ప్రభాస్, మోహన్ లాల్, శివ రాజ్ కుమార్, మోహన్ బాబు, శరత్ కుమార్ వంటి భారీ తారాగణంతో ప్రారంభమైన 'కన్పప్ప' సినిమాలో మంచు విష్ణు టైటిల్‌ రోల్‌ పోషిస్తున్న సంగతి తెలిసిందే. మంచు విష్ణు డ్రీమ్ ప్రాజెక్ట్‌గా తెరకెక్కుతోన్న ఈ కన్నప్ప ప్రస్తుతం పాన్ ఇండియా స్థాయిలో బజ్ క్రియేట్ చేసింది. విష్ణు బర్త్ డే (నవంబర్ 23) సందర్భంగా కన్నప్ప నుంచి తాజాగా ఓ పోస్టర్‌ను రిలీజ్ చేశారు. ఈ పోస్టర్ సినిమా మీద అంచనాలను రెట్టింపు చేసేలా ఉంది.

ప్రకృతి నడుమ భారీ శివలింగం ఆకారం ఏర్పడినట్టుగా పోస్టర్ ఎంతో క్రియేటివ్ గా ఉంది. శివలింగం నుంచి కిరణాల్లాగా బాణాలు దూసుకొస్తున్న తీరు, విల్లుని ఎక్కు పెట్టిన కన్నప్ప లుక్ ఆకట్టుకుంటున్నాయి. కన్నప్ప పాత్రకి తగ్గట్టుగా విష్ణు తన దేహాన్ని మలుచుకున్న తీరు, వస్త్రధారణ బాగున్నాయి. పోస్టర్ ని బట్టి చూస్తే.. బిగ్ స్క్రీన్ మీద ఆశించిన దానికంటే అద్భుతమైన సినిమాటిక్ ఎక్స్‌పీరియెన్స్ 'కన్పప్ప' ఇవ్వబోతుందని అర్థమవుతోంది.

‘మహాభారత్’ను తెరకెక్కించిన డైరెక్టర్ ముఖేష్ కుమార్ ఈ మూవీని డైరెక్ట్ చేస్తున్నారు. ఈ సినిమాను న్యూజిలాండ్ పరిసర ప్రాంతాల్లోనే 80 శాతం షూటింగ్‌ పార్ట్‌ను కంప్లీట్ చేయనున్నారు. కన్నప్పను ఓ విజువల్ వండర్‌గా.. తెరపై ఎప్పటికీ చెరిగిపోని ఓ దృశ్యకావ్యంలా ఉండేలా నిర్మిస్తున్నామని చిత్రబృందం చెబుతోంది. హాలీవుడ్ సినిమాటోగ్రఫర్ షెల్డన్ చౌ ఈ సినిమాకి పనిచేస్తుండటం విశేషం.

"కన్నప్ప సినిమా కోసం మా ప్రాణాన్ని పనంగా పెడుతున్నాం. మహా శివుడి ప్రియ భక్తుడైన కన్నప్పను తెరపైకి తీసుకొచ్చేందుకు మా శాయశక్తులా ప్రయత్నిస్తున్నాం. కన్నప్ప సినిమాను ఓ దృశ్యకావ్యంలా.. మునుపెన్నడూ చూడని ఓ సినిమాటిక్ ఎక్స్‌పీరియెన్స్ ఇచ్చేలా రూపొందిస్తున్నాం" అని విష్ణు అన్నారు.