సెప్టెంబర్ 28న విడుదల కావాల్సిన పాన్ ఇండియా స్టార్ ప్రభాస్ బిగ్గెస్ట్ యాక్షన్ ఫిల్మ్ 'సలార్' వాయిదా పడటంతో.. ఆ తేదీపై పలు సినిమాలు కర్చీఫ్ వేస్తున్నాయి. సెప్టెంబర్ 28న 'మ్యాడ్', 'రూల్స్ రంజన్' సినిమాలు విడుదల కానున్నట్లు అధికారిక ప్రకటనలు వచ్చాయి. అలాగే సెప్టెంబర్ 29న 'పెదకాపు-1' విడుదల కాబోతోంది. 'సలార్' వాయిదాతో ఈ సినిమాలకి భలే లక్ కలిసొచ్చింది అనుకుంటే పొరపాటే. ఎందుకంటే 'స్కంద' రూపంలో షాక్ తగిలే ఛాన్స్ ఉంది.

రామ్ పోతినేని, శ్రీలీల జంటగా బోయపాటి శ్రీను దర్శకత్వంలో తెరకెక్కిన పాన్ ఇండియా ఫిల్మ్ 'స్కంద'. శ్రీనివాస సిల్వర్ స్క్రీన్ నిర్మించిన ఈ సినిమాని సెప్టెంబర్ 15న విడుదల చేయడానికి ఏర్పాట్లు చేసుకున్నారు. అయితే ఇప్పుడు 'సలార్' వాయిదా పడటంతో సెప్టెంబర్ 28కి రావాలని 'స్కంద' టీం డిసైడ్ అయింది. అదే ఇప్పుడు 'మ్యాడ్', 'రూల్స్ రంజన్', 'పెదకాపు-1' సినిమాలకు తలనొప్పిలా మారే అవకాశముంది. ఎనర్జిటిక్ స్టార్ రామ్ కి మంచి మార్కెట్ ఉంది. పైగా దర్శకుడు బోయపాటి శ్రీను సినిమాలకి మాస్ లో ఉండే క్రేజే వేరు. ఈ ఇద్దరు కలిసి చేసిన మొదటి సినిమా, అందునా పాన్ ఇండియా సినిమా కావడంతో ఇప్పటికే 'స్కంద'పై భారీ అంచనాలు ఉన్నాయి. ఆ సమయంలో విడుదల కానున్న మిగతా సినిమాలతో పోలిస్తే 'స్కంద'నే మొదటి ఛాయస్ అవుతుంది అనడంలో సందేహం లేదు. అంటే 'సలార్' స్థాయిలో కాకపోయినా ఎంతో కొంత ఇతర సినిమాలపై ఖచ్చితంగా ప్రభావం పడుతుంది. మరి 'సలార్' వాయిదా పడిందన్న ఉత్సాహంలో ఆ తేదీపై కన్నేసిన కుర్ర హీరోలు.. 'స్కంద' ధాటికి తట్టుకొని నిలబడతారేమో చూడాలి.