బాలీవుడ్ కి వెళ్ళనున్న లక్ష్మీ ప్రసన్న అని విశ్వసనీయ వర్గాల ద్వారా అందిన సమాచారం. వివరాల్లోకి వెళితే డైలాగ్ కింగ్ గా, కలెక్షన్ కింగ్ గా, పేరుగడించిన పద్మశ్రీ, డాక్టర్ మంచు మోహన్ బాబు పెద్దకుమార్తె మంచు లక్ష్మీ ప్రసన్న చక్కని ప్రతిభకల నిర్మాత, అనుసంధాన కర్త (యాంకర్), నటి అన్న విషయం ప్రేక్షకులందరికీ తెలిసిందే. ఆ విషయం గతంలో ఆమె చేసిన "లక్ష్మీ టాక్ షో" చూసినా, లేక ప్రస్తుతం లక్ష్మీ ప్రసన్న అత్యంత ప్రతిభావంతంగా, అనితరసాధ్యంగా నిర్వహిస్తున్న"ప్రేమతో మీ లక్ష్మీ" కార్యక్రమాన్ని చూసినా అర్థమవుతుంది. ఇక నిర్మాతగా దర్శకేంద్రుడు కె.రాఘవేంద్రరావు దర్శకత్వంలో, మనోజ్ హీరోగా, లక్ష్మీ ప్రసన్ననిర్మించిన "ఝుమ్మంది నాదం" సినిమా చూస్తే ఆమె అభిరుచి ఏమిటన్నది అర్థమవుతుంది.

ప్రస్తుతం తన తమ్ముడు మనోజ్ కుమార్ హీరోగా, శేఖర్ రాజాని దర్శకుడిగా పరిచయం చేస్తూ లక్ష్మీ ప్రసన్న "ఊ..కొడతారా...ఉలిక్కి పడతారా"అనే విభిన్నకథా చిత్రాన్ని నిర్మించబోతున్నారు. "అనగనగా ఓ ధీరుడు", "దొంగల ముఠా" చిత్రాల్లో తాను ఎంతటి ప్రతిభ కలిగిన నటో నిరూపించారు. అలాంటి లక్ష్మీ ప్రసన్న ప్రస్తుతం బాలీవుడ్ సినిమాకి సైన్ చేసినట్లు తెలిసింది. అక్కడ కూడా లక్ష్మీ ప్రసన్న తన ప్రతిభ నిరూపించుకుని జాతీయ స్థాయిలో మన తెలుగు జండా ఎగురవేయాలని ఆమెకు శుభాకాంక్షలు తెలుపుతోంది తెలుగువన్.