సినిమా పేరు: శశివదనే
తారాగణం: రక్షిత్ అట్లూరి, కోమలి ప్రసాద్, శ్రీమాన్, ప్రిన్స్ దీపక్ తదితరులు
మ్యూజిక్: శరవణ వాసుదేవన్
ఎడిటర్: గ్యారీ బీహెచ్
రచన, దర్శకత్వం: సాయి మోహన్ ఉబ్బన
సినిమాటోగ్రాఫర్:సాయికుమార్ దార
బ్యానర్ : ఎస్వీఎస్ కన్‌స్ట్రక్షన్స్ ప్రై.లి
నిర్మాత:అహితేజ బెల్లంకొండ,
విడుదల తేదీ: అక్టోబర్ 10 ,2025

పలాస 1978’, నరకాసుర’, ఆపరేషన్ రావణ్ తో ప్రేక్షకుల్లో మంచి గుర్తింపు పొందిన హీరో 'రక్షిత్ అట్లూరి'. ఈ రోజు 'కోమలిప్రసాద్' తో కలిసి 'శశివదనే' అనే యాక్షన్ డ్రామా రొమాంటిక్ మూవీతో థియేటర్స్ లో అడుగుపెట్టాడు. మరి మూవీ ఎలా ఉందో చూద్దాం.

కథ
డిగ్రీ చదివిన రాఘవ(రక్షిత్ అట్లూరి) కి తన తండ్రి (శ్రీమాన్) అంటే పంచ ప్రాణాలు. చిన్నప్పుడే తల్లి చనిపోవడంతో రాఘవని తండ్రి ఎంతో గారాబంగా పెంచుతాడు. రాఘవ తొలి చూపులోనే తన పక్క ఊరుకి చెందిన పెద్దింటి అమ్మాయి శశి(కోమలి ప్రసాద్) ని ప్రేమిస్తాడు. రాఘవ ప్రేమలో నిజాయితీని గమనించిన శశి కూడా రాఘవని ప్రేమిస్తుంది. శశి చిన్నప్పుడే అమ్మ నాన్న చనిపోతే అమ్మమ్మ రక్షణలో ఉంటు ఉంటుంది. శశి బావ (ప్రిన్స్ దీపక్) ఒక తిరుగుబోతు. నచ్చిన అమ్మాయిని శారీరకంగా అనుభవిస్తుంటాడు. శశి ని పెళ్లి చేసుకోవాలనేది తన లక్ష్యం. పోలీసులు ఒక హత్యా నేరం కింద రాఘవ ని అరెస్ట్ చేస్తారు. దీంతో రాఘవ పద్నాలుగు సంవత్సరాలు జైల్లో ఉండి వస్తాడు. రాఘవ ని పోలీసులు హత్యా నేరం కింద ఎందుకు అరెస్ట్ చేసారు? అసలు నిజంగానే హత్య చేశాడా? రాఘవ జైల్లో ఉన్నప్పుడు శశి పరిస్థితి ఏంటి? తన బావ విషయంలో ఏం చేసింది? అసలు రాఘవ జైల్లో ఉన్న పద్నాలుగు సంవత్సరాలు శశి ఎక్కడ ఉంది? శశి బావ క్యారక్టర్ చివరకి ఎలా ముగిసింది? రాఘవ, శశి ఒక్కటయ్యారా లేదా? ఒక వేళ ఒక్కటి అవ్వకపోతే ఆ ఇద్దరి క్యారక్టర్ లు ఏ విధంగా ముగిసాయి అనేదే 'శశివదనే' కథ

ఎనాలసిస్
ఇలాంటి కథలు సిల్వర్ స్క్రీన్ కి కొత్త కాదు. అసలు మేకర్స్ ఎలాంటి ధైర్యంతో ఈ కథని తెరకెక్కించారో అనే డౌట్ కూడా వస్తుంటుంది. పోనీ కథ పాతదే అయినా రివర్స్ స్క్రీన్ ప్లే తో మెప్పించే ప్రయత్నం అయినా చెయ్యవచ్చు. రివర్స్ స్క్రీన్ పై అంటే ఈ కథ క్లైమాక్స్ లో ఏదైతే చెప్పారో, ఆ పాయింట్ ని రాఘవ, శశి పాయింట్ ఆఫ్ లో ఒకే సారి ఓపెన్ చేసి చెప్పవచ్చు. దాంతో లవ్, యాక్షన్ కి సంబంధించిన సీన్స్ ఒకేసారి స్క్రీన్ పై రన్ అవుతు మెస్మరైజ్ చేస్తుండేవి. తద్వారా మూవీకి సరికొత్త లుక్ వచ్చి ఉండేది. అలా కాకుండా ప్రీ క్లైమాక్స్, క్లైమాక్స్ వచ్చే వరకు ఫ్లాట్ గా సాగింది. సినిమా ప్రారంభం జైలు నుంచి రాఘవ విడుదల అయినా, ప్రేమ కోసం జైలు పాలయ్యాడనే విషయం అర్థమైపోతుంది. ఫస్ట్ హాఫ్ స్టార్ట్ అయిన మొదటి ఐదు నిమిషాలకే సినిమా స్వరూపం మొత్తం కూడా ముందుగానే తెలిసిపోతుంది. కథనాలు కూడా అందుకు తగ్గట్టే వస్తుంటాయి. రాఘవ, శశి మధ్య లవ్ సీన్స్ కి అంత లాగ్ అక్కర్లేదు. పైగా ఎక్కువ క్యారక్టర్ లు లేకుండా రాఘవ, శశి, శశి బావ, రాఘవ తండ్రి, ఫ్రెండ్ మధ్యనే నడిపారు. దీంతో కథనాల్లో పస లేకుండా పోయింది. కాకపోతే నటీనటుల పెర్ ఫార్మెన్స్, ఫొటోగ్రఫీ బాగుండటం వలన విసుగుని తెప్పించలేదు. రాఘవ, అతని తండ్రి మధ్య వచ్చిన సన్నివేశాలు బాగున్నాయి. ముఖ్యంగా ఆడవాళ్లు మగ వాడి ప్రేమలో ఏం కోరుకుంటారో రాఘవతో తండ్రి చెప్పిన సన్నివేశంబాగుంది. అలాగే ఈ కథలో కావాల్సినంత యాక్షన్ ని జోడించవచ్చు. మేకర్స్ ఆ దిశగా ఎందుకు ఆలోచించలేదో అర్ధం కాదు. ఇంటర్వెల్ ట్విస్ట్ పెద్దగా పేలలేదు. టోటల్ గా ఫస్ట్ హాఫ్ మొత్తం శశి ప్రేమ కోసం రాఘవ తిరుగుతున్నట్టయింది. సెకండ్ హాఫ్ లో కూడా ఆ ఇద్దరు ఒకరికొకరు ఇష్టపడే సన్నివేసాలు మాత్రమే ఎక్కువగా వచ్చాయి. అనవసరమైన సీన్స్ కూడా ఎన్నో.శశి బావ ని క్యారక్టర్ పరంగా ఎక్కువగా ఉపయోగించుకోలేదు. యాక్షన్ సీక్వెన్స్ కూడా అసలు బాగోలేదు. సినిమాని ముగించే క్రమంలో కథనాల పరంగా ఎన్నో తప్పులు జరిగాయి. కాకపోతే ప్రీ క్లైమాక్స్, క్లైమాక్స్ బాగుంది.

నటీనటులు సాంకేతిక నిపుణుల పని తీరు
రాఘవ గా రక్షిత్ అట్లూరి ఎంతో ఎనర్జీతో చేసాడు. లవ్, సెంటిమెంట్, యాక్షన్ సన్నివేశాల్లో తనకి తిరుగులేదని మరో సారి నిరూపించడంతో పాటు, కథనంలో మంచి పట్టు లేకపోయినా తన పెర్ ఫార్మెన్సు తో చివరి వరకు కూర్చోపెట్టగలిగాడు. శశిగా కోమలిప్రసాద్ పర్ఫెక్ట్ గా సెట్ అయ్యింది. తన అందంతో క్యారక్టర్ కి నూటికి నూరుపాళ్ళు న్యాయం చేసింది. మరిన్ని అవకాశాలు వస్తే మరో బడా హీరోయిన్ గా చెలామణి అయ్యే ఛాన్స్ ఉంది. ఇక రాఘవ తండ్రిగా చేసిన తమిళ నటుడు శ్రీమాన్ ఒక రేంజ్ లో పెర్ఫార్మ్ ని ప్రదర్శించాడు. తెలుగు ఇండస్ట్రీకి ఇంకో ఫాదర్ క్యారక్టర్ దొరికినట్టే. నెగిటివ్ రోల్ లో చేసిన ప్రిన్స్ దీపక్ నటనలో పెద్దగా మెరుపులు లేవు. రాఘవ ఫ్రెండ్ క్యారక్టర్ లో గుర్తింపు ఉన్న కామెడీ నటుడ్ని ఎంపిక చేసుకోవాల్సింది. ఇక మిగతా ఆర్టిస్టుల గురించి పెద్దగా చెప్పుకోవాల్సిన అవసరం లేదు. రచయిత, దర్శకుడు సాయిమోహన్ విషయానికి వస్తే దర్శకుడుగా పర్వాలేదు అనుకున్నా, రచయితగా మాత్రం ఏ స్థాయిలో కూడా మెప్పించలేకపోయాడు. డైలాగులు ప్రారంభంలో బాగున్నా, ఆ తర్వాత జరుగుతున్న సీన్ కి సింక్ కాలేదు స్క్రీన్ ప్లే పరంగా కూడా చాలా లోపాలు ఉన్నాయి. సాంగ్స్ అండ్ బ్యాక్ గ్రౌండ్ మ్యూజిక్, ఫొటోగ్రఫీ మాత్రం ఎక్స్ లెంట్. నిర్మాణ విలువలు కూడా నార్మల్ గానే ఉన్నాయి. కోనసీమ పల్లెల్లో ఉండే వాతావరణాన్ని, గోదావరి అందాలని మాత్రం బాగా ఉపయోగించుకున్నారు. సినిమా మొత్తం కూడా అక్కడే తెరకెక్కించారు.

ఫైనల్ గా చెప్పాలంటే సిల్వర్ స్క్రీన్ పై ఇలాంటి ప్రేమ కథలు చాలానే వచ్చాయి. కథనంలో కూడా ఎన్నో లోపాలు ఉన్నాయి. రక్షిత్, కోమలిప్రసాద్ పెర్ఫార్మెన్స్, క్లైమాక్స్ బాగున్నాయి.

రేటింగ్ 2 .25 /5 అరుణాచలం