మళ్ళీ హీరోగా మోహన్ బాబు నటించనున్నారని ఫిలిం నగర్ వర్గాల ద్వారా అందిన సమాచారం. వివరాల్లోకి వెళితే దర్శకరత్న దాసరి నారాయణరావు వద్ద అసిస్టెంట్ డైరెక్టర్ గా సినీజీవితాన్ని ప్రారంభించిన భక్తవత్సలం నాయుడు మోహన్ బాబుగా మారి అంచలంచెలుగా ఎదుగుతూ "కలెక్షన్ కింగ్" అనిపించుకుని విలన్ గా, కామెడీ విలన్ గా, క్యారెక్టర్ ఆర్టిస్టుగా, ఆ తర్వాత హీరోగా, నిర్మాతగా, అనంతరం శ్రీవిద్యానికేతన్ అనే విద్యాసంస్థను స్థాపించి విద్యాదాతగా, రాజకీయనాయకుడిగా ఇలా బహుముఖ ప్రజ్ఞాశాలిగా పేరుగాంచారు.

ప్రస్తుతం పద్మశ్రీ, డాక్టర్ మంచు మోహన్ బాబుగా తెలుగు సినీ పరిశ్రమలో తనకంటూ ఒక ప్రత్యేకస్థానం సంపాదించుకున్నారు. అలాంటి మోహన్ బాబు ఇప్పుడు మళ్ళీ హీరోగా ఒక సినిమాలో నటించటానికి నిర్ణయించుకున్నారట. ఆ సినిమాని శ్రీ లక్ష్మీ ప్రసన్న పిక్చర్స్ పతాకంపై నిర్మించనున్నారని సమాచారం. ఈ సినిమా పేరు "వివేకానందుడు". ఈ సినిమా ప్రస్తుత రాజకీయాలపై ఎక్కుపెట్టిన వ్యంగ్యాస్త్రం అని తెలిసింది. ఈ సినిమా త్వరలో సెట్స్ పైకి రానుందట.