ఇటీవల ప్రమోషన్స్ తో అందరి దృష్టిని ఆకర్షించిన చిన్న సినిమా అంటే 'మేం ఫేమస్' అని చెప్పొచ్చు. పలువురు సినీ సెలబ్రిటీలతో ఈ సినిమాని ప్రమోట్ చేస్తున్న తీరు ఆకట్టుకుంటోంది. ముఖ్యంగా యూత్ ఈ సినిమా పట్ల ఆసక్తి చూపిస్తున్నారు. ఇక తాజాగా విడుదలైన ట్రైలర్ సినిమాపై అంచనాలను పెంచేసింది.

'మేం ఫేమస్' ట్రైలర్ తాజాగా నేచురల్ స్టార్ నాని చేతుల మీదుగా విడుదలైంది. ఎంటర్టైన్మెంట్ ప్రధానంగా సాగిన ఈ ట్రైలర్ మెప్పిస్తోంది. ఈ సినిమాలో ఎంటర్టైన్మెంట్ తో పాటు ఎమోషన్స్ కూడా ఉన్నాయని ట్రైలర్ బట్టి అర్థమవుతోంది. ఇది పక్కా పల్లెటూరు నేపథ్యంలో సాగే కథ. పనిపాట లేకుండా తిరిగే హీరో మరియు అతని ఫ్రెండ్స్ ని ఊళ్ళోవాళ్లంతా చులకనగా చూస్తుంటారు. పిల్లల తీరు వల్ల వారి తల్లిదండ్రులు కూడా ఊళ్ళో తలదించుకునే పరిస్థితి వస్తుంది. ఈ అవమానాలను, బాధలను తట్టుకొని హీరో మరియు అతని ఫ్రెండ్స్ ఎలా ఫేమస్ అయ్యారు? అసలు ఫేమస్ అవ్వడానికి వాళ్ళు ఏం చేశారు? అనే ఆసక్తిని కలిగిస్తూ ట్రైలర్ ను రూపొందించారు. ట్రైలర్ లో పలు సన్నివేశాలు, సంభాషణలు యూత్ కి కనెక్ట్ అయ్యేలా ఉన్నాయి. చూస్తుంటే ఈ సినిమా బాక్సాఫీస్ దగ్గర సర్ ప్రైజ్ హిట్ కొట్టేలా ఉంది.

సుమంత్ ప్రభాస్ హీరోగా నటిస్తూ దర్శకత్వం వహిస్తున్న చిత్రం 'మేం ఫేమస్'. ఛాయ్ బిస్కెట్ ఫిలిమ్స్, లహరి ఫిలిమ్స్ సంయుక్తంగా నిర్మిస్తున్న ఈ సినిమా మే 26 న ప్రేక్షకుల ముందుకు రానుంది. ఇప్పటికే ఈ బ్యానర్స్ లో రూపొందిన 'రైటర్‌ పద్మభూషణ్‌' ఈ ఏడాది చిన్న సినిమాగా విడుదలై మంచి విజయాన్ని సాధించింది. ఆ మ్యాజిక్ ని 'మేం ఫేమస్' కూడా రిపీట్ చేస్తుందేమో చూడాలి.