ఇటీవల 'గేమ్ ఛేంజర్'తో నిరాశపరిచిన మెగా పవర్ స్టార్ రామ్ చరణ్ (Ram Charan) సాలిడ్ కమ్ బ్యాక్ ఇచ్చి, మరోసారి తన బాక్సాఫీస్ స్టామినా చూపించాలి అనుకుంటున్నాడు. అందుకు తగ్గట్టుగానే ప్రస్తుతం అదిరిపోయే లైనప్ ఉంది. రామ్ చరణ్ తన 16వ సినిమాని 'ఉప్పెన' ఫేమ్ బుచ్చిబాబు దర్శకత్వంలో చేస్తుండగా, 17వ సినిమాని స్టార్ డైరెక్టర్ సుకుమార్ తో చేయనున్నాడు. ఈ రెండు సినిమాలపైనా భారీ అంచనాలు ఉన్నాయి. ముఖ్యంగా ఈ రెండు చిత్రాలలో ముందుగా రానున్న 'RC16'పై ఇప్పుడు అందరి దృష్టి పడింది.

 

రామ్ చరణ్, బుచ్చిబాబు కాంబినేషన్ లో రానున్న 'RC16' మూవీ, స్పోర్ట్స్ డ్రామా అని ముందు నుంచి ఉన్న ప్రచారం. దీంతో ఈ సినిమా ఏ ఆట నేపథ్యంలో తెరకెక్కుతుందో తెలుసుకోవాలనే ఆసక్తి అందరిలో నెలకొంది. అలాగే కబడ్డీ ప్రధానంగా ఈ సినిమా ఉంటుందని కూడా ఒక ప్రచారం జరిగింది. అయితే అందరూ అనుకుంటున్నట్టుగా ఇది కేవలం ఒక గేమ్ నేపథ్యంలో నడిచే కథ కాదట. 

 

'RC16' అనేది మల్టీ స్పోర్ట్స్ ఎమోషనల్ డ్రామాగా రూపుదిద్దుకుంటోందట. ఇందులో కబడ్డీ, కుస్తీ, క్రికెట్ తో పాటు పలు స్పోర్ట్స్ ను టచ్ చేస్తూ కథ నడుస్తుందట. అయితే ఈ సినిమాలో పలు స్పోర్ట్స్ ప్రస్తావన ఉన్నప్పటికీ, రెగ్యులర్ స్పోర్ట్స్ డ్రామాలా కాకుండా.. గ్రామీణ నేపథ్యంలో బలమైన ఎమోషన్స్ తో దర్శకుడు బుచ్చిబాబు ఈ చిత్రాన్ని మలుస్తున్నట్లు తెలుస్తోంది. 'RC16'లో రామ్ చరణ్ పాత్ర కొత్తగా ఉంటుందని సమాచారం. 'రంగస్థలం'లో చిట్టిబాబు పాత్రకు ఎంతో పేరు వచ్చిందో, 'RC16'లో పాత్రకు అంత పేరు వస్తుందని ఇండస్ట్రీ వర్గాల్లో వినిపిస్తున్న మాట. ఇక ఈ సినిమాలో జాన్వీ కపూర్ హీరోయిన్ కాగా, కన్నడ స్టార్ శివ రాజ్‌కుమార్ కీలక పాత్ర పోషిస్తున్న సంగతి తెలిసిందే. ఇందులో శివన్న, కుస్తీ మాస్టర్ రోల్ లో కనిపించనున్నారని సమాచారం.

 

ఇదిలా ఉంటే నిజానికి 'ఉప్పెన' తర్వాత దర్శకుడు బుచ్చిబాబు.. జూనియర్ ఎన్టీఆర్ తో 'పెద్ది' అనే సినిమాను ప్లాన్ చేశాడు. అయితే ఎన్టీఆర్ తన చేతిలో ఉన్న ఇతర ప్రాజెక్ట్స్ కారణంగా డేట్స్ అడ్జస్ట్ చేయలేకపోయాడు. దీంతో ఇప్పుడు అదే కథను బుచ్చిబాబు, రామ్ చరణ్ తో చేస్తున్నాడని తెలుస్తోంది. మరి ఈ సినిమాకి ఎన్టీఆర్ తో అనుకున్న 'పెద్ది' అనే టైటిల్ నే ఉంచుతారో లేక మరో కొత్త టైటిల్ పెడతారో చూడాలి.