రం నష్టపోతున్న తీరు వగైరా వగైరాలనే వ్రాసుకొచ్చి, చివరాఖరిగా రాష్ట్ర విభజనపై తమ అభిప్రాయం తెలుసుకోవాలంటే ‘రిఫెర్ అవర్ లెటర్ డేటెడ్’ అంటూ తానూ కేంద్రానికి 2008లోనే వ్రాసిన లేఖ చూసుకొని అర్ధం చేసుకోండని ముగించారు. అంతేతప్ప, నాలుగు ముక్కల్లో తెలంగాణా ఇవ్వాలా వద్దా అని మాత్రం స్పష్టంగా వ్రాయలేదు.   అయితే, తమ పార్టీ తెలంగాణా రాష్ట్ర ఏర్పాటునే కోరు కొంటోందని లేఖలో అస్పష్టంగా వ్రాసినప్పటికీ, తరువాత మాట్లాడిన ఆ పార్టీ ప్రతినిధి కడియం శ్రీహరి ద్వారా తెలుగుదేశంపార్టీ అభిప్రాయాన్ని నిర్ద్వందంగా తెలియజేసారు.   అఖిలపక్ష సమావేశంలో తెలుగుదేశం పార్టీ ప్రతినిధులుగా వెళ్ళిన ఇద్దరిలో ఎనమల రామక్రిష్ణుడు పార్టీ వ్రాసిన లేఖని హోంమంత్రికి షిండేకి అందజేసిన తరువాత, తమ పార్టీ అభిప్రాయాన్ని తమపార్టీ మరో ప్రతినిధి కడియం శ్రీహరి తెలియజేస్తారని చెప్పి కుర్చోన్నతరువాత, కడియం శ్రీహరి “తెలంగాణా రాష్ట్రం ఏర్పడాలని తమ పార్టీ కోరుకొంటున్నట్లు విస్పష్టంగా సమావేశంలో ప్రకటించడం ద్వారా, చంద్రబాబు(తెలుగుదేశం పార్టీ) మనసులో మాటని బయట పెట్టారు. అందుకు ఎనమల రామకృష్ణుడు అభ్యంతరం తెలుపకపోవడమే అది పార్టీ యొక్క ఏకగ్రీవ అభిప్రాయమని తెలియజేస్తోంది.   అయితే, మరి కర్ర విరగకుండా పాము చావకూడదన్నట్లు చంద్రబాబు వ్రాసిన ఈ లేఖ ఎందుకంటే, అయన ఇప్పటికే తెలంగాణా ప్రాంతాలలో ప్రజలతో చెపుతున్నట్లు పార్టీ అధినేతగా రెండు ప్రాంతాలలో పార్టీని బ్రతికించుకోవడానికి చేసిన ప్రయత్నంగానే చూడాల్సి ఉంది.   ఏమయినప్పటికీ, చంద్రబాబు తన స్వహస్తాలతో వ్రాసి సంతకం చేసిన లేఖ నఖలు ఇదిగో: దానిని మీరే స్వయంగా చదువుకొని మీకు తోచిన లేదా నచ్చిన భాష్యం చెప్పుకోండి.  

హల్లో హరీష్, అటెండర్ పోస్టు రెడీ : లోకేష్

      ఈ ఏడాది ప్రారంభంలో తన తండ్రి, తెలుగు దేశం అధినేత నారా చంద్ర బాబు నాయుడుఫై టిఆర్ఎస్ నేత హరీష్ రావు చేసిన కామెంట్ కు నారా లోకేష్ ఘాటుగా స్పందించారు. తెలంగాణా ప్రత్యెక రాష్ట్రానికి అనుకూలంగా చంద్ర బాబుతో చిదంబరానికి లేఖ రాయిస్తే, తెలుగు దేశం పార్టీ కార్యాలయం ఎన్టీఆర్ ట్రస్ట్ భవన్ లో అటెండర్ ఉద్యోగం చేస్తానని హరీష్ రావు తెలంగాణా ప్రాంతానికి చెందిన తెలుగు దేశం నేతలకు గత జనవరి 13 న సవాల్ విసిరిన విషయం తెలిసిందే.   ‘హరీష్, ఎన్టీఆర్ భవన్ లో అటెండర్ పోస్టు విషయంలో మీ నుండి అప్లికేషన్ కోసం ఎదురుచూస్తున్నాం. అలాగే, కెటిఆర్, మీరు రాజీనామా ఎప్పుడు చేస్తారు?’ అని లోకేష్ తన ట్విట్టర్ అకౌంట్లో పేర్కొన్నారు.   తాజాగా, తెలంగాణాకు అనుకూలమని టిడిపి హోం మంత్రి సుశీల్ కుమార్ షిండే కు లేఖ ఇచ్చిన నేపధ్యంలో లోకేష్ ఈ కామెంట్ చేయడం సంచలనం కలిగించింది. తెలంగాణా రాష్ట్రాన్ని తాము ఎప్పుడూ వ్యతిరేకించలేదని, ఇప్పుడు కూడా ఇదే విషయాన్ని ఈ రోజు జరిగిన అఖిల పక్ష సమావేశంలో చెప్పామని లోకేష్ అన్నారు. ఎన్టిఆర్ ట్రస్ట్ భవన్లో అటెండర్ పోస్టు హరీష్ కోసం రిజర్వ్ చేసి పెట్టామని, ఇక ఆయన అప్లికేషన్ కోసం మాత్రం వేచి చూస్తున్నామని లోకేష్ చురకలంటించారు.   అలాగే, చంద్ర బాబు ఇలా చేస్తే తాను తన శాసనసభ్యత్వానికి రాజీనామా చేస్తానని టిఆర్ఎస్ నేత కె.తారక రామారావు గత ఫిబ్రవరి 10 న ఓ పత్రికా ప్రకటన ఇచ్చారు. ఆయన వ్యాఖ్యలకు కూడా లోకేష్ తన ట్విట్టర్ అకౌంట్ లోని అదే కామెంట్ లో తగిన ఘాటు సమాధానం ఇచ్చారు.   లోకేష్ తాజా వ్యాఖ్యలకు హరీష్ నుండి ఇంకా ప్రతిస్పందన రాలేదు. అయితే, లోకేష్ ఈ వ్యాఖ్యలు కాస్తంత రాజకీయ అలజడి చేసే అవకాశం ఉందని మాత్రం రాజకీయ పరిశీలకులు అంచనా వేస్తున్నారు.

అందరి అభిప్రాయాలు విన్నాం : షిండే

      తెలంగాణా విషయాన్ని చర్చించేందుకు ఢిల్లీ లో జరిగిన అఖిల పక్ష సమావేశం ముగిసింది. రాష్ట్రంలోని ఎనిమిది రాజకీయ పార్టీల ప్రతినిధులు ఈ సమావేశానికి హాజరయ్యి తమ పార్టీల వాణిని హోం మంత్రి సుశీల్ కుమార్ షిండే ముందు వినిపించారు.   ఈ సమావేశం ముగిసిన అనంతరం షిండే విలేఖరులతో మాట్లాడుతూ, అన్ని రాజకీయ పార్టీల అభిప్రాయాలను విన్నామని, ఈ విషయంలో నెల రోజుల్లో ఓ నిర్ణయానికి వస్తామని అన్నారు. అంత వరకూ, రాష్ట్రంలోని అన్ని ప్రాంతాల ప్రజలు, ముఖ్యంగా యువత, సంయమనంతో ఉండాలని అన్నారు. అన్ని రాజకీయ పార్టీలు ఈ సమావేశంలో వ్యక్తం చేసిన అభిప్రాయాలకు అనుగుణంగానే నిర్ణయం తీసుకొంటామని షిండే అన్నారు.   ఆయా పార్టీలు వ్యక్తం చేసిన అభిప్రాయాలను కేంద్రానికి తెలియచేస్తానని షిండే అన్నారు. సమావేశమంతా స్నేహపూర్వక వాతావరణంలో జరిగిందని ఆయన అన్నారు. ప్రత్యెక తెలంగాణా రాష్ట్రం విషయాన్ని చర్చించేందుకు ఇదే చివరి అఖిల పక్ష సమావేశమని మంత్రి అన్నారు. రాష్ట్ర ప్రజల ఆకాంక్షలకు అనుగుణంగానే తెలంగాణాఫై కేంద్రం నిర్ణయం ఉంటుందని అన్న షిండే సమావేశంలో వివిధ పార్టీలు వ్యక్తం చేసిన అభిప్రాయాలను చెప్పేందుకు మాత్రం నిరాకరించారు.

ఎన్టీఆర్ కు తీరని అవమానం !

    ఎన్టీఆర్, ఈ పదం ఆంధ్ర ప్రదేశ్ రాష్ట్రంలో ఎవరికీ పరిచయం చెయ్యాల్సిన అవసరం లేదు. ఆయనను తెలుగు జాతి ఆత్మ గౌరవానికి ప్రతీకగా భావిస్తారు. తెలుగు ప్రజలకు ఆయన ఆరాధ్య దైవం. తెలుగు జాతి గొప్పదనాన్ని ప్రపంచానికి తెలియ చెప్పిన గొప్ప వ్యక్తిగా ఆయనను తెలుగు ప్రజలు చిర కాలం గుర్తు పెట్టుకుంటారనడంలో రాష్ట్రంలో, బహుశా దేశంలో కూడా, ఎవరికీ ఎలాంటి సందేహం ఉండకపోవచ్చు.   అలాగే, తెలుగు సినీ పరిశ్రమలో దాదాపు అన్ని పౌరాణిక పాత్రల్లో నటించి రాముడంటే ఎన్టీఆరే, కృష్ణుడంటే ఎన్టీఆరే అని గుర్తువచ్చేలా తెలుగు ప్రజల మనస్సులో నిలిచిపోయారు. అంతే కాదు, ఆయనను తెలుగు ప్రజలు మూడు సార్లు ముఖ్య మంత్రిగా ఎన్నుకొన్నారు. తెలుగు గడ్డ మీద ప్రతి పేదవాడికి ఉపయోగపడే అనేక పధకాలను ప్రవేశపెట్టి వారికి దేవుడిగా గుర్తించబడ్డ వ్యక్తి,   అవినీతి మచ్చలేని నాయకుడు. ఇలా సినీ, రాజకీయ రంగాల్లో తనదైన ముద్ర వేసి, తెలుగేతర ప్రాంతాల్లో తెలుగు వాడివేడిని చాటి చెప్పిన వ్యక్తి ఆయన. అన్నగారుగా తెలుగు ప్రజలచే కీర్తించబడే అరుదైన వ్యక్తి ఎన్టీఆర్.   రాజకీయాలకు అతీతమైన గొప్ప వ్యక్తి ఆయన. ఆ నట సార్వభౌముడికి మాత్రం ప్రపంచ మహా సభల్లో తీరని అవమానం జరిగింది. అయితే, రాష్ట్ర ప్రభుత్వం మాత్రం ఆయన తెలుగు జాతికి పెద్దగా చేసిన సేవలేమీ లేవనే విధంగా వ్యవహరించింది. నిన్న తిరుపతిలో అత్యంత అట్టహాసంగా ప్రారంభం అయిన నాలుగవ ప్రపంచ తెలుగు మహా సభల్లో ఆయన ప్రస్తావన ఎక్కడా లేదు. ఆయన పేరు ఎక్కడా వినిపించకుండానే తెలుగు మహాసభలు ప్రారంభం అయ్యాయి.   ముఖ్య మంత్రి కిరణ్ కుమార్ రెడ్డి తన ప్రసంగంలో అన్నమయ్య, పి.వి.నరసింహా రావు, నీలం సంజీవ రెడ్డి, వెంగమాంబ, పింగళి వెంకయ్య, శంకరంబాడి సుందరాచార్య, జి.ఎం.సి.బాలయోగిల పేర్లను ప్రస్తావించారు. అయితే, తాను నిర్వహిస్తున్న పదవిలో మూడు సార్లు కూర్చున్న ఎన్టీఆర్ మాత్రం ఆయనకు గుర్తుకు రాలేదు !   ఆలాంటి గొప్ప తెలుగు వ్యక్తిని, అదీ తెలుగు మహా సభల్లో స్మరించుకోవడంలో కూడా కుళ్ళు రాజకీయాలు చోటు చేసుకోవడంఫై ఎన్టీఆర్ అభిమానులతో పాటు, తెలుగు భాషాభిమానులు కూడా తీవ్ర అసంతృప్తిని వ్యక్తం చేస్తున్నారు. చివరకు, సభాప్రాంగణంలో ఏర్పాటు చేసిన తెలుగు ప్రముఖుల ఫోటో ఎక్జిబిషన్ లో మాత్రం ఎన్టీఆర్ ఫోటోను కనిపించీ కనిపించకుండా ఏర్పాటు చేసి, ఆయన ముఖం కనిపించకుండా చేశారు.

‘వైఎస్ మనుషులందరిపైనా ఏసిబి దాడి చేయాలి’

        దివంగత ముఖ్య మంత్రి వైఎస్ రాజ శేఖర రెడ్డి హయాంలో కీలక పదవుల్లో ఉన్నవారందరిఫైనా ఏసిబి దాడులు చేయించాలని, వారి ఆస్తులఫైన విచారణ చేయించాలని కాంగ్రెస్ సీనియర్ నేత వి. హనుమంత రావు డిమాండ్ చేశారు. ముఖ్య మంత్రి కిరణ్ కుమార్ రెడ్డి ఈ దిశగా తగు చర్యలు తీసుకోవాలని ఆయన సూచించారు.   రాజ శేఖర రెడ్డి హయాంలో ఆంధ్ర ప్రదేశ్ పబ్లిక్ సర్వీస్ కమీషన్ లో సభ్యునిగా నియమితులైన రిపున్జయ్ రెడ్డి నాలుగేళ్లలో వందల కోట్ల రూపాయల ఆస్తులను సంపాదించారని ఆయన ఆరోపించారు. అలాగే, వైఎస్ పాలనలో ముఖ్య పదవుల్లో ఉన్న అధికారులఫైన కూడా కన్నేయాలని ఆయన డిమాండ్ చేశారు. అధికారులు కూడా ఆ సమయంలో పెద్ద ఎత్తున అవినీతికి పాల్పడ్డారని ఆయన ఆరోపించారు.   ప్రభుత్వ భూములను కాపాడాల్సిన హైదరాబాద్ కలెక్టర్ నవీన్ మిట్టల్ ప్రైవేటు వ్యక్తులకు సహకరించిన విషయంలో ప్రభుత్వానికి నివేదిక అందినప్పటికీ చర్య ఎందుకు తీసుకోలేదని విహెచ్ ప్రశ్నించారు.

కాంగ్రెస్ అభిప్రాయం చెప్పకుంటే నిలదీస్తాం: యనమల

      తెలంగాణపై జరగనున్న అఖిల పక్ష సమావేశానికి తెలుగుదేశం పార్టీ తరుపున ఎవరు వెళ్ళాలన్న విషయం పై కరీంనగర్ జిల్లాలో పాదయాత్రలో ఉన్న తమ పార్టీ అధ్యక్షుడు చంద్రబాబు నాయుడు తో ఇరు ప్రాంతాల పొలిట్ బ్యూరో సభ్యులు సుదీర్ఘ౦గా చర్చించిన తరువాత ఓ నిర్ణయానికోచ్చినట్లు తెలుస్తోంది.   చర్చ అనంతరం యనమల మీడియాతో మాట్లాడారు. సీమాంధ్ర నేత ప్రతినిధిగా యనమల రామకృష్ణుడు, తెలంగాణ నుండి కడియం శ్రీహరిలు అఖిల పక్ష సమావేశానికి వెళ్లనున్నట్లు చెప్పారు. తాము కొన్ని విషయాలపై సుదీర్ఘంగా చర్చించామని, తామిద్దరం ఒకే అభిప్రాయాన్ని చెప్తామని, అదే సమావేశంలో కాంగ్రెసు పార్టీ వైఖరిపై తాము నిలదీస్తామన్నారు. తమ పార్టీ అభిప్రాయాన్ని సీల్డ్ కవర్ రూపంలో కేంద్ర హోంమంత్రి సుశీల్ కుమార్ షిండేకు అందజేస్తామన్నారు. 2008లో రాసిన లేఖకు తాము కట్టుబడి ఉన్నామన్నారు. తాము ఆ లేఖను వెనక్కి తీసుకోలేదన్నారు. అఖిల పక్ష సమావేశం ముగిసిన తర్వాత కేంద్రం తన వైఖరి చెప్పాలని డిమాండ్ చేస్తామన్నారు. సమావేశంలో కాంగ్రెసు అభిప్రాయం చెప్పకుంటే అన్ని పార్టీలు నిలదీయాలన్నారు.

ఇంకా తేలని కాంగ్రెస్ ప్రతినిధులు !

        తెలంగాణాఫై ఢిల్లీ లో జరగనున్న అఖిల పక్ష సమావేశానికి ఇంకా సరిగ్గా ఒక్క రోజు మాత్రమే ఉన్నప్పటికీ అధికార కాంగ్రెస్ పార్టీ నుండి హాజరయ్యే ప్రతినిధుల పేర్లు ఇంకా ఖరారు కాలేదు. బిజెపి, టిఆర్ఎస్, ఎంఐఎం, సిపిఐ, సిపిఎం లు ఇప్పటికే తమ ప్రతినిధుల పేర్లను ఖరారు చేసాయి.   కాంగ్రెస్ పార్టీ నుండి ఉండవల్లి అరుణ్ కుమార్, సురేష్ షెట్కార్ వెళ్తారని ముందుగా ప్రచారం జరిగింది. అయితే, ప్రస్తుతం ఆరుగురు పేర్లను కాంగ్రెస్ పార్టీ పరిశీలిస్తున్నట్లు సమాచారం. సీమాంధ్ర నుండి మాజీ మంత్రి గాదె వెంకట రెడ్డి, శాసన మండలి సభ్యుడు చెంగల్రాయుడు, పార్లమెంట్ సభ్యుడు ఉండవల్లి అరుణ్ కుమార్ ల పేర్లు పరిశీలనలో ఉన్నట్లు తెలుస్తోంది. ఇక తెలంగాణా ప్రాంతం నుండి మాజీ అసెంబ్లీ స్పీకర్ కె.ఆర్.సురేష్ రెడ్డి, మాజీ మంత్రి చిన్నారెడ్డి, మాజీ పార్లమెంట్ సభ్యుడు మల్లు రవిల పేర్లను పార్టీ అధిష్టానం పరిశీలిస్తున్నట్లు సమాచారం.   తమ ప్రతినిధులుగా ఎవరిని పంపాలనే విషయాన్ని చర్చించడానికి ముఖ్య మంత్రి కిరణ్ కుమార్ రెడ్డి తన క్యాంప్ ఆఫీస్ లో మూడు ప్రాంతాలకు చెందిన నేతలతో నిన్న సమావేశమయ్యారు. ఈ సమావేశంలో పిసిసి అధ్యక్షుడు బొత్స సత్యానారాయణ, పార్లమెంట్ సభ్యుడు గుత్తా సుఖేందర్ రెడ్డిలు కూడా పాల్గొన్నారు. రాష్ట్ర పార్టీ కార్యాలయం వర్గాలు ఈ నేతలందరికీ ఫోన్లు చేసి ఈ సమావేశానికి హాజరయ్యేందుకు అందుబాటులో ఉండాలని సూచించినట్లు సమాచారం.