రేపు(మే 18) విడుదలవుతున్న 'అన్నీ మంచి శకునములే' సినిమాకి నిజంగానే శకునం, సమయం మంచిగా ఉన్నాయని చెప్పాలి. ఎందుకంటే ప్రస్తుతం బాక్సాఫీస్ దగ్గర చెప్పుకోదగ్గ సినిమాలు లేవు. ఈ నెలలో ఇప్పటిదాకా విడుదలైన సినిమాలేవీ ప్రేక్షకుల ఆదరణకు నోచుకోలేకపోయాయి. పైగా వేసవి సెలవలు కావడంతో థియేటర్లలో సరైన సినిమా కోసం ప్రేక్షకులు ఎదురుచూస్తున్నారు. అదే ఇప్పుడు 'అన్నీ మంచి శకునములే'కి కలిసొచ్చే అంశం. సినిమా బాగుందని టాక్ వస్తే చాలు.. ప్రేక్షకులు భారీగానే థియేటర్లకు కదిలే అవకాశముంది. ఎందుకంటే ప్రస్తుతం థియేటర్లలో చెప్పుకోదగ్గ కొత్త సినిమాలు లేవు. పైగా ఇది కుటుంబమంతా కలిసి చూసి ఆనందించదగ్గ సినిమా అని ప్రచార చిత్రాలు తెలియజేశాయి. జస్ట్ పాజిటివ్ టాక్ వస్తే చాలు.. ఈ సినిమా బాక్సాఫీస్ దగ్గర మ్యాజిక్ చేసి.. మంచి విజయాన్ని అందుకునే అవకాశముంది. అయితే ఈ విజయం మిగతా టీం వారితో పోలిస్తే హీరోగా నటించిన సంతోష్ శోభన్ కి చాలా కీలకం.

'తను నేను' సినిమాతో హీరోగా పరిచయమైన సంతోష్.. 'పేపర్ బాయ్'తో పరవాలేదు అనిపించుకున్నాడు. లాక్ డౌన్ సమయంలో అతను నటించిన 'ఏక్ మినీ కథ' నేరుగా ఓటీటీలో విడుదలైంది కాబట్టి ఫలితం గురించి చెప్పలేము. ఆ తర్వాత మారుతి దర్శకత్వం వహించిన 'మంచి రోజులు వ‌చ్చాయి' ఆశించిన స్థాయిలో అలరించలేకపోయింది. ఇక గతేడాది నవంబర్ లో వచ్చిన 'లైక్ షేర్ అండ్ సబ్‌స్క్రైబ్' దారుణంగా నిరాశపరిచింది. ఆ తర్వాత రెండు నెలకే ఈ ఏడాది జనవరిలో 'కళ్యాణం కమనీయం'తో పలకరించాడు సంతోష్. కానీ అది ఓటీటీ సినిమా అనే పేరు తెచ్చుకుని బాక్సాఫీస్ దగ్గర ఫెయిల్యూర్ గా మిగిలింది. ఇక ఫిబ్రవరిలో 'శ్రీదేవి శోభన్ బాబు'తో మరో పరాజయాన్ని అందుకున్నాడు. ఇలా వరుస పరాజయాలతో సతమతమవుతూ సరైన విజయం కోసం ఎదురుచూస్తున్న సంతోష్.. 'అన్నీ మంచి శకునములే' పైనే ఆశలన్నీ పెట్టుకున్నాడు.

'అన్నీ మంచి శకునములే' సినిమాకి ఎన్నో విశేషాలు ఉన్నాయి. 'అలా మొదలైంది', 'ఓ బేబీ' సినిమాలతో ఆకట్టుకున్న నందిని రెడ్డి ఈ చిత్రానికి దర్శకురాలు. అలాగే 'జాతి రత్నాలు', 'సీతారామం' వంటి ఘన విజయాలతో జోరు మీదున్న ప్రముఖ నిర్మాత సంస్థ స్వప్న సినిమా ఈ చిత్రాన్ని నిర్మించింది. మిక్కీ జె. మేయర్ ఈ చిత్రానికి సంగీత దర్శకుడు. ఓ యంగ్ హీరో నటించిన సినిమా అయినప్పటికీ ఎక్కడా వెనకాడకుండా మంచి బడ్జెట్ తోనే నిర్మించారు. పైగా నాన్ థియేట్రికల్ రైట్స్ తోనే దాదాపు 20 కోట్లు వచ్చాయని సమాచారం. మరి ఇన్ని విశేషాలతో వస్తున్న ఈ సినిమాతోనైనా సంతోష్ విజయాన్ని అందుకుంటాడేమో చూడాలి.