మనోళ్ళు విశాల్ లా ఎందుకు ఆలోచించరు...? విశాల్ మన తెలుగబ్బాయే. కానీ తమిళంలో హీరోగా నిరూపించుకుని నేడు తెలుగులో రావటానికి ఆలోచిస్తున్నాడు. అంటే రచ్చ గెలిచి ఇంట గెలవటానికి రెడీ అవుతున్నాడు. ఆ విశాల్ ఈ మధ్య "వాడు-వీడు" అనే సినిమాలో ఆర్యతో కలసి నటించాడు. అది కూడా మెల్లకన్నుతో ఉండే అటూ ఇటూ కాని వాడి పాత్రలో ఆ సినిమాలో నటించాడు. ఆ సినిమా హిట్టయ్యింది. అతన్ని సినీ విమర్శకులంతా మెచ్చుకున్నారు. తోటి నటీనటులంతా అతని నటనను కొనియాడారు.

కమల్ హాసన్, విక్రమ్, సూర్యల తర్వాత అలాంటి విభిన్నపాత్రల్లో నటించే దమ్ము తనకుందని విశాల్ నిరూపించుకున్నాడు ఆ సినిమాతో. అలాంటి పాత్రల్లో నటించాల్సి వస్తే మన యువ హీరోలెవరైనా అంగీకరిస్తారా...? ఒక వేళ అంగీకరించినా అలాంటి పాత్రలకు న్యాయం చేసే దమ్ముందా...? అంత దమ్మున్న మొనగాళ్ళు ఎవరైనా ఉంటే వాళ్ళని మెచ్చుకోవాల్సిందే. అలాంటి పాత్రలు మన యువ హీరోల్లో భవిష్యత్తులో ఏమన్నా పోషిస్తే మంచు మనోజ్ పోషించే అవకాశాలు కనపడుతున్నాయి. తప్పితే ఇంకెవరికీ ఆ ధైర్యం ఉన్నట్టు కనపడదు.