పాన్ ఇండియా ఇమేజ్ ఉన్నప్పటికీ, భారీ ప్రాజెక్ట్ లు చేస్తున్నప్పటికీ మరే హీరోకి సాధ్యంకాని విధంగా రెబల్ స్టార్ ప్రభాస్ వేగంగా సినిమాలు చేస్తున్నారు. ఈ ఏడాది ఇప్పటికే 'ఆదిపురుష్'తో పలకరించిన ఆయన, సెప్టెంబర్ లో 'సలార్-1'తో ప్రేక్షకుల ముందుకు రానున్నారు. అలాగే 'సలార్-2', 'కల్కి 2898 ఏడీ'(ప్రాజెక్ట్ k), 'స్పిరిట్'తో పాటు దర్శకుడు మారుతితో ఓ సినిమా చేసున్నారు. హను రాఘవపూడి దర్శకత్వంలోనూ ఓ సినిమా చేయడానికి అంగీకరించారని సమాచారం. ఇదిలా ఉంటే ఇప్పుడు ఆయన మరో ప్రాజెక్ట్ కి ఓకే చెప్పినట్లు న్యూస్ వినిపిస్తోంది.

మలయాళ స్టార్ పృథ్వీరాజ్ సుకుమారన్ నటుడిగానే కాకుండా దర్శకుడిగానూ రాణిస్తున్నారు. ఆయన దర్శకత్వంలో 'లూసిఫర్', 'బ్రో డాడీ' వంటి విజయవంతమైన చిత్రాలు వచ్చాయి. 'బ్రో డాడీ' నేరుగా ఓటీటీలో విడుదల కాగా, 'లూసిఫర్' మాత్రం థియేటర్లలో విడుదలై మలయాళంలో టాప్ గ్రాసర్స్ లో ఒకరిగా నిలిచింది. పృథ్వీరాజ్ దర్శకుడిగా తన తదుపరి సినిమాని ప్రభాస్ తో చేయడానికి సన్నాహాలు చేస్తున్నట్లు తెలుస్తోంది. 'సలార్'లో నెగటివ్ ఛాయలున్న పవర్ ఫుల్ పాత్రలో పృథ్వీరాజ్ నటిస్తున్న సంగతి తెలిసిందే. ఈ సినిమా షూటింగ్ సమయంలో, గ్యాంగ్ స్టర్ బ్యాక్ డ్రాప్ లో నడిచే ఒక కథని ఆయన ప్రభాస్ కి వినిపించారట. పృథ్వీరాజ్ చెప్పిన స్టోరీ లైన్ ప్రభాస్ కి నచ్చినప్పటికీ, ఈ ప్రాజెక్ట్ పట్టాలెక్కడానికి చాలా సమయం పట్టే అవకాశముందని అంటున్నారు.