బుల్లితెర ప్రేక్షకుల్లో సుడిగాలి సుధీర్ కి మంచి ఫాలోయింగ్ ఉంది. కామెడీ షో 'జబర్దస్త్'లో కంటెస్టెంట్ గా వచ్చిన సుధీర్.. టీమ్ లీడర్ గా ఎదిగి మంచి గుర్తింపు తెచ్చుకున్నాడు. ప్రస్తుతం పలు షోలు, సినిమాలతో సుధీర్ ఫుల్ బిజీగా ఉన్నాడు. అయితే 'జబర్దస్త్'తో ఇంత ఫేమ్ తెచ్చుకున్న సుధీర్.. ఇప్పుడు ఆ షో నుంచి బయటకు వచ్చాడని తెలుస్తోంది.

బుల్లితెరపై పలు పాపులర్ షోలను నిర్మించే మల్లెమాల సంస్థ ప్రతి సంవత్సరం జబర్దస్త్ కమెడియన్స్ తో అగ్రిమెంట్ చేయించుకుంటుదట. ఆనవాయితీ ప్రకారం ఈ ఏడాది కూడా కమెడియన్స్ తో అగ్రిమెంట్ పై సంతకాలు చేయించుకోవడానికి ప్రయత్నించగా.. అగ్రిమెంట్ పై సంతకం చేయడానికి సుధీర్ నిరాకరించార‌ట‌.

బుల్లితెరపై వచ్చిన క్రేజ్ తో వెండితెరపైనా వరుస ఆఫర్స్ పట్టేస్తున్నాడు సుధీర్. 'సాఫ్ట్ వేర్ సుధీర్'తో హీరోగా ఎంట్రీ ఇచ్చిన సుధీర్.. గతంలో క్యారెక్టర్ ఆర్టిస్ట్ గా పలు సినిమాల్లో మెరిశాడు. ప్రస్తుతం హీరోగా రెండు సినిమాలు చేస్తున్న సుధీర్.. పలు సినిమాల్లో కీలక పాత్రలు చేస్తున్నాడు. ఇలా సినిమాలతో ఫుల్ బిజీగా ఉన్న సుధీర్ పూర్తిస్థాయిలో సినిమాలపై ఫోకస్ పెట్టాలన్న ఉద్దేశంతో 'జబర్దస్త్' షోని వదిలేస్తున్నట్లు తెలుస్తోంది. జబర్దస్త్ తో పాటు మల్లెమాల నిర్మిస్తున్న ఇతర షోలకు కూడా సుధీర్ దూరం కానున్నాడని ప్రచారం జరుగుతోంది.

'జబర్దస్త్' నుంచి సుధీర్ బయటకు వచ్చేస్తున్నాడన్న వార్త నిజమైతే అది ఆ షోకి బిగ్ షాక్ అనే చెప్పాలి. ఆ షోకి మంచి రేటింగ్ రావడానికి ప్రధాన కారణాల్లో సుధీర్ టీమ్ కూడా ఒకటి. ఇప్పుడు సుధీర్ బయటకు వచ్చేస్తే అతనితో పాటు అతని టీమ్ సభ్యులు గెటప్ శ్రీను, రామ్ ప్రసాద్ కూడా బయటకు వచ్చే అవకాశముందని టాక్ వినిపిస్తోంది.