హేరిస్ జైరాజ్.. ఒకప్పుడు ఈ పేరే ఒక బ్రాండ్. మ్యూజిక్ లవర్స్ ని కొన్నేళ్ళ పాటు మైమరిపించిన హేరిస్.. ఈ మధ్య ఎందుకనో కాస్త స్లో అయిపోయాడు. మరీముఖ్యంగా.. తెలుగునాట తన పాట ముచ్చట వినిపించి చాలా కాలమే అయింది. చివరిసారిగా 'స్పైడర్' (2017)తో సందడి చేసిన మిస్టర్ జైరాజ్.. దాదాపు ఆరేళ్ళ విరామం అనంతరం మరో టాలీవుడ్ ప్రాజెక్ట్ తో పలకరించబోతున్నాడు. ఆ చిత్రమే.. 'ఎక్స్ ట్రా'. ఆర్డినరి మ్యాన్ అనే ట్యాగ్ తో వస్తున్న ఈ సినిమాలో యూత్ స్టార్ నితిన్ హీరోగా నటిస్తుండగా.. క్రేజీ బ్యూటీ శ్రీలీల హీరోయిన్. 'నా పేరు సూర్య నా ఇల్లు ఇండియా'తో దర్శకుడైన ప్రముఖ రచయిత వక్కంతం వంశీ ఈ సినిమా కోసం మరోమారు మెగాఫోన్ పట్టాడు. నితిన్ సొంత నిర్మాణ సంస్థ శ్రేష్ఠ్ మూవీస్ ఈ చిత్రాన్ని ఎంతో ప్రతిష్ఠాత్మకంగా నిర్మిస్తోంది.

ఇదిలా ఉంటే, 'ఎక్స్ ట్రా'కి సంబంధించిన ఫస్ట్ సింగిల్ "డేంజర్ పిల్ల"ని ఆగస్టు 2న రిలీజ్ చేయబోతున్నారు. ఇందులో భాగంగానే సోమవారం ఈ పాట తాలూకు ప్రోమోని యూట్యూబ్ ముంగిట నిలిపారు. పాటైతే మరీ గొప్పగా లేదు.. అలాగని చప్పగా లేదు. హేరిస్ జైరాజ్ మార్క్ ట్యూనే అయినా.. లిరిక్స్ అంతగా మ్యాచ్ కాలేదనిపించింది. పూర్తి పాట వింటే గానీ ఓ క్లారిటీ రాదు కాబట్టి.. ఆగస్టు 2 వరకు వేచి చూడాల్సిందే. ఇక ఈ ప్రోమో చూసి హేరిస్ జైరాజ్ అభిమానులు 'అన్న మళ్ళీ దిగిండు' అంటూ సంబరపడిపోతున్నారు. మరి.. ఇప్పటివరకు తెలుగులో ఒక్క సాలిడ్ హిట్ లేని హేరిస్ జైరాజ్.. ఈ సారైనా ఆ ముచ్చట తీర్చుకుంటాడేమో చూడాలి.కాగా, 'ఎక్స్ ట్రా' క్రిస్మస్ స్సెషల్ గా డిసెంబర్ 23న జనం ముందుకు రానుంది.