Home  
Politics

త్వరలో జగన్ కి బెయిలు మంజూరు అవబోతోందా?

  గత ఏడు నెలలుగా వివిధ కేసులలో చంచల్ గూడా జైలులో నిర్బంధించబడ్డ జగన్మోహన్ రెడ్డి పట్టువదలని విక్రమార్కుడిలా కోర్టులో బెయిలు దరఖాస్తులు వేస్తూనే ఉన్నాడు. కోర్టులు వాటినన్నిటినీ కూడా తిరస్కరించినప్పటికీ, తనకి అన్యాయం జరుగుతోందనే సంగతిని మాత్రం కోర్టువారికి తెలియజేయగలిగేడు. ఇన్ని నెలలు జైలులో నిర్బందించినప్పటికీ, ఇంతవరకు కోర్టులు ఒక్క కేసులో కూడా విచారణ మొదలుపెట్టేందుకు, సిబి.ఐ. తగిన సమాచారంతో ముందుకు రాలేకపోయిందని, ఇంకా ఇప్పటికీ సమయం కోరుతోందని కోర్టువారికి జగన్ తరపున లాయర్లు విన్నవించుకోవడంతో, హైకోర్టు కూడా వారి వాదనలతో అంగీకరించి, జగన్ కేసుల విషయంలో సి.బి.ఐ. తన దర్యాప్తు ఎంతవరకు పురోగతి సాదించిందో తెలుపమని రిపోర్ట్ కోరింది. సిబిఐ తన రిపోర్టులను హైకోర్టుకి సమర్పిస్తూ, వివిధ కేసులకు సంబంధించి వివరాల కోసం తాము సచివాలయానికి వ్రాసిన లేఖలకి స్పందన కరువయిందని తెలుపుతూ, ప్రభుత్వం నుండి పూర్తీ సమాచారం పొందేందుకు మరో మూడు నెలలయినా పట్టవచ్చునని, అంతవరకూ జగన్ కు బెయిలు ఈయవద్దని కోర్టును కోరింది. అయితే, ఇప్పటికే ఏడూ నెలలు ఎటువంటి విచారణ లేకుండా జగన్ మోహన్ రెడ్డిని నిర్బందించడం అన్యాయం అని వాదిస్తున్న అతని లాయర్స్ వాదనతో కోర్టు గనుక అంగీకరిస్తే త్వరలో జగన్మోహన్ రెడ్డికి కోర్టు బెయిలు మంజూరు చేసే అవకాశాలు ఉన్నాయి. గానీ, కోర్టు, సిబిఐ వాదనతో అంగీకరించినట్లయితే మాత్రం జగన్ కి మరో మూడు నెలలు చెంచల్ గూడా నివాసం తప్పకపోవచ్చును.

జాతకాలు చెపుతున్న కామ్రేడ్లు

  రాష్ట్రంలో మిగిలిన మరే రాజకీయ పార్టీలకన్నాకూడా ఎక్కువగా ప్రజలతో మమేకమవుతూ, వారి పక్షాన్న నిలబడి వారి సమస్యల పరిష్కారానికి నిత్యం పోరాటాలుచేసే కమ్యునిస్ట్, మార్క్సిస్ట్ పార్టీలు రెండూకూడా దశాబ్దాలు గడుస్తున్నా ఇంతవరకు రాష్ట్రంలో స్వయంగా గానీ, సంకీర్ణంగా గానీ ప్రభుత్వం ఏర్పాటు చేయలేకపోయాయి.   ఎన్ని పోరాటాలుచేసినా ఆ రెండు పార్టీలు రాష్ట్రంలో ప్రధాన రాజకీయ పార్టీలకు తోకపార్టీలుగానే మిగిలిపోయాయి. అందుకు ఆపార్టీల రాష్ట్రనాయకత్వంలో లోపమా, లేక తమ పార్టీసిద్దాంతాలపట్ల ప్రజలలో నమ్మకం కల్గించలేకపోవడంవల్ల విఫలమవుతున్నారా? లేక ప్రదాన రాజకీయపార్టీల ప్రభావం ప్రజలమీద ఎక్కువగా ఉన్నందునే వెనుకబడిపోయారా? కారణాలు వారే తెలుపాలి.   రెండు పార్టీలుకూడా తాము జీవితాంతము ప్రధానరాజకీయ పార్టీలకు తోకపార్టీలుగానే ఉండిపోయేందుకు మానసికంగా సంసిద్దమయిపోయినట్లే కనిపిస్తోంది. విచారించవలసిన విషయం ఏమిటంటే, అలాగ మిగిలిపోయినందుకు ఆ రెండు పార్టీలు ఏనాడు చింతిస్తున్నట్లు గానీ, సిగ్గు పడుతున్నట్లు గానీ కనిపించకపోవడం. ప్రస్తుత అవి ఉన్న స్థాయిలోనే ఎన్నటికీ ఉండిపోవాలనుకొంటున్నాయే తప్ప, ఎందుకు ఇలాగ ఉండిపోయాము? ఎంతకాలం ఈవిదంగా ఉండిపోవాలి మనము? అని ఆలోచనలుచేసి, కొత్తగా చేసిన ప్రయత్నం ఏది లేదు.   ఒక సారి చేతులు కలుపుకొంటూ, మరోసారి తమ కొడవళ్ళు ఒకరిపై ఒకరు దూసుకొంటూ కాలక్షేపం చేసేస్తున్నాయి ఆ రెండు పార్టీలుకూడా.   ఇక విషయానికి వస్తే, మార్క్సిస్టు పార్టీ నాయకుడు బీవి రాఘవులు, తమ మిత్రపార్టీ సి.పి.ఐ. నాయకుడు నారాయణ తెలంగాణాపై నిత్యం చేస్తున్న ఊహాగానాలను గమనించి, ఆయననుద్దేశించి మాట్లాడుతూ కమ్యునిస్ట్ పార్టీ తమ ఆఫీసులో జాతకాలు చెప్పుకొనే దుకాణం కూడా తెరుచుకొంటే బాగుంటుంది అని చురకలు వేసారు. అయితే, దానిని సరదాగా తీసుకొన్న సి.పి.ఐ. నాయకుడు నారాయణ వెంటనే స్పందిస్తూ, “కమ్యునిస్ట్, మార్క్సిస్ట్ పార్టీలు రెండూ కూడా భవిష్యత్ సమాజం కోసం చేసిన ఆలోచనలోంచి పుట్టుకు వచ్చినవే. అందుకే రెండుకూడా ఎవరి జాతకం ఎలా ఉంటుందో చెపుతుంటాయి” అని జవాబిచ్చేరు.   గానీ కామ్రేడ్లు ఇద్దరూ ఎంతసేపు కూడా ఎదుటవారి ‘సైకిళ్ళు,’ ‘కార్లు’ ఎక్కుతూ వారి ‘హస్తరేఖల్లోనే’ తమ జాతకాలు చూసుకొవడం ఒక వింత.

మంత్రి రాంరెడ్డి కి శ్రీ చైతన్య స్కూల్ 35 లక్షల లంచం.. !

    రాష్ట్ర ఉద్యానవన శాఖ మంత్రి రాంరెడ్డి వెంకట రెడ్డికి తమ స్కూల్ నిర్వహణ కోసం దాదాపు 35 లక్షల రూపాయలు లంచం ఇచ్చామని ఖమ్మం జిల్లాలోని ఓ పాఠశాల యాజమాన్యం హైకోర్టు కెక్కింది. జిల్లాలోని ఎన్కూర్ లో గల శ్రీ చైతన్య టెక్నో స్కూల్స్ యాజమాన్యం కరస్పాండెంట్ గుగులోట్ చిన్న, హెడ్ మాస్టర్ రమేష్ లు మంత్రిఫై ఈ పిటీషన్ వేసి సంచలనం సృష్టించారు.   మంత్రితో పాటు ఇతర అధికారులకు కూడా దాదాపు 15 లక్షల రూపాయలు ఇచ్చామని వారు హైకోర్టు కు తెలియచేసారు. అయితే, ఈ పిటీషన్ ను స్వీకరించిన ధర్మాసనం లంచం ఇచ్చిన వారిఫైన కూడా చర్యలు తప్పవని పేర్కొంటూ, దీనిఫై విచారణ సంక్రాంతి తర్వాత ఉంటుందని ప్రకటించింది. సుమారు మూడు సంవత్సరాల క్రితం తమ పాఠశాల ఏర్పాటు సమయంలో వీరందరికీ ఈ లంచాలు ఇచ్చామని పాఠశాల యాజమాన్యం అంటోంది.   తమ పాఠశాలను మూసివేయాలని మంత్రి ఇచ్చిన సూచనల మేరకే ఎంఇఓ తగిన ఉత్తర్వులు జారీ చేసారని, వాటిని నిలిపివేయాలని వారు ఆ పిటీషన్లో పేర్కొన్నారు.   అసలు గిరిజన ప్రాంతాల్లో పాఠశాలలు ఏర్పాటు చేయాలంటే ఇలాంటి వారి వల్ల తీవ్ర ఇబ్బందులు ఎదురవుతున్నాయని కూడా వారు ఆ పిటీషన్లో పేర్కొన్నారు. అసలు ఈ లంచం విషయం ఎలా ఉన్నా, పిటీషనర్లు ప్రస్తావించిన ఈ అంశంఫై మాత్రం ప్రభుత్వం దృష్టి సారించాల్సిఉంది.

వైసిపి నుండి ఆహ్వానం వచ్చింది : వట్టి

    వైఎస్ఆర్ కాంగ్రెస్ పార్టీ నుండి తనకు ఆహ్వానం వచ్చిందని రాష్ట్ర మంత్రి వట్టి వసంత కుమార్ వెల్లడించారు. గత రాత్రి పశ్చిమ గోదావరి జిల్లా నరసాపురం లో జరిగిన కాంగ్రెస్ పార్టీ సమావేశంలో మాట్లాడుతూ ఆయన ఈ విషయాన్ని తెలియచేసారు.   తనతో పాటు, మంత్రి పితాని సత్యనారాయణ కూడా తమ పార్టీలో చేరుతున్నారంటూ ఆ పార్టీ నేతలు అసత్య ప్రచారం చేస్తున్నారని ఆయన అన్నారు. అయితే, తాను విద్యార్ధి దశ నుండి కాంగ్రెస్ పార్టీలో ఉన్నానని, తనకు ఇంత గుర్తింపు, మంత్రి పదవి ఇచ్చి గౌరవించిన పార్టీని వదలి రాలేనని వారితో అన్నానని ఆయన అన్నారు.   ఇది సభ్యత ఉన్నవాళ్ళు చేసే పని కూడా కాదని వట్టి వ్యాఖ్యానించారు. తాను ఎట్టి పరిస్థితుల్లోను ఆ పార్టీలో చేరానని వారితో అన్నానని మంత్రి అన్నారు. పదవుల కోసం పాకులాడే వారితో జగన్ పార్టీ నేతలు ఆటలాడుకుంటున్నారని వట్టి అన్నారు. తప్పుడు ప్రచారాలతో రాజకీయ గందరగోళానికి కూడా కారణమవుతున్నారని ఆయన వ్యాఖ్యానించారు. ఆయన దివంగత ముఖ్య మంత్రి వైఎస్ రాజ శేఖర రెడ్డికి అత్యంత సన్నిహితంగా మెలిగేవారు.

ఎంఐఎం అక్బరుద్దీన్ ఫై చర్యలను పరిశీలిస్తున్నాం : స్పీకర్

      మత విద్వేషాలను రెచ్చగొట్టేలా వ్యాఖ్యలు చేసిన ఎంఐఎం శాసనసభ్యుడు అక్బరుద్దీన్ ఓవైసిఫై శాసనసభ నిభందనలకు లోబడి చర్యలు తీసుకొనే విషయాన్ని పరిశీలుస్తున్నామని స్పీకర్ నాదెండ్ల మనోహర్ ప్రకటించారు.   అక్బరుద్దీన్ విషయాన్ని శాసనసభ నైతిక విలువల కమిటీకి అప్పగించే విషయాన్ని ఆలోచిస్తున్నామని స్పీకర్ అన్నారు. ఎంఎల్ఏ గా ఉండి ఆయన ఈ విధంగా వ్యాఖ్యలు చేయడంతో స్పీకర్ మనోహర్ మీడియా తో మాట్లాడుతూ ఈ ప్రకటన చేశారు. అక్బర్ ఈ వ్యాఖ్యలు ఓ బహిరంగ సభలో చేసినప్పటికీ, శాసనసభ నిభందనల పరిధిలో ఎలాంటి చర్యలు ఆయనఫై తీసుకోవాలో కూడా సమీక్ష జరుపుతున్నామని స్పీకర్ అన్నారు. ఆయన చేసిన ఈ తీవ్ర వ్యాఖ్యలను లోతుగా పరిశీలించాలని తనకు చాలా ఫిర్యాదులు అందాయని మనోహర్ ప్రకటించారు.   సభలో సభ్యుడుగా ఉన్నప్పుడు సభ గౌరవాన్ని దృష్టిలో పెట్టుకొని మాట్లాడాల్సి ఉంటుందని స్పీకర్ సభ్యులందరికీ సూచించారు. అలాగే, పరిటాల సునీత ఇంటిలో అర్ధరాత్రి చేసిన తనిఖీల విషయంఫై తనకు వెంటనే నివేదిక ఇవ్వాలని అనంతపూర్ జిల్లా ఎస్ పి ని ఆదేశించానని మనోహర్ అన్నారు.

పరిటాల కేసును కొత్తమలుపు తిప్పిన అదృశ్య హస్తాలు

  పరిటాల తనయుడిని హత్యకేసులో ఇరికించే తొందరలో ఆనంతపురం పోలీసులు, హత్య జరుగకపోయినప్పటికీ, సాధారణంగా హత్యజరిగిన తరువాత మాత్రమే వాడే సెక్షన్ల క్రింద పరిటాల తనయుడు శ్రీరామ్ మరియు ఇతర ముద్దాయిలపై కేసు నమోదు చేయడం, అందుకు కోర్టునుండి మొట్టికాయలు తినడం, ఆ తరువాత మళ్ళీ మరో సెక్షన్ క్రింద కేసు నమోదుచేయడం, వారి అత్యుత్సాహానికి నిదర్శనంగా నిలుస్తోంది.   తెలుగుదేశంపార్టీ అధికార ప్రతినిది రేవంత్ రెడ్డి ఈ రోజు మద్యాహ్నం మీడియాతో మాట్లాడుతూ పోలీసుల ఈ అత్యుసాహానికి కారకులెవరు అని ప్రశ్నిస్తూ, అసలు ఎవరిపైనా హత్యాప్రయత్నం జరిగిందని పోలీసులు కేసులు నమోదు చేసేరో, ఆ వ్యక్తి అనగా సుధాకర్ రెడ్డి స్వయంగా తనకు పరిటాల కుటుంబముతో ఏ వ్యక్తిగత కక్షలు, గొడవలులేవని మీడియా ముందే చెప్పినపుడు, మరి ఏ ఉద్దేశ్యంతో ఈ విధంగా పరిటాల తనయుడు శ్రీరామ్ పై పోలీసులు కేసు నమోదు చేసారని ప్రశ్నించారు.   అంతేగాకుండా, తమ పార్టీకి చెందిన మహిళా శాసనసభ్యురాలయిన పరిటాల సునీత ఇంటిని అర్ధరాత్రి పోలీసులు సోదాలు చేయడంపై స్పీకర్ నాదెండ్ల మనోహర్ కి లిఖితపూర్వక పిర్యాదు చేయడం, ఆయన వెంటనే స్పందిస్తూ 48గంటల్లో తనకు నివేదికను సమర్పించమని అనంతపురం జిల్లా యస్.పీ.ని ఆదేశించడంతో పోలీసులు తత్తరపడుతూ తమ తప్పు కప్పిపుచ్చుకొనేందుకు తిప్పలు పడుతున్నారు. ఆ ప్రయత్నంలో భాగంగా ఇప్పుడు కేసు ఒక కొత్త మలుపుతిరిగింది.   ఇంతవరకూ పరిటాల కుటుంబముతో తనకు ఏ వ్యక్తిగత కక్షలు, గొడవలు లేవని మీడియా ముందే చెప్పిన సుధాకర్ రెడ్డి, మాటమార్చి పరిటాల సునీత తమ్ముడు బాలాజీ ఇదివరకు ఒకసారి తనపై హత్యా ప్రయత్నం చేసాడని, మళ్ళీ ఇప్పుడు జరిగిన హత్యప్రయత్నంతో తనకూ, తన కుటుంబానికి కూడా ప్రాణభయం ఏర్పడిందని, అందువల్ల తనకు, తన కుటుంబానికి పోలీసు రక్షణ కలిపించమని సుధాకర్ రెడ్డి ఈ రోజు ధర్మవరం పోలీసులను కోరారు.   అసలు తాను పరిటాల శ్రీరామ్ పై ఫిర్యాదు చేయలేదని సుధాకరరెడ్డి ప్రకటించారు. తనను ఎవరు టార్గెట్ చేశారో పోలీసులే తేల్చాలని చెప్పిన సుధాకర్ రెడ్డి ఇంత ఆకస్మాతుగా మాట ఎందుకు మార్చేడు? ఆవిధంగా పలికేందుకు అతనిపై ఎవరెవరు ఒత్తిడి తెచ్చేరు? ఎందుకు ఒత్తిడి తెచ్చేరు? అనే కొత్త ప్రశ్నలు పుట్టుకొచ్చి ఈ కుట్ర వెనుక ఎవరో కొందరు రాజకీయ పెద్దల ప్రమేయం ఉండి ఉండవచ్చునని సూచిస్తోంది.    

ఎంఐఎం అక్బరుద్దీన్ ది దేశ ద్రోహమే : వెంకయ్య

    ఎంఐఎం శాసనసభ్యుడు అక్బరుద్దీన్ ఓవైసి నిర్మల్ లో చేసిన వ్యాఖ్యలు దేశ ద్రోహం కిందకే వస్తాయని బిజెపి సీనియర్ నేత వెంకయ్య నాయుడు అన్నారు. ఆయన హైదరాబాద్ లో నిన్న పార్టీ రాష్ట్ర కార్యాలయంలో పార్టీ నేతలతో కలిసి విలేఖరులతో మాట్లాడారు.   పాకిస్తాన్ ఉగ్రవాది కసబ్ కి కోర్టు విధించిన ఉరి శిక్షను ప్రశ్నించడం నేరమేనని నాయుడు వ్యాఖ్యానించారు. ఆయన చేసిన వ్యాఖ్యలన్నీ మత విద్వేషాలను రెచ్చగొట్టే విధంగా ఉన్నాయని ఆయన అన్నారు. ఓవైసి దేశ సార్వభౌమత్వాన్ని ప్రశ్నించే విధంగా మాట్లాడారని నాయుడు అన్నారు. ఆయనను వెంటనే అరెస్టు చేసి, కఠినంగా శిక్షించాలని ఆయన డిమాండ్ చేశారు.   అసలు ఎంఐఎం పార్టీ ముస్లింల ప్రతినిధి ఎంత మాత్రం కాదని, అది కేవలం రజకార్ల సంస్థ అని నాయుడు అన్నారు. అసలు ఎంఐఎం మైనారిటీలకు చేసిందేమీ లేదని నాయుడు వ్యాఖ్యానించారు. ఆయన హిందూ దేవుళ్ళను విమర్సిస్తోంటే ప్రభుత్వం ఏమి చేస్తోందని నాయుడు ప్రశ్నించారు. ఆయన చట్టాన్ని అదుపులోకి తీసుకొని ఇష్టం వచ్చినట్లు మాట్లాడుతున్నారని ఆయన ఆరోపించారు.   ఒవైసీ వ్యవస్థను ప్రశ్నించే విధంగా మాట్లాడుతోంటే ముఖ్య మంత్రి, పోలీసులు ఎందుకు మౌనంగా ఉన్నారని నాయుడు అన్నారు.

బయటపడుతున్న పరిటాల కేసులో రాజకీయ కోణం..!

  తెలుగుదేశం పార్టీ శాసనసభ్యురాలు పరిటాల సునీత ఆమె పార్టీ నేతలు ఆరోపిస్తున్నట్లు, పరిటాల శ్రీరామ్ పై నమోదుచేయబడిన హత్యాయత్నం కేసులో ఇమిడిఉన్నరాజకీయకోణం కూడా క్రమంగా బయటకోస్తోంది.   ధర్మవరం పోలీసులు, పరిటాల శ్రీరామ్ అనుచరులుగా చెప్పబడుతున్న ఆరుగురు వ్యక్తులను స్థానిక కాంగ్రెస్ నేత సుధాకర్ రెడ్డిపై హత్యాయత్నానికి పాల్పడినట్లు గుర్తించి వారిపై కేసు నమోదు చేసారు. వారు వెల్లడించిన వివరాల ఆధారంగా పోలీసులు పరిటాల శ్రీరామ్ పై కూడా కేసు నమోదు చేసి, అతన్నిఅరెస్ట్ చేసేందుకు ప్రయత్నించగా, ఆవిషయం తెలిసుకొన్నపరిటాల శ్రీరామ్ అజ్ఞాతంలోకి వెళ్ళిపోయి, ముందస్తు బెయిలుకోసం కోర్టులో దరఖాస్తు చేసుకొన్నాడు.   పోలీసుల గాలింపు చర్యలో భాగంగా తెలుగుదేశం పార్టీ శాసనసభ్యురాలు పరిటాల సునీత మరియు వారి బంధువుల ఇళ్ళలో సోదాలు నిర్వహించడం వివాదాస్పదమయింది. ముఖ్యంగా ఒక మహిళా శాసనసభ్యురాలి ఇంట్లో ఆమె అనుమతి లేకుండా రాత్రిపూట పోలీసులు గాలింపు చేప్పటి ఎందుకు అంత అత్యుత్సాహం చూపారో తెలుపాలని తెలుగుదేశం డిమాండ్ చేసింది. పరిటాల సునీత పత్రికలవారితో మాట్లాడుతూ, హత్యయత్నం మీద అరెస్టు చేసిన వారిని వెంటనే కోర్టు ముందు ప్రవేశపెట్టకుండా, పోలీసులు వారిని ఇంకా తమ ఆధీనంలోనే ఎందుకు ఉంచుకొన్నారు? అని ప్రశ్నించడంతో పోలీసులు కూడా జవాబు చెప్పలేకపోయారు.   అనంతపురం జిల్లాలో గత అనేక సం.లుగా పరిటాల కుటుంబము తెలుగుదేశం పార్టీకి మద్దతునిస్తూ, ఆ జిల్లాలో పార్టీకి బలమయిన పునాదివేసింది. ప్రస్తుతం హత్యాయత్నం నుండి బయటపడినట్లు చెపుతున్న కాంగ్రెస్ నేత సుధాకర్ రెడ్డి, కొద్దికాలంక్రితం జరిగిన సహకార సంస్థ ఎన్నికలలో పోటీచేసి ఓడిపోయాడు. తన విజయానికి తెలుగుదేశమే గండి కొట్టిందని అయన ఆరోపించినట్లు వార్తలొచ్చాయి కూడా. ఆ ఎన్నికలలో పరిటాల కుటుంబం చక్రం తిప్పడం వల్లనే తను ఓటమి చవిచూసినట్లు భావిస్తున్న సుధాకర్ రెడ్డి, పరిటాల కుటుంభాని, తెలుగుదేశం పార్టీని ద్వేషించడం సహజమే.   ఇక, కొత్తగా బరిలోకి దిగిన వై.యస్సార్. కాంగ్రెస్ పార్టీకి స్థానికంగా ప్రాతినిద్యం వహిస్తున్నతోపుదుర్తి ప్రకాష్ రెడ్డికూడా పరిటాల కుటుంబం తన రాజకీయ ప్రస్తానంలో ఒక అడ్డుగోడగా నిలిచినట్లు భావిస్తూ, పరిటాల కుటుంబానికి, తెలుగుదేశం పార్టీకి మద్య ఉన్న అనుబందము విడగొట్టిననాడే తనకి జిల్లాలో మనుగడ సాధ్యం అని తెలుసుకొన్నాడు. అందుకే, తనకు ప్రమేయంలేని పరిటాల కేసులో వేలు పెడుతూ ఒకనాడు పరిటాల రవిని ప్రోత్సహించిన తెలుగుదేశం పార్టీ ఇప్పుడు పరిటాల శ్రీరామ్ ను కూడా ప్రోత్సహిస్తోందని ఆరోపించేడు. అంటే గాక పరిటాల శ్రీరామ్ తో లోకేష్ కి ఉన్న స్నేహ సంబందాల గురుంచి కూడా ప్రశ్నించేడు. తెలుగుదేశం పార్టీ రాయలసీమలో శాంతి కోరుకొంటే, ముందు పరిటాల సునీతని, ఆమె అనుచరులను పార్టీనుండి బహిష్కరించాలని డిమాండ్ చేసాడు. అంతేగాకుండా పరిటాల శ్రీరామ్ నడుపుతున్న వెబ్ సైటును కూడా వెంటనే పోలీసులు మూయించేయాలని డిమాండ్ చేసాడు.   దీనిని బట్టి అనంతపురం జిల్లాలో పరిటాల కుటుంబముకు గల ప్రాముక్యత అర్ధమవుతోంది. ఒకవైపు కాంగ్రెస్ పార్టీ మరో వైపు వై.యస్సార్. కాంగ్రెస్ పార్టీ నేతలు ఇద్దరూ కూడా తెలుగుదేశం-పరిటాల కుటుంబం మద్యన ఉన్న బలమయిన బందం తెంచగలిగినప్పుడే తమ రాజకీయ ప్రస్థానం సాధ్యమని గ్రహించి, జిల్లాలో తెలుగుదేశానికి పునాదివంటి పరిటాల కుటుంబాన్ని లక్ష్యం చేసుకొని ఆరంబించిన ప్రయత్నాలలో భాగంగానే పరిటాల శ్రీరామ్ పై కేసు నమోదు అని రాజకీయ విశ్లేషకులు భావిస్తున్నారు.

అక్బరుద్దీన్ ఫై సర్వత్రా విమర్శలు

      ఎంఐఎం ఎంఎల్ఏ అక్బరుద్దీన్ ఒవైసీ చేసిన వివాదాస్పద వ్యాఖ్యలఫై దేశవ్యాప్త దుమారం చెలరేగుతుంది. ఎంఎల్ఏ గా ఉండి మత విద్వేషాలను రెచ్చగొట్టే విధంగా వ్యవహరించిన ఒవైసీను దాదాపు అన్ని రాజకీయ పార్టీలు తీవ్రంగా ఖండిస్తున్నాయి.   ఓట్ల కోసం ఇలా ప్రజలను రెచ్చగొట్టడాన్ని ఆ పార్టీలు తప్పుబడుతున్నాయి. కాంగ్రెస్, బిజెపిలు ఎంఐఎం నేతఫై తీవ్ర విమర్శలు చేస్తున్నాయి. ఆయనఫై కఠిన చర్యలు తీసుకోవాలని ఆ పార్టీలు డిమాండ్ చేస్తున్నాయి. అసలు ఆయన ఎంఎల్ఏ గా పనికిరాడంటూ కూడా వ్యాఖ్యలు చేస్తున్నాయి. భారత దేశంలో అన్ని మతాల ప్రజలు సోదరభావంతో ఉంటారని, ఆ వాతావరణాన్ని ఇలాంటి ప్రసంగాలు చెడగొడతాయని ఆ పార్టీలు అభిప్రాయపడుతున్నాయి.   రాష్ట్ర డిజిపి దినేష్ రెడ్డి నిన్న ఓ ప్రకటన చేస్తూ, ఒవైసీఫై ఇండియన్ పీనల్ కోడ్ లోని సెక్షన్లు 121, 153 A కింద ఆయన ఫై కేసులు నమోదు చేసామని, ఇందుకు తగిన ఆధారాలు తమ వద్ద ఉన్నాయని ప్రకటించారు. లండన్ వెళ్ళినట్లు ఆయన కుటుంబ సభ్యులు తెలిపారని, అవసరమైతే, ఆయనను అరెస్టు చేయడానికి ఇంటర్ పోల్ సహాయం తీసుకొంటామని డిజిపి తెలియచేసారు.   సెక్షన్ 121 అంటే ప్రభుత్వం మీద యుద్ధం ప్రకటించడం. ఏదేని రెండు వర్గాలు లేక మతాల మధ్య శత్రుత్వం సృష్టించడం సెక్షన్ 153 A కిందకు వస్తుంది.

అక్బరుద్దీన్ ఓవైసీ ఓ దేశద్రోహి...అరెస్ట్ చేయండి: పాల్వాయి

        ఎంఐఎం ఎమ్మెల్యే అక్బరుద్దీన్ ఓవైసీ ఓ దేశద్రోహి అని..మతం పేరుతో వైశమ్యాలు సృష్టిస్తూ హిందూ – ముస్లింల మధ్య కలహాలు రేపేందుకు ప్రయత్నిస్తున్నాడని..అతన్ని వెంటనే అరెస్టు చేసి విచారణ చేపట్టాలని” కాంగ్రెస్ రాజ్యసభ సభ్యుడు పాల్వాయి గోవర్ధన్ రెడ్డి డిమాండ్ చేశారు. అక్బరుద్దీన్ ఇటీవల పలు సభల్లో చేసిన వ్యాఖ్యల పట్ల ఆయన తీవ్రంగా మండిపడ్డారు. తెలంగాణపై జరిగిన అఖిలపక్ష సమావేశంలో స్పీకర్ సురేష్ రెడ్డి తెలిపిన వాదనే కాంగ్రెస్ వాదన అని, తెలంగాణకు కొందరు దోపిడీ దారులు తప్ప ఎవరూ అడ్డులేరని అన్నారు. రాష్ట్ర విభజనను సీమాంధ్రనేతలెవరూ వ్యతిరేకించటం లేదన్నారు. హైదరాబాద్ను శాంతి భద్రతలు వంటి అంశాలను కేంద్రపరిధిలో ఉంచుకుని ప్రత్యేక తెలంగాణ ఇచ్చినట్లు అయితే సీమాంధ్రులకు అభ్యంతరం ఉండదని ఆయన అన్నారు. తెలంగాణ వచ్చేంతవరకూ హైకమాండ్ వద్ద తెలంగాణ కాంగ్రెస్ నేతలు లాబీయింగ్ ఉంటుందన్నారు. పనిలో పనిగా మాజీమంత్రి కోమటిరెడ్డి వెంకటరెడ్డిపై పాల్వాయి ధ్వజమెత్తారు. కోమటిరెడ్డి తెలంగాణ ద్రోహి అని అన్నారు. ఓ సారి తెలంగాణ అంటాడు, మరోసారి జగన్ పార్టీలోకి వెళ్తానంటాడు అని ఆయన ఎద్దేవా చేశారు.

ఉత్తమ్ కుమార్ రెడ్డి vs కోమటిరెడ్డి

  రాష్ట్ర మంత్రి ఉత్తమ్ కుమార్ రెడ్డి, మాజీ మంత్రి కోమటిరెడ్డి వెంకట రెడ్డి ల మధ్య పచ్చ గడ్డి వేస్తే బగ్గుమనే పరిస్థితులు నెలకొని ఉన్నాయి. ఈ ఇద్దరు నేతల జరుగుతున్న మాటల యుద్దాన్ని గమనిస్తే, నల్గొండ జిల్లా కాంగ్రెస్ పార్టీ గ్రూప్ రాజకీయాలు తారాస్థాయికి చేరుకున్నట్లుగా కనిపిస్తోంది.   జిల్లా రాజకీయాల్లో ఎప్పటినుండో ఉన్న ముఠా పోరులు కేంద్ర పర్యాటక శాఖ సహాయ మంత్రి చిరంజీవి పర్యటనతో ఒక్కసారి బాగ్గుమన్నాయి. వీరిద్దరి మధ్య వ్యక్తిగత మాటల యుద్ధం నడుస్తోంది. చిరంజీవిని, ఆయనను నల్గొండ పర్యటనకు ఆహ్వానించిన రాష్ట్ర మంత్రి ఉత్తమ్ ఫై కోమటిరెడ్డి తీవ్ర విమర్శలు చేశారు. ఎప్పుడు పార్టీలు మారతారో తెలియనివాళ్ళు, వైఎస్ఆర్ కాంగ్రెస్, టిఆర్ఎస్ పార్టీల్లో దస్తీలు వేసుకొని ఇంకా కాంగ్రెస్ లో కొనసాగుతున్నవారు తనను విమర్సిస్తారా అంటూ ఉత్తమ్, కోమటిరెడ్డిఫై ఫైర్ అయ్యారు. తెలంగాణా ఉద్యమాన్ని అడ్డం పెట్టుకొని రాజకీయాలు చేస్తున్నారని కూడా ఉత్తమ్ వ్యాఖ్యలు చేశారు.   మంత్రి చేసిన ఈ వ్యాఖ్యలకు కోమటిరెడ్డి అంతే స్థాయిలో సమాధానం ఇచ్చారు. తెలంగాణా రాష్ట్రం కోసం తాను రాజీనామా చేస్తే, ఆ స్థానంలో మంత్రి పదవి చేపట్టిన నేతలకు తన గురించి మాట్లాడే అర్హత లేదంటూ కోమటిరెడ్డి బదులిచ్చారు.   తాను పార్టీ మారనని, కాంగ్రెస్ పార్టీలోనే కొనసాగుతానని ఆయన స్పష్టం చేశారు. రాజకీయ బ్రోకర్లు, కాంట్రాక్టర్లు విమర్శలు చేస్తే సహించేది లేదని మంత్రి ఉత్తమ్ వ్యాఖ్యానించారు. ఈ మాటల యుద్ధం ఏ స్థాయికి చేరుతుందో మాత్రం వేచి చూడాల్సిందే.

యాన్టిసిపేటరీ బెయిల్ కోసం పరిటాల శ్రీరామ్ పిటిషన్

  అనంతపురం జిల్లా ధర్మవరానికి చెందిన కాంగ్రెస్ నేత సుధాకర్ పై గత వారం జరిగిన హత్య ప్రయత్నంలో పట్టుబడ్డ నిందితులు ఇచ్చిన సమాచారం ఆధారంగా ధర్మవరం పోలీసులు తెలుగుదేశం పార్టీ శాసన సభ్యురాలు పరిటాల సునీతా కుమారుడయిన పరిటాల శ్రీరామ్ పేరును కూడా జేర్చడంతో, అతను గత మూడు రోజులుగా అజ్ఞాతంలోకి వెళ్ళిపోయాడు. పోలీసులు శాసన సభ్యురాలు పరిటాల సునీత మరియు వారి బందువుల ఇళ్ళలో కూడా సోదా చేయడం వివాదాలకు తావిచ్చింది. అయితే, పరిటాల శ్రీరామ్ కోర్టులో లొంగి పోబోతున్నట్లు అనంతపురంలో జోరుగా పుకార్లు ప్రచారం అవడంతో, మీడియా అక్కడికి జేరుకొంది. ఆ వార్త తెలిసిన పరిటాల శ్రీరామ్ సానుభూతిపరులు కూడా పెద్దఎత్తున హడావుడిగా కోర్టువద్దకు జేరుకోవడంతో ఒక్కసారిగా కోర్టు వద్ద తీవ్ర ఉద్రిక్తత పరిస్థితులు తలఎత్తాయి. గానీ, కోర్టు మూసేసే సమయానికి కొద్ది నిమిషాల ముందు పరిటాల శ్రీరామ్ కు బదులు, అతని లాయర్ వచ్చి కోర్టులోఅతని తరపున యాన్టిసిపేటరీ బెయిలు పిటిషను దాఖలు చేసారు. కోర్టు ఆ పిటిషన్ పై విచారణ ఈరోజు చేపట్టవచ్చునని సమాచారం.

153 ఏ సెక్షన్ కింద అక్బరుద్దీన్ ఫై కేసు నమోదు

      రెచ్చగొట్టే ప్రసంగాలు చేశారనే ఆరోపణతో ఎంఐఎం శాసనసభ్యుడు అక్బరుద్దీన్ ఫై ఢిల్లీ లో కేసు నమోదు అయింది. ఇటీవల ఆదిలాబాద్ జిల్లా నిర్మల్ లో జరిగిన ఓ బహిరంగ సభలో ఆయన చేసిన వ్యాఖ్యలు రాజ్యాంగ, ప్రజాస్వామ్య, లౌకిక విలువలఫై దాడి చేసినట్లుగా ఉన్నాయంటూ శబ్మం హష్మీ అనే సామాజిక కార్యకర్త ఫిర్యాదు చేయడంతో ఆయనఫై ఢిల్లీ లోని పార్లమెంట్ స్ట్రీట్ పోలీస్ స్టేషన్ లో కేసు నమోదు అయింది.   ఈ ఫిర్యాదుఫై ఇండియన్ పీనల్ కోడ్ లోని 153 ఏ సెక్షన్ కింద పోలీసులు ఈ కేసు నమోదు చేశారు. అక్బరుద్దీన్ ఇటీవల నిర్మల్ లో జరిగిన సభలో మాట్లాడుతూ, ముంబాయి మారణకాండ సబబేనని, అది ముస్లింల ప్రతీకార చర్య మాత్రమేనని అన్నారు. ఒక్క 15 నిమిషాల పాటు పోలీసులు పక్కకు తప్పుకొంటే, కేవలం 15 కోట్ల మంది ముస్లింలు 100 కోట్ల మంది హిందువులను ఏమి చేయగలరో తెలుస్తుందని ఆయన తీవ్ర వ్యాఖ్యలు చేసిన విషయం తెలిసిందే. అలాగే, ముస్లింలు తలచుకొంటే, చార్మినార్ ప్రాంతంలోని భాగ్య లక్ష్మి ఆలయం కూలిపోతుందని కూడా ఆయన ఆ సభలో మాట్లాడుతూ అన్నారు.   అయితే, ఆయన వ్యాఖ్యలఫై హైదరాబాద్ లో కూడా ఇప్పటికే ఓ కేసు నమోదు అయి ఉంది. అక్బరుద్దీన్ విషయంలో చట్టం తన పని తాను చేసుకు పోతుందని కాంగ్రెస్ పార్టీ ఢిల్లీ లో ప్రకటించింది.

చట్టానికి పేర్లు లేవు

  కేంద్రమంత్రి శశి ధరూర్ డిల్లీ అత్యాచార బాధితురాలి పేరుని ఎందుకు బహిర్గతం చేయకూడదని తన ట్వీట్టర్ మెసేజ్ లో ప్రశ్నించదమేగాకుండా, ఆ అమ్మాయి కుటుంభానికి అభ్యంతరం లేనట్లయితే ఆమె వీరోచిత పోరాటానికి చిహ్నంగా త్వరలో సవరించబోతున్న చట్టానికి ఆమెపేరునే పెడితే బాగుంటుందని కూడా ఒక సలహా వ్రాసి ప్రజలనుండి కొంత మద్దతును మరికొంత వ్యతిరేఖతను కూడా పొందారు. అయితే, అనూహ్యంగా ఆమె కుటుంబసభ్యులు సానుకూలంగా స్పందిస్తూ సవరణలు పొందుతున్న చట్టానికి తమ కుమార్తె పేరు పెడితే తమకేమి అభ్యంతరంలేదని ఈరోజు డిల్లీలో ప్రకటించేరు. వారి స్పందనచూసి కొందరు ప్రజలు కూడా ఆవిధంగా చేసినట్లయితే ఆమెకు సముచిత గౌరవం ఇచ్చినట్లు ఉంటుందని అభిప్రాయపడ్డారు.   హోం మంత్రిత్వశాఖ వెంటనే స్పందిస్తూ భాదితురాలు తన వీరోచిత పోరాటంతో చట్టంలో పెను మార్పులకు దోహదపడినప్పటికీ, భారతీయ శిక్షాస్మృతిలో చట్టాలకు వ్యక్తులపేర్లు పెట్టె అవకాశం లేదని, రాజ్యాంగం అందుకు అనుమతించదని పేర్కొన్నారు.

సమైక్యమే అంటున్న మెగా స్టారువారు

  ఇపుడిపుడే కాంగ్రెస్ నీరు ఒంటబట్టిన్చుకొంటున్న మన మంత్రి చిరంజీవిగారు, తమ పార్టీలో అందరు నేతలు కూడా అఖిలపక్షం, తదనంతర పరిణామాల గురించి మాట్లాడేస్తూ నిత్యo మీడియాలో కనబడుతుండగా తానూ మాత్రం మడికట్టుకొని మూలాన కుర్చోవడం ఎందుకనుకున్నాడో మరేమో, నిన్న నల్గొండలో జరిగిన ఒక సభలో తనకు తోచిన అభిప్రాయం తను కూడా వ్యక్తం చేసాడు. అంతే గాకుండా, తన ప్రసంగంలో కాంగ్రెస్ సంప్రదాయ వాడుక పదాలయిన సోనియాగాంధీ, రాహుల్ గాంధీ, అధిష్టానం, విధేయత, క్రమశిక్షణ, కార్యకర్త వంటివన్నికూడా మద్య మద్యలో జోడించి ప్రసంగించి తనకీ రాజకీయ పరిణతి, కాంగ్రెస్ సంస్కృతి రెండూ అబ్బేయని కూడా ఋజువు చేసుకొన్నాడు.   ఇంతకీ ఆయనేమన్నాడంటే, “నేను మొదటి నుండే చెపుతున్నాను. కాంగ్రెస్ పార్టీ ప్రజల పక్షాన్న నిలిచే పార్టీ అని. మా అదిష్టానం రాష్ట్రంలో మెజారిటీ ప్రజలు ఏమి కోరుకొంటున్నారో దానినే అమలు చేయబోతోంది. ఇటీవల మా అధ్యక్షురాలు సోనియాగాంధీగారిని కలిసినప్పుడు ఆమెకి రాష్ట్రంలో పరిస్థితులు వివరించి త్వరగా సమస్యని పరిష్కరించామని కోరాను. త్వరలో ఆమె “మెజార్టీ ప్రజలకి ఆమోదమయిన నిర్ణయం” ప్రకటించుతారు. ఆమె నిర్ణయం ఏదయినా సరే విదేయత, క్రమశిక్షణ గల కార్యకర్తలగా మేమందరమూ అంగీకరిస్తాము.”   చిరంజీవి తన రాజకీయ పరిణతిని చూపించడంతో బాటు, తెలంగాణ విషయంలో కాంగ్రెస్ ఆలోచనలకి అద్దం పట్టెడు తన ప్రసంగంలో. మెజారిటీ ప్రజల అభిప్రాయం అంటే సమైక్యంద్ర రాష్ట్రం అని అర్ధం చేసుకోవలసి ఉంటుంది. అంటే, తెలంగాణా కోసం కేంద్రం ఒక అభివృద్ధి మండలినో మరో ఆలోచనో చేస్తున్నట్లు సంకేతం ఇచ్చినట్లే భావించవలసి ఉంటుంది. సీమంద్రకు చెందిన లగడపాటి, గాదె వెంకట రెడ్డి వంటి వారు రాష్ట్రం ఎట్టి పరిస్థితుల్లో విడిపోదని బల్లగుద్ది మరీ చెపుతున్న ఈతరుణంలో చిరంజీవి మాటలు వారి వాదనకి బలం చేకూర్చేవిగా ఉన్నాయి.   ఒకవేళ, కాంగ్రెస్ పార్టీ తెలంగాణా ఈయని పక్షంలో మళ్ళీ రాష్ట్రంలో అరాచక పరిస్థితులు తలఎత్తక మానవు. అదే జరిగితే, ఇప్పటికే, అన్నివిధాల వెనకబడిపోయిన మన రాష్ట్రం మరింత వెంకబడిపోక తప్పదు. తద్వారా, రాష్ట్ర ప్రజల పరిస్థితులు మరింత దిగజారిపోక తప్పవు.

దమ్ముంటే ‘అఖిలం’ మినిట్స్ తెప్పించు :కడియం సవాల్

          గత నెలలో ఢిల్లీ లో జరిగిన అఖిల పక్ష సమావేశంలో తెలంగాణా విషయంలో స్పష్టత ఇవ్వలేదని కేసిఆర్ చేస్తున్న ఆరోపణలను దమ్ముంటే నిరూపించాలని తెలుగు దేశం పార్టీ నేత కడియం శ్రీహరి సవాల్ చేశారు. తమ పార్టీ వైఖరి తెలంగాణా కు అనుకూలం కాదని నిరూపిస్తే, తాను ఏ శిక్షకైనా సిద్దమని, అలా చేయలేని పక్షంలో కేసిఆర్ తగిన శిక్షకు సిద్దమా అని కడియం ప్రశ్నించారు.   అఖిల పక్ష సమవేశంలో జరిగిన దానికి తమ పార్టీ ప్రతినిధిగా వెళ్ళిన తాను సాక్షినని, దానికి ప్రత్యక్ష సాక్షిగా ఉన్న కేసిఆర్ ఇలా మాట్లాడటం ఏమిటని ఆయన అన్నారు. ఆయనకు దమ్ముంటే, ఆ సమావేశం మినిట్స్ తెప్పించవచ్చని కడియం సవాల్ విసిరారు. అప్పుడు తమ పార్టీది స్పష్టతో, కాదో తెలిసిపోతుందని కడియం వ్యాఖ్యానించారు.   ఆ సమావేశం నుండి బయటకు వచ్చిన తర్వాత తమ పార్టీ స్పష్టమైన వైఖరితో వచ్చి మాట్లాడిందని అన్ని పార్టీలు తమను ప్రశంసించాయని, అయినా కేసిఆర్ తమఫై ప్రత్యెక రాష్ట్రం విషయంలో ఎందుకు విమర్శిస్తున్నాడో అర్ధం కావడం లేదని ఆయన అన్నారు. టిడిపి తెలంగాణాకు అనుకూలమని షిండే బహిరంగంగా అన్న మాటలు కేసిఆర్ వినలేదా అని కడియం ప్రశ్నించారు.

‘టి’ విషయం తేల్చాలని ప్రణబ్ కు మంత్రుల రిక్వెస్ట్

      కాంగ్రెస్ పార్టీ తెలంగాణా విషయంలో ఓ స్పష్టమైన వైఖరి తీసుకోలేకపోవడంతో, ఆ ప్రాంత నేతలు అధిష్టానం ఫై వత్తిడి తెచ్చేందుకు తమ సొంత మార్గాల్లో పయనిస్తున్నారు. తన హైదరాబాద్ పర్యటన చివరి రోజున రాష్త్రపతి ప్రణబ్ ముఖర్జీతో తెలంగాణా ప్రాంతానికి చెందిన ఆరుగురు రాష్ట్ర మంత్రులు బేటీ అయ్యారు.   తెలంగాణా విషయాన్ని త్వరగా తేల్చేందుకు చర్యలు తీసుకోవాలని వారు ఆయనను కోరారు. ఈ విషయంఫై పూర్తి అవగాహన ఉంది కాబట్టి ఈ విషయాన్ని సాధ్యమైనంత త్వరగా పరిష్కరించేందుకు తగిన చొరవ తీసుకోవాలని హోం శాఖ మంత్రి సబిత ఇంద్రా రెడ్డి, భారీ పరిశ్రమల శాఖ మంత్రి గీతా రెడ్డి, శాసన సభ వ్యవహారాల శాఖ శ్రీధర బాబు, నీటి పారుదల శాఖ మంత్రి సుదర్శన్ రెడ్డి, బిసి సంక్షేమ శాఖ మంత్రి సారయ్య, స్త్రీ శిశు సంక్షేమ శాఖ మంత్రి సునీత లక్ష్మ రెడ్డి నిన్న ఆయనను బొల్లారం లో కలిసి విజ్ఞప్తి చేశారు. తెలంగాణాకు అనుకూలంగా కేంద్రం నిర్ణయం తీసుకొంటే, మరలా కాంగ్రెస్ పార్టీనే రాష్ట్రంలో అధికారంలోకి వచ్చే అవకాశం ఉందని కూడా వారు రాష్ట్రపతితో అన్నారు.   ఆయన మంత్రులతో మాట్లాడుతూ, ఈ విషయంలో తనకు అన్ని విషయాలు తెలుసని, త్వరలోనే నిర్ణయం వస్తుందన్న ఆశాభావం వ్యక్తం చేశారు. ఈ విషయంలో తన వంతు ప్రయత్నం తాను చేస్తానని కూడా ప్రణబ్ వారికి హామీ ఇచ్చారు.

హోం మంత్రిగా సబిత విఫలం ?

            రాష్ట్ర హోం శాఖ మంత్రి సబితా ఇంద్రా రెడ్డి తన బాధ్యతలను నిర్వర్తించడంలో దారుణంగా విఫలం చెందారని తెలుగు దేశం పార్టీ సీనియర్ నేత గాలి ముద్దు కృష్ణమ నాయుడు వ్యాఖ్యానించారు. ఆమె నియోజక వర్గంలో ఒక విద్యార్ధినిని రేప్ చేసి హత్య చేస్తే మంత్రి కనీసం పరామర్శించడానికి కూడా వెళ్లలేదని నాయుడు అన్నారు. ఇది ఓ హోం మంత్రి చేయాల్సిన పని కాదని ఆయన అన్నారు.   ఆమెను వెంటనే ఆ పదవి నుండి తొలగించాలని ఆయన డిమాండ్ చేశారు. రేప్ సంఘటనను నిరసిస్తూ, ఆ గ్రామస్తులు దాదాపు ఏడు గంటల పాటు ఆ ప్రాంతంలో రాస్తారాకో చేసారని, ఆ ప్రాంతం హైదరాబాద్ కు కేవలం 20 కిలోమీటర్ల దూరంలోనే ఉన్నప్పటికీ, ముఖ్య మంత్రి, మంత్రులెవరూ అక్కడకు వెళ్లకపోవడం దారుణమని ఆయన అన్నారు.   మహిళలఫై జరుగుతున్న దారుణాలకు దేశమంతా తీవ్ర స్థాయిలో నిరసనలు వ్యక్తం అవుతున్న సమయంలో కూడా, రాష్ట్రంలో అధికారంలో ఉన్న నేతలకు మాత్రం చీమ కుట్టినట్లయినా లేదని గాలి అన్నారు. మహిళలకు ఆత్మ రక్షణ కోర్సులు నేర్పించడానికి చర్యలు తీసుకొంటానని హోం మంత్రి తీరికగా కబుర్లు చెపుతున్నారని, అవి మొదలయ్యేనాటికి ఆమె తన పదవి కోల్పోతారని గాలి వ్యాఖ్యానించారు.

వై కాంగ్రెస్? సందిగ్దంలో రెడ్డిగారు

    తల్లి పిల్లా కాంగ్రేసులు ఏనాటికయినా ఒకటయ్యేవే అని ఒకవైపు చంద్రబాబు ఎంతగా మోత్తుకొంటున్నా అర్ధంచేసుకోలేని కొందరు కాంగ్రెస్ నేతలు కాంగ్రెస్... వై... కాంగ్రెస్ అంటూ ఎటువైపు జంపింగ్ తీసుకోవాలో తెలియని సందిగ్దంలో ఒకసారిటు, ఒకసారటు దిక్కులు చూస్తున్నారు గోడ మీద పిల్లిలా. కాంగ్రెస్ ఉప్పు తింటూ వై.యస్సార్ కాంగ్రేసుకి జై కొట్టిన అనేకమందిలో ఒకడయిన ప్రకాశం జిల్లా దర్శి నియోజకవర్గ శాసనసభ్యుడు శివప్రసాదరెడ్డి, జగన్ పార్టీ పెట్టగానే వై (?) కాంగ్రెస్ అంటూ అటువైపు పరుగులు తీసాడు. గానీ, ఆ తరువాత జగన్ జైల్లోకి వెళ్ళే పరిస్థితులు కనిపించడంతో మళ్ళీ బుద్దిగా ‘వై నాట్ కాంగ్రెస్?’ అనుకొంటూ కాంగ్రెస్ బెంచీల మీదకోచ్చేసాడు. గానీ మనసొకచోట మనువు మరోచోటా అన్నట్లున్న అతను, మద్య మద్యలో ఆ ‘వై.కాంగ్రెస్’ వైపు పక్కచూపులు చూస్తూనే ఉన్నాడు. గానీ, కిరణ్ కుమార్ రెడ్డి ప్రభుత్వం మీద జగన్ కత్తికట్టి అవిశ్వాసం పెట్టినప్పుడు మరేమనుకున్నడో ఏమో శివప్రసాదరెడ్డి మళ్ళీ ‘వై నాట్ కాంగ్రెస్?’ అంటూ ప్రభుత్వానికే తన మద్దతు తెలిపాడు. కొద్ది నెలలక్రితం జరిగిన ఉపఎన్నికలలో తన ‘వై కాంగ్రెస్’ భారీ విజయం సాదించడంతో ఏ కాంగ్రేసు ను నమ్ముకుంటే మంచిదో అర్ధంకాక మళ్ళీ మరోసారి సందిగ్దంలో పడ్డారు మన రెడ్డిగారు. అందుకే ఎందుకయినా మంచిదని కొంచెం రెండు కాంగ్రేసులతో రాసుకు పూసుకు తిరుగడమే మంచిదనే నిర్ణయానికి వచ్చి, మొన్న జగన్ పార్టీ వాళ్ళు జగన్ అరెస్ట్ కు వ్యతిరేకంగా మొదలుపెట్టిన కోటి సంతకాల సేకరణలో తానూకూడ సంతకం పెట్టి “మా జగన్ బాబుకి జై!” అని ఓ కేకేసి మళ్ళీ తన ఒరిజినల్ కాంగ్రెస్ శిబిరానికి తిరిగి వచ్చేసాడు.