'పెళ్లి ఎప్పుడు?' - ప్రతి అమ్మాయి ఏదొక సమయంలో ఈ ప్రశ్న ఎదుర్కొంటుంది. కావ్యశ్రీకీ ఎదురైంది. ఇంట్లో వాళ్ళ నుండి. "నాకు పాతికేళ్ళు వచ్చేవరకు పెళ్లి ప్రస్తావన తీసుకురావొద్దని మా ఇంట్లోవాళ్ళకు చెప్పాను. అప్పటివరకూ కెరీర్ మీద దృష్టి పెడతానని చెప్పా. వచ్చిన అవకాశాలు చేసుకుంటూ వెళతా. అలాగని, నాకు పెద్ద లక్ష్యాలు ఏమీ లేవు" అని కావ్యశ్రీ చెప్పుకొచ్చింది. తనకు కాబోయే భర్త మంచివాడు అయితే చాలు అని, ఆస్తిపాస్తులు లేకపోయినా పర్వాలేదని అంటోంది.

స్టార్ మా సీరియల్ 'గోరింటాకు'తో తెలుగునాట గుర్తింపు తెచ్చుకున్న కావ్యశ్రీ తెలుగు అమ్మాయి కాదు. బెంగళూరు ముద్దుగుమ్మ. కావ్యశ్రీ బ్యాగ్రౌండ్ ఏంటంటే...

○ కావ్యశ్రీకి డాన్స్ అంటే ఎంతోఇష్టం. స్కూల్, కాలేజ్... ఏవైనా ప్రోగ్రామ్స్ జరిగితే కావ్యశ్రీ గ్రూప్ డాన్స్ కంపల్సరీ. అమ్మాయి డాన్స్ చూసిన తల్లితండ్రులు సీరియళ్ళలో ప్రయత్నించమని సలహా ఇచ్చారు. అప్పటివరకు నటన గురించి ఆలోచించని కావ్యశ్రీకి కొత్త ఆలోచనలు మొదలయ్యాయి.

○ ఇంటర్ సెకండియర్ చదివే సమయం నుండి ప్రయత్నాలు ప్రారంభించింది. నాలుగేళ్ళ తర్వాత, బీఎస్సీ పూర్తి చేశాక అవకాశం వచ్చింది. కన్నడ సీరియల్ 'నీలి'లో సెకండ్ హీరోయిన్ రోల్ దక్కింది. అందులో 200 ఎపిసోడ్లు చేసింది.

○ కన్నడ సీరియల్ చేస్తున్న సమయంలో తెలుగు ఛానల్ 'స్టార్ మా' నుండి పిలుపు రావడంతో హైదరాబాద్ వచ్చింది. 'గోరింటాకు'లో శ్రీవల్లి పాత్ర చేసే అవకాశం దక్కింది. అందులో ఆమెవి ఎప్పుడూ ఏడుపు సీన్లే. దాంతో మీమ్ పేజీల్లో పాపులర్ అయ్యింది.

○ 'గోరింటాకు' తర్వాత 'అమ్మకు తెలియని కోయిలమ్మ' సీరియల్ చేసే అవకాశం అందుకుంది. సోమవారం (జూలై 19) నుండి ఈ సీరియల్ ప్రసారం అవుతుంది.

○ సీరియళ్ళు చేస్తూనే సినిమాల్లో ప్రయత్నించింది కావ్యశ్రీ. కన్నడలో పునీత్ రాజ్ కుమార్ హీరోగా వచ్చిన 'అంజనీపుత్ర'లో ఇంపార్టెంట్ రోల్ చేసింది. సీరియళ్ళతో పోలిస్తే సినిమా వాతావరణం భిన్నంగా ఉందని, అది తనకు నచ్చలేదని చెప్పింది.