కోలీవుడ్ స్టార్ ధనుష్ హీరోగా వెంకీ అట్లూరి దర్శకత్వంలో తెలుగు, తమిళ భాషల్లో రూపొందిన ద్విభాషా చిత్రం సార్(వాతి). సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్, శ్రీకర స్టూడియోస్ సంయుక్తంగా నిర్మించాయి. ఇందులో ధనుష్ తో పాటు సముద్రఖని, సంయుక్త మీనన్ ప్రధాన పాత్రలు పోషించారు. ఫిబ్రవరి 17న విడుదలైన ఈ చిత్రం విమర్శకుల ప్రశంసలతో పాటు ప్రేక్షకుల మెప్పు పొందుతోంది. తాజాగా ప్రముఖ దర్శకుడు భారతీరాజా సైతం ఈ చిత్రంపై ప్రశంసలు కురిపించారు.

"నా సినీ జీవితంలో ఎన్నో మైలురాళ్లను చూశాను. కొన్ని విషయాలు నన్ను ఆశ్చర్యపరిచాయి. అలాంటి వాటిలో 'సార్' ఒకటి. నేను చాలా సినిమాలు చూస్తున్నాను, నేను ఇందులో భాగమైనందున ఇది ప్రత్యేకమైనది. సినిమాలు వినోదం పంచడం కంటే ప్రజలకు ఉపయోగపడేలా ఉండాలి. అలాంటి సినిమాల్లో వాతి ఒకటి. ఈ సినిమాలో విద్య యొక్క ప్రాముఖ్యత గురించి చెప్పారు. సార్/వాతి అనేది గొప్ప టైటిల్, ఈ చిత్రం ఉపాధ్యాయుని సామాజిక బాధ్యత గురించి మాట్లాడుతుంది. ఈ చిత్రానికి సంగీతాన్ని అందించే అవకాశం జివి ప్రకాష్ కి రావడం ఆయనకు ఆశీర్వాదం. ఈ ఏడాది ఆయన జాతీయ అవార్డు అందుకోవడం ఖాయం. ధనుష్, సముద్రఖని, సంయుక్త అద్భుతంగా నటించారు" అని భారతీరాజా చెప్పుకొచ్చారు.

ఈ చిత్రాన్ని థియేటర్లలో చూడాలని భారతి రాజా ప్రజలను కోరారు. "నేను ఇప్పుడే సినిమా చూసి వచ్చాను. ప్రేక్షకులు సినిమాను ఆదరిస్తున్న తీరు బాగుంది. ఇటీవల కాలంలో వచ్చిన అత్యుత్తమ చిత్రాలలో ఇదొకటి. ఇది థియేటర్‌లో తప్పక చూడవలసిన చిత్రం. మీరు ఈ సినిమాని థియేటర్లలో చూసి, ఆ అనుభూతిని నాతో పంచుకోవాలని కోరుకుంటున్నాను" భారతీరాజా అన్నారు.