జబర్దస్త్‌లో ఇమ్మానుయేల్‌ తన కామెడీతో అందర్నీ ఆకట్టుకుంటున్న విషయం తెలిసిందే. దాంతో పాటు సినిమాల్లో కూడా నటిస్తూ మంచి పేరు తెచ్చుకుంటున్నాడు. అతని కెరీర్‌ సజావుగా సాగిపోతుండగా సడన్‌గా సోషల్‌ మీడియాలో అతని గురించి రకరకాల వార్తలు వచ్చాయి. ఇమ్మానుయేల్‌ చనిపోయాడంటూ ప్రచారం మొదలైంది. ఒకరిని చూసి మరొకరు ఈ వార్తను వైరల్‌ చెయ్యడమే పనిగా పెట్టుకున్నారు. దానికి తోడు ఇమ్మానుయేల్‌ మరణం పట్ల వర్ష దిగ్భ్రాంతి చెందిందని, గుండెలు పగిలేలా రోదిస్తోందని కామెంట్స్‌ పెట్టడం మొదలుపెట్టారు.

దీనిపై స్పందించిన ఇమ్మానుయేల్‌ తన ఇన్‌స్టాగ్రామ్‌లో ఓ వీడియో పోస్ట్‌ చేశాడు. ‘‘అరే చేతకాని కొడుకులు.. నేను నటనం చేస్తే చచ్చిపోయానని రాశారంట.. నా నటనంరా అది. నా నటనం.. చచ్చిపోలేదు నేను.. ఇట్టాంటోళ్లను ఏమంటారో తెలుసా.. చేతకాని కొడుకులు అంటారు. నా వీడియో ఎక్కడి దాకా వచ్చిందో కింద కామెంట్‌ చేయండి.. అరే బాబు నేను చావలేదురా నాయనా.. ప్రేమ వాలంటీర్‌లో సీన్‌రా అది ..’’ అంటూ ఈ విషయంలో సీరియస్‌ అవ్వకుండా సరదాగానే తన సమాధానం చెప్పాడు.

నిజానికి జరిగిందేమిటంటే ఇమ్మానుయేల్‌ ‘ప్రేమ వాలంటీర్‌’ అనే ఓ వెబ్‌ సిరీస్‌ చేశాడు. అందులోని అతని నటనకు, కామెడీకీ మంచి మార్కులే పడ్డాయి. ఆ వెబ్‌ సిరీస్‌లోని ఓ సీన్‌ని తీసుకొని కొన్ని యూట్యూబ్‌ ఛానల్స్‌ ఇమ్మానుయేల్‌ చనిపోయాడని తమ ఇష్టానుసారం చెప్పుకుంటూ పోయాయి. ఇవన్నీ చూసిన ఇమ్మానుయేల్‌ పరిస్థితి చేయిదాటిపోయిందని గ్రహించి తప్పనిసరి పరిస్థితుల్లో ఓ వీడియోను విడుదల చేశాడు. ఇమ్మానుయేల్‌ పోస్ట్‌ చేసిన వీడియో కింద నెటిజన్లు కామెంట్స్‌ బాగానే పెట్టారు. అన్నా నీ వీడియో బెంగుళూరు వరకు వచ్చిందంటూ ఒక నెటిజన్‌ కామెంట్‌ చేశాడు. అలాగే అన్ని ఏరియాల నుంచి ఇలాగే కామెంట్స్‌ పెడుతున్నారు. బ్రతికుండగానే మనుషుల్ని చంపేస్తున్న కొన్ని యూట్యూబ్‌ ఛానల్స్‌పై ఆగ్రహం వ్యక్తం చేస్తున్నారు నెటిజన్లు.