English | Telugu
ఇలాగైతే ఇక క(న)ష్టమే 'బ్రో'.. ఫస్ట్ వీక్ కలెక్షన్స్ రిపోర్ట్!
Updated : Aug 4, 2023
తమిళ చిత్రం 'వినోదాయ సిత్తం' ఆధారంగా రూపొందిన రీమేక్ మూవీ 'బ్రో'. మెగా కాంపౌండ్ హీరోలు పవర్ స్టార్ పవన్ కళ్యాణ్, సుప్రీమ్ హీరో సాయిధరమ్ తేజ్ కలిసి నటించిన ఈ మల్టీస్టారర్ ని సముద్రఖని తెరకెక్కించారు. ఫస్ట్ వీకెండ్ లో మంచి వసూళ్ళు రాబట్టిన ఈ చిత్రం.. సోమవారం నుంచి కలెక్షన్ల పరంగా తిరోగమన బాట పట్టింది. సోమవారం కంటే మంగళవారం వసూళ్ళు తగ్గగా.. ఆరో రోజైన బుధవారం మరింత తక్కువ కలెక్షన్స్ వచ్చాయి. ఇక ఏడో రోజైన గురువారం ప్రపంచవ్యాప్తంగా రూ. కోటి కంటే తక్కువ షేర్ చూసింది. దీంతో.. రూ. 97 కోట్ల షేర్ టార్గెట్ తో బరిలోకి దిగిన 'బ్రో'.. ఇక బ్రేక్ ఈవెన్ మార్క్ చూడడం కష్టమేనని ట్రేడ్ వర్గాలు విశ్లేషిస్తున్నాయి.
మొదటి రోజు ప్రపంచ వ్యాప్తంగా రూ. 30.01 కోట్ల షేర్ రాబట్టిన 'బ్రో' మూవీ.. రెండో రోజు రూ. 12. 32 కోట్ల షేర్, మూడో రోజు రూ. 12. 93 కోట్ల షేర్ ఆర్జించింది. ఇక నాలుగో రోజైన సోమవారం రూ. 2.96 కోట్ల షేర్, ఐదో రోజైన మంగళవారం రూ. 2. 20 కోట్ల షేర్, ఆరో రోజైన బుధవారం రూ. 1.84 కోట్ల షేర్ చూసింది. ఏడో రోజైన గురువారం రూ. 95 లక్షల షేర్ రాబట్టింది. మొత్తంగా.. తొలివారంలో (7 రోజులు) రూ. 63. 21 కోట్ల షేర్ (రూ. 105. 80 కోట్ల గ్రాస్) ఆర్జించింది 'బ్రో'. మరి.. వర్కింగ్ డేస్ లో అనుకున్నంతగా రాణించలేకపోయిన 'బ్రో'.. శని, ఆది వారాల్లోనైనా పుంజుకుంటుందేమో చూడాలి.