English | Telugu
ఇదెక్కడి మాస్ రా మావ.. సౌత్ డిజిటల్, శాటిలైట్ రైట్స్ రూ.54 కోట్లు!
Updated : Aug 30, 2023
రామ్ పోతినేని, శ్రీలీల జంటగా బోయపాటి శ్రీను దర్శకత్వంలో రూపొందుతోన్న చిత్రం 'స్కంద'. శ్రీనివాసా సిల్వర్ స్క్రీన్ నిర్మిస్తున్న ఈ సినిమా పాన్ ఇండియా స్థాయిలో సెప్టెంబర్ 15న విడుదల కానుంది. ఇటీవల రిలీజైన ట్రైలర్ మాస్ ని మెప్పించింది. బోయపాటి మార్క్ మాస్, రామ్ ఎనర్జిటిక్ పర్ఫామెన్స్ కలిసి ఈ సినిమా బాక్సాఫీస్ దగ్గర మ్యాజిక్ చేయడం ఖాయమనే అంచనాలున్నాయి. ఆ అంచనాలకు తగ్గట్లే బిజినెస్ కూడా భారీస్థాయిలో జరుగుతోంది. ఇప్పటికే ఈ సినిమా థియేట్రికల్ బిజినెస్ రూ.55 కోట్లకు పైగా చేయగా, నాన్-థియేట్రికల్ బిజినెస్ కూడా అదే స్థాయిలో జరుగుతోంది అంటున్నారు.
'స్కంద' సౌత్ భాషల శాటిలైట్, డిజిటల్ రైట్స్ ని ఏకంగా రూ.54 కోట్లకు స్టార్ గ్రూప్ దక్కించుకుందని సమాచారం. ఇది కేవలం రామ్ కెరీర్ హైయెస్ట్ మాత్రమే కాదు.. టైర్-2 హీరోల సినిమాల్లోనే రికార్డు డీల్స్ లో ఒకటిగా చెబుతున్నారు. డబ్బింగ్ సినిమాలతో నార్త్ లోనూ మంచి గుర్తింపు తెచ్చుకున్న రామ్ నుంచి వస్తున్న మొదటి పాన్ ఇండియా మూవీ కావడంతో.. హిందీలో కూడా ఈ సినిమా అదిరిపోయే బిజినెస్ చేసిందని అంటున్నారు. హిందీలో థియేట్రికల్, శాటిలైట్, డిజిటల్ కలిపి రూ.35 కోట్లు బిజినెస్ చేసిందట. మొత్తానికి రికార్డు స్థాయి థియేట్రికల్, నాన్-థియేట్రికల్ బిజినెస్ జరగడం చూస్తుంటే విడుదలకు ముందే మేకర్స్ భారీ లాభాలను చూస్తున్నారని అర్థమవుతోంది.