కీర్తి క్రియేషన్స్, బాలయ్య సినిమా స్కెడ్యూల్ జూలై 20 నుండి ప్రారంభం కానుందని విశ్వసనీయ వర్గాల ద్వారా అందిన సమాచారం. వివరాల్లోకి వెళితే కీర్తి క్రియేషన్స్ పతాకంపై, యువరత్న, నందమూరి బాలకృష్ణ త్రిపాత్రాభినయం చేస్తూండగా, పరుచూరి మురళి దర్శకత్వంలో, యమ్.యల్.కుమార్ చౌదరి నిర్మిస్తున్న ఈ చిత్రం తదుపరి స్కెడ్యూల్ జూలై 20 వ తేదీన, హైదరాబాద్ లో ప్రారంభమవనుంది. ఈ చిత్రంలో హీరో నందమూరి బాలకృష్ణ తాత, తండ్రి, మనవడుగా మూడు పాత్రల్లో నటిస్తున్నారు.

తాత పాత్ర కరుడుకట్టిన ఫ్యాక్షనిస్టు కాగా, తండ్రి సాత్వికుడుగా, మనవడు తెలివైన నేటి కాలపు జర్నలిస్ట్ గా ఉండే మూడు విభిన్న పాత్రల్లో బాలకృష్ణ నటిస్తున్నారు. ఈ చిత్రం ఇప్పటికే వైజాగ్, అరకు లోయల్లో ఒక స్కెడ్యూల్ పూర్తిచేసుకుంది. ఇప్పటికి లక్ష్మీరాయ్, సలోనీ, ఛార్మి ఈ చిత్రంలో బాలకృష్ణ సరసన హీరోయిన్లుగా నటిస్తున్నారు. ఇటీవల బాపు దర్శకత్వంలో, యలమంచిలి శివాజీ నిర్మిస్తున్న పౌరాణిక కళాఖండం "శ్రీ రామరాజ్యం" చిత్రంలో శ్రీరామచంద్రమూర్తిగా బాలకృష్ణ నటించారు.