బాలకృష్ణ తన ప్రతి సినిమాలో కూడా సింహ అనే పేరు వచ్చే విధంగా పెట్టిన టైటిల్స్ బాక్సాఫీస్ వద్ద రికార్డుల మోత మోగించాయి. "సమరసింహారెడ్డి", "నరసింహ నాయుడు", "లక్ష్మీ నరసింహ"..తాజాగా "సింహ". ఇలా సింహ అనే పదం ఉన్న ప్రతి సినిమా కూడా ఆయనకు అదృష్టంగా విజయాన్ని చేకూర్చింది. అయితే ప్రస్తుతం బాలయ్య నటిస్తున్న "లెజెండ్" సినిమా ఫస్ట్ లుక్ ఇటీవలే విడుదలయ్యాయి. అదే విధంగా స్మాల్ టీజర్ నిన్న సాయంత్రం విడుదలైంది. వీటన్నిటిని చూస్తుంటే వెండితెర మీద సింహం లాంటి బాలకృష్ణ, టైటిల్లో ఎంతో రాజసం ఉట్టిపడేలా "లెజెండ్". నందమూరి అభిమానులకు ఇంతకంటే ఇంకేం కావాలి.

అయితే బాలయ్యకు నరసింహ స్వామి అంటే ఎంతో అపారమైన భక్తి. కానీ ఈ సినిమాలో బాలయ్య మెడ దగ్గర ఓ టాటూ ఉంది. ఓంకారం-త్రిశూలం కలిపిన టాటూను బాలయ్య మెడ దగ్గర కనిపిస్తుంది. అంటే ఈ సినిమాలో బాలయ్య శివుడి భక్తుడిగా కనిపించనున్నాడా లేక కేవలం అది ఒక లుక్ కోసం మాత్రమే పెట్టారా అనే సంగతి త్వరలోనే తెలియనుంది. ఏదేమైనా కూడా బాలయ్య సినిమా అంటే ఎప్పుడు కూడా ఒక హాట్ టాపిక్.

బోయపాటి శ్రీను దర్శకత్వంలో తెరకెక్కుతున్న ఈ సినిమాకు దేవిశ్రీప్రసాద్ అందించిన పాటలను మార్చి 7న శిల్పకళా వేదికలో విడుదల చేయనున్నారు. భారీ అంచనాలతో తెరకెక్కుతున్న ఈ చిత్రం ప్రస్తుతం టాలీవుడ్ లో హాట్ టాపిక్ గా మారింది. మార్చి 28న లేదంటే ఏప్రిల్ 4న "లెజెండ్"ను విడుదల చేయడానికి సన్నాహాలు చేస్తున్నారు.

వారాహి చలన చిత్ర సాయి కొర్రపాటి సమర్పణలో, 14రీల్స్ ఎంటర్ టైన్మెంట్స్ బ్యానర్ పై అనిల్ సుంకర, రామ్ ఆచంట, గోపి ఆచంట సంయుక్తంగా నిర్మిస్తున్నారు. రాధికా ఆప్టే, సోనాల్ చౌహాన్ కథానాయికలు. జగపతి బాబు విలన్ పాత్రలో మొదటిసారిగా నటిస్తున్నాడు.