'బాహుబలి'తో పాన్ ఇండియా స్టార్ గా మారి, వరుస భారీ సినిమాలు చేస్తున్న ప్రభాస్ (Prabhas).. మారుతి దర్శకత్వంలో సినిమా ప్రకటించినప్పుడు అందరూ ఆశ్చర్యపోయారు. ప్రభాస్ అనవసరంగా రిస్క్ చేస్తున్నాడని అభిప్రాయపడినవారు కూడా ఉన్నారు. అయితే రీసెంట్ గా రిలీజ్ అయిన గ్లింప్స్ తో ఆ మాటలకు చెక్ పెట్టాడు మారుతి. 'రాజా సాబ్' (Raja Saab)లో వింటేజ్ ప్రభాస్ ని చూపిస్తున్నాడు అంటూ మారుతిపై అందరూ ప్రశంసలు కురిపిస్తున్నారు. అదే సమయంలో ఈ సినిమాలో ప్రభాస్ పాత్ర ఏంటి? స్టోరీ ఎలా ఉండబోతుంది? అనే చర్చ జరుగుతోంది.

ప్రస్తుతం ప్రభాస్ చేసేవన్నీ పాన్ ఇండియా సినిమాలే. అయితే 'రాజా సాబ్' గ్లింప్స్ ని.. 'పాన్ ఇండియా గ్లింప్స్'కి బదులుగా 'ఫ్యాన్ ఇండియా గ్లింప్స్' పేరుతో విడుదల చేశారు. దీంతో అభిమానుల్లో కొత్త డౌట్స్ మొదలయ్యాయి. సినిమాలో ప్రభాస్ పాత్రకి నత్తి ఉంటుందని, 'ప' కి బదులుగా 'ఫ' పలుకుతాడని అనుమానపడుతున్నారు. ఫ్యాన్స్ డౌట్ ని అంత తేలికగా కొట్టిపారేయడానికి లేదు. ఎందుకంటే, తన సినిమాల్లో హీరోకి మతిమరుపు, ఓసీడీ వంటి ప్రాబ్లెమ్స్ పెట్టి.. కామెడీ పండించడం డైరెక్టర్ మారుతికి అలవాటు. అందుకే ఇప్పుడు 'రాజా సాబ్' విషయంలో కూడా మారుతి అదే సెంటిమెంట్ ఫాలో అవుతున్నాడని పలువురు అభిప్రాయపడుతున్నారు. అందుకే క్రియేటివ్ గా ఆలోచించి 'పాన్ ఇండియా'కి బదులుగా 'ఫ్యాన్ ఇండియా' పేరుతో గ్లింప్స్ ని రిలీజ్ చేసుంటారని అంటున్నారు.

ఇక 'రాజాసాబ్' స్టోరీ విషయంలోనూ ఒక ఆసక్తికర చర్చ జరుగుతోంది. ఇందులో ప్రభాస్ భయస్తుడిగా కనిపిస్తాడట. భారీ కటౌట్ తో పైకి గంభీరంగా కనిపించినా.. లోపల మాత్రం పిరికిగా ఉంటాడట. ఈ చిత్రం హారర్ రొమాంటిక్ కామెడీ జానర్ లో రూపొందుతోంది. మూవీలో బ్యూటిఫుల్ లవ్ స్టోరీ ఉంటుందట. లవర్ బాయ్ గా ప్రభాస్ మ్యాజిక్ చేస్తాడని చెబుతున్నారు. అయితే చిన్న చిన్న విషయాలకే భయపడే ప్రభాస్.. తన గర్ల్ ఫ్రెండ్ కోసం ధైర్యవంతుడిగా మారి, ఒక పెద్ద సమస్యను ఎలా ఎదుర్కొన్నాడనే పాయింట్ తో ఈ చిత్రం రూపొందుతోందట. లవ్, హారర్, కామెడీ ఇలా అన్ని ఎలిమెంట్స్ తో ఫుల్ మీల్స్ లా ఉంటుందని టాక్.

మరి 'రాజాసాబ్' స్టోరీ, అందులోని ప్రభాస్ పాత్ర గురించి వస్తున్న వార్తల్లో నిజమెంత అనేది.. టీజర్ విడుదలయ్యాక కొంత క్లారిటీ వచ్చే అవకాశముంది. కాగా, ఈ మూవీ వచ్చే ఏడాది ఏప్రిల్ 10న ప్రేక్షకుల ముందుకు రానుంది.