English | Telugu
1000 మంది ఫైటర్స్ తో 'గేమ్ ఛేంజర్' క్లైమాక్స్!
Updated : Apr 20, 2023
మెగా పవర్ స్టార్ రామ్ చరణ్ హీరోగా కోలీవుడ్ స్టార్ డైరెక్టర్ శంకర్ దర్శకత్వంలో రూపొందుతోన్న పొలిటికల్ యాక్షన్ థ్రిల్లర్ 'గేమ్ ఛేంజర్'. శ్రీ వెంకటేశ్వర క్రియేషన్స్ బ్యానర్పై దిల్ రాజు భారీ బడ్జెట్ తో నిర్మిస్తున్న ఈ చిత్రంలో కియారా అద్వానీ హీరోయిన్ గా నటిస్తోంది. శంకర్ సినిమా అంటేనే భారీతనం. పాటలు, యాక్షన్ సన్నివేశాలను భారీస్థాయిలో తెరకెక్కిస్తారు. 'గేమ్ ఛేంజర్'లోనూ ఆ భారీతనం ఉండబోతుంది. ముఖ్యంగా క్లైమాక్స్ ను అంత్యంత భారీ స్థాయిలో రూపొందిస్తున్నారట.
'మగధీర'లో వంద మందితో రామ్ చరణ్ చేసిన ఫైట్ ఎంతలా ఆకట్టుకుందో తెలిసిందే. అలాగే 'ఆర్ఆర్ఆర్'లో దాదాపు రెండు వేల మందితో తెరకెక్కించిన రామ్ చరణ్ ఇంట్రడక్షన్ సీన్ కి అదిరిపోయే రెస్పాన్స్ వచ్చింది. ఇక 'గేమ్ ఛేంజర్'లోనూ అలాంటి భారీ యాక్షన్ సన్నివేశం ఉంటుందట. 1000 మందికి పైగా ఫైటర్స్ తో హీరో చరణ్, విలన్ ఎస్.జె. సూర్య మధ్య క్లైమాక్స్ చిత్రీకరించనున్నారట. దాదాపు 70 శాతం షూటింగ్ పూర్తి చేసుకున్న ఈ మూవీ కొత్త షెడ్యూల్ ఏప్రిల్ 23 నుంచి మొదలుకానుంది. రామోజీ ఫిల్మ్ సిటీలో వేసిన భారీ సెట్ లో క్లైమాక్స్ ని చిత్రీకరించనున్నారని సమాచారం.