రిలయెన్స్ కి నో చెప్పిన పవన్ కళ్యాణ్ అని విశ్వసనీయవర్గాల ద్వారా అందిన సమాచారం. వివరాల్లోకి వెళితే సంఘమిత్ర, అర్క మీడియా పతాకాలపై, పవర్ స్టార్ పవన్ కళ్యాణ్ హీరోగా, సారాజేన్ హీరోయిన్ గా, ప్రముఖ తమిళ దర్శకుడు విష్ణువర్థన్ దర్శకత్వంలో, నీలిమ తిరుమలశెట్టి, శోభు యార్లగడ్డ సంయుక్తంగా నిర్మిస్తున్న విభిన్నకథా చిత్రం "కాళీ" (అయితే ఈ "కాళీ" పేరు ఇంకా అధికారికంగా ధృవీకరించాల్సి ఉంది. కానీ ఇంతకు ముందు "దిషాడో" అన్న పేరు కూడా వినపడింది). ప్రస్తుతం పవన్ కళ్యాణ్ "కాళీ" సినిమా షూటింగ్ కేరళ రాష్ట్రం లోని అత్యంత సుందరమైన ప్రదేశం పొల్లాచ్చిలో జరుగుతూందని తెలిసింది.

గతంలో పవన్ కళ్యాణ్ "కాళీ" సినిమా షూటింగ్ కలకత్తాలో జరిగింది. అయితే ఈ సినిమాకి కార్పొరేట్ బ్రాండింగ్ కోసం రిలయెన్స్ సంస్థ ఈ చిత్రం యూనిట్ ని సంప్రదించింది. కానీ ఈ చిత్ర హీరో పవర్ స్టార్ పవన్ కళ్యాణ్ మాత్రం అందుకు అంగీకరించలేదు. గతంలో సిద్ధార్థ హీరోగా, శృతి హాసన్ హీరోయిన్ గా నటించిన "అనగనగా ఓ ధీరుడు" చిత్రానికి ముంబాయికి చెందిన ఆర్.కె. మీడియా సంస్థ వార్నర్ బ్రదర్స్ తో కలసి ఆ చిత్రానికి బ్రాండింగ్ చేసింది. కానీ రిలయెన్స్ వంటి సంస్థనే పవన్ కళ్యాణ్ వద్దన్నారంటే ఆయన ఆలోచనా సరళి మనం అర్థం చేసుకోవచ్చు.