English | Telugu
టీడీపీ పగ్గాలు చంద్రబాబుకు ఎందుకిచ్చావ్? బాలయ్యకు మోహన్బాబు సూటి ప్రశ్న!
Updated : Oct 31, 2021
విశ్వవిఖ్యాత నటసార్వభౌమ నందమూరి తారక రామారావుకు తగ్గ తనయుడిగా ఇటు సినిమాల్లోనూ, అటు రాజకీయాల్లోనూ సింహం నందమూరి బాలకృష్ణ పేరు తెచ్చుకున్నారు. హీరోగా ఆయనది ఎప్పుడూ టాప్ ప్లేస్. రాజకీయాల్లోనూ ఎమ్మెల్యేగా రాణిస్తున్నారు. తండ్రి స్థాపించిన తెలుగుదేశం పార్టీ పగ్గాలను అందుకోవాలనే ఆశ తనకు ఉన్నట్లు ఎప్పుడు బాలకృష్ణ చెప్పలేదు. బావ నారా చంద్రబాబు నాయుడు నేతృత్వంలో నడుస్తున్న పార్టీకి మద్దతుగా నిలుస్తున్నారు. అయితే... 'తెలుగుదేశం పార్టీ పగ్గాలు చంద్రబాబుకి ఎందుకిచ్చావ్?' అని బాలకృష్ణను మోహన్ బాబు ప్రశ్నించారు.
బాలకృష్ణ హోస్ట్ చేస్తున్న టాక్ షో 'అన్ స్టాపబుల్' ఫస్ట్ ఎపిసోడ్ ప్రోమో ఆదివారం విడుదల అయింది. ఈ షోకి మోహన్ బాబు తొలి అతిధిగా వచ్చారు. ఆయనతో బాలకృష్ణ ఇంటర్వ్యూ సరదాగా మొదలైంది. మధ్యలో తెలుగుదేశం పార్టీ విషయం వచ్చినప్పుడు ఇద్దరిమధ్య మాటా మాటా పెరిగింది. "చంద్రబాబుకు పార్టీ పగ్గాలు ఎందుకు ఇచ్చావు?" అని మోహన్ బాబు ప్రశ్నించిన తర్వాత... "ఆయన్ను అన్నగారు (ఎన్టీఆర్) స్థాపించిన పార్టీలో నుంచి వెళ్ళిపోయి వేరే పార్టీలో ఎందుకు చేరాల్సి వచ్చింద"ని బాలకృష్ణ అడిగారు.
ప్రోమో మొత్తం మీద సగటు సినిమా అభిమానులతో పాటు సామాన్యులను సైతం ఆకట్టుకున్న అంశం ఏదైనా ఉందంటే అది ఇదే. దీపావళి కానుకగా విడుదల కానున్న ఫుల్ ఎపిసోడ్ లో టాపిక్ మీద ఇంకేం మాట్లాడారో చూడాలనే ఆసక్తి అందరిలోనూ నెలకొంది.