హిందీలోకి ఢీ రీమేక్ చేయనున్నారని విశ్వసనీయ వర్గాల ద్వారా అందిన సమాచారం. వివరాల్లోకి వెళితే గతంలో మంచు విష్ణువర్థన్ హీరోగా, జెనీలియా హీరోయిన్ గా, రియల్ స్టార్ శ్రీహరి ఒక ముఖ్య పాత్రలో నటించగా, బ్రహ్మానందం కామెడీ హైలైట్ గా, శ్రీనువైట్ల దర్శకత్వంలో వచ్చి సూపర్ హిట్టయిన చిత్రం "ఢీ". ఈ చిత్రానికి చక్రి ఇచ్చిన సంగీతం కూడా ఈ చిత్రం హిట్టవటానికి బాగానే దోహదపడింది. అలాంటి హిట్ "ఢీ" చిత్రాన్ని హిందీలోకి రీమేక్ చేయనున్నారని తెలిసింది. కోన వెంకట్ కథనందించిన ఈ "ఢీ" చిత్రాన్ని హిందీలో సల్మాన్ ఖాన్ హీరోగా రీమేక్ చేసే అవకాశాలున్నాయి.

ఇప్పటికే "పోకిరి, రెడీ" చిత్రాల హిందీ రీమేక్ లో సల్మాన్ ఖాన్ హీరోగా నటించాడు. సల్మాన్ హీరోగా నటించనున్న "షేర్ ఖాన్, నో ఎంట్రీ2" చిత్రాలకు కోన వెంకట్ కథలను అందిస్తూండగా, ప్రస్తుతం ఆ లిస్ట్ లో "ఢీ" చిత్రం కూడా వచ్చి చేరింది. అలాగే వివేక్ ఒబెరాయ్, అజయ్ దేవగణ్, అఫ్తాబ్ శివదాసానీ, రితేష్ దేశ్ ముఖ్, అమృతారావ్ లు నటించిన "మస్తీ" చిత్రం సీక్వెల్ కి కూడా కోన వెంకట్‍ కథ వ్రాయటం విశేషం.