వినటానికి ఇది విచిత్రంగా ఉంది కదూ...! కానీ నిజం. సకలకళావల్లభుడు, పద్మశ్రీ డాక్టర్ కమల్ హాసన్ ప్రస్తుతం కథక్ నాట్యాన్ని శ్రద్ధగా నేర్చుకున్నారు. అది కూడా "విశ్వరూపం" అనే సినిమా కోసం ఆయన ఈ నాట్యాన్ని నేర్చుకున్నారు. ఈ సినిమాలో హీరోగా నటిస్తూ, సినిమాకి దర్శకత్వం కూడా కమల్ హాసనే నిర్వహిస్తున్నారు. తమిళ సినీ పరిశ్రమలో కొందరు ఇదంతా పబ్లిసిటీ స్టంట్ అని అంటుంటే దానికి కమల్ హాసన్ బాగా ఘాటుగా స్పందించారు.

"పబ్లిసిటీ కోసం ఇదంతా చేయటానికి నేనీరోజు సినీ పరిశ్రమకు రాలేదు. నేను తీసేది మాస్ మసాలా కమర్షియల్ చిత్రమూ కాదు. ఒకవేళ అలాంటి సినిమా తీస్తుంటే పబ్లిసిటీ కోసం చీప్ ట్రిక్స్ ప్లే చేసినా ఫలితముంటుంది. నేను ఇప్పుడు కథక్ ఎందుకు నేర్చుకున్నానో ఈ "విశ్వరూపం" సినిమా చూస్తే అర్థమవుతుంది" అని అన్నారు. యాభై శాతం మాత్రమే పూర్తయిన ఈ "విశ్వరూపం" సినిమాకి ఇప్పటికే 52 కోట్లు ఖర్చయిందట.