గొప్ప యాక్టర్స్ అందరూ బిగ్ స్టార్స్ కాలేరు.. అలాగే, బిగ్ స్టార్స్ అందరూ గొప్ప యాక్టర్స్ కాలేరు అంటుంటారు. అయితే ఈ రెండు క్వాలిటీస్ ఉన్న హీరోలు అరుదుగా ఉంటారు. అలాంటి అరుదైన హీరోలలో జూనియర్ ఎన్టీఆర్ ఒకరు. (Jr NTR)

ఎన్టీఆర్ తిరుగులేని మాస్ ఫాలోయింగ్ ఉన్న స్టార్ హీరో. అలాగే, ఎలాంటి పాత్రకైనా ప్రాణం పోయగల గొప్ప నటుడు. అయితే ఎన్టీఆర్ కొన్నేళ్లుగా ఎక్కువగా యాక్షన్ సినిమాలే చేస్తున్నాడు. తనలోని నటుడిని సవాల్ చేసే పాత్ర.. ఈమధ్య కాలంలో చేయలేదనే చెప్పాలి. అందుకే ఎన్టీఆర్ తన నట విశ్వరూపం చూపే పాత్రలు చేయాలని అభిమానులు ఆశపడుతున్నారు. ముఖ్యంగా 'కాంతార' తర్వాత.. ఇలాంటి అభిప్రాయాలు ఎక్కువగా వినిపిస్తున్నాయి.

నవరసాలు అద్భుతంగా పలికించగల నటుల్లో ఎన్టీఆర్ ఒకరు. సరైన పాత్ర పడితే.. జాతీయ అవార్డు గెలుచుకోగల సత్తా ఉన్న నటుడు. కానీ, ఎన్టీఆర్ ప్రతిభకి తగ్గ గొప్ప పాత్రలు పడట్లేదు. ఓ రకంగా ఎన్టీఆర్ కూడా మాస్ ఇమేజ్ చట్రంలో చిక్కుకొని.. తనలోని నటుడిని వెనక్కి నెడుతూ, ఎక్కువగా యాక్షన్ చిత్రాలే చేస్తున్నాడు. ఎన్టీఆర్ ఇకనైనా తన రూట్ మార్చాలని ఫ్యాన్స్ కోరుతున్నారు. ఇమేజ్ కి తగ్గట్టుగా యాక్షన్ సినిమాలు చేస్తూనే.. మధ్య మధ్యలో తనలోని నటుడిని ఛాలెంజ్ చేసే సినిమాలు చేయాలని సూచిస్తున్నారు. ముఖ్యంగా 'కాంతార' లాంటి సినిమా పడితే ఎన్టీఆర్ నట విశ్వరూపం చూడొచ్చని, అలాంటి సినిమాలు ఆయన చేస్తే బాగుంటుందని.. సోషల్ మీడియా వేదికగా కొందరు ఫ్యాన్స్ తమ మనసులోని మాట బయట పెడుతున్నారు.

ఎన్టీఆర్ గత రెండు చిత్రాలు 'దేవర', 'వార్-2' యాక్షన్ సినిమాలే. ప్రజెంట్ ప్రశాంత్ నీల్ డైరెక్షన్ లో చేస్తున్న 'డ్రాగన్', నెక్స్ట్ చేయనున్న 'దేవర-2' కూడా యాక్షన్ సినిమాలే. ఆ తర్వాత త్రివిక్రమ్ దర్శకత్వంలో ఓ మైథలాజికల్ ఫిల్మ్ చేసే అవకాశముంది. అది చేస్తే మాత్రం.. ఎన్టీఆర్ ఫ్యాన్స్ కోరిక నెరవేరినట్టే. పౌరాణిక పాత్రలకు నందమూరి కుటుంబం పెట్టింది పేరు. గతంలో 'యమదొంగ' సినిమాలో యముడిగా కాసేపు కనిపించి మెస్మరైజ్ చేశాడు ఎన్టీఆర్. ఇప్పుడు ఫుల్ లెంగ్త్ మైథలాజికల్ ఫిల్మ్ అంటే.. ఎన్టీఆర్ తనలోని నటుడిని పూర్తిస్థాయిలో ఆవిష్కరించే అవకాశముంటుంది. ఈ మైథలాజికల్ ప్రాజెక్ట్ పట్టాలెక్కి.. ఎన్టీఆర్ ఫ్యాన్స్ ని ఖుషీ చేస్తుందేమో చూద్దాం మరి.