తెలంగాణలో నవంబర్‌ 30 ఎన్నికలు జరగనున్న విషయం తెలిసిందే. ఇప్పటికే వివిధ పార్టీలు తమ నాయకులు విజయం సాధించాలని ఆకాంక్షిస్తూ రకరకాల కార్యక్రమాలు చేపడుతున్నారు. విస్తృత స్థాయిలో ప్రచారం చేస్తున్నారు. ఈ నేపథ్యంలో కర్ణాటక మాజీ ముఖ్యమంత్రి హెచ్‌.డి.కుమారస్వామి తన పూర్తి మద్దతును బీఆర్‌ఎస్‌కేనని తెలియజేస్తూ ఓ ప్రెస్‌మీట్‌ను ఏర్పాటు చేసిన విషయం తెలిసిందే.
ఇదిలా ఉంటే... కర్ణాటకలో సూపర్‌హిట్‌ బేనర్‌గా పేరు తెచ్చుకున్న శ్రీ దుర్గా పరమేశ్వరి ప్రొడక్షన్స్‌ ‘అజాగ్రత్త’ పేరుతో ఓ పాన్‌ ఇండియా మూవీ నిర్మిస్తోంది. ‘ది షాడోస్‌ బిహైండ్‌ ది కర్మ’ అనేది ట్యాగ్‌లైన్‌. దేశంలోని ఏడు భాషల్లో ఈ సినిమా రిలీజ్‌ కాబోతోంది. దర్శకుడు శశిధర్‌ ఈ చిత్రాన్ని ఎంతో గ్రాండ్‌గా తెరకెక్కిస్తున్నారు. భారీ బడ్జెట్‌తో రూపొందుతున్న ఈ సినిమా కోసం భారీ సెట్లను వేస్తున్నారు. ప్రస్తుతం ఈ సినిమా షూటింగ్‌ దశలో ఉంది. రవిరాజ్‌ నిర్మిస్తున్న ఈ చిత్రం ఫస్ట్‌లుక్‌ను ఇటీవల విడుదల చేశారు. ఈ ఫస్ట్‌లుక్‌ సంచలనం సృష్టిస్తోంది. సోషల్‌ మీడియాలో ఈ ఫస్ట్‌లుక్‌ పోస్టర్‌ వైరల్‌గా మారింది.
ఇంతకీ విషయం ఏమిటి అనుకుంటున్నారా.. కర్ణాటక మాజీ సీఎం కుమారస్వామి భార్య రాధిక ఈ చిత్రంతో ప్రేక్షకులను పలకరించబోతోంది. రాధిక కుమారస్వామి పుట్టినరోజు సందర్భంగా ఏడు భాషల్లో ఈ ఫస్ట్‌లుక్‌ను విడుదల చేశారు. ఒక మాజీ ముఖ్యమంత్రి భార్య ఈ సినిమాలో నటిస్తోందనగానే సినిమాపై అందరిలోనూ క్యూరియాసిటీ పెరిగింది. 2002లో హీరోయిన్‌గా కెరీర్‌ స్టార్ట్‌ చేసిన రాధిక ఇప్పటివరకు ఓ పాతిక సినిమాలు చేసింది. ఇప్పటికీ సినిమాలు చేస్తూనే ఉంది. ‘అజాగ్రత్త’తోపాటు ‘భైరదేవి’ అనే సినిమా కూడా నిర్మాణంలో ఉంది.