ప్రస్తుతం జూనియర్ ఎన్టీఆర్ ఫ్యాన్స్ మాటల్లో చెప్పలేనంత హ్యాపీగా ఉన్నారని చెప్పొచ్చు. వరుస అప్డేట్స్, సెలబ్రేషన్స్ తో వాళ్ళు గాలిలో తేలిపోతున్నారు. ఎన్టీఆర్ 30వ సినిమా 'దేవర' ఫస్ట్ లుక్ నిన్న(మే 19) సాయంత్రం విడుదలై అదిరిపోయే రెస్పాన్స్ తెచ్చుకుంది. ఇక ఈరోజు 'సింహాద్రి' రీరిలీజ్ తో థియేటర్ల వద్ద అభిమానులు తెగ హంగామా చేస్తున్నారు. అలాగే 'వార్-2'తో ఎన్టీఆర్ బాలీవుడ్ ఎంట్రీ ఇస్తున్నట్టుగా హృతిక్ రోషన్ క్లారిటీ ఇచ్చేశాడు. వీటితో పాటు తాజాగా 'ఎన్టీఆర్ 31' అప్డేట్ కూడా వచ్చేసింది.

ఎన్టీఆర్ తన 31వ సినిమాని ప్రశాంత్ నీల్ దర్శకత్వంలో చేయనున్న సంగతి తెలిసిందే. ఎన్టీఆర్ ఆర్ట్స్ తో కలిసి మైత్రి మూవీ మేకర్స్ ఈ చిత్రాన్ని భారీ బడ్జెట్ తో నిర్మించనుంది. గతేడాది ఎన్టీఆర్ పుట్టినరోజు కానుకగా ఈ చిత్రాన్ని అధికారికంగా ప్రకటిస్తూ ఓ పోస్టర్ ని వదలగా.. కేవలం ఒక్క పోస్టర్ తోనే ఈ సినిమాపై అంచనాలు పెరిగిపోయాయి. ఈ సినిమా ఎప్పుడెప్పుడు పట్టాలెక్కుతుందా అని అభిమానులు ఎంతగానో ఎదురుచూస్తున్నారు. అయితే ఈ మూవీ షూటింగ్ కి సంబంధించిన అప్డేట్ ని ఈరోజు మేకర్స్ ఇచ్చారు. వచ్చే ఏడాది మార్చి నుంచి షూటింగ్ మొదలు కానుందని ప్రకటించారు.

ఎన్టీఆర్ ఈ ఏడాది చివరి కల్లా 'దేవర' షూటింగ్ పూర్తి చేసి, ఆ తర్వాత 'వార్-2' షూటింగ్ తో బిజీ అయ్యే అవకాశముంది. 'వార్-2' కోసం కేవలం రెండు-మూడు నెలలు మాత్రమే కేటాయించి.. అది పూర్తి కాగానే తన పూర్తి దృష్టిని 'ఎన్టీఆర్ 31' పైనే పెట్టనున్నాడని అంటున్నారు.