మృత్యువు ఎవరిని.. ఎప్పుడు.. ఎలా కబళిస్తుందో ఎవరికీ తెలీదు. ఆరోగ్యంగా ఉన్నవారు కూడా హఠాన్మరణం చెందడం మనం ఈమధ్యకాలంలో తరచూ చూస్తున్నాం. అలాంటి ఘటనే ప్రపంచ సుందరి కావాలని కలలుగన్న ఆమెకు జరిగింది. ఉరుగ్వేకు చెందిన 26 ఏళ్ళ షెరికా డీఅర్మాస్26 ఏళ్ళకే మృత్యువాత పడ్డారు. ఆమె కొంతకాలంగా గర్భాశయ క్యాన్సర్‌తో బాధపడుతోంది. అన్నిరకాల చికిత్సలు జరుగుతున్నప్పటికీ ఆమె ఆరోగ్యం విషమించడంతో అక్టోబర్‌ 13న తుదిశ్వాస విడిచింది. ఈ విషయాన్ని ఆమె సోదరుడు సోషల్‌ మీడియా వేదికగా వెల్లడిరచాడు.

మోడల్‌గా ఎంతో పేరు తెచ్చుకున్న షెరికాకు మిస్‌ వరల్డ్‌ అవ్వాలన్నది జీవిత లక్ష్యం. దానికోసం అహర్నిశలు శ్రమించేది. తన అందాన్ని కాపాడుకునేందుకు అన్నిరకాల ప్రయత్నాలు చేసేది. ఉరుగ్వే దేశంలో జరిగిన అందాల పోటీల్లో ఎన్నో అవార్డులు గెలుచుకున్న షెరికా మిస్‌ వరల్డ్‌ పోటీల్లో మాత్రం నెగ్గలేకపోయింది. 2015లో చైనాలో జరిగిన మిస్‌ వరల్డ్‌ పోటీల్లో టాప్‌ 30లో నిలవలేకపోయింది. అయినా తన ప్రయత్నాన్ని విరమించుకోలేదు. ఎంతో ఆత్మవిశ్వాసంతో ముందుకు వెళ్ళేది. కానీ, విధి ముందు ఆమె ఆత్మవిశ్వాసం ఓడిపోయింది. బ్యూటీ మోడల్‌ అయినా, అడ్వర్టైజింగ్‌ మోడల్‌ అయినా, క్యాట్‌వాక్‌ మోడల్‌ అయినా తాను ఎప్పుడూ మోడల్‌గా ఉండాలని కోరుకుంటున్నానని షెరాక్‌ ఒక ఇంటర్వ్యూలో తెలిపింది. ప్రపంచ సుందరి కిరీటం ధరించడమే తన కల అని చెప్పే షెరాక్‌ చివరికి మృత్యువుతో పోరాడి ఓడిపోయింది. షెరాక్‌ అకాల మరణం ప్రపంచ వ్యాప్తంగా అందర్నీ కలచివేసింది. చిన్న వయసులోనే మృత్యువు ఒడిలోకి చేరిన ఆమె ఆత్మకు శాంతి చేకూరాలని ఆమె స్నేహితులు, శ్రేయోభిలాషులు ప్రార్థనలు చేశారు.