హీరోయిన్‌ మాధవీలత చాలా విషయాలపై స్పందిస్తూ ఉంటుంది. అది తనకు అవసరమా లేదా అన్నది పక్కన పెట్టి ఘాటుగా స్పందించడం ఆమెకు బాగా అలవాటు. తాజాగా టాలీవుడ్‌ సీనియర్‌ హీరోలపై తన కామెంట్స్‌తో విరుచుకుపడింది.సోషల్‌ మీడియాలో పెట్టిన ఓ పోస్ట్‌ సీనియర్‌ హీరోలనే కాదు, వారి అభిమానులను సైతం హర్ట్‌ చేసేలా వుంది. అసలు మాధవీలత పెట్టిన ఆ పోస్టు సారాంశం ఏమిటో ఒకసారి చూద్దాం.

‘మన తెలుగు హీరోలు మారాలబ్బా.. రియల్‌ లైఫ్‌లో పెళ్లిళ్ళు అయిపోయి గాడిదలంత కొడుకులున్నా, 40 నుంచి 60 సంవత్సరాల వయసు వచ్చినా.. ఇంకా సినిమాల్లో పెళ్ళి కానీ కుర్రాడిలా వేషాలేస్తూ అమ్మాయిల వెంటపడి లైన్‌ వెయ్యడం చేస్తున్నారు., రొట్ట స్టోరీలతో సినిమాలు తియ్యడం మానేసి, కాస్త తమిళ్‌, మలయాళం మూవీస్‌ చూసి మంచి సినిమాలు తియ్యండి. చూడలేక ఛస్తున్నాం. ఇలాఅంటే వెర్రి ఫ్యాన్స్‌ ఎగబడతారు. దేవుడ్ని పూజిస్తే రాయికి పూజ అంటారు. స్క్రీన్‌లో తప్ప నిజజీవితంలో ఒక క్యారెక్టర్‌ లేని హీరోలకు మొక్కుతారు, మా హీరో తోపు అంటారు. గుడి కట్టి పూజ తప్ప అన్నీ చేస్తారు. ఇలా అంటే హీరోల అభిమానులకుఎంత కాలుతుందో, దేవుడు లేడు అంటే దేవుడ్ని నమ్మే మాకూ అంతే కాలుతుంది. మంచి సినిమాలు చెయ్యండి. తట్టెడు మేకప్‌ వేసినా 60, 70 సంవత్సరాల వయసుని 16 చెయ్యలేం. హీరోయిన్‌ వెంటపడే డ్యూయెట్స్‌ ఆపెయ్యండి. మంచి కాన్సెప్ట్స్‌ చెయ్యండి. దీనికి వెంకటేష్‌ మినహాయింపు అబ్బా‘ అంటూ ఘాటుగా తన కామెంట్‌ను పోస్ట్‌ చేసింది.