పవన్ కళ్యాణ్ 'బ్రో' మొత్తానికి రెండోవారంలోకి ఎంటరైంది. అదే సమయంలో.. తొలివారం ముగిసే సమయానికి రూ. కోట్లలో ఉంటూ వచ్చిన గ్రాస్ కాస్త.. రెండో వారం మొదటి రోజుకి రూ. లక్షలకి పడిపోయింది. మిశ్రమ స్పందన తెచ్చుకున్న సినిమా అయినా.. ఈ స్థాయికి వసూళ్ళు పడిపోవడం ట్రేడ్ వర్గాలను విస్మయపరుస్తోంది. సెకండ్ వీక్ లో తొలి రోజైన నిన్న (ఆగస్టు 4) కేవలం రూ. 80 లక్షల గ్రాస్ తో సరిపుచ్చుకోవడం చూస్తే.. 'బ్రో' బ్రేక్ ఈవెన్ ఇక గగన కుసుమమన్నది పరిశ్రమ వర్గాల మాట. షేర్ విషయానికి వస్తే.. ఎనిమిదో రోజు కేవలం రూ. 41 లక్షలు ఉండడం గమనార్హం. ఇదే ట్రెండ్ కొనసాగితే.. రూ. 97 కోట్ల షేర్ టార్గెట్ తో బాక్సాఫీస్ ముంగిట నిలిచిన 'బ్రో'.. రూ. 25 కోట్లు - రూ.30 కోట్ల వరకు నష్టాలు చూసే అవకాశముందంటున్నారు ట్రేడ్ పండితులు.

తొలి రోజు నుంచి ఎనిమిదో రోజు వరకు 'బ్రో' వసూళ్ళను గమనిస్తే..

మొదటి రోజు ప్రపంచ వ్యాప్తంగా రూ. 30.01 కోట్ల షేర్ రాబట్టిన 'బ్రో'.. రెండో రోజు రూ. 12. 32 కోట్ల షేర్, మూడో రోజు రూ. 12. 93 కోట్ల షేర్ ఆర్జించింది. ఇక నాలుగో రోజైన సోమవారం రూ. 2.96 కోట్ల షేర్, ఐదో రోజైన మంగళవారం రూ. 2. 20 కోట్ల షేర్, ఆరో రోజైన బుధవారం రూ. 1.84 కోట్ల షేర్, ఏడో రోజైన గురువారం రూ. 95 లక్షల షేర్ రాబట్టింది. ఇక ఎనిమిదో రోజైన శుక్రవారం రూ. 41 లక్షల షేర్ ఆర్జించింది. మొత్తంగా.. ఎనిమిది రోజుల్లో రూ. 63. 62 కోట్ల షేర్ (రూ. 106. 60 కోట్ల గ్రాస్) ఆర్జించింది 'బ్రో'. మరి.. వర్కింగ్ డేస్ లో అనుకున్నంతగా రాణించలేకపోయిన 'బ్రో'.. శని, ఆది వారాల్లోనైనా పుంజుకుంటుందేమో చూడాలి.