యన్ టి ఆర్ "ఊసరవెల్లి" పాటకి 3 గురు కొరియోగ్రాఫర్లు పనిచేయనున్నారట. వివరాల్లోకి వెళితే యంగ్ టైగర్ యన్ టి ఆర్ హీరోగా, తమన్నా భాటియా హీరోయిన్ గా, సురేంద్ర రెడ్డి దర్శకత్వంలో, ప్రముఖ బి.వి.యస్.యన్.ప్రసాద్ నిర్మిస్తున్న విభన్నకథా చిత్రం "ఊసరవెల్లి". యన్ టి ఆర్ "ఊసరవెల్లి" చిత్రానికి యువ సంగీత తరంగం దేవీశ్రీ ప్రసాద్ సంగీతాన్ని అందిస్తున్నారు. దేవీ శ్రీ ప్రసాద్ ఈ చిత్రంలోని ఒక పాటకు వెస్ట్రన్, క్లాసిక్ రెండూ కలిపి ఒక అద్భుతమైన ట్యూన్ అందించారట.

స్వతహాగా మంచి డ్యాన్సర్ అయిన హీరో యన్ టి ఆర్ ఈ పాటకు డ్యాన్స్ చేయాలంటే ఆయన శక్తికి తగ్గట్టు డ్యాన్స్ కంపోజ్ చేయటానికి ఒక కొరియోగ్రాఫర్ వల్ల కాదని భావించిన దర్శకుడు సురేంద్ర రెడ్డి ఈ పాటను ముగ్గురు కొరియోగ్రాఫర్లతో డ్యాన్స్ కంపోజ్ చేయించి చిత్రీకరిస్తున్నారట. ఈ మధ్య యన్ టి ఆర్ నటించిన చిత్రాల్లోని పాటల్లో ఆయన చేసిన డ్యాన్స్ ఆయన అభిమానులను అనుకున్నంత బాగా ఆకట్టుకోలేదన్నది వాస్తవం. అదీ గాక ఈ మధ్య అల్లు అర్జున్ సినిమాల్లోని పాటల్లో డ్యాన్స్ బాగుండటం కూడా ఇలా యన్ టి ఆర్ చేయటానికి కారణం కావచ్చు అనుకుంటున్నారు సినీ జనం.