యంగ్ టైగర్ ఎన్టీఆర్ ఇటీవల బుల్లితెరపై 'ఎవరు మీలో కోటీశ్వరులు' షోతో అలరించిన సంగతి తెలిసిందే. ఈ షో ఫస్ట్ ఎపిసోడ్ కి గెస్ట్ గా మెగా పవర్ స్టార్ రామ్ చరణ్ రాగా ఆ ఎపిసోడ్ కి 11.4 టీఆర్పీ వచ్చింది. ఆ తర్వాత ఈ షోకి ఆ స్థాయిలో రేటింగ్ రాకపోయినా.. సెలబ్రిటీలు గెస్ట్ లుగా వచ్చినప్పుడు ఓ మాదిరి రేటింగ్ వచ్చింది. ఇక ముగింపు ఎపిసోడ్ లో సూపర్ స్టార్ మహేష్ బాబు సందడి చేయడంతో ఈ ఎపిసోడ్ కి.. ఫస్ట్ ఎపిసోడ్ కి వచ్చిన రేంజ్ రేటింగ్ వస్తుందని భావించారంతా. కానీ అనూహ్యంగా అందులో సగం కూడా రాకపోవడం గమనార్హం.

ఈఎంకేలో మహేష్ సందడి చేసిన ఎపిసోడ్ కి కేవలం 4.9 టీఆర్పీ మాత్రమే నమోదైంది. ఇద్దరు స్టార్స్ ఉన్నప్పటికీ ఈ ఎపిసోడ్ కి ఇంత దారుణమైన రేటింగ్ రావడానికి అనేక కారణాలున్నాయి. మహేష్ ఈఎంకే షో షూట్ లో పాల్గొన్న ఫోటోలు సోషల్ మీడియాలో ముందే లీక్ అయ్యాయి. దీంతో ఆ ఎపిసోడ్ ఎప్పుడెప్పుడా వస్తుందా అని ప్రేక్షకులు ఎంతో ఆశగా ఎదురుచూశారు. కానీ నిర్వాహకులు మాత్రం దసరా, దీపావళి ఇలా ఎన్నో అకేషన్స్ వచ్చినా మహేష్ ఎపిసోడ్ ని టెలికాస్ట్ చేయకుండా చివరి ఎపిసోడ్ కోసం హోల్డ్ చేసి ఉంచారు. దీంతో ఈ ఎపిసోడ్ పై రోజురోజుకి ప్రేక్షకుల్లో ఆసక్తి తగ్గిపోయింది. దానికితోడు ఈ షో మిగతా ఎపిసోడ్స్ ప్రతివారం సోమవారం నుంచి గురువారం వరకు ప్రసారమైతే.. మహేష్ ఎపిసోడ్ మాత్రం ఆదివారం టెలికాస్ట్ అయింది. అది కూడా ఎపిసోడ్ రేటింగ్ పై ప్రభావం చూపిందన్న అభిప్రాయం వ్యక్తమవుతోంది.

మరోవైపు 'ఎవరు మీలో కోటీశ్వరులు' షో ఓవరాల్ గా కూడా ఆశించినస్థాయిలో రేటింగ్స్ ని రాబట్టలేదని తెలుస్తోంది. గతంలో బిగ్ బాస్ షోతో తారక్ ఆకట్టుకున్నాడు. ఆ షోకి రికార్డ్ రేటింగ్స్ వచ్చాయి. అయితే ఈఎంకే షో ఓల్డ్ ఫార్మాట్ కావడంతో అంచనాలకు తగ్గ రేటింగ్స్ ని సాధించలేక పోయిందని అంటున్నారు.