English | Telugu
హ్యాట్రిక్ హీరోల లిస్ట్ లో.. నవీన్ పొలిశెట్టి!
Updated : Sep 9, 2023
తెలుగునాట హ్యాట్రిక్ కొట్టిన హీరోలు చాలామందే ఉన్నారు. ఈ జాబితాలో తాజాగా మరో హీరో కూడా చేరాడు. ఆ కథానాయకుడు మరెవరో కాదు.. యంగ్ సెన్సేషన్ నవీన్ పొలిశెట్టి.
ఆ వివరాల్లోకి వెళితే.. 'లైఫ్ ఈజ్ బ్యూటిఫుల్' మూవీతో యాక్టర్ గా తెరంగేట్రం చేసిన నవీన్ పొలిశెట్టి.. ఆపై 'డి ఫర్ దోపిడి', సూపర్ స్టార్ మహేశ్ బాబు '1 నేనొక్కడినే' సినిమాల్లోనూ చిన్న చిన్న పాత్రల్లో అలరించాడు. 2019లో విడుదలైన 'ఏజెంట్ సాయి శ్రీనివాస ఆత్రేయ'తో హీరోగా ప్రయాణం మొదలు పెట్టిన నవీన్.. కథానాయకుడిగా మొదటి ప్రయత్నంలోనే మంచి విజయం సాధించాడు. ఆనక 2021లో వచ్చిన 'జాతిరత్నాలు'తో సంచలన విజయం అందుకున్నాడు.
కట్ చేస్తే.. తాజాగా 'మిస్ శెట్టి మిస్టర్ పొలిశెట్టి'తో పలకరించిన నవీన్ కి.. ఈ సినిమా కూడా మంచి ఫలితాన్నే అందిస్తోంది. డివైడ్ టాక్ తో జనం ముందుకు వచ్చిన ఈ సినిమా తొలి రెండు రోజుల్లో బాగానే వసూళ్ళు చూసింది. శని, ఆది వారాల్లోనూ ఇదే ఊపు కొనసాగితే.. 'మిస్ శెట్టి మిస్టర్ పొలిశెట్టి' హిట్ లిస్ట్ లో చేరడం ఖాయమంటున్నారు ట్రేడ్ పండితులు. ఏదేమైనా.. 'ఏజెంట్ సాయి శ్రీనివాస ఆత్రేయ', 'జాతిరత్నాలు', 'మిస్ శెట్టి మిస్టర్ పొలిశెట్టి'.. ఇలా రెండేళ్ళకో హిట్ సినిమాతో సందడి చేసి 'హ్యాట్రిక్ హీరో' ట్యాగ్ ని సొంతం చేసుకున్నాడు ఈ టాలెంటెడ్ హీరో. మరి.. రాబోయే చిత్రాలతోనూ ఇదే జోరుని కొనసాగిస్తాడేమో చూడాలి.