కొందరు నటీనటులు వివాదాలు సృష్టిస్తారు. వాటిని కొనసాగిస్తూ అందులోనే తమ ఆనందాన్ని వెతుక్కుంటూ ఉంటారు. అలాంటి వారిలో నటుడు మన్సూర్‌ అలీ ఖాన్‌ ఒకరు అని చెప్పొచ్చు. ఇటీవల త్రిష, ఖుష్‌బూ, రోజాలపై అతను చేసిన సంచలన వ్యాఖ్యలు ఎంతటి దుమారాన్ని రేపాయో అందరికీ తెలిసిందే. ఎంతో మంది సినీ ప్రముఖులు అతని వ్యాఖ్యలను ఖండిరచారు. నటీమణులకు అండగా నిలిచారు. చివరికి నెటిజన్లు సైతం వారికి మద్దతు తెలుపుతూ కామెంట్స్‌ పెట్టారు. కానీ, మన్సూర్‌ మాత్రం దిగి రాలేదు. తను తప్పుగా ఏమీ మాట్లాడలేదని, ఈ విషయంలో వెనక్కి తగ్గేది లేదని ప్రకటించాడు. ఒక దశలో త్రిషకు క్షమాపణ చెప్పాలని మన్సూర్‌పై వత్తిడి వచ్చింది. దానికి కూడా తలొగ్గని మన్సూర్‌ క్షమాపణ చెప్పే ప్రసక్తే లేదని స్పష్టం చేశాడు. చివరికి ఈ విషయం జాతీయ మహిళా కమిషన్‌ దృష్టికి వెళ్లడంతో దాన్ని సుమోటోగా స్వీకరించి మన్సూర్‌ అలీఖాన్‌పై కేసు నమోదు చెయ్యాలని పోలీసులను ఆదేశించింది. దీంతో అతనిపై కేసు నమోదు కావడం, కోర్టు సమన్లు జారీ చేయడం వేగంగా జరిగిపోయాయి. ఇక తప్పని పరిస్థితిలో విచారణకు హాజరయ్యాడు మన్సూర్‌. చివరికి త్రిషకు బహిరంగంగా క్షమాపణలు కూడా చెప్పాడు. అంతటితో ఈ వివాదానికి తెరపడిరదని అందరూ భావించారు. కానీ, అది అక్కడితో ఆగిపోలేదు.. సెకండాఫ్‌ కూడా ఉందని ఇటీవల మన్సూర్‌ స్పష్టం చేశాడని తెలుస్తోంది.

తాజాగా త్రిష, మెగాస్టార్‌ చిరంజీవి, ఖుష్బులపై పరువు నష్టం దావా వేస్తానని మన్సూర్‌ ప్రకటించి మరో వివాదానికి తెరలేపాడు. తనపై అనుచిత వ్యాఖ్యలు చేసిన త్రిష, చిరంజీవి, ఖుష్బులపై పరువు నష్టం దావా, క్రిమినల్‌ కేసు, ముందస్తు అల్లర్లు, ఇతరులను రెచ్చగొట్టడం లాంటి సెక్షన్ల కింద కేసు వేస్తున్నట్లు ప్రకటించాడు మన్సూర్‌ అలీఖాన్‌. తన లాయర్‌ గురు ధనంజయన్‌ ద్వారా కోర్టులో కేసు వేసి.. వారికి నోటీసులు జారీ చేయనున్నట్లు ప్రకటించాడు. ప్రస్తుతం ఈ వార్త సోషల్‌ మీడియాలో హల్‌చల్‌ చేస్తోంది. త్రిష విషయంలో తాను చేసిన వ్యాఖ్యలకు సంబంధించిన వీడియోను ఎడిట్‌ చేసి ఆమె గురించి అసభ్యంగా మాట్లాడినట్టు క్రియేట్‌ చేశారని మన్సూర్‌ ఆరోపిస్తున్నాడు. తాను మాట్లాడిన నిజమైన వీడియో కోర్టుకు సమర్పిస్తున్నానని, దాని ఆధారంతోనే వారిపై కోర్టులో కేసు వేయనున్నట్టు మన్సూర్‌ చెబుతున్నాడు. ఇప్పుడు మన్సూర్‌ లేవనెత్తిన కొత్త సమస్య ఎటు వెళుతుందో, ఎన్ని మలుపులు తిరుగుతుందో, దీనిపై సినీ ప్రముఖులు ఎలా స్పందిస్తారో వేచి చూడాలి.