రామ్, నాగ చైతన్యల మధ్య పోరు జరుగబోతోంది. వివరాల్లోకి వెళితే యువ హీరోలు రామ్, నాగచైతన్యలు హీరోలుగా నటించిన చిత్రాలు రెండూ ఒకే నెలలో, ఇంకా చెప్పాలంటే ఒకే వారంలోనే విడుదల కాబోతున్నాయి. శ్రీ సాయిగణేష్ ప్రొడక్షన్స్ పతాకంపై, రామ్ హీరోగా, హన్సిక మోత్వానీ హీరోయిన్ గా, సంతోష్ శ్రీనివాస్ ని దర్శకుడిగా పరిచయం చేస్తూ, బెల్లంకొండ సురేష్ నిర్మించిన చిత్రం "కందిరీగ". కామాక్షీ కళా మూవీస్ పతాకంపై, నాగచైతన్య హీరోగా, కాజల్ అగర్వాల్ హీరోయిన్ గా, అజయ్ భూయాన్ ని దర్శకుడిగా పరిచయం చేస్తూ, డి.శివప్రసాదరెడ్డి నిర్మించిన విభిన్నకథా చిత్రం "దడ".

ఈ రెండు సినిమలూ డైరెక్ట్ చేసింది నూతన దర్శకులే కావటం విశేషం. ఈ రెండు చిత్రాలను నిర్మించింది అనుభవమున్న సీనియర్ నిర్మాతలే. ఇక సక్సస్ రేట్ విషయనికొస్తే రామ్ కన్నా నాగచైతన్యే కాస్త ముందున్నాడని చెప్పవచ్చు. అతను హీరోగా నటించిన "ఏమాయ చేశావే, 100% లవ్" సినిమాలు మంచి హిట్టయ్యాయి. రామ్ హీరోగా నటించిన "రామ రామ కృష్ణ కృష్ణ" సినిమా ఆశించిన స్థాయిలో విజయం సాధించలేదు. మరి ఈ ఇద్దరిలో రేపు హీరో ఎవరో...? జీరో ఎవరో కాలమే చెప్పాలి.