మెగా పవర్ స్టార్ రామ్ చ‌ర‌ణ్ హీరోగా స్టార్ డైరెక్ట‌ర్ శంక‌ర్ ద‌ర్శ‌క‌త్వంలో రూపొందుతోన్న భారీ బ‌డ్జెట్ పాన్ ఇండియా మూవీ ‘గేమ్ ఛేంజర్’. శ్రీ వెంక‌టేశ్వ‌ర సినీ క్రియేష‌న్స్ బ్యాన‌ర్ పై భారీ బ‌డ్జెట్‌తో దిల్ రాజు, శిరీష్ నిర్మిస్తున్నారు. ఈ సినిమాపై భారీ అంచ‌నాలు నెల‌కొన్నాయి.

థమన్ సంగీతం అందిస్తున్న గేమ్ ఛేంజర్ సినిమా నుంచి కొద్ది రోజుల క్రితం 'జరగండి' అనే ఓ పాట లీకైన సంగతి తెలిసిందే. దీనిపై తీవ్ర ఆగ్రహం వ్యక్తం చేసిన నిర్మాత దిల్ రాజు.. ఆ సమయంలో సైబర్ పోలీస్ స్టేషన్‌లో ఫిర్యాదు చేశారు. ఈ లీకులో భాగమైన ఇద్దరిని తాజాగా పోలీసులు అరెస్ట్ చేశారు. భవిష్యత్తులో మళ్ళీ ఇలాంటి లీకులు చేయొద్దని హెచ్చరించారు.

సైబర్ క్రైమ్ ఏసీపీ చాంద్ భాషా, ఎస్సై భాస్కర్ రెడ్డి, ప్రసేన్ రెడ్డి, సాయి తేజ్ ల బృందం ఈ కేసును చేధించారు. సాంగ్‌ లీక్ చేసిన ఇద్దరు వ్యక్తులను అరెస్ట్ చేసి.. వారి మీద ఐటీ చట్టంలోని సెక్షన్ 66సీ, 66 ఆర్/డబ్ల్యూ కింద కేసు నమోదు చేశారు.

దీపావ‌ళి సంద‌ర్బంగా ‘గేమ్ ఛేంజ‌ర్’ సినిమా నుంచి తొలి సాంగ్‌ 'జరగండి'ని అధికారికంగా విడుద‌ల చేయనున్నారు. ఈ పాట‌ను పాన్ ఇండియా రేంజ్‌లో గ్రాండ్ లెవ‌ల్లో రిలీజ్ చేయ‌టానికి స‌న్నాహాలు చేస్తున్నామ‌ని చిత్ర యూనిట్ తెలియ‌జేసింది.

కియారా అద్వానీ హీరోయిన్ గా నటిస్తున్న ఈ సినిమాలో అంజ‌లి, సముద్ర‌ఖ‌ని, ఎస్‌.జె.సూర్య‌, శ్రీకాంత్‌, సునీల్‌, న‌వీన్ చంద్ర త‌దిత‌రులు ముఖ్య పాత్రలు పోషిస్తున్నారు. సినిమాటోగ్రాఫర్ గా ఎస్‌.తిరుణావుక్క‌ర‌సు, ఆర్ట్ డైరెక్ట‌ర్‌ గా అవినాష్ కొల్ల‌, ఎడిట‌ర్‌ గా షామీర్ ముహ్మ‌ద్ వ్యవహరిస్తున్నారు. ప్ర‌స్తుతం ఈ చిత్ర షూటింగ్ శ‌ర‌వేగంగా జరుగుతోంది.